سنفرة ... سنفروا كما تريدون (استلموا) ... فلستُ مسؤولاً عنه (ما لي علاقة) ...
يدور هذا النقاش حول سنفرة ... سنفروا كما تريدون (استلموا) ... فلستُ مسؤولاً عنه (ما لي علاقة) ... في قسم لقاءات في الملتقى الطبي السوري; شخصية جدليّة ... هلكتني ... وهلكت المشرفين ... هلكت الأعضاء ... هلكت القرّاء ...
ما عنده رمادي ... يا أبيض ... يا أسود ...
أفكار متحرّرة ... منطلقة ... لا
| |||||||
 أنت تتصفح الموقع كزائر، للحصول على مساعدة في التسجيل أو استرجاع كلمة المرور اضغط هنا. |
| القرحة القلاعية Aphthous Ulcers | عندي مذاكرة تشريح 1 بكرى ومالي ملحق .......شو بدي اساوي؟!!!؟ | استفسارات بخصوص الفيزيولوجيا |
| خلونا نحل اسئلة دورات الفيزيولوجيا سوا ...Go | ||
| | LinkBack | أدوات الموضوع |
Oct, 07 2005, 15:42
| |||
| |||
| سنفرة ... سنفروا كما تريدون (استلموا) ... فلستُ مسؤولاً عنه (ما لي علاقة) ... شخصية جدليّة ... هلكتني ... وهلكت المشرفين ... هلكت الأعضاء ... هلكت القرّاء ...  ما عنده رمادي ... يا أبيض ... يا أسود ... أفكار متحرّرة ... منطلقة ... لا مُطلَق ... لا مقدّس ...  منتج للأفكار بشكل ما حدا بيتخيله ... بيسأل ألأف سؤال في الدقيقة ...  اسألوا ... سن شاين عنه ...  معنا اليوم سنفور ... مو مشان شي ... مشان أخلص من نقّه ... (مزحة)  تفضّل عزيزي سنفور ... عرفنا عن حالك متل ما بتحب ...  |
|
#61
Oct, 08 2005, 20:42
| |||
| |||
| المرأة تلعب بحياتي.. المشاركة الأصلية بواسطة Shankool
الخسة؟؟  الخسة تشبه كثيرين ومنهم أنا .. بدرجات متفاوتة.. الخسة بأوراقها المتداخلة كالشخصيات المتعددة للآدمي، متداخلة ببعضها، وموجودة كلها معا، واحدة في واحدة.. تنزع شخصية لتبدو أخرى تحتها.. تنزعها لتبدو أخرى.. وفي النهاية.. جذر تافه.. ! بالوردة الحمراء! مشكلتها أني لا أستطيع حملها لكل فتاة.. مع أنها ليست أجمل وردة أهديها لحبيبتي.. ما رأيك بالنرجس!  يشبهني أحيانا.. حين لا أرى غير نفسي.. أكرهني حين أشبهه..! ولهذا كان الشعار في غرفتي .. فكر بغيرك! التي هي توقيعي أيضا.. بالمرأة؟ ليست لاعبا في حياتي فحسب.. المرأة تلعب بحياتي.. بيديها!  هي دائما عندي البطلة في كل أحلامي.. وإن كنت أحتال أحيانا لذاتي فأكون أنا المؤلف والمخرج..!  |
|
#62
Oct, 08 2005, 20:48
| |||
| |||
| المشاركة الأصلية بواسطة Shankool بالحب؟؟ قبل الزواج ..
