في كل مقرر للمداواة الترميمية والمواد السنية ... يتكرر النقد والمدح حيناً للأملغم على حساب الكومبوزيت ... وحيناً خوف بالغ من الأملغم ..؟؟؟
وتتفاوت ردود أفعال دكاترتنا ... من الدكتور جمال الذي يعتبرالأملغم المادة المرممة الأولى ... إلى الدكتورة إليزابيت التي تعتقد بالكومبوزيت والGI
ونحن نستقي هذه المعلومات ... ونتعلم ترميم حفر الصنف الأول والثاني بالأملغم فقط ...
لأن هذا ما يقرر علينا في هذه المرحلة
لكن ... في عياداتنا ... بم سنرمم يا ترى ؟؟
أملغم أم كومبوزيت ؟؟؟أم مادة أخرى ؟؟

والله انا من السنة الأولى عم حاول قابل هالكلية المتعبة بابتسامة بس السنة عن جد اكتئبت ؟؟؟
ومامؤامرات ولا شي مجرد إقناع وتبادل وجهات النظر ما عم نقدر إلا نحملا معنا إلى الكلية من المنتدى
وبتمنى أنك تكون قدمت منيح في اللبية

حبيباتي كيفكون ...

أول شي بحب أوجه كلامي للماما زوربا (كما تفضلتو) ، يا عزيزتي أنا زلمة بحكي هيك دج ، وأنا ما عندي مشكلة إذا حكيت هيك لأنو مو لازم يعني إذا كنت أنا (نص دكتور) يعني لازم أتكلم بالعربية الفصحى (هو الظاهر انت متأثرة كتير بالدكتور محمد سلطان) يعني مو لازم أقول حشوة سيئة التصميم والإنهاء ، خلص يا عمي حشوة بتهوي ، شو في أحلى من الهواء الطلق ، بعدين اللي بياخذ على خاطرو من حكي وبيحسو كلام عيب، في عندو حلين ، يا ببطل اشتراكو من هل المنتدى مشان ما يسمع حكيي ، أو بيغض بصر عن هذا الكلام الجارح يعني مشان ما يتعلم حكي مو كويس خصوصي انو لساتكون صغار وقابلين لأنو الواحد يعلمكون هيك شغلات ..

ويا صادقلي ... أو شي أنا وآنسة زوربا متقاتل بالكلية كل يوم 100 مرة ، بس نحن دايماً سمنة على عسل وما بتفك شراكتنا إلا إذا حدا من بيناتنا غللا (يعني حلق) من هل الكلية (إن شاء ما على قلبنا شر لا انا وانت يا ميمو)..

بعدين مشان صحابك أبو عبدو وأبو مدري مين ، يا أخي إذا كانت زباينك انت بكرة هيك ، فهي مشكلتك مو مشكلتي ، بعدين على حكيك مسوي فيها إنك بدك بكرة تشتغل شغل خيالي وانو رح تاخذ على حشوة الأملغم 800 ليرة أو أكتر ، شو محسب أبو عبدو وأبو بطيخ بدو يدفعلك الـ 800 ل.س !!! متفائل كتير ..

مشان هيك يا عزيزي انتقاء المريض بكرة أهم من تدبير المريض بالعيادات السنية ، أنا يعني بدبر مريض مبتك وبقسم عليه شوي ويكون شي ناظيك وبطالع منو حق حشوة كومبزيت 1500 أو 2000 ليرة وبعملو ياها بعد شغل ساعتين بالعيادة على رواق وبتطلع حشوة بتعقد وبتحدى فيها المقاومة لمدة عشر سنوات (لأنو مارح أشتغل بالمواد المتوفرة هون بسوريا قطعياً) وانت إذا بدك تعالج أبو عبدو بعد ما يقتنع أنو يدفع لك 400 ليرة على حشو الضرس على حد تعبيره ، بتشتغلو سلق وبتحطلو الحشوة اللي انت كمان بتتحدى أنو تطول 10 سنين لأنو أبشع حشوة أملغم بتطول 5 سنين فما بالك بشغلك أكيد بتطول الضعف !! بس شو بتكون خسرت انت وشو بكون كسبت أنا :
انت بتكون خسرت لنقول 1000 ليرة ، وأنا بكون ربحت بحدود 1000 ، أنا بكون عم اشتغل ببتك ونظافة ومريض ناظيك ، وانت علقان بريحة تمو لأبو عبدو إللي بكون آكل مخلوطة وراسين ثوم وجاي لعندك ، بس أكيد انت بتكون كسبت وقت لأنو ما رح تطول الحشوة مع التحضير أكتر من ساعة ، أما أنا فبدي ساعتين شغل على الأقل لأنو ما بشتغل إلا على رواق ..

