شخصية جدليّة ... هلكتني ... وهلكت المشرفين ... هلكت الأعضاء ... هلكت القرّاء ...

ما عنده رمادي ... يا أبيض ... يا أسود ...

أفكار متحرّرة ... منطلقة ... لا مُطلَق ... لا مقدّس ...

منتج للأفكار بشكل ما حدا بيتخيله ... بيسأل ألأف سؤال في الدقيقة ...

اسألوا ... سن شاين عنه ...

معنا اليوم سنفور ... مو مشان شي ... مشان أخلص من نقّه ... (مزحة)

تفضّل عزيزي سنفور ... عرفنا عن حالك متل ما بتحب ...

المشاركة الأصلية بواسطة Shankool

مرهف أنا كتير مستمتع بقراءتك
وخصوصاً إجاباتك على شيري انت عمتجاوبها شعر
طيب
أكيد ما لازم يمر اللقاء بدون ما نسترجع أيام ماضية قضيناها بهدف واحد وكنا إيد وحدة
بتتذكر أيام الاعتصامات؟ ... بتتذكر أيام الاعتصام المفتوح ؟ ...
ما بدي أغمق كتير بالحكي وأخليك تحكي حكي بعرفه مسبقاً وما بريد يطلع منك
بس سؤالي كتير سطحي بالنسبة للي كنا مع بعض فيه بيوم من الأيام
لساتك بنفس الحماس؟
عندك شي تعطيه ولا خلص يا دوب تظبط وضعك ومستقبلك؟
شو رأيك بالعمل ككل؟
كان كويس؟ طيب كان ماشي تمام ولا فيه أخطاء؟
طيب شو رأيك بالدكتور محمد عرب؟
طيب انت ليش في النهاية انسحبت وفي آخر اللحظات؟
ما بدي أغمق أكتر من هيك حاج

إنت كتير بتستمتع بقراءتي .. شنكول حبيبي.. بس انشالله التانيين يكونو ما مللو!
طبعا بتذكر.. ما بتنتسى هديك الأيام..
لساتني بنفس الحساسية إيه.. بنفس الحماس ضد الخطأ إيه.. بنفس الإيمان إنو في شي لازم ينعمل إيه..
تغيرت وسائل التعبير. !
في صار انفتاح أكتر ع أساليب عم غير سياسية.. يعني الاشتغال ع الثقافة، والفن، الموسيقا والأدب..
بحس إنو في حاجة لنهضة أوسع من مجرد الحصول ع مكتسبات سياسية.. وإن كنت لسا مقتنع إنو الحريات السياسية بتفتح المجال لتفتح إمكانيات المجتمع، وبتخليه يشتغل ع حاله.. يعني هي البداية.. بس إذا ما صارت.. وهي غالبا ما عم تصير.. وما بعرف شقد بدها لتصير..
فعلى العالم تشتغل بالشغلات التانية.. وتعيش .. تكتب، تفكر، تناقش، تحلل، تحكي، تعبر، تحب، تعمل شي اجتماعي، تأسس لعلاقات نظيفة بين الجنسين، لعلاقات عابرة للطوائف، تحرر عقلها من تعصب ديني أو قومي أو اجتماعي، وللوصول لهيك شي.. ممكن تتعدد الطرق..

عندي شي أعطيه، يمكن بده صقل كتير.. وبده شغل عليه..
قلتلك إني رايد أكون متمكن من الشي يللي بدي أعطيه، ورايد إني أتعب عالي وأتعلم أكتر.. قبل ما أمارس عطائي الأساسي..
بس ما بيمنع إني أشارك بالشي يللي عندي..
عندي، شوية تراكم ثقافي من سنوات القراءة والعلاقات العامة.. بعتقد ما قليل.. (بيحتاج كتير لسا.. ) ممكن إني أشارك من خلاله بالحوارات العامة..
عندي شوية تحرر من عقد ورواسب اجتماعية، ممكن أساعد بالإشارة إلها..
عندي شوية قدرات بسيطة ع الكتابة.. ممكن إني أنشر من خلالها شوية مواضيع..
عندي كمان ابتسامة ممكن يشوفوها العالم ع وجهي، عندي شوية خبرة طبية أو خبرة عن الطب.. ممكن أفيد فيها الدفعات الجديدة..
بعرف أعزف شوي،، ممكن الناس تسمعلي ويتحسن مزاجها أو أعبر عن شي بصير داخلها.. !
وهيك شغلات. .

ككل تجربة فيها أخطاء.. بس كان أكتر من رائع.. صعب إنو يتكرر متله، بسنوات عديدة لسا..
كان في استفادة من الظرف العام.. والمناخ المنفتح نسبيا.. بس بعد ما تخرب العمل.. رجعو الجامعة كذا سنة لورا.. ويعني حرقو الأرض بالمرة..
لدرجة صعب يطلع عمل مشابه.. بجرأته..
عم أحكي ع جانب من الموضوع.. بس الجوانب التانية.. ممكنة.. الشغل بالثقافة والفن.. مسرح، موسيقا، غناء، رسم، لسا ممكن كتير.. ويمكن أكتر من قبل.. فيللي عنده أحلام.. ما يقتلها.. لإنو ممكن يتحقق شي نسبة مئوية منها..

محمد عرب.؟ بدك أحكي عنه هون.. ؟
كإنو عندك نزعة فضائحية شوي..؟
بحترمه ، إله أخطاؤه.، ابن بيئته، أخطاؤه نحنا كنا مسؤولين عنها بدرجة مشابهة لمسؤوليته هو عنها..
ما هو وحدة بيتحمل المسؤولية لتخريب النشاط العام.
بآخر فترة صار في ظرف داخلي جديد.. خلاهن يعملو الإنقلاب المعروف ع الشي يللي تسمى فيما بعد ربيع جامعة حلب..
مثقف، إرادته قوية.. بيحسب لقدام بس بخربط بالحساب!
لو بظروف تانية كان ممكن تتحقق جزء منيح من أحلامه الرائعة،

بضغط الأسرة والأهل بسبب تضاعف الضغط الأمني.. بعد استدعاءات أمنية بنص الفحص بالسنة الرابعة، وإحساسهن إنو عم أدخل بموضوع خطر.. (والنتائج أثبتت إنو خطرة..) ، هو السبب الأساسي، بتجي أسباب تانية، إلها علاقة برغبتي إني أحفظ استقلاليتي وخياري الشخصي..
وبحثا عن آفاق للعمل قد تكون منتجة أكثر..
يعني ممكن الواحد يكون ماشي بخط.. وفاقد قدرته ع النقد لإنو جوا.. بجرب إنو يباعد شوي من شان يفكر بهدوء.. وهيك صار..
يمكن لما باعدت صرت أقدر أشوف أخطاء ما كنت عم شوفها وأنا قريب..
ع فكرة الفترة التالية لانسحابي.. كانت أكثر فترة تطورت فيها ثقافيا..!

