زملائي الأعزاء:
آلمني جداً أن أسمع أحد أساتذتنا الأفاضل يذكر اسم المرض الذي يعاني منه المريض وبصوت عالٍ ويستطرد في ذكرالإختلاطات القريبة والبعيدة على مرأى ومسمع هذا المريض وذلك أمام أكثر من مريض وفي نفس الجولة السريرية والمؤسف أن غالبية هؤلاء المرضى كانوا مرضى احتشاء عضلة قلبية أو قصور قلب وجميعنا يعرف حساسية وضع هؤلاء.
المشكلة أن ذلك كله تكرر مع أكثر من أستاذ ........(أما الطلاب فحدث ولا حرج)........للأسف الشديد!!
فأين هي آداب الطب كما علمنا إياها أبقراط وجالينوس والرازي و..............
إني أستغرب جداً أن يحدث كل هذا وما يجر وراءه من آلام طالما أن بإمكان الجميع أن يتحدث باللغة الإنكليزية (اسم المرض على الأقل) عند الاضطرار إلى ذلك....
فأرجو من زملائي الأعزاء أن لا ينسوا أن كلام الطبيب-لا يزال- مقدسا عند المريض وهو لا يفرق بين طالب وطبيب ولا يميز إن كانوا يتحدثون عن مرضه هو أصلا........(الغريق يتعلق بقشة)..... فبشروا ولا تنفروا......وارحموا من في الأرض يرحمكم من في السماء..... ولنكن سبباً في تخفيف الألم لا سبباً إضافياً له.

أشد على يديك
جوي أنا بأيدك 100%

ايوااااااااااااااا ...... عيفو المريض على عماها ما هيك
ه
اد الحكي تبع تاريخ الطب انو خبي المرض عن المريض و دير بالك تحسسو بشي كلو غلط بغلط
المريض من حئو يعرف كلشي عن مرضو و كيفية حدوثو و عواقبو لحتى يعرف كيف يقاوم المرض
يعني اذا انا ما بعرف شو معي كيف بدي اتعايش مع عالمرض ؟؟ ...

مو من حئي ئئرا عن المرض اللي معي ؟ ...مو من حئي حاول شوف هالطبيب العظيم اللي عن يطبب فينو شو عم يعطيني أدوية ؟ و ليش ؟ و شغلو صح الا غلط ؟

لك بكل بلاد العالم اذا بيدرا المريض انو معو شي مرض و مالك ئايلو عليه بيسحبو منك شهادتك و بيعتبروك طبيب مسيء للمهنة ....
و نحن لسا عم نطالب بانو نخبي !!!

عم تحكو عن مرضى قصور القلب .... شو أحكي عن المرضى اللي عم شوفون و بيطلع معهون سرطان رئة ... او كتلة بالدماغ

صح كتير من المرضى بيتأثروا لما بتئلون بس كمان شغلتك كطبيب انك تئدملون الدعم المعنوي و تشرحلون عن مرضون و كيف انت ممكن تساعدون

هيك بتصير العلاقة بين الطبيب و مريضه كتير متينة و بيكسب الطبيب ثقة المريض

عنجد كتير بشوف مرضى جايين و عم يناقشو بمرضون و بؤولو لطبيبون امبارح هيك سمعت او هيك ئريت بالانترنت
و ئال نزلو فلان دوا يا ترا بينفعني ولا لأ

انا شخصيا مع مصارحة المريض بماهية مرضو 100%

المشكلة يا أبو نذرة هي اختلاف المستوى الثقافي و مستوى الوعي و نظرة المجتمع

هلأ أنا ما رح أقللك إنو شعبنا متخلف و جاهل و أمي و من هاحكي خليني روح عالمتعلمين صدقني نسبة كبيرة منهون إذا قلتلهون ماهية مرضهون رح يتصرفوا متل الجهلة و أكتر

طيب شيلك من هي في كل دول العالم حتى ببيروت في شي إسمو Patient Guide أو Patient Info إلا عنا ليش ؟؟
رح نلقي بالمسؤولية عالكبار ؟؟؟ لأ شعبك من اساسو غلط .

لما بتشوف وحدة بيقللها الدكتور انت معك ضغط و صمام متعطل "يعني قصور" و حالتك القلبية رح تتدهور و فجأة بعد سنتين بتشوفها بعد ما خلصت أول علبة دواء ما أخدت غيرها و ما راحت عند الدكتور لأجتها أعراض قصور قلب احتقاني مثلاً و راحت لعنده و كشف هالشي

طيب إش رأيك إنو اللي ساوت هيك معها دبلوم بالهندسة الميكانيكية

طيب مديرية الصحة الفظيعة ما عمتعرف تنزل نشرات توعية للمرضى ملان منهون عالانترنت يترجموا و يطبعوا إش فيا

أنا بالنسبة إلي الصراحة رح اققلوا للمريض اللي معو بس رح حاول قدر الامكان أطمنوا و ارفع روحو المعنوية أوضحلوا إش ممكن يصير اختلاطات إذا لم يفعل كذا أو كذا

إذا صحلي بالمستقبل رح حاول انا وممجموعة من زملائي إنو نعمل Group نساوي فيو Patient Guide عربي للمرضى

طبعاً حلم كبير كتير إنو نحسن نغير نظرة المجتمع للمريض من شخص يستحق العزل إلى شخص يستحق كل الاهتمام .

تحياتي
حازم

يسلم تمك يا حازم

فعلا يسلم تمك يا حازم