بعيد..

بتحس حالك بعيد، ...
بعيد بعيد.. بعيد..
فجأة بنط ع راسك، بيطلع.. متل شبح.. وبعبيك..
بتقلله روح من هون، بتقتل ذاكرته.. بتحذفه من المسنجر.. بتحذف عنوانه من بريدك.. وتلفونه من جوالك..
بترتاح.. خلصت منه..
بعد شوي..
بيطلع غيره، ..
بتمسك التلفون وبتحكي معه.. بيكئبك.. لإنو هو هو، وهو مكئب متل حاله.. وممل..
طيب إذا هيك .. ليش عم يطلع ع بالك؟؟؟؟
..
ما بعرف..
بتسمع موسيقا.. يفترض إنو تشعل عندك الذكريات يلي ما إلها آخر..
وتنزللك الدموع..
بتحس بإحساس غريب..
بدك تكسر العود ع راس النقشبندي، وبدك تمسك طبلة من شان تدق عكس الإيقاع لتفشكل ستك وهي عم ترقص رقصتها الستية القديمة والأبدية..
ما عبي راسك، وما فاقت ذكرياتك.. أساسا شو هالذكريات؟؟
..
شو بتسمي هي؟؟
هي حالة برزخية بين الجحيم والنعيم..
مع حالة من انعدم التمييز .. ما في دليل..
وما في فرق..
لحظة بتحس إنو النعيم.. سخف، .. وستين حورية عذراء ما بيستاهلو تعب السرير.. وكاسين نبيد بطعم الحصرم المالح.. وما بيستاهلو حتى رفعة إيدك لتمسك الكاس..
وبتحس إنو الجحيم ركبو فيها كوندشن.. وصارت حرارتها متل محاضرة أدوية ما بتنتهي مع ملل وأسبرين..
طيب كلله متل بعضه.. وكلله أضرب من بعضه..
وإنت بالنص، لا عرفان تحدد مين إنت..
ولا وين رايح..
وما فيك ترجع حتى ع القبر.. لإنو خلص الموتى انبعثو والصحف نشرت..
وصار لازم تختار..
..
وقتها شو بتعمل؟؟
بتفرش أرض السما.. وبتنام!