المشاركة الأصلية بواسطة Shankool

مرهف انت بتعزف عود

ابتدأت متأخر بعد ما دخلت على الجامعة

بتحس العود شخص آخر معك؟

ولا بتحسه عضو إضافي إلك

بتنتمي للعود؟ أم هو ينتمي لك؟ من هو الأكثر فناً بينكما؟

أكيد بتعزف تقاسيم؟ من عندك؟ بتحاول تخلق لحن ما؟ ولا بتحاول بس تقلد غيرك ويادوب؟

اسمعت نصير شمة؟

شو مشان المقارنة بينه وبين مارسيل خليفة؟

بنبسط إنو هو بيقعد بحضني، بحسه حنون علي..
أحسن من البيانو يللي أنا مضطر أقعد بحضنه..!

لما بسمع غيري عم يعزف ع العود.. بحس إنو العود فيه يحكي كتير.. أكتر مما أنا بقدر أخليه ينطق.. يعني هو أعمق مني..
بس يعني، هو بدوني خشب.. وأنا بدونه أصابع بس..

بقسم أحيانا.. من عندي، قدرتي ع التقليد ضعيفة.. السماعي عندي ياه ما كتير قوي..
بحاول أعزف شي من راسي أنا..
أحد الاصدقاء بقللي إني بعزف بطريقة رياضية..! يعني متل مسألة رياضيات.. !
بحاول أجرب .. وأمسك الموسيقا يللي بتطلع..

سمعت نصير شمة.. من لما كنت بالبكالوريا.. كنت أسمعه وأنا عم أدرس أحيانا.. !
بحب، رحيل القمر، إشراق، نسمات عذبة، حدث في العامرية، حوار بين أبو تمام والسياب..
ما بحسها مظبوطة، كل واحد خط..
ببساطة واحد عراقي وواحد لبناني.. واحد من حضارة ما بين النهرين، وواحد فينيقي! (هي أول مرة بتخطر عبالي هي الفكرة..)
في فرق كبير بتكنيك العزق، بحس في طريقتين مختلفات يمكن لإنو الإيقاعات غير، وضرب الريشة غير.. نصير بيعزف بأكثر من طريقة وطريقته مشتقة من اكتر من آلة وترية..
حتى المشروع الموسيقي مختلف.. والإحساس مختلف، واحد برجعك لمناخات القضية، وشعر محمود درويش..
وواحد بياخدك لبين النخيل بالعراق، وأحزان الشعب العراقي..

المشاركة الأصلية بواسطة sunshine

مرهف....

حكيلنا عن هواياتك غير العزف على العود...

أول موسيقا عود أدهشتني.. وحست إنو في شي بقلبي عم يتناغم معها.. كان جدل لمارسيل خليفة، ورحيل القمر لنصير شمة..
بين البكالوريا والسنة الأولى..
صهري (زوج أختي) يللي تزوجو بصيفية السنة الأولى بيعزف عود، عطاني مبادئ وعلمني ع كتاب تعلم العود
كان يسمعلي بين وقت وتاني..
بعدها عملت فترة شهر عند أستاذ وشهر تاني عند أستاذ تاني..
ولهلأ.. بعزفي بين وقت وتاني..
بعد وفاة والدتي ساعدني العود إني أبكي شوي.. أخلي الحزن يعبر عن حاله..
كنت أرتاح بعد العزف.. بس أنتبه ع أخواتي (وأولادهن.. الأطفال ) كانت دموعهن غزيرة ع خدودهن..
بعزف لما بحزن أكتر شي..
أحيانا بعزف مع أصدقائي.. بنبسط كتير لما بحس إنو قدرت أقدم شي يطرب حدا..
بعزف نوتة، وبعزف شوي سماعي..
يمكن بحاجة لأستاذ هلأ.. لحتى أقدر أتقدم أكتر.. بلكي بعد التخرج.. وبعد الـ..!

المشاركة الأصلية بواسطة sunshine

افكارك ومواقفك من بعض القضايا من اين حصلّتها؟ ...هل هي افكار جاهزة ام انك حصلتها نتيجة تجارب خاصة او ثقافة معينة؟

لمن تقرأ؟ وماذا تقرأ...؟ اي نوع من الكتب يستهويك؟


عادة الكلام من خلف الحاجز يلغي خجلنا ويمنحنا ثقة وقوة اكبر...فيا ترى بتلاقي في فرق بين سنفور على بشري حلب ومرهف على ارض الواقع ؟ من حيث الحوار و الافكار والجرأة؟

بتحس بالاختلاف عمن حولك بالافكار؟؟ هالاختلاف بخليك تحس انك منعزل او غير قادرعلى التفاهم والتعايش مع الناس....؟ولا الاختلاف هو علامة للتميز...؟


هل انت مستعد للتنازل عن فكرة او مبدأ بسيط لارضاء الغير او" خلينا نقول للمسايرة.."..؟؟
وبالتالي هل انت مستعد للمسايرة؟؟ والى اي حد؟؟
...

ما بدعي إني كنت أعمل نقد شامل وتفصيلي لكل كتاب كنت أقرؤه..
وبلاحظ إني بأول أسبوع من القراءة وأحيانا أكتر.. بكون مدووخ فيه، ومتأثر فيه..
بس بعدها مع قراءة كتاب تاني، أو مع حوار أو أكتر عن الموضوع بيتعدل شوي التأثر..
وهيك، الواحد بيتغير من كتاب لكتاب، وبيتراكم عنده شي..
القراءة من الإنترنت مفيدة، في مواقع مميزة وبتعطي ثقافة.. يمكن ما بأفضل عمق بس ماشي الحال..
الجرائد منيحة .. السفير متل ما قلت، بنزلها من الإنترنت..
في شي بينعاش كمان.. بأثر بالشخص.. ناس جديدين، طرق حياة مختلفة..
أهم شي اللقاء مع حدا غير الواحد.. يعني حدا يكون مختلف .. مختلف، وجذاب، يعني يحس الشخص إنو لو كنت مكانه ممكن يكون حلو..
وهيك بيترك الواحد شغلات كان يفكرها أساسية، وما بعيش بدونها..

