دكتور!!! ع راسي وأنا دكتور كمان!!!!

بتساله شو اسمك.؟؟
بقللك دكتور فلان..
...
عمي سالتك شو اسمك ما سألتك شو شغلتك.!!!
وعلما إنك إنت كمان دكتور (ويعني ع حسبته إنو كل دكتور قد الدنيا!!!.. ) فإنت كمان بتطلع قد الدنيا متله كمان!
لأ.. عفوا هو دكتور قد الدنيا والآخرة.. سوا!!! (العياذ بالله من كل دكتور )

بيحكي معك.. الدكتور فلان!
بقللك شلونك يا دكتور عللان!.؟ وبشدد ع الدكتور..
بتنبسط ع حالك إنت.. لإنك بتفكر كمان متله إنك قد الدنيا . .. دكتور!!
هو بالحقيقة ما شايفك، لإنو هو وحده الدكتور.. (وغيره.. ؟؟ ولا شي أو مجرد.. مرضانين أو يمكن أمراض!!!!!)
هو قللك يا دكتور من شان إنت بدورك تقلله دكتور.. فبيفرح!!
...
شي مرة جرب هدا الدكتور العظيم يمشي عاري؟؟
عاري؟!!!.. قصدك إنو يلبس السماعة ويمشي بالزلط؟؟؟
وللا يلبس الروب الأبيض بلا شي تحت؟؟؟
ممكن.. إيه يجرب يعمل هيك
ع الأقل بجرب شوي شعور إنو هو مو شي أبدا.. وكونه لابس هي السماعة أو هالمريول الأبيض ما بخليه شي أكتر من.... "قرد عاري" !!! قرد عاري بسماعة!
بس أنا ما قصدت هيك..
يلي بدي ياه يحسه بعريه.. إنو يجرب إنو يحقق ذاته كإنسان مجرد، بدون هي الصفة السابقة..
يلي بالحقيقة ما بتضيف ع قيمته الإنسانية ولا شي..
يعيش حياته كبشر سلس، بسيط، عفوي، خفيف... إنساني يعني! وليس دكتور!!! (وبالتوصيف الأخير بتتماهى الدكترة مع اللاإنسانية..)

قيمتك يا دكتور (بقولها إذا بتحبها.. بقللك دكتور ما تزعل، بس عريف إنو أنا عم أضحك عليك كل ما بسميك دكتور.. عم أضحك عليك، وعم أضحك بقلبي.. من سطحيتك!!
وعريف كمان.. إنو بتصغر بعيني كل ما بتفكر إنك رح تكبر بهي الكلمة فهمت يا حكيم؟؟ )
عم قول.. قيمتك يا دكتور.. هي بإنسانيتك، بلطفك، بقدرتك ع إسعاد الناس وتقليل معاناتهن.. وهي شغلتك..
وهي معنى كلمة طبيب..
وإذا ما كنت عم تعملها.. بتكون مجرد قرد عاري لابس مريول أبيض وشايل ع رقبته سماعة!!
...
أو إذا بدك قول الله.. بيلي حملو التوراة ثم لم يحملوه!!؟؟ الفكرة واحدة