أكتر من ضروري.. بالبنت الشرقية.. بكتير من الأحيان.. مرباية لتكون.. إتكالية، سلبية، ضعيفة، خجولة، هشة، مسطحة، ما بتهتم بالثقافة ولا بالعقل، فهمانة دورها غلط بالحياة، بتعطي للرجل أكثر مما بيستحق أهمية، هي بكتير أحسان سبب بلاءها، قليلا ما تكون مبدعة.. عم قول إنو البنت الشرقية بتتربي لتكون هيك.. ويللي بتنفد من هيك تربية أو بتتأمنلها بيئة أفضل بكون من حظها.. بنت بتناسبني بحلب؟؟ صعب.. غير مستحيل..  لو رفضو إهلي .. باخدها خطيفة ؟.. وللا بقللها ما مشي الحال والله .. لحتى آخدها خطيفة بدي كون عندي وفر مادي لحتى نعيش مع بعض.  . يعني أكون عم أشتغل.. وبس أوصل لهيك مرحلة غالبا أهلي ما بقولولي إي ولأ.. بس لو صار.. وأنا رايدها، وهي رايدتني.. ممكن آخدها لو ما كان حدا موافق.. طبعا هي تكون موافقة.. وتتحمل معي المسؤولية.. لهيك قرار..بين الناجحين بحياتهن..؟ بدي شي لسا بعيد عني؟؟ لأ.. أنا من غير الناجحين.. ويللي بدي ياه ما حصلت شي منه.. علميا غير رضيان عن وضعي ثقافيا.. ما رضيان.. اجتماعيا بينقصني كتير.. بأمور الحياة التانية.. بينقصني.. هي الأمور ما هي بعيدة.. بس بدها شغل.. ووقت، وأنا عم أجل مشاريعي لبعد التخرج.. بدي عوض كل النقص يللي راح علي.. مرتاح من إنجازي الحياتي لهلأ..؟ وللا بشوف ..إنو وييين!.. بدي كتير.. بدي كتير كتير.. ماني مرتاح.. وما رح أرتاح.. لإنو كل يوم بدي شي أكتر.. ما رح أوصل.. ورح اموت وما أوصل.. وإذا فكرت إني وصلت .. بموت انتحارا  |
|
#63
Oct, 08 2005, 22:18
| |||
| |||
 أهلاً و سهلاً إلى كرسي الاعتراف ياعيني المقابلة مع سنفور : كيفك سنفور و كيف معنوياتك على هل الأسئلة ؟؟ رح أسئلك شوية أسئلة , بس اطمن ما رح أعذبك : أنت متابع أفلام كرتون السنافر مو هيك ؟؟؟ , بتعتبر نفسك أي واحد منهم ( بابا سنفور؟؟ سنفور مفكر ؟؟؟ سنفور .......... ؟؟؟؟؟ ؟؟ شو رأيك بشرشبيل ؟؟ شو هي وجوه الشبه بينك و بينه ؟؟  السنافر برأيي مخلوقات لطيفة و حبابة ( كتير كنت أحب هل أفلام كرتون لما كنت صغيرة ) , فياترى بتعتبر نفسك واحد منها و لا أنت نوع جديد من السنافر طيب شو سبب اختيارك لاسم سنفور : ؟؟؟ في سؤال سألت ياه بمقابلة سن شاين : ليش معقد الحياة ؟؟ شو هو رده طيب ياترا بتقدر أحياناً تشوف الحياة بسيطة ؟؟؟ طيب شو هي الحياة برأيك ( ما بدي أعذبك عبرلي عنها بشي بسيط ) ؟؟ أنت ضد الخجل و عبرت عن رأيك بكل صراحة في موضوع ملكة جمال العام ( ما كتير حبيت رأيك بالموضوع , بس كتير بفهم وجهة نظرك و بحترمها ) بدي أسألك ليش نظرتك للخجل هي سلبية كل هد قد ؟؟ ليش خجل البنت برأيك هو( لامن تمها و لا من كمها  ) ياترا هيك بيكون التعبيرالوحيد عن الخجل لدى البنت ؟؟ و في تعبير عن الخجل ممكن تتحمله أو تحبه و لا كل الأنواع بتنظر إليها بهل شكل ؟؟ طيب إذا قلتلك أنو الخجل و الأنوثة جزء لا يتجزء , أنت معي بهل شي ؟؟ إذا كانت الفتاة عديمة الخجل , ألا ينظر إليها على أنها مسترجلة ؟؟ برأيك عيب أنو الشب يخجل ؟؟ شو هي الأنوثة برأيك ؟؟؟ بتوافقني أنو مشكلة الشعب بهل بلد أنه ما بيستحي ؟؟ ياترا بتقرأ كتب و قصص أدبية ؟؟ أريان شي مجموعة المنفلوطي و خصوصاً النظرات ؟؟ هيك نوع من الكتب بيأثر فيك ؟؟ ياترا بتكتب شي قصص أو شعر ؟؟ بحس أنو هل موهبة كتير قوية عندك , و إذا ما بتكتب بدعيك أنو تجرب تكتب أكيد رح يطلع معك شي كتير حلو و مؤثر , ممكن أطلب منك أنو تعرض شي من يلي أنت كاتبه رح أكون من أكبر المشجعين لكتاباتك ممكن تبكيك ( أو تعملك غصة بحلقك ) قصة أو نهاية فيلم محزنة ؟؟ ممكن تذكرلي قصة أو فيلم عملوا فيك هل شي ؟؟ طيب بتحب القصص الحزينة ؟؟ شو نوع الموسيقا و الأغاني يلي بتسمعها ؟؟ الفرح شو هو برأيك ؟؟ بتظن أنه ملازمك على طول ( يعني ببساطة بتعتبر نفسك واحد فرحان بهل دنيا ) ؟؟ ولا ملازمك شوي ؟؟ و شو رأيك بالناس الفرحانين ؟؟ ياترا 90% فرحهم هو لتغطية حزنهم و هنن عن جد فرحانين مرهف بتعتبر نفسك حساس , على فكرة اسمك كتير رقيق و حساس و إله رنة موسيقية كتير حلوة , ياترا أنت حاسس فيها , ولا بتعتبر أنه اسم غير مناسب لإلك ياترا أنت مبسوط من رأيرفقاتك فيك ؟؟ و لا بتسعى لتغيره ؟؟ طيب هنن رأيهم مظبوط فيك ؟؟ صار ت معك مرة أنو استسلمت ؟؟ و لشو ؟؟ بتحس أنو قوة إرادتك كبيرة ؟؟ أنت ممشي حياتك و لا أنت بهل حياة ( عم تطبش ) , و لا هي يلي ممشيتك ؟؟ لسا عندي أسئلة كتير..................... نبعت الأسئلة فرد مرة بس بالصدق ما عم أسئل لأعجزك و إذا حسيت للحظة أني عم أعجزك فبتقدر ما تجاوب عن أي سؤال , بالصدق ما رح أزعل  ( على كل مستوا أسئلتي التعقيدي مستحيل يوصل لمستوى أسئلتك) كتير حابة أشوف وجهة نظرك بالحياة ( بدي أزيد ثقافتي العامة ) , و يمكن متلما أنت قلت أنو هل أسئلة عم تكون لنكتشف أ نفسن ا فخليني أكتشف مين هو سنفور الحقيقي بتمنالك كل التوفيق |
|
#64
Oct, 08 2005, 22:27
| |||
| |||
| أفق إنساني واسع. المشاركة الأصلية بواسطة RWTH ما بعرف إذا معنى العبارة متل معنى أسألك نفسي؟ دلالتها النفسية شوي بشعة..