بداياتي الفكرية كانت فلسفية.. مع ديكارت، ..
بعيدين مع قصة الفلسفة لويل ديورانت غرقت بأسئلة ما بتنتهي، عن كل شي.. وبدون حدود، ووبدون محرمات للتفكير..
بعدها فولتير، كانت، سبينوزا.. هيغل، نيتشه.. (نيتشه اشتغل بمخي كتير.. ) وقبلهن أفلاطون بالجمهورية.. وسارتر اشتغلت معه كتير ، ألبير كامو..
قرأت جزء منيح من ترجمات ابن رشد لكتب أرسطو عن المنطق، وقرأت شي من تهافت الفلاسفة لابن رشد..
اشتغلت بعلم النفس كتير.. من فرويد، ليونغ، لداكو..
كان من الكتاب يللي اشتغلت معهن شوي.. محمد عابد الجابري.. (مع إني ما قرأت مشاريعه الكبيرة عن نقد العل العربي..) بس كتبه الصغيره اشتغلت فيها.. طيب التيزيني قرأتله كمان شوي.. صادق جلال العظم ، حسن حنفي، نصر حامد أبو زيد.. حسين فضل الله.. محمد خاتمي.. ادوارد سعيد،
قرأت أدب كمية لا بأس بها.. كولن ولسن ، سارتر متل ما قلت.. وكامو.. وغيرهن من الوجوديين، دوستويفسكي قرأتله كمان، هرمان هسه، وغيرهن..
مسرح قرأت لشكسبير أكتر مسرحياته.. (بالعربي..) سعد الله ونوس، محمد الماغوط..
محمود درويش، صلاح عبد الصبور، سميح القاسم، أمل دنقل، أدونيس ،
هي اسماء قليلة خطرت عبالي.. من يللي اشتغلت فيه..
بس في شغلة كنت أقولها من سنتين..
كان عندي هاجس المعرفة أعلى شي.. والرغبة فيه هي الدافع .. (كنت أقرأ بأوقات حتى وأنا بالحمام..!)
يمكن كنت متطرف شوي.. كنت أمشي من البيت للجامعة وبإيدي كتاب.. وأحيانا بين الممرات بالكلية أكون دايخ عم فكر بشغلة.. !
كنت أحيانا أخبي الكتاب بفترة الفحص تحت الملخصات..
كانو يقولولي روح اشتغل..( يعني دروس..) أقللهن أنا القراءة هي شغلتي.. والثقافة هي مشروعي.. !
بآخر سنتين تغيرت شوي.. تراجعت كتير.. !
انتاجي صار قليل.. ثقافتي صارت محدودة.. يمكن الناس يللي حوالي بهي الفترة ما بحفزوني.. ! يمكن لإنو ما عاد في منافسة..!
بذكر أحد الدوافع مثلا.. هي إنو أخي مصطفى كان مدهش جدا.. بيكتب شعر، بيقرأ بشبق.. يعني مخ..! كان يتعبني بمصطلحاته الكبيرة.. وبحكيه المعقد.. وأكتر منه أختي يللي أكبر منه... واكتر شي أخي الكبير يللي عطاني أول كتاب فلسفة.. ! وبيناهن أخواتي التانيين بدرجات متفاوته.. بس كان دايما التساؤلات شغالة بالسهرات.. فكان لازم أشتغل ع حالي.. لحتى لا قي محل بهي المعمعة.. هلأ.. ! الوضع سيء صار كتير..
بحكي جملتين متفككات ما إلهن معنى.. بلاقي مين بقللي حكيك حلو!
يضرب الحب.. ! شو بحد! ما تواخذني حبيبتي..!

سنفور هون بلاقي ناس يسمعوه أكتر مما بلاقي مرهف ع الأرض..
هون لسنفور الحرية يطرح الموضوع ويمشي، هنيك بدو يضمن إنو الناس مهتمه..
بس لما بلاقي الناس ع الأرض.. بحكي أكتر بمرات ومرات.. من هون.. ما بتنقصني الجرأة ع الأرض، وعموما أفكاري متسلسلة..
بحس بالاختلاف، بدون ما أعتبره تميز.. اختلاف أفقي بس.. أنا بمحل وحدا تاني بمحل تاني.. بس بلتقي مع ناس بيشبهوني، وبحس إني مختلف عنهن بالعمق، يعني قادرين ع التحليل والربط والتأمل بأعماق أبعد..

أنا ماني عقائدي، يعني ما عندي فكرة غير قابلة للنقاش..
يمكن عندي ضوابط خاصة، بتبتعد أو بتقترب من الشي العام..
وبقبل إنو يكون للتانيين ضوابط خاصة..
طبعا بما يتعلق بالشأن الخاص.. انا مرن جدا، مع حالي أحيانا ومع التانيين..
بس بما يتعلق بالشأن العام.. فلأ.
هدا خط أحمر.. ما مقبول إنو حدا يتعدى عليه، ولا أنا برضى إني كون من المعتدين عليه
يعني ممكن أحكي مع حدا عم يكب وسخ بالشارع، أو ممكن ألمها من وراه.. ليخجل..
ممكن أنتقد حدا عم يشخوط ع الحيطان، أو عم يخرب الأثاث، أو عم يعلي صوت المسجلة،
لهلأ ما رشيت موظف بحياتي.. لا شرطي، ولا تجنيد..

المشاركة الأصلية بواسطة shery

ما هو الاسم الذي لا يقرأ برأيك بل يسمع كموسيقى تعزف على الة واحده من أجل مستمع واحد......

لكل شخص هي شغلة خاصة..
عندي.. سعاد (اسم أمي..)