صدقني انت كيف بتعلم المرضى يجو لعندك على العيادة رح يجو ورح يطيعوا آراءك وبالسعر اللي بدك ياه ، هلق الناس بيسألوني طيب ما 90 % من شعبنا أبو عبدو ، طيب أنا ما ني مضطر أعالج شعب الجمهورية العربية السورية كلها ( مشان هيك أنا مسؤول عن علاج الـ 10 % المتبقية واللي إذا كان عدد سكان سوريا 20 مليون بني آدم احسبها انت وبتشوف انو والله عدد كبير أما الباقي فشو ذنبون إذا ما معون مصاري أو هيك حالتون الصحية يعني وين النواحي الأخلاقية والمهنية ، بقلك أنو كل سنة عم يتخرج 120 دكتور سنان وكلون عندون أخلاق مهنية يعني ماهو مجبور المريض يجي لعند واحد غلواتي متلي يروح لعند غيري ..
بعدين مافي حدا فقير بهل الدنيا ، الواحد إذا عم يعمل عملية بجسمو عم يحطعلى الأقل عشر آلاف ليرة سورية ، فأظن انت تحسن تقنع المريض يدفعول 5000 آلاف إذا بتقنعو وبتفرجي انك مهتم فيو وانو المعالجات اللي عم تعملها أبدية وبتطول عمر طويل لأنو شغلك وموادك كلها تمام ..

طيب وإذا كفر المريض وأجى لعندي ، أنا أي مريض بفوت لعيادتي يا بيشتغل معي معالجة سنية شاملة يا ولها يدبر حالو ، يعني أول ما بفوت المريض عندي بعملو ملف عندي وباخدلو رأساً صورة بانورامية شاملة وبيدفع متل ما الله خلقو 300 ليرة حقها قبل ما أمسك المسبر لسى لأنو بدي أقعد معو نصف ساعة تشخيصية خاصة فيو وعشان سواد عيونه فقط ، هلق إذا كان عندو القلح مقياسو 3 متل ما تفضلتو ، في اختراع اسمو تقليح وتجريف ، فأول معالجة منقوم فيها قبل الترميم هي التقليح ، ومن ثم المعالجات اللثوية إذا كان في داعي وبعدين منشوف شو في عندو ترميم ، جسور ، إلخ ... ولا تخاف علي أنا قادر على إقناع المريض بالشي اللي بدي أعملو وهو موجاي مشانو ، يعني نحن شغلنا مو مامتل بدو المريض ، لأنو المريض ما بيجي غير مشان يسكن وجعو ، بقى انت بتشوف شو في عندو وبتقلو هيك عندك وهيك عندك ولازم نبلش بكذا وكذا وتحط خطة المعالجة ، يمكن يحسب الواحد انو حكيي عن خطة المعالجة هو حكي نظري ، بس أنا نزلت على عيادة دكتور من دون ذكر أسماء وشفت الوضع شلون بتنحط خطط المعالجة وبتكون في جلسة تشخيصية خاصة وبذكر أنو الدكتور سلطان ولأول مرة بقول حكي رائع على أنو وقتنا مو بلاش يعني متل مأنا عم شخص للمريض لازم أخذ حق وقتي وهو 300 ليرة حق الصورة البانورامية ، هذاك الوقت المريض اللي ما عجبو يعمل هيك وهيك متل ما بدي بقلو أنا ما بشتغل غير هيك روح عند اللي بسميهون أنا هون د.أبو عبدو والدكتور إلخ ، هي إذا انت سميت المرضى بهل الأسماء فانا بسمي معظم دكاترنا بهل الأسماء كمان ..