بس ممكن المقصود منها رد مثلا ع الفكرة القومية العربية.. إنو يعني حاج تحكو بأهداف بعيدة خلونا نشتغل لوطنا سوريا.. ! فيها وجهة نظر، إنو يعني من أجل الأهداف القومية الكبيرة (يللي يمكن الحكي فيها هلأ هو حكي بس وما في شي عملي، ) لازم نشتغل ع إصلاح داخلي ع مبدأ لما الشعوب بتاخد حريتها رح تختار الوحدة..! فيها وجهة نظر.. برأيهن ما بنعمل حساسية مع الأكراد مثلا.. أو رد ع إسلاميين بخطاب بيطرح الوطنية السورية كجامع بيجمع مع الطوائف الأخرى ومع المسيحيين.. ! من حيث المبدأ انا مع تقديم الشأن الوطني اليوم، باعتباره أمر واقع ع القضايا والأهداف الكبيرة يللي ما عم ينضرب فيها بسمار.. وعم تنحكى بس كشعارات.. خلونا نعمل شي لهالبلد.. وكتر خيرنا قبل ما نعمل شي لموريتانيا.. من جهة تانية ممكن إنو ما يكونو متعارضات مع بعض.. يعني منيح نعمل شي لبلدنا سوريا بس مع الاحتفاظ بأفق عربي وبتعاون عربي، وبانفتاح ع العالم العربي.. (معروف إنو التبادل التجاري بين الأقطار العربية أقل من التبادل بين أي وحدة منها والاتحاد الأوروبي أو أمريكا..) فمنيح نبدا بسوريا اليوم.. بس منيح كمان نحتفظ بأفق عربي.. ما نعمل ردات فعل .. أحيانا غير عقلانية.. يعني ماني مضطر إني أقول والله أنا ماني عربي.. لأ.. أنا عربي، بس ماني شوفيني، وماني متعصب، ومنفتح ع أفق إنساني واسع.. أنا ما حبيت العنوان.. بس ممكن أوافق ع شوي من معانيه.. وأعبر عنها بشكل ما يكون محمل بمضامين مستفزة.. أو ردود أفعال.. ثقافة العناوين.. ما بسمع عنها .. بلمسها بإيدي.. التلفزيون عامل أساسي بنشرها.. يعني فيه الواحد عن طريقه يسمع عن كل شي.. بدون ما يفهم عن شي. ثقافة ذات انتشار أفقي بدون عمق.. الناس ما بتقرأ، يعني صعب تشوف حدا ماسك كتاب.. ثقافة مصدرها جلسات السمر والحكي، يللي بتبدا بالعولمة الثقافية.. وبتنتهي بوصفة طبخة البامية.. مرورا بالتكنولوجيا العالية، لسعر البطيخ.. إلخ.. هي أكثر شي بين الشباب.. (لإنو البنت ما مطلوب منها تكون مثقة أصلا، وما مطلوب منها تحكي شي.. ) يللي بيقعد بين عالم وبكون لازم يحكي لإنو رجال ولازم يحكي.. فبيحكي بالشي يللي سمعه بسهرة مبارح.. وبسهرة بكرا بيحكي بالشي يللي تعلمه بسهرة اليوم.. وهيك.. ثقافة قشرة.. بتضل ع السطح..  السياسة لعبة قذرة.. بغياب القانون والمحاسبة.. يللي بتخلي كل سياسي مسؤول عن أقواله ومحاسب ع وعوده.. رح يكون فيه قذارة بالسياسة.. وبالمجتمعات يللي بتنحط فيها الأخلاق العامة.. وبصير كل مين إيدو إله.. كمان بتصير لعبة قذرة.. أصلا معنى السياسة كله بيتغير .. بالمجتمعات المتأخرة بدون قانون ولا محاسبة وبغياب الشرعية الشعبية للسياسي.. يعني بين إنو يكون السياسي هو حامل لفكرة، ومشروع يحقق أهداف فئات إجتماعية يعبر عنها.. وهو محاسب إذا ما نفذ.. وبين أن يجير المنصب العام والمجال العام لخدمة مصالحه الخاصة.. بكون عم يهبش من مصالح العالم.. ويسير مصالحه.. هي قذاره..  الكذب والدجل موجود (وهو قذارة سياسية) في كل العالم.. لكن بدرجات متفاوتة.. وغالبا ما تكفل الآليات الديمقراطية والإصطفاء الطبيعي.. إزالتها.. الشفافية ووجود سلطات قضائية حرة وعادلة، ووجود إعلام حر.. بتكفل التقليل من قذارة السياسة.. كل شخص بكل مكان قد يتورط في قذارة بدون سيادة قانون.. ! وبدون رقابة.. لسؤال المثقفين.. ما بعتقد.. بيعرفو.. |