المشاركة الأصلية بواسطة shery

و ما هو الاسم الذي عندما تذكره تكاد تصلح من جلستك و تطفئ سيجارتك...
و كأنك تتحدث الى رموز تحيط نفسها بحاجز لا مرئي يفصل بين العادي و الاستثنائي...
و الممكن و المستحيل في كل شيء..
...

جورج حاوي..
الأمين العام للحزب الشيوعي اللبناني، البيان الأول لعمليات المقاومة في بيروت ضد الإحتلال الإسرائيلي عام 83 كتبه بخط يده..
كان بيحلم بلبنان جديد، وطني، عروبي، فيه عدالة اجتماعية، وفيه كرامة وطنية ، وكرامة للإنسان
وفيه سيادة للدولة.. واستقلال بالقرار..
استشهد.. من 4 شهور..
.. بس القضية ما هي رمز.. شخص بنحني إله..
حطيت صورته مرة بغرفتي.. بس هلأ.. شلتها،

ما كتير بشجع الرموز وما بآمن بوجود الأبطال الخارقين غير العاديين..
فيكي إنتي تكوني هدا الشخص يلي بيعمل شغلات منيحة..
وفيكي تشتغلي وتعطي، وتعمري وتحلمي.. متله وأكتر..
واحدنا ما إله سقف.. ودايما بحاول يتجاوز الشي الأحسن..

المشاركة الأصلية بواسطة shery

هل تحسد الأطفال الرضع لأنهم يملكون وحدهم حق الصراخ ....
والقدرة عليه قبل أن تروض الحياة حبالهم الصوتيه و تعلمهم الصمت...
...

بيبكي الطفل من شان ياكل، ومن شان يشرب، ومن شان ينضفوه .. ومن شان ياخد حنان..
يمكن تروضت.. إنو في ناس اليوم ما بتاكل وما بتشرب، وعايشه ببيوت متل الخراب وببرد وتعب، وبدون حنان أو حب..
ومع هيك أنا ساكت.. صح..

لس في كمان قضايا كبرى وأنا ما عم أعبر عن احتجاجي.. بحسد الناس يللي بقولو لأ..
بس مو الأطفال، بحسد الشباب من مناهضي العولمة يللي بيتظاهرو بأوقات مؤتمرات الدول الصناعية الثماني.. ضد الفقر ، مثلا..

مع إني لسا عندي قدرة على الصراخ.. فيكي تسألي الجيران عني..
آخر قصيدة لمحمود درويش حبيتيها كتير.. وصرت اصيح.. من حلاوتها.. وأرقص..
أنا بعزف كمان.. بأحيان كتيرة ببكي بعزفي لما بكون حزين.. وأحيانا بصيح بغضب..
والعود بيتجاوب معي.. يمكن ماني عازف بتكنيك عالي.. بس بحس فيه، وهو بحس فيني..
وبكتب كمان.. وبقول لا.. بكتاباتي.. وبقول بدي وبدي وبدي.. وبديييييييي.. بأعلى صوتي..
بس بحس حالي عم تدبل حبالي الصوتية.. وعم ترتخي يوم بعد يوم..

أحيانا بقول لحالي..
أنا ما كتير بحب الصراخ ولا الصوت العالي.. بحب كلمة لا، تنقال بلغة تانية..
ويوصل الاحتجاج بطرق تانية..
الصمت هو طريقة للاحتجاج كمان..!
في شغلة تانية.. ما ضروري كون عم صيح وعم أغضب ومنرفز وعم سب.. لعبر عن احتجاجي الشديد..
هون ممكن كلمة بتنقال ع الورق تكون مفيدة إذا كان معها تحليل منيح، وممكن كمان كلمة تنحكى
أو أي شي.. المهم إنو يحاول الواحد يعبر عن شي..

بس بضل الصراخ مع إنه أكثر الطرق بدائية.. من أكثرها رقيا ..!

المشاركة الأصلية بواسطة shery

ماهو الاتعس ؟ ان يعيش الانسان بثيابه مبللة ........خارجا لتوه من مستنقع
أم أن يصمت قليلا في انتظار أن تجف؟
...

ما يستنى.. يحاول ينشف تيابه.. ع المكواية ويلبسها ناشفة....

المشاركة الأصلية بواسطة shery

متى تبتسم؟ متى تغضب... كيف تتكلم و كيف تصمت؟
و اذا كانت الابتسامات فواصل و نقاط انقطاع...
فهل انت ممن يتقن وضع الفواصل و النقط في كلامهم؟
...

الناس المقربين بيعرفو.. إني ببتسم وقت البكون زعلان.. من شان أطلع منا الحزن.. (جربيها كتير شغلة منيحة.. وبفسرلنا ياها مستر سام.. لإنها مفسرة علميا) طبعا.. ببتسم لما بشوف شي جميل.. وبضحك لما بسمع مفارقة حلوة.. أو تعليق ظريف، ببتسم كمان لما بكون عم سلم ع حدا الصبح.. بفرح من قلبي وببتسم لما حدا بيهديني وردة ولو ياسمينة صغيرة بالذات إذا ما متوقعها.. لما بقرأ شي سؤال حلو ملعوب..
الكلام والصمت..
عندي مشكلة بالحكي بكتير من الأحيان يللي بكون فيها قاعد مع عالم.. بحس إنو خلص الحكي، وراسي فاضي.. وما بقى يطلع معي شي.. لو بتنفضني نفض ما بعرف أحكي كلمة.. بالذات إذا كانو كبار – هدا الشي أحيانا مو دايما.. بوقت تاني بحكي كتير وبضحك كتير بدون سبب وأحيانا بشكل هستيري.. هدا الشي قريب يا سام.. لنموذج الـBi-Polar يعني اكتئابي – هوسي..
ماني كتير شاطر بالحكي الإجتماعي، من شان هيك علاقاتي ع الأرض ما كتير واسعة..
قلتلك أنا بضحك من قلبي بأكتر الاحيان.. ما ضروري يكون السبب كتير ببرر الضحك.. وأحيانا قد تأتي الضحكة بغير وقتها..
مثلا.. بكون أخي الكبير عم يحكي معي بموضوع كتير هام.. كتير كتير.. بس أنا بحس إنو في ضحكة بدها تطلع.. بحاول أفجرها بأول مناسبة (ممكن أمرقها مع شي جملة طريفة بتستاهل ابتسامة بالعادة فبكون أنا فرطت من الضحك..)
قلتلك الحكي مع الناس يللي بعمري أسهل علي.. وأسلس، وبكون فيه متحكم بحالي اكتر..
ولما كنت بضحك من قلبي .. بعفوية وببساطة، ما كتير بعرف أحط الضحكة بمحلها أو أوزن إنو والله صارت طويلة أو كبيرة...
ما كتير بهتهم بهي القضايا، بحب أعبر عن حالي متل ما أنا.. وما أحط حواجز.. قدام فرحي أو حزني..

