أنت تتصفح الموقع كزائر، للحصول على مساعدة في التسجيل أو استرجاع كلمة المرور وجهين لعملة واحدة
تم النشر في Sep, 06 2008 الساعة 18:05 بقلم No Body
اقتباس:
رفعت الجلسة
عندو قضية ... وعاملها مبدأ
بيتنفس منها ... وبيغنيها
بيكتبها شعر ... وبيرسمها لوحة
بيشوفها بعيون حبيبتو ... وبيحسها حضن امو
شافوه من يومين ...
ماشي مع وحدة شقرا
مابتحكي لغة القضية
قالولو لك وينو مبدأك؟ ... خنتها؟ ... طلقتها؟
قللون لا تكبرو الأمور ... اقتضت الظروف
قالولو والقضية؟
وينها؟
قلون القضية موجودة .... بس رفعت الجلسة
شو بعمركون مو حضرانين محكمة؟
حلم حياتي
كانت تقول عنو حلم حياتها
وبتعتبر وجودو بحياتها بحد ذاتو مبدأ ...
كانت تعطي دروس عن انه مو حبة بتتاخد وقت اللزوم
وتصيبها قشعريرة الاخلاقيات العالية لما بينحكى عن اللي حواليها وكيف بيخونو وبيبعو حلم حياتهون
ولانو اخلاقياتها عالية ...
وبتنبذ الكذب والخيانة والوعد المنقوض
كانت ماتنام الليل لما بتغلط ولو غلط صغير
من يومين شافوها راكبة قطار التغيير
ضاربة بالمبادئ والاخلاق عرض الحيط
عمتتخبط يمين ويسار
بين الكذب والخديعة
والمصلحة اللي فوق كل مبدأ عندها
وقلة الاحترام
قالولها وينو مبدأك؟ خنتيه؟
وينها رؤيتك اللي تفتحت عينيكي عليها؟
بعتيها؟
قالتلون لا ولوووووو ...
لا تقسو بالاحكام
الانسان بيغير لبسو بين صيف وشتا
ويمكن يغير جلدو إذا اقتضت المصلحة والايام
قالولها طيب وحلم حياتك؟
وينو؟
تركتيه؟
قالتلون ... لأ ... بيضلو حلم حياتي
بس الانسان بيفيق وبينام
شو بدكن ياني ضل نايمة يعني؟
وجهين لعملة واحدة
عدد التعليقات 0
التعليقات
نشرات No Body الحديثة
- حكمة غريق ... (Dec, 04 2008)
- فصام شعور ... (Nov, 19 2008)
- اللامنتمي ... (Nov, 15 2008)
- عندما يخون الذكاء (Nov, 13 2008)
- واكتملت القصيدة ... (Nov, 08 2008)