|
#65
Oct, 08 2005, 22:30
| |||
| |||
| الحياة بدها شغل كتير.. عم يستنا كل واحد منكن المشاركة الأصلية بواسطة Shankool بتحس إنك وصلت ليقين حول معنى الحياة.. والوجود.. والقضايا الفلسفية الكبرى.. عن الله والإنسان، القدر والحرية..؟
لأ... لسا ما وصلت ليقين.. بتشوف الحياة بتستاهل تنعاش.. وللا هوا.. الحياة هوا.. بيستاهل ينعاش.. بتعتقد إنو الدنيا منظمة بأسنفر ما يجب..؟ وللا بتشوفها ناقصة.. كتير.. يمكن كتير لسا بدها البشرية لتعرف شلون الحياة منظمة.. الأسئلة كبيرة، ولسا عم نشتغل عليها، ماني مع التسرع بالتسليم لجواب، والدخول في عقيدة .. بتكون عائف قدام حرية التفكير والبحث الدايم.. والتساؤل.. الحياة فيها نظام.. وفيها فوضى.. والحياة عم تكتشف حالها من خلالنا .. والوعي الكوني عم يزداد.. يعني وعي الكون لذاته من خلال العقل البشري مثلا عم يتطور.. طيب، ممكن الحياة ع الأرض تتحسن، والنظام يكون أحسن.. لما بسيطر العقل بدل العنف.. إذا لسا الحياة فيها شي بينشغل عليه لقدام: - الوعي، -التغيير.. بتعتقد إنو الإنسان هو مركز الكون .؟ وللا هو حشرة صغيرة على ظهر البسيطة.؟؟ الإنسان ليس مركز الكون، قد لا يكون الإنسان أكثر أهمية من أي دودة على ظهر الأرض، ربما للإنسان دور في الوجود، كأي شجرة، وعليه أن يقوم به.. والكون لا يعبأ بالبشري كنوع مقدس.. ولا يحترمه بالذات.. فهو واحد من كل.. وجزء من كون كبير هائل.. قد لا يكون أكثر أهمية من أي شيء آخر.. ولكن كل شيء في الكون هو على درجة عالية من الأهمية.. حتى الحشرات..! |
|
#66
Oct, 08 2005, 22:31
| |||
| |||
| رقم موبايلي.. للي ما بدو المشاركة الأصلية بواسطة Shankool كان نونة المغضوب عليه
عم يقول، إيمت بيجي الوقت يللي الصبية إذا طلب منها الشب رقم موبايلها ما بتعتبره عم يعتدي ع شرفها.. من هالباب أنا ما رح أعتبر شنكول عم يعتدي ع شي إذا طلب رقم موبايلي.. ورح أعطيه ياه.. بشرط إنو ما يتصل فيني يعد الساعة 12 ليلا، ولا قبل العشرة صباحا.. 092397949 |
|
#67
Oct, 08 2005, 22:47
| |||
| |||
| طيب على اعتبار إسرائيل مازالت عدواً مو لازم نعرف عن عدونا أكتر طيب منين منجيب هالمعلومات الصراحة ؟؟؟ المكتبة العربية فقيرة بكتب موضوعية غير موجهة من قبل الكبار توصفلنا هالدولة المفترضة"كون لسا ما اعترفنا فيا" حرية بلا حدود عبارة أطلقها الأمريكان حصراً رئيسهم بوش بتشوفها مناسبة إلك؟ بتشوفها صح؟ بتشوفهم عميطبقوها صح؟ و لسا راجع تحياتي حازم |
|
#68
Oct, 08 2005, 23:03
| |||
| |||
| أحلى شي الحب.. الله محبة المشاركة الأصلية بواسطة Mr.Sam إني أحكيلك شو الفرق بين مرهف وسنفور بدو تفكير منيح.. وتأمل، لسا سؤال إنو شو مرهف بده، وشو سنفور بده.. ؟ هيك كتير صعب..