المشاركة الأصلية بواسطة shery

ما هو الشيء الذي يجمد الدمع في عينيك و يجعلك تنزف لينتقل الالم تدريجبا الى جسدك كله ..
و يستقر في حلقك غصة(طبعا بعيد الشر)..الخيبه أم الخوف من المجهول..ام ..؟
...

إحساس اليتم، والفقدان..
لحظات بحس إنو يتمي ووحدتي صارت مجسدة..
لحظات كان فيها ذكريات كثيفة..
رمضان، عيد الأم، رأس السنة، عيد ميلادي، عيد ميلاد أمي، عيد الفطر، عيد الأضحى..
جلسة مع خالاتي.. أتذكر فيها أمي واراها الحاضر الغائب..

المشاركة الأصلية بواسطة shery

هل الرجل المهيب الذي لا هموم له الا هموم الوطن ولا اهل له غير رجاله.. يحن ويشتاق..
و قد يبكي في حدود الحياة...
هل من حق الرموز ان تبكي شوقا...
...

حكتها أحلام مستغانمي عن ابن واحد من أبطال الثورة الجزائرية.. ورموزها..
كان الأب يعمل إجتماعات بالبيت عنده.. ويخللي النساء (أمه وزوجته، وبناته..) ومعهن هدا الطفل بالغرفة..
كان يجيب معه ناس، أكثرهن متنكرين بزي نساء.. يعني ثوار متخبيين بثوب نسائي من شان ما ينعرفوا..
بيحكي إنو كانت الزوجة ينحرق قلبها لما تحس إنو ما كل هدول ثوار..
بعد فترة اكتشف الابن إنو هدا الأب الرمز الثار المغامر.. كان إله مغامراته غير الثورية بالغرفة التانية.. !
هي القصة بتقول إنو الرمز هو بشر.. وإله أخطاءه..
شو مفكرة.. الرموز بتعمل كل شي..

حسن نصر الله .. إله أولاد وأسرة..
بكي ع إبنه هادي لما استشهد..

أنا أساسا ما بحب الرموز.. وما برفع حدا من هي الدنيا فوقي وبقدمله فروض الولاء وآيات الإكبار..
كلنا بشر.. وكلنا إلنا دور بهي الدنيا..

المشاركة الأصلية بواسطة shery

هل تتوقع ان تغيرك الابوه..
هل تعتبرها رمزا جاهزا لمستقبل اجمل..
ام هي معجزة صغيره للامل؟
...

هي فرصة لحب حقيقي جارف،
ولممارسة عطاء بدون مقابل ولا حدود..
أو ..لربما هي لحظة للاعتراف بالفشل وأني استسلمت فليكمل ولدي من بعدي ما بدأت..

أخاف من الأبوة..
ابني ليس لي، هو ابن الحياة..
فكيف سأكونه ليكون ذاته لا نسخة عني.؟
هل سأبثه أفكاري.؟
أم سأتركه سارحا مع تيار الهواء.؟
هل من حقي أن أعلمه عبادة آلهتي؟.
أم أنتظر حتى يكبر فيختار الإله الذي يريد؟
ربما عاش تعيسا.. فهل سيقول إني قد جنيت عليه؟
أمن حقي أن أجلبه لهذه الدنيا؟؟
أما علي أولا أن أخلق له عالما أفضل ليعيش بدون ألم عشته أنا؟

أخاف أن أشعر بشيخوختي بعد مجيء ابني..
أخاف أن أسلمه الراية وأجلس في البيت...
ربما لن يكون الأمر هكذا....
أبي أنجب بكره في الـ19.. وهو في بداية الصعود..
وما زال إلى اليوم يكبر ويصعد..
كثيرا ما أشعر أنه شاب أكثر مني.. حماه الله
سانجب ابنة أو ابنا..
وسأمشي معهما صديقا..
سأحاول أن لا أشيخ، وأن أرى فيها أملا،
وحياة تكون ذاتها من خلالي..
سأرفعه على كتفي ليرى أكثر مما رأيت ..

المشاركة الأصلية بواسطة shery

هل تفضل ان يكون مولودك صبيا..وان كنت كذلك..
فهل ذلك من أجلك...ام لتحقق جملة نسمعها دائما(نريد رجالا يا جماعه)
...

ما كتير بتفرق.. مع إني بفضل يكون بنت..
البنت طول عمرها أحلى من الصبي.. ! هي واحد..
بحس الذكر لو أنا كنت حريص إنو ما ينفسد لإنو ذكر بمجتمع ذكوري.. المجتمع الحوالي بيفسده.. وما بدي طفل ذكورته متورمة
حبيبتي بدها بنت.. !
بس إذا كان صبي.. بحاول أدير بالي عليه..

المشاركة الأصلية بواسطة shery

هل يفاجئك النهار بضجيجه الاعتيادي...
و ضوئه المباغت الذي يدخل النور الى أعماقك غصبا عنك؟
أم انك تكره العتمه و تحب الجانب الفضولي المحرج من الشمس...
...

يعني لما كنت أفيق بفترة الفحص ع صوت الكومبريسا عم تعزف بالبناية الحدنا..
كنت أكره النهار.. (بس هدا ضجيج يفترض غير اعتيادي، بس للأسف كل سنة معودين ع هيك ضجيج بفترة الفحص..)

لكني في العموم..
أعشق نور الشمس الذي يتسلل إلى غرفتي
ويداعب كأصابع حبيبتي جبيني..
ويخبرني أن يوما جديدا بـ16 ساعة أمامي لأعمل بها ما أشاء
وأكمل ما بدأته أو لأحاول من جديد
وإن كنت لا أكره العتمة،
فهي فرصة لي لأترك لأذني أن تصغي للصمت..
ولأصابعي أن تتلمس المكان وتكتشفه من جديد..

