شخصية جدليّة ... هلكتني ... وهلكت المشرفين ... هلكت الأعضاء ... هلكت القرّاء ...

ما عنده رمادي ... يا أبيض ... يا أسود ...

أفكار متحرّرة ... منطلقة ... لا مُطلَق ... لا مقدّس ...

منتج للأفكار بشكل ما حدا بيتخيله ... بيسأل ألأف سؤال في الدقيقة ...

اسألوا ... سن شاين عنه ...

معنا اليوم سنفور ... مو مشان شي ... مشان أخلص من نقّه ... (مزحة)

تفضّل عزيزي سنفور ... عرفنا عن حالك متل ما بتحب ...

لفترة طويلة كنت حاطط شعار إلك..
جرب الآن الحياة لكي تعلمك الحياة على الحياة!
برأيك الحياة .. فيها مساحات للتجربة أكتر.. وللا مساحات لتطبيق النظريات!؟

إذا قدرت تطلع مرة من حالك..
وخيرك الله إنك تكون حالك من جديد.. شو بتترك من صفاتك وشو بتغير؟؟
كنت بتختار أهل تانيين.؟؟ وإذا اخترت أهلك، شو بتغير بتكوينتهن.. لتناسبك..؟
كنت بتختار بلد تاني.؟ شو هو.. ؟
كنت بتختار فرع تاني للدراسة.؟

بقولو إنو لكل شخص من اسمه شي..
شو في شي منك من اسمك.؟

لما بصير الوقت مناسب للزواج، شو رأيك أسنفور طريقة.. ؟ الطرقة التقليدية: خطبة نسوان.؟ زميل عمل.؟؟ ولا حبيب.. بعد قصة حب شرقية.؟

إنت رومانسي..؟ ولا واقعي.؟

إنت كشخص عايش بوسط ارستقراطي .، بنمط حياة سلس، مؤمنة فيه الضروريات وحتى الكماليات..
يعني كل شي مؤمن .. إلى حد كبير..
بوسط متعلم، مثقف.. أرستقراطي..
شو أثر هدا كله ع شخصيتك.؟
هل برأيك لو كنت عم تكدح مثلا متل نماذج أخرى بالمجتمع.. يعني الطبقات الوسطى والفقيرة.. كان رح تكون شخصيتك غير.؟ كيف..

طبعا، ما بعرف إذا كان أسئلتي ضمن الخطوط الحمراء..
بس يمكن كل شي بالأسئلة مسموح..

شو هي أحلى عيون برأيك...؟
الخضرا، الزرقا ، السودا، وللا العين الحمرا!!

شو رايك بحق الإنسان بتغيير شكله (يعني عمليات التجميل، ) برأيك بجوز وللا بكون عم يغير خلقة الله.؟

أكيد إنت متل شعبان عبد الرحيم وكل مواطن عربي..
بتكره اسرائيل.. (ما ضروري تحب عمرو موسى..)
فالسؤال..
إنت مع عملية السلام ولا لأ.؟
إذا سوريا دخلت بالسلام لا سمح الله.. (بجوز يسمح ما بعرف..) ممكن تزور المسجد الأقصى..؟
برأيك أبو عمار مات مسموم ولا مات موت ربه..؟

لو كنت رئيسة مكتب إداري بجامعة حلب.. شو بتعمل؟
وين بتاخدنا رحلة..؟

برايك إنو الصبية بمجتمعنا فيها تحب.؟
ليش كتير من الشباب إذا حب.. بيطلع ع المأذنة وبقول أنا حبيت..
والبنت مستحيل إنو تقول.. ولو شو ماصار..

بتحب ترجع طفل؟؟ وتضل طفل..؟
وللا بتحب لو تبقى متل ما إنت شب..
ولا بتحب إنك تكبر بسرعة وتدخل الحياة العملية؟

أول كلمة بتخطر ع بالك لو واحد سألك إنت سنفور.. مين سنفور.؟

بتحس إنك قادر على العمل بفريق عمل، بالتعاون مع آخرين.. ولا بتحس إنك بتفضل تعمل الشغل لحالك وبتكون مبدع أكثر..؟
سنفور هو سنفور أكثر، بينه وبين حاله ..؟ وللا وهو بين مجموعة..؟
إلك حياة خاصة لسنفور... ما حدا بشاركه فيها بالدنيا..؟

دقت الحب... يللي بيغمر القلب، وبيعصف بالكيان..؟ ولا بتحب تضل سيد نفسك ومشاعرك.. وتضبط العلاقات عند الحدود..

بيخطر ع بالك بوقت.. لو إنك تربيت بشكل مختلف، وبلا التفوق يللي كانو أهلنا عم يفرضوه علينا من نحنا وصغار..
ولو كان إلك الخيار إنو تطلع وتلعب، وترقص وتفرح بشبابك.. و"تصيع شوي أو كتير" وع سبيل المثال.. تتعرف ع مدرسة نابلس؟

حياتك فيها من تجربتك الشخصية أكتر، ولا استفادة من تجارب التانيين؟؟

شو عملت من شان تتخلص من متلازمة طالب الطب يللي بيعرف بالحياة أوراق محاضراته بس..؟

ما جاوبت ع سؤالي ، إنت حالك أكتر لحالك ولا مع الناس..؟
يعني بتحس إنك بتغير من حالك من شان التكيف..؟ وللا بتفرض شخصيتك الذاتية متل ما هي.. ويللي ما عجبه إلى الجحيم؟

إيمت حسن بحس بالخجل..؟
إيمت.. بالخوف؟
.. بالقلق.؟
.. بالحزن..؟
.. بالفرح..؟

برأيك عمر الإنسان كافي لينتج شي إله قيمة.؟
وللا بحاجة الفرد مننا لسنين تانية..؟

إذا اخترت عمر إلك تعيشه .. شقد بتعيش..؟

إذا كان الخلود بين إيديك.. بتقبل فيه.؟ ولا بتختار تموت .. (بعيد الشر.. يعني بعد عمر طويل، وكلنا ميتين.)
لو خيروك تكون إله أو شيطان أو ملاك أو إنسان .. شو بتختار..؟
(ع فرض إنو لو كنت شيطان رح تروح ع الجنة..)

لو أسست حزب سياسي.. بعد صدور قانون أحزاب ديمقراطي..
بكون توجهاته يسارية.؟ أم يمينية..؟ اقتصاديا.. أم وسط..؟
بمعنى آخر إنت بتفضل التنمية الإقتصادية على التنمية الإجتماعية أم العكس.؟

أحسن الانظمة برايك.. استبدادية عادلة.؟ أم ديمقراطية ولو جائرة..؟

لو اختار الشعب شي مخالف لقناعاتك إنت كمشرع.. ومخالف لمبادئك.. بتوافق معه.؟؟ وبتعتبر لا صوت يعلو فوق صوت الشعب.؟ ولا بتمشي تشريعاتك وبتكيف الشعب معها.؟