بس لمى بيقتنع منك المريض وبيشتغل معك متل ما بدك وبتشتغل انت على رواق ومبسوط وعم تاخذ اللي بدك ياه ، النتيجة معالجة متكاملة وناجحة تماماً ، هذاك الوقت اسمك هو اللي يبقى بالسوق وغيرك بغللي (يعني بيطير) ..

بعدن مرة تانية بأكد هذا الشي كلو في حال الواحد بقي هون بالبلد ، لأنو بصراحة أنا إذا طلعت مو ناوي أرجع إلا بعدن ما أكون عم أشتغل طقطقة وتسلاي ، اللي يسرلنا الطللعة انتو بس ادعو لنا (أكيد عم تدعو علي، أنا بعرفكون) ..

المهم ، مرة أخيرة بذكر الشباب والصبايا اللي عم ينزعجو من حكيي وبيعتبروه حكي (غير لائق بالأطباء) ، أنا أول شي لسى ما صرت دكتور ، وتاني شي حكيي ما فيو شي لأنو حكي شباب ونحن أظن بالعشرينات لسى ، وتالت شي إذا كنتو بتعرفو إنو البروفيسرور برى وقت بكون عم يلقي محاضرة بيحسن الواحد ياكل ويشرب جوى المحاضرة ويقعد على الأرض ويرفع أجرو على الطاولة ، ليش البروفيسور برى ما بيعتبر رفعة الإجر على الطاولة إهانة إلو ، لأنو حتى ما بفكر أنو هيك موضوع هو إهانة إلو وبفسروها على أنو الطالب تعبان وبدو يريح حالو ، لكن نحن شعب المظاهر والأفلمة ونحن اللي منحط حولينا هالات ما إلها داعي مو لأنو هذا الشي صح او خطأ ، لأنو نحن اللي من خلي الشغلات البسيطة خطأ وغير أمور عظيمة منساويها عادي يالله أهم شي الواحد يصرخ لي دكتور ويوقف قدامي عم يرجف ويبوس أيدي مشان يقعد على الكرسي ، والله عيب يا جماعة ، نحن لازم نغير الوضع مو نزيد الطين بلة ، بعدين في مرة بروفيسور ياباني على حكي شب كان ببريطانيا وقت عم يحكي محاضرة عصب من بعض المداخلات ولتشوفو شو طلع معو حكي هذاك الوقت ، بتعرفو انو الواحد لازم يكون تفكيرو أعلى من أنو والله أنا دكتور يعني أنا نبي أو رسول منزل ، المهم بعد ماخلص محاضرتو طلع هذا البروفيسرور هو والشباب وراحو أكلو همبرغر وعلى الحكي كانت طيبة كتير وعلى حسابو .

تصورور مين أهم في هذه الدنيا هذا البروفيسور (ركزو بروفيسور مو دكتور) ، أم أنا اللي لسى نصف دكتور ..

أكيد أنا اهم مو هيك .!!!!!!

وفي النهاية ما حدا يزعل من حكيي لأنو بكرر نحن شباب والشباب أحلى شي بهل الدنيا ...

على راسي يا شباب ...

سلامات ...

يا أبو السوم أنت رائع بالإقناع بس أنا مصر على حكايت أبو عبدو وأبو محمد من شان هيك بكرة بدي أفتح عيادة جنبك وإنت بعتلي العالم إللي من الـ90% وأنا ببعتلك مرضى من الـ10 % وهيك منسترزق أنا وياك صح؟؟
بس لازم تجربلك شوي من الـ90% وبركي على إيدك بتسوي من الـ10% وهيك شوي شوي حتى أنا أسكر عيادتي لأني بيكونوا الـ10 % تبعاتك صارو 100% ... وهيك أنا بكون أكلت هوا(على قولتك)

ولك على راسي يا أبو حميد ..

شفت شلون هلق بلشت تعرف تشتغل صح معي ..

كل واحد لازم يشيل التاني .. يعني إذا أجاني مريض عندو صنف تاني وما ني مشتهي أشتغلو بحكي معك وبقلك لازمك صنف تاني معلم ، يعني متلها متل العيادات السنية كلو متل بعضو ....

بعدين أنا بقول انت من أول الناس اللي بدون يطورور هل 10 % من المجمتمع ، صدقني مو مجرد مجاملة ...

تحياتي ..