ربما.. أحب العتمة أحيانا..
أمارس بها هوايتي في إشعال الشموع!

المشاركة الأصلية بواسطة shery

هل الحب شريط مصور نخاف ان يحرقه الضوء و يلغيه...
ينبت في دهليز سري و يمتلك شريعة سريه..
هل لا بد ان نسدل كل الستائر و نغلق كل النوافذ عندما نتكلم عنه؟
...

بحلم.. بقبلة حب.. تكون بنص ساحة عامة.!
ما ضروري يكون فيها كتير فضوليين.. بس بغير نص الساحة العامة ما بتجي الشمس..
لأ.. الحب ما هو شريط مصور بدو عتمة.. بالعكس..
بالعتمة بيتراكم العفن ع الحب، وبتتجمع الرطوبة بين مفاصل الحبيبين وبتنمو الطحالب..
بحب الحب بالضو..
يمكن ما يكون فيه شمس.. المطر حلو.. أوف شو حلو الحب تحت المطر..
إذا أردت أن تحب فافتح نوافذ قلبك للريح.. وأبعد الستائر كي ينتشر الضوء في الزوايا..
يمكن ما ضروري إني أخبر كل العالم من على المئدنة إني حبيتها.. بس يللي بحب أو بتحب يعمل هالشي..
والله من كل قلبي بفرحله.. (هي من الشغلات يللي بتخليني أبتسم.. رؤية عاشقين..)
ليس من الضروري للحب أن يكون له شريعة سرية..
ولكن جميل أن يمتلك العاشقان شريعة خاصة بهما.. ففي مملكة الحب يسمح بالحب..
لا تقوم مملكة الحب، بدون حرية.. شرعة الحرية هي شرعة الحب..
(جزء من قانون المجتمع، يعني فصل أو عشر فصول.. بتنترك بيضا.. من شان العشاق يكتبو فيها شلون بدهن يحبو.. وهي مقبولة فورا..!)

طيب هلأ انت بهيك حالة وصلت لمرحلة صرت تشوف فيا الديمقراطية الحلوة ممكنة التحقق مع أي شعب

طيب برأيك الديمقراطية شي جامد و لا متطور مع الزمن

طيب هي ببساطة و كما يفهمها الكثير حكم الكثرية المطلقة طيب إذا كان الحاكم شايف رأي غير رأي الأكثرية و كان رأيه صح ؟؟؟رأي مين بينفذ ؟؟؟

رح تقللي كيف عرف إنو رأيه هو الصح غير رأي الأكثرية ؟؟؟ هون بقللك ممكن تكون أكثرية مجلس نيابي لها مصلحة مشتركة تهمهم و لا تهم شعبهم !!!!

طيب شو بيعمل برأيك بهيك حالة ؟؟؟

تحياتي
حازم

المشاركة الأصلية بواسطة rwth

طيب هلأ انت بهيك حالة وصلت لمرحلة صرت تشوف فيا الديمقراطية الحلوة ممكنة التحقق مع أي شعب
طيب برأيك الديمقراطية شي جامد و لا متطور مع الزمن
طيب هي ببساطة و كما يفهمها الكثير حكم الكثرية المطلقة طيب إذا كان الحاكم شايف رأي غير رأي الأكثرية و كان رأيه صح ؟؟؟رأي مين بينفذ ؟؟؟
رح تقللي كيف عرف إنو رأيه هو الصح غير رأي الأكثرية ؟؟؟ هون بقللك ممكن تكون أكثرية مجلس نيابي لها مصلحة مشتركة تهمهم و لا تهم شعبهم !!!!
طيب شو بيعمل برأيك بهيك حالة ؟؟؟
تحياتي
حازم

أكيد إنو آليات النظام الديمقراطي متطورة. .بس المبدأ واحد.. إنو تكون السلطة للشعب..
هو حكم الأغلبية.. لكن..
الأغلبية النسبية وليس المطلقة. .!

طبعا رأي الشعب لازم يتنفذ، بالديمقراطية الحاكم مسؤول قدام الشعب، وكل شخص منتخب هو محاسب قدام الشعب..
يعني في مؤسسات دستورية، (محكمة عليا، مجلس شعب، قضاء.. ! إلخ) بحاسب الكل.. وبلاحق المخطئين..
والحاكم هو شخص عادي قدام القانون.. بالعكس القانون يللي بيضبط الحاكم هو أقسى من القانون يللي بيضبط الناس.. لإنو بإيده السلطة ومعرض يسيئ استخدامها.. من شان هيك الرقابة عليه صارمة..
بالذات لما بكون فيه معارضة.. والمعارضة شي أساسي بالنظام الديمقراطي.. بكونو عم يستنوه ع خطأ.. من شان يسقطوه ويحجبو عنه الثقة..
بوجود إعلام عم يتابع..
قصدك رأي الحاكم أصح من رأي ممثلي الشعب.؟
بالعادة بكون عدد أعضاء مجلس الشعب كبير.. ومن فئات متنوعة .. لحتى ما يصير في مصلحة إلهن خاصة غير مصلحة الشعب..
وع فرض إنو قررو شي غير مصلحة الشعب.. في شي اسمه دورة انتخابية قادمة.. بوجود تنافس بيفقد المرشح أصوات المنتخبين..!
طيب بدك تقللي إنو الحاكم وهو شخص واحد.. بده مصلحة الشعب.؟ وأعضاء المجلس وهنن 600 واحد كلهن بدهن مصلحتهن الخاصة.؟ صعبة شوي هي..!

ما بصير السلطة التنفيذية تشتغل ع كيفها.. أبدا.. فتح هيك باب هو مقدمة للاستبداد.. والحاكم هو منفذ وليس مشرع..
الفصل بين السلطات شي أساسي، من شان ما تصير هيك شغلات..
والرقابة هامة كتير.. مع إعلام حر.. ومع قانون فوق الجميع يعني مع قضاء عادل!
وهدول شروط للنظام الديمقراطي..

