عندما بكى إبليس!!

لمحت العنوان بدينيات. "الآية التي أبكت إبليس!"
كنت مفكر إنو إبليس بكى حزنا على نفسه وعلى عاقبته السيئة، ..
ما بعرف ليش خطرلي إنو رح تكون القصة إنو إبليس سمع الآية مرة فحزن وقرر إنو يتوب،.. تخيلت المغزى رح يكون "حتى إبليس بكى، وإنت بلا إحساس!!"
وحتى لما قرات السطور الأولى ، والآية نفسها، فكرت إنو القصة رح تكون إبليس سمع إنو من يغفر الذنوب إلا الله، فبكا، وحس لوهلة إنو لو تاب بكون كويس وبنيغفر ذنبه.
..
صحي ليش ما بتوب إبليس؟ ليش ما بيرجع بيستغفر الله.. "ومن يغفر الذنوب إلا الله"..
يا ترى كيف بكون شكل الدنيا لو بطل إبليس يعمل مشاكل ويوسوس للعالم إنو يعملو شر؟؟
لو وقف عن التدخل بشؤون البشر وتركهن يعملو ع سجيتهن؟
يا الله.. ما أحلا الدنيا لو بتوب إبليس!
..
بس يا ترى لو تاب إبليس مين بدنا نلعن؟ ومن مين بدنا نعوذ؟
ولو تاب إبليس.. مين بدنا نلوم لما بنخطئ نحنا البشر.. وكل ابن آدم خطاء!
..
يمكن ابليس لازمنا..
خليه ما يتوب أحسن،.. أحسن للنظام الكوني.
وأحسن لتوازننا النفسي.
..
على الأقل حتى إشعار آخر، يعني.. حتى نلاقي معنى تاني، ورواية أخرى، وتوازن نفسي جديد!!