فسامحني إذا جاوبتك عني أنا..! بس 1_الطب بدي من الطب، إنو يكون مهنة إلي، أقدر من خلالها أساعد الناس، يللي بيحتاجو لعلاج من شان يعيشو حياة بقدرات أكبر وبفعالية أعلى، يعني يكونو أقدر على العيش، والتمتع بالحياة والإنتاج فيها.. وتخفيف ألم عن إنسان عم يتألم، بتعرف السعادة بتعريفها الأفلاطوني هو تخفيف الألم أو زيادة اللذة.. أنا لما بساعده بحل مشكلته الألمية وتحسين فعاليته بكون عم أتحله فرصة إنو يعيش أولا (وأنا مؤمن إنو البقاء في الحياة غاية بحد ذاته، أنا ضد الموت) وإنو يشتغل ع حاله وللناس ليعيش بسعادة ويعمم السعادة.. 2_الله أراه فيك، في حبيبتي في جسد الآدمي، أراه في اخضرار الشجر، وفي تفتح الزهر، وفي برد الشتاء وفي نزول المطر.. أراه في عودة الخصب إلى الصحراء أراه في ضياء الشمس وفي جمال القمر.. أراه في الزائد من الكون عن حاجة البشر.. في الكون كله.. أراه في نظام الكون وفي الفوضى أراه.. وأريد منه أن أراه دائما.. 3_الاسلام أن يشارك في الثقافة الكونية، أن بتحرر من إسار كتب الأولين والتفاسير، أن ينفتح على أفق معرفي بجدل مع منجزات الحضارة والفكر والفلسفة.. أن يعود للحياة من باب ما يهم الحياة في هذا الزمان، وأن يتحرر أتباعه من عبادة الماضي، أن يبحثو في الجوهر، وفي الغايات والمقاصد السامية، التي تلتقي ربما مع كثير من منجزات البشرية، أن لا يحمله الناس أكثر مما يحتمل، أن لا يتختبئ وراءه البشر، أن يمشي بالشوارع بسيطا سلسا خفيفا بيسر وروحانية.. أن يبتعد عن التطرف، أن يتمسك بـ لكم دينكم ولي دين..! 4_الشيوعية مرحلة هامة من تاريخ البشرية ومنجز بشري هام، ساهمت في دعم حركات التحرر في العالم.. له ككل ككل تجربة بشرية أخطاؤه، محاولة لصنع عالم أكثر إنسانية وعدلا، انغلاقها أمام النقد وتحولها من آليات تفكير ديناميكية إلى عقيدة جامدة آذن بنهايتها ، ما يزال البعض من بقايا التاريخ لا يعترفون بالتقدم ولا يرون أبعد مما في الكتب المقدسة لماركس (على أهميتها).. أنصح من يريد العمل من أجل المجتمع أن يبتعد عن العقيدة الجامدة وينفتح على أفق معرفي أوسع، تحول أحزابها إلى قوالب وعلب كرتونية وهياكل تراثية من عبادة القائد والأمين العام وأسرته.. كان طريقا إلى ككل نظام شمولي تكون بيئة خصبة لنشوء الدكتاتوريات.. أريد نقدا للشيوعية من أفق إنساني أوسع، باعتماد مناهج بحث بشري أرقى، ربما تؤسس لما بعد الماركسية،.. أرفض النقد الذي ينطلق من خلفية عقائدية أخرى.. أرفض صراع العقائد.. أبحث عن حوار عقل منفتح.. ليست الرأسمالية أقل سوءا منها.. وإن أثبتت قدرة على التكيف.. 5_العلمانية، أريد أن يعاملني الناس كبشري بغض النظر عن خلفيتي العقائدية أو الفكرية، وأن يتفاعل الناس مع بعضهم كبشر.. أن تضع جانبا دينك الذي أنت حر به بينك وبين ربك، وأن نقف على أرضية لقاء إنساني بين بشر عقلاء.. أن لا يتكتل أصحاب الذقون الطويلة، ولا ينفر منهم أو ينفرو من أصحاب الذقون الحليقة، من يؤمن بعيسى مع من يؤمن بمحمد.. على طاولة واحدة لا يبحث أحد عن تسفيه قناعات الآخر، ويتعامل معه كشريك له في الإنسانية وفي الأرض وفي التاريخ وفي الهموم وفي.. إلخ.. أن لا نرى التكتلات البغيضة في كليتنا.. ولا في أي مكان في الوطن.. 