المشاركة الأصلية بواسطة Elloni

أنت ضد الخجل و عبرت عن رأيك بكل صراحة في موضوع ملكة جمال العام ( ما ‏كتير حبيت رأيك بالموضوع , بس كتير بفهم وجهة نظرك و بحترمها ) ‏
‏ ‏
بدي أسألك ليش نظرتك للخجل هي سلبية كل هد قد ؟؟ ‏
ليش خجل البنت برأيك هو( لامن تمها و لا من كمها ) ‏
ياترا هيك بيكون التعبيرالوحيد عن الخجل لدى البنت ؟؟ و في تعبير عن الخجل ‏ممكن تتحمله أو تحبه و لا كل الأنواع بتنظر إليها بهل شكل ؟؟ ‏
طيب إذا قلتلك أنو الخجل و الأنوثة جزء لا يتجزء , أنت معي بهل شي ؟؟ ‏
‏ إذا كانت الفتاة عديمة الخجل , ألا ينظر إليها على أنها مسترجلة ؟؟
برأيك عيب أنو الشب يخجل ؟؟
شو هي الأنوثة برأيك ؟؟؟
بتوافقني أنو مشكلة الشعب بهل بلد أنه ما بيستحي ؟؟
‏

شو يعني الخجل؟
إني كون بدي قول شي وما أقوله لإني خايف ما يرضو عني؟.؟ إيه بكرهه..
وبكرههن لما بيقتحمو كياني وبيعملولي رقابة داخلية .. وبعيشوني برعبهن..

ممكن تعبر عن خجلها بطرق تانية..
بس ليش..؟ بدي أفهم أنا وين الجمال بالسلبية.؟ يعني
اللوحة الصامتة أحلى وللا يللي عم تتدفق فيها الحياة والحركة.؟.
بتقوليلي أذواق.. صح.. أذواق.. بس بعتقد إنو الطريقة الوحيدة للتعبير عن الوجود هو بالحكي .. يللي ممكن يكون بأكتر من لغة..
(إشارة، إيماءة، كلمة، صرخة، لمسة،.. إلخ.) أما هدا الشخص يللي ما بيحكي شي.. هو اشبه بأثاث منزلي.. يستخدم وقت الحاجة وبينترك لصمته بالوقت التاني..!
ممكن إنو تحمر خدودي لما صبية بتقللي كلمة حلوة.. مثلا.. وممكن يصير العكس..! طيب بس يعني ما بضل عم أدوب وأخجل.. وأدوب وأحمر وأخجل.. يعني يفترض الشخص يرد الكلمة بكلمة.. أو يعمل شي.. (قد كاد يذبحني بك التمثال..، وهو كان عم يتأمل بجمالها.. ما بالك إذا كان خجلان وما عرفان لا يتأمل ولا يحكي..؟ ) هدا شخص بيستحق العطف.. وما بحب أنا إنو حدا يستحق العطف..
ليش..؟ بجك تقول قول.. حابب تعبر صراخ.. بدك تاخده بحضنك خده.. بس ما تقعد تتخبى ورا نظاراتك وتغوص بتيابك..! ككمشة غبار!
عم أحكي هالشي وأنا بخجل .. بس ما بحب حالي وأنا خجول..!
لأ ... الفتاة يللي ما بتخجل.. بينظر إلها على إنها جريئة، وواثقة من حالها.. وبعدها تقيم ع أساس الحكي .. يعني إذا عم تهبب.. بتكون عم تهبب، وإذا ذكية وفهمانة.. بينقال ذكية وفهمانة..
بتعرفي شغلة.. نسبة ليست قليلة.. من الخجل هو لتغطية ضعف..! شو رأيك.؟
يعني إذا بدي أحكي وأخبص.. أحسن إلي إني أسكت.. وأعمل حالي متدثرة بالحياء.. !
وهي آلية دفاع نفسية طبيعية.. غير واعية.. بس أحيانا بتكون واعية!
الأنوثة..؟ العمق، الاتساع، النفس الطويل، الاحتواء، الصبر، بعد النظر، الحدس المتقد، العطاء بلا حدود، الأمومة للجميع، السلاسة، الرقة، اللطف.. اللمسة الخفية التي تترك الكون مرتبا، النظام!

مشكلة الشعب بهالبلد إنو: 1- ناقصه حرية، 2- ناقصه قانون مطبق ع الكل، 3- ناقصه نظام يحط كل واحد بمحله المظبوط، 4- ناقصه تحفيز ع العمل 5- ناقصه معاقبة للمقصر، 5- رفع قيم العلم والمعرفة والإنسانية، 7- إعادة توزيع للثروة تلغي مظاهر الثراء الفاحش والفقر الفاحش، 8- توفير صحة وتعليم وعمل للكل، ناقصه ناس تشتغل ع الأدب والفن والفكر، 9- ناقصه أطباء (أو كل مهنة تانية..) يشتغلو بضمير ويراقبهن النظام! .. 100- ناقصه حريات عامة 101-قانون فوق الجميع!

المشاركة الأصلية بواسطة Elloni

ياترا بتقرأ كتب و قصص أدبية ؟؟ أريان شي مجموعة المنفلوطي و خصوصاً ‏النظرات ؟؟ هيك نوع من الكتب بيأثر فيك ؟؟
ياترا بتكتب شي قصص أو شعر ؟؟ بحس أنو هل موهبة كتير قوية عندك , و إذا ما ‏بتكتب بدعيك أنو تجرب تكتب أكيد رح يطلع معك شي كتير حلو و مؤثر , ممكن ‏أطلب منك أنو تعرض شي من يلي أنت كاتبه رح أكون من أكبر المشجعين لكتاباتك‏
‏

قرأت هي المجموعة لما كنت بصف التامن.. بيتذكر أوبتمستو.. وبيومها لخصتها للطلاب.. وقرأتلهن ياها..
كان فيه فصل عم يحكي عن مشاكل الاختلاط .. واحد بيحكي بالسفور.. (السفور غير السنفور..في فرق..!) والاختلاط .. بعد فترة الشرطة بتمسك مرته وصديقه بموقف غير أخلاقي..!! فأنا من حماقتي بسنتها.. وكنت متحمس للأخلاق العالية، وللفضيلة.. لخصتلهن ياها وكانو طلاب صف تامن..
وأنا عم أقراها.. انتبهت إنو الأستاذ تلبك، وصار يحمر ويصفر.. والطلاب انشدت أسماعهن.. لأول مرة مع إنو كانو عم يشوشو من قبل!
رجعني الأستاذ بعدها.. وما خلاني أكمل! الطلاب فرحو فيني واتهموني إنو كنت مخبى بتيابي.. واحد قللي والله كنت مفكرك حباب! طلعت واحد!!
المهم..
كانت تأثر فيني لما كنت صف تامن..
بحسها مكتوبة بأسلوب كتير مباشر، وتربوية، يعني عميل هيك بتاخد ثناء ما بتعمل، بصير فيه مشاكل.. !
متل ما قلت قبل شوي، ما هي هي نوعية الكتب يللي بحبها.. !

