فتحت هادا الموضوع حتى كل واحد فينا يحط الأسئلة اللي إجته بمقابلته وكل يوم بيومه أيا كانت المادة ....ويحكي تجربته

ياريت الكل يشارك ويفيد غيرو ...


بكرة رح يبدو المقابلات والوضع عصيب ...الله ييسر علينا

ما رح أحكيلكن إش صار معي بمقابلة الأطفال ....الله عالظالم

بالنسبة للدورة التكميلية ...في كتير إشاعة كبيرة لدرجة إنو وصلتنا من تم العميد وإنو خلال هاليومين رح يطلع القرار ...لنشوف ...

أنا حكيت مع رئيس شعبة الامتحانات ، وهو قال إنو التغت الدورة التكميلية وراح تضل دورة تشرين متل ما هيي

إنتو بتعرفو إنو الموضوع بيهمني كتير ........لذلك بس بيطلع شي قرار بشكل نظامي خبروني على السريع

بحب أتشكر موهي اللي فتح هالموضوع الرائع......وبتشكر كل الطلاب اللي أخدو من وقتهن الثمين..وكتبولنا تجاربهن في المقابلات...بهديكن جميعاً أحلى وردة............وانشالله مايلغولنا دورة تشرين....لأنو موناقصني وجع راس...

مرحبا...
اليوم سمعت انو نزل قرار دورة ايلول..وتعلق الاعلان بالكلية
قال الدورة للطلاب اللي ما قدروا يدخلوا امتحان التخرج لان عندن مواد من السنوات السابقة
(يعني بس لمواد السنوات السابقة)
حبيت خبركن ..بقى المهتم ينزل ويشوف القرار بالكلية
موفقين

موضوع حلو و رح يفيد كتير طلاب السنة السادسة الجدد

رح أكتب شو متذكرة حتى الواحد يعرف كيف سيستم الفحص و ما يتفاجأ و يعرف كيف يحضر



بمقابلة الاطفال طلعت عند كريم زحلاني : أسلوبه بيعطيك حالة و من حل حالك ما بيعيف شي ما بيسالك عنه , بتضل قاعد جوا ربع ساعة عم تتناقش مع الدكتور بيسال أسئلة فهم لانها تشاخيص تفريقية , و بيسال أرقام كتير

جبلي حالة طفل معه شحوب شو بنعمل و شو التشاخيص التفريقية .................................................. ......... و إذا كان هيك هيك .... شو بيكون التشخيص و شو يلي عرفك و كيف بتشخص ......
باختصار بدها حدا ممخمخ ( حسب المقولة هنا )


بمقابلة الاذنية : هون في سحب , و أنت و حظك بيطلع السؤال
أنا طلعلي تحدث عن كسور الوجه و الانف , هون بدك تكتب عل ورقة رؤوس الأقلام لبينما يجي دورك لعند الدكتور ليسألك , بشكل عام بيسال الدكتور ضمن نفس السؤال يلي طلعلك أحياناً بيسألوا غير شي , طبعاً بيكون من حظ يلي إجاه سؤال ما بيعرف عنه شي


بمقابلة الجراحة : في حالة بده تفحصها و تكتب على ورقة بس الامتحان بغرفة المقابلة

زائدة , ت ت , فحص ...............
التهاب حويضة و كلية بتحكي عنها بشكل كامل و شو بنعمل للمريض
تجميل سألوا عن الحروق ( فادرسوها ) , إصابة العصب الوجهي المحيطية و المركزية ............


بمقابلة الداخلية : في حالة بدك تفحصها و بيجي الدكتور لعندك بتفحص قدامه و بيسألك كم سؤال

بدك تحفظ التعدادات منيح لأنو ممكن يكون السؤال لعدد كبير و يوصل التعداد بشكل متأخر

أدوية الضغط و آلية تأثيرها ,نسيت شو كمان
أمراض المعدة القابلة للتسرطن , كيف بنشخص , شو العلاج


قلبية سأل عن كيف بتفرق بين التهاب التامور و الاحتشاء سريرياً , تخطيطياً ...........
نسيت شو كمان بس كان مركز على التشاخيص التفريقية , أو العلامات ..............


نسائية و توليد : في حالة بدك تفحصها و بتكتبها على ورقة و الامتحان بغرفة المقابلة
لازم الطالب يكون فهمان و حفظان بهل مقابلة و عرفان كل دكتور شو بيحب و شو بيعتبر صح و لا غلط ( يعني كل دكتور عقله شكل )
أنسألت عن المشيمة المنزاحة و شرحت عنها , و شو التدبير , بعدين سالني وقت الولادة بيزيد النزف و لا لاء , و دخل الدكتور بالموضوع لضيعني
تنافر الزمر كيف بنشخص , عدة أسئلة , الخزب الجنيني شو سببه شو بنعمل
الاورام الرحمية
انسأل قدامي تحدث عن تفاعل كلايهاور شلون بينعمل



هادا يلي بتذكره في شغلات كتيرة راحت من ذهني

يلا ذكرى الله لايعيدها , فترة المقابلات أبشع فترة لأنو بتفكر حالك خلصت فحص , بس أنت لسا مانك مخلص بيكفي تاخد علامة قليلة بمقابلة ( و كتير ممكن يصير هل شي ) بتحمل مادة و راح التخرج للسنة الجاي


صعوبتها أنو لازم تراجع على الرغم من إنهاكك الشديد بعد فترة امتحان النظري , و بدون مراجعة رح تتبهدل بالمقابلة شو ماكنت حفظان قبل و مفكر حالك متذكر و رح تاخد علامة كويسة بالنظري

اهم نقطة هي عدم الاستهتار بالمقابلة , تجيب معك المادة لقدام غرفة المقابلة عسى و لعل يكون اسمك بالاخير و تراجعلم كمان و كمان حسب سيستم اسئلة اللجنة يلي طلعت عندها ( متلما بتعرفوا بنص يوم مارح تلحقوا كتير و أحياناً بتراجعوا ليجي دوركم أكتر من يلي بتراجعوه اليوم يلي قبله )



يلي بيقلكم المقابلات سهلة قوقوله كذاب , فيها مقامرة كتير و شدة نفسية كبيرة , كل يوم عندك مقابلة

يلي بيقلكم الشغلة حظ , قولوله مزبوط بس بحدود , في حظ كتير كبير باللجنة , و حظ كبير بالسؤال يلي رح تنسأله , و حظ نفسية الدكتور بهل يوم حامضة و لا حلوة , و ميت شغلة , بس هل امور مافينكم تتحكموا فيها و توكيلها لله , يلي بدكم تتحكموا فيه هو أنو تعملوا يلي عليكم و تراجعوا منيح و بعدين شو ما إجا من حظكم أو ضدكم أحسن و أحسن

في ناس إجت مستهرة بالمقابلة دبرت حالها و عرفت تجاوب بشغلات , بس هون أنت تحت رحمة أنو تتوفق بلجنة كويسة ............

أنا شفت الطلاب الشاطرين يلي تعبانين على حالهم شو ماكانت اللجنة سيئة و صعبة طلعوا بعلامات كويسة , بيجوز لو بلجنة حبابة كانوا جابوا تامة بس على الاقل ما انكسروا و رح التخرج هيك الواحد بده يفكر


بظن حكيت كتير انشالله تجربتي مع المقابلات تفيد حدا
أنا سألت كتير عن المقابلات , فهون حبيت احكي الشي يلي ما انحكالي و حسيته ضمن تجربتي كتير مهم

يلا الدفعة يلي بعدنا كلهم شاطرين و ما بينخاف عليهم

موفقين