6_الوطنية.. أريدها أن لا تبقى شعارا يرفع فوقنا لنداس تحته.. أريدها شعورا حقيقيا يملأ قلب وعقل مواطن معترف به كشريك في الوطن ومالك له، ومنتم إليه، وهو بدوره يعتبر الوطن حيزا عاما مسؤول هو عنه وعن إصلاحه وتنميته، أن لا يداس على رقبة مواطن، أو تنفض جيبته ثم يساءل عن لحظة شك فيها بانتمائه إلى هذه الأرض.. لا تجوعني وتسحقني بقدمك ثم تحكي لي عن الوطنية.. 7_القومية انتماء لأمة تجمع تسعى لتكون دولة قانون.. ربما تتغير المعاني مع انفتاح الكون على بعضه، من الخطأ المناداة بهوية أزلية، منغلقة جامدة، الانتماء هو لأمة متجددة متدفقة، انتماء لحاضر الأمة لا لماضيها ولا لشعاراتها الهوائية عن مستقبل ينتحر على اللافتات.. لا يتعارض الشعور القومي مع اعتناق دين أو فلسفة معينة.. لا تقف القومية عقبة أمام الانفتاح على العالم.. 8_الحب زاد الفقير، ما تبقى لشاب يسحقه كل من حوله، في الأسرة، في المدرسة، في الجامعة وفي الجامع، مساحة حرية لأحلام قد لا تتحقق ولكنها تترك طعما حلوا في علقم حياة بائسة، هو ما يدغدغني صباحا لأستيقظ باكرا وأذهب للدرس أو العمل، ما يشد شفاهي لأبتسم.. ما يهدهدني ليلا لأنام مطمئنا.. هو ما يشدني إليكِ، إليكَ.. لو كان قلبي في يدي وزعته على كل من أحب في الإنسانية، على كل البشر! أنا سطحي أو عميق يا سام.. حسب جملة المقارنة.. حاولت جهدي.... |
|
#69
Oct, 08 2005, 23:08
| |||
| |||
| إنسان محترم كإنسان المشاركة الأصلية بواسطة Shankool
علاقتي مع الحب.؟ حبية. داق الحب..؟ داقه بس ما شبع منه شو رأيه بالفتاة الحلبية..؟ بتزعل إذا حكيت الصراحة..  يا ترى شلون الوضع بالشام؟؟ ما عشت بالشام لأقول.. بس بحس إنو الشام المجتمع منفتح أكتر من حلب، يعني في تنوع من كل الأشكال هدا بيعطيه غنى حلو.. بعدين بسمع إنو كتير نشاطات ثقافية بتصير بالشام وما بوصل شي لحلب.. غير الريحة.. بتحس حالك متصالح مع المجتمع؟؟ وللا في جدال.. أو تناقض.؟ ماني متصالح .. في كتير شغلات ما بوافق عليها.. بس ماني عدمي، يعني ماني من الناس يللي ع الطالع والنازل ع.. هيك وهيك من البلد ع هيك وهيك من الناس وشعب ما بيسوى.. ما بحب هيك طريقة بالحكي.. تهكمية من ناس غالبا مانهن أحسن من غيرهن.. بس لما بيتهكمو بزتو التهمة ع التانيين.. عندك فكرة يوتوبية للمجتمع؟؟ كيف..! ما عندي.. لأ.. عندي شوية أفكار.. بحلم بمجتمع أكتر إنسانية، بيحترم الإنسان، بيحترم المرأة، بيشتغل ع نفسه، مجتمع ما بيعبد الماضي، وما بيكره الآخر، فيه حريات عامة، حريات للتعبير والتفكير وللحياة .. وحريات سياسية ، والناس فيه مواطنين ع قدم المساواة، يعني ما في مواطن درجة أولى وتانية.. وفيه عدل ومساواة، والقانون فوق الجميع ما فيه فقراء وأغنياء، في الصحة مؤمنة للجميع، والتعليم بيقدر يحصله الكل.، الكل عم يشتغل ويلاقي فرصة عمل براتب منيح وبشروط إنسانية محترمة، فيه الأطفال عم تكبر وتتعلم وتاخد حنان، وفيه المعاقين عم يعيشو بظروف رعاية خاصة، بيتعاقب المسيء وبيثاب الكويس، القانون مطبق ع الكل، وما في خيار وفقوس.. بتنقطع فيه إيد المرتشي، وبيتخوزق فيه يللي بيسرق قرش من أموال الشعب، وبينحرق يللي بقصر بواجباته، وطبعا الحقوق للكل معطاة.. وبوطني هدا، فيني أحب بحرية.. وفيها تحبني.. بدون خوف من عاداتهن وتقاليدنا! |