ما عندي موهبة سردية، وما بعرف أقص قصة.. وحياتك ليلى والذئب ما بعرف شلون أحكيها لإبن اختي.. !
بضيع بالغابة..
بكتب شي متل ما بعرف شو.. بسميه.. نثر! موجودين بقسم شعر!

المشاركة الأصلية بواسطة Elloni

ممكن تبكيك ( أو تعملك غصة بحلقك ) قصة أو نهاية فيلم محزنة ؟؟ ممكن تذكرلي ‏قصة أو فيلم عملوا فيك هل شي ؟؟ ‏
طيب بتحب القصص الحزينة ؟؟ ‏
شو نوع الموسيقا و الأغاني يلي بتسمعها ؟؟ ‏
‏

ممكن تبكيني نهايات أفلام.. في فلم يمكن اسمه أساطير أرجنتينية؟؟ يمكن هيك شي.. بيحكي عن الدكتاتورية حسيت إني كتير تفاعلت معه.. وبكيت فيه..
فلم تاني، حياة دافيد غيل.. بيحكي عن واحد ضحى بنفسه، وأعدم من شان ينتصر لقضية.. (إلغاء عقوبة الإعدام..) الفلم هزني ، ولهلأ بحس الصور ما بتروح من ذهني..
مدينة الملائكة بكاني كتير.. بنهايته..
وكتير .. تانيات ما رح عد..
ببساطة ببكي أنا بسهولة، آخر مرة بكيت فيها بغزارة شديدة.. كانت بحفلة لنصير شمة.. لما عزف مقطوعتين ، إليك يا عراق وهي مقطوعة جديدة.. ومقطوعة حدث في العامرية..
بحتاج إني أبكي بين فترة وتانية.. وبحس إني روحي بتصير أصفى بعد الدموع..

الموسيقا، قلت.. بسمع موسيقا عود.. (مارسيل، شربل روحانا، نصير شمة، منير وعمر بشير، سيمون شاهين.. السنباطي، فريد الأطرش.. إلخ..)
بسمع غيتار.. منيح عندي مجموعة حلوة.. بدي ساعة لأكتب أسماءها..
بسمع كمان (فانيسا مي.. ، وشي كلاسيك، ..)
كلاسيك بسمع كمان.. بدون ما أحس إنو إدني ذواقة منيح كتير..
بسمع شي ما بعرف صنفه.. (كليدرمان، بول موريا..، إيرا، فانغاليس،)
بسمع.. لورينا مكنت..
عربي.. بسمع مارسيل كتير، محمد منير، فيروز طبعا، ماجدة الرومي، عبد الوهاب، نجاة، فريد، أم كلثوم.. عبد الحليم إلخ..)

المشاركة الأصلية بواسطة Elloni

الفرح شو هو برأيك ؟؟ بتظن أنه ملازمك على طول ( يعني ببساطة بتعتبر نفسك واحد فرحان بهل دنيا ) ؟؟ ولا ملازمك شوي ؟؟ و ‏شو رأيك بالناس الفرحانين ؟؟ ياترا 90% فرحهم هو لتغطية حزنهم و هنن عن جد فرحانين ‏
مرهف بتعتبر نفسك حساس , على فكرة اسمك كتير رقيق و حساس و إله رنة ‏موسيقية كتير حلوة , ياترا أنت حاسس فيها , ولا بتعتبر أنه اسم غير مناسب لإلك
‏

الفرح هو إنك تحس إنو روحك خفيفة، وقلبك خفيف، وجسدك خفيف..
إنك عم تطير،
إنك منسجم مع حالك كتير.. ورضيان عن حياتك
إنك حابب اللحظة تمتد وما تنتهي،
حابب إنو الناس يللي بتحبهن يحسو متلك..
وتحس إنك حابب كل العالم،
إنك ما حاقد ع حدا، ما ناقصك شي،
وكإنو في نور جوا قلبك، وأحلام وردية..
أو إنك عم تطفو ع ظهر غيمة.. بالسما..
سألتيني شو الفرح.. هو هيك.. ما جاوبتك إيمت..

لأ.. الفرح ما ملازمني..
الفرح بزورني أحيانا بس وبغيب ..
بكتير من الأحيان بشتاق للفرح..
أنا شخص قلق، ما سهل إرضائي بالدنيا، دائما بدي شي ما بعرفه..
بدور ع حلم جديد.. كل يوم، وعندي ملل سريع..
وخوف من إني أكون ما عم أمشي لقدام..
بس مع هيك بعيش أوقات كلها فرح..
بس بحلم كتير فيه، وبحب إني أقدر أعممه..
بغنيله كتير..

ممكن الناس تفرح..
القناعة بتوصل لشعور رضا وأمان وطمأنينة.. حلوة..
منيح من العالم تغطي حزنها.. وتهرب منه للحظات من سرور ..
مو أحسن ما تضل تندب وتشهق؟؟

أنا قلت إنو الفرح بزورني.. بس عكس الفرح مو هو الحزن..
يعني إذا ماكنت فرحان بكون حزين.؟؟
لأ.. ببساطة ماني فرحان.. هيك عادي.. ما في شعور عالي.. وماشي الحال..!
بس أكيد إنو الفرح أحلى..

قلت لما عرفت عن حالي.. شوي عن علاقتي باسمي..
(كشفتك ما عم تقرأي شو عم أكتب!! )
قلت إني حساس.. وإنو اسمي ملازمني متل ظلي من 22 سنة، وإني آخد منه كتير من معناه..
أحيانا بكون عبء علي.. لإنو بيلبسني كتير..
أحيانا بكون خفيف.. لما بخليني أطير مع نسمة رقيقة.. أو مع حلم وردي..