تعا لهون..

كل ما بحكي مع حدا من سوريا.. بتنتابني مشاعر متناقضة..
وكل ما بيحكي مع حدا، بحسه عم بتعامل معي انطلاقا من مشاعر متناقضة..
مع الوقت عم يقل عدد الأشخاص يلي عم أحكي معهن.. للسببين السابقين، ولسبب أهم منهن..
البعيد ما إله مكان بحياة الأشخاص يلي ما عم يشوفوه .. (وهي بيتنطبق ع الطرفين..)
مشاعري،..
شوق في البداية،.. لهفة،..
خوف،
إحساس إني عم أتعرف عليه من جديد،..
رغبة بالتعبير عن مشاعر، بتنكبت غالبا.. لما بتنصد برد غير متوقع..
ترقب لإنو يعطيني شي ما عندي..
خيبة أمل، بنهاية حديث صار بعده مزاجي أكثر حزنا،..
بداية لوم للذات،.. وإحساس ببعض الخيانة!
..
مشاعره:
شوق، ..
عتب كبير..
لوم كتير.. (أحيانا ع فكرة الغياب،..)
عم تتغير.. ، ما إنت يلي بعرفك..
وينه، .. بس مع هيك رح ضلني متعلق فيك..
لساتك ع حالك..
ما عم تسأل علينا،...
لو إننا معك،!.. (أحيانا نيالك! بتتخبى بسرعة ..)
لو إنك معنا.. (أحيانا مسكين إنت،.. أحيانا مساكين نحنا.. ليش تركتنا وتحررت من همنا؟)!
أحيانا.. رح ترجع؟؟ رجاع عم نستناك..
أحيانا .. ما ترجع، شو برجعك لهون.. عيش حياتك..
...
بكل اتصل مع حدا... بتدخل بألف سؤال ما بينتهو..
وبمشاعر إثم، شوق، رغبة بالعودة..
و... رغبة باللاعودة!
....
عم يقل يوم عن يوم، عدد الأشخاص يلي عم أتواصل معهن..
ما بعرف، هل بكون أكتر حرية.. لما ببطل أسمع مشاعر متناقضة من برات فضاء حياتي الخاص؟
وللا بكون أقل جمالا... لما بعيش حياتي.. ضمن المعنى يلي بختار أنا أرسمه..
بدون تأثير مشاعر.. يمكن أحسن ما يمكن وصفها .. بإنها غير ناضجة!
. ما بعرف