|
#70
Oct, 08 2005, 23:20
| |||
| |||
| الحرية لأبعد حدود.. وليس بلا حدود.. المشاركة الأصلية بواسطة rwth المعلومات بدك ياها إلك وللا لصناع القرار..؟
إذا إلك دخول ع موقع جريدة السفير.. فيها كل يوم تنين ملحق من بالصحف الإسرائليلة حلو كتير.. إذا صناع القرار بدهن يعرفو.. بيعملو مراكز أبحاث وبيقرؤوا الإنتاج المعرفي للمجتمع الاسرائيلي.. بس ما رح يلحقو.. حرية بلا حدود.. ! بدها صفنة.. ما في شي اسمه بلا حدود.. الحد دائما للشيء هو نقيضه.. الداخل يتوقف عند حدود الخارج والخراج مثلا يتوقف عن حدود الداخل.. طيب الحرية نقيضها الجدلي هو القانون.. يعني ما في شي اسمه حرية بدون قانون.. الحرية هي إنك تعمل شو مابدك بس ضمن يللي بيسمحلك فيه القانون.. ممكن هون يكون عندك قانون متساهل أكتر من قانون.. يعني مجالات تدخل من يمثل العام بالخاص قليلة.. وهدا يعني في عندك إمكانيات للعمل أكبر.. إنك تعمل هيك أو هيك أو هيك أو هيك.. وهدا أفضل.. بينما إذا تدخل القانون أكتر .. بيمنعك مثلا تعمل هيك وهيك.. وبيترك عندك خيارين بس.. ليش أفضل.؟. لما إنت عم تسمح للشخص إنو يجرب ويكون خطأه ما بيعمل مشكلة.. فإنت عم تكسب تجارب وخبرات ومعارف ومحاولات منها الناجح ومنها الخاسر.. طفل عاطيه إمكانياتو اسعة للقراءة والإطلاع.. وعاطيه حرية التفكير والتساؤل .. رح يكون مبدع أكبر إذا جرب يكتب شي من شخص ما قرأ غير كتاب واحد أو كتابين.. صح؟؟ لما بكون عندي حرية إني أحب مرة وتنتين وتلاتة.. بدون ما يحسسني المجتمع إني عملت ذنب.، وبدون ما تحس البنت إنو عم تعمل ذنب.. هيك بتكون في فرصة إلها وإلي إنو تتعرف ع حالها أكتر (متل ما حكيت قبل شوي) وتعرف شو بدها.. وتعرف شو بتحب وشو بتكره.. وهي حرة (وهو مجال الحرية المفيد) إنو تتركني إذا شافت إنها ما رايدة.. وهدا شي مفيد.. الخطورة وين..؟ لما بتم تجاوز القانون.. هي اسمها فوضى ما اسمها حرية.. يعني متل موظف عم يرتشي.. هدا حر.؟ لأ.. هدا حرامي ابن كلب.. وبتنقطع إيده.. متل واحد مثلا عم يضرب مرته.. هدا حر.؟ لأ.. هدا عمل غير قانوني.. وبيتحاسب عليه.. أنا مع الحرية.. لابعد حدود ممكنة.. (بس في حدود هي القانون..) والحرية كفيلة تصلح أخطاءها.. بنفسها.. |
| Bookmarks |
| أدوات الموضوع | |
| |
المواضيع المشابهة | ||||
| الموضوع | مبتدئ الموضوع | المنتدى | الردود | آخر مشاركة |
| علاقة بين انتشار الملاريا والايدز | Article Bot | آخر المستجدات الطبية | 0 | Dec, 08 2006 17:50 |
| ما عجزت عنه الفتوحات الغابرة تحققه الصحوة المعاصرة | Hani | اجتماعيات | 5 | Sep, 20 2006 16:49 |
| ما هو لي - هو لي وليس لك - وما هو لك ليس لي.. محاولة لمقاربة علاقة الفرد بالمجتمع | سنفور | اجتماعيات | 91 | Jul, 21 2005 13:47 |
كل الأوقات حسب GMT +2، والوقت الآن 03:58.