ودع الأيام تفعل ما تشاء ، وطب نفساً إذا حكم القضـــاء ..

zorba
الله يعطيك العافية، والحمد لله اليوم كانت المذاكرة رائعة، ويا ريت كل المذاكرات هيك، وشلون كتبت إنت؟ إن شاء الله تمام؟
wesambassout
الله يعطيك العافية على مشاركتك الحلوة، وثق تماماً إنه ما حدا بيزعل من الحكي، ولو ... كلياتنا شباب وتعليقاتنا كلها مزح، ودخيلك خلي يقولوا دكاترة المستقبل عبيمزحوا وينكتوا، إيش لح يقدم لنا هالشي أو يؤخر؟
وبالنسبة للمرضى 10 % فأكيد شي رائع إنك تتقن بعملك، وأنا إن شاء الله من حملة نفس الشعار، بخصوص الإتقان، أما 10 % فاتركهم عالتيسير...
sadekly
إذا بدك تفتح عيادة جنب وسام فقلي وين لح يكون محلها، مشان أبعتلكم المرضى لتنيناتكم، مو اتفقنا نتعاون؟ فببعتلك 9 مرضى باليوم ومريض واحد لوسام والشاطر فيكم اللي بيطلع له دعاية وسمعة أكبر.
بس بشكل جدي يا شباب والله أنا بعتقد إنه من مسؤوليتنا بكرة إنه نحسن سمعة أطباء الأسنان وأنه نشتغل بقلب ورب. مو هيك، ولاّ غلطان؟

مع تحياتي....
عبد الحليم غريب

يا سيدي يا عبدو أنا عن جد مفكر في المستقبل إنو في حال استقريت هون ، أنو الواحد بيجمع هل كم شب المعلمين والفنانين وذوي الخبرات والشهادات العلمية الممتازة وبيعمل مستوصف _متل اللي بالسعودية) واللي هلق بلشو هون يصيرو ، ويكون شامل لكافة اختصاصات طب الأسنان ، يعني منجيب مثلاً صادقلي للترميمية (بعد اخترع الكومبوملغم) ، ومنجيب صبحي بارود لقسم التعويضات ، وأنا من ناحيتي ما بشتغل إذا الله يسرلي غير جراحة ، وانت يا عبد الحليم شو مفكر تختص ؟؟؟

See u all

والله يا أبو السوم أنا مبدئياً حبيت التقويم والجراحة، ولسع عمبفاضل بينهم، حاسس هلأ إنه التقويم عجبني بس لسع ما شفت لناخد الجراحة شو بيكون رأيي..
أما عن فكرة المستوصف ففعلا ً الفكرة رائعة ولازم تنعمل بين طلاب دفعتنا اللي إيدهم نظيفة، وعن جد ما في أحسن من هيك فكرة وخصوصي للي شافها متلي ومتلك.
مع تحياتي.....

طيب مالكون مفكرين بزرع الأسنان .. ليش ما حدا جاب سيرتها ..

أما قصة العيادة السنية المشتركة .. بدول الخليج قليل ما تلاقي عيادة خاصة لدكتور .. الكل بيشتغل بمراكز ومجمعات صحية .. هيك أحسن .. الواحد بحس حاله رجع لأيام الجامعة وخصوصي إذا الكل كان بيعرف بعض أيام الدراسة .. يا سلام رجعوا للأيام الخوالي يعني ..

بعدين الواحد ما بيحس بالوحدة .. لأ عم بحكي عن جد كتير باكل هم كيف رح أشتغل بعيادتي لحالي .. متعودة هلأ على رفقاتي جنبي .. بكرة هيك بين يوم وليلة ألاقي حالي لحالي
نحنا كمان من فترة تناقشنا بهالشي .. نفتح عيادة مشتركة وكل وحدة بتاخد اختصاص ..

خلونا نتخرج أول شي .. بعدين بنحكي بالعيادة والمجمعات الصحية ..

أول شي وين رايح يا أبو السوم ... أنا مفكر بثلاث اختصاصات هنن التقويم ثم الجراحة ثم اللثة مع تفضيلي الفائق للتقويم ومن شان الكومبوملغم ... هادا بخترعو بطريقي أنا عم بتسلى بس هلأ ما عندي وقت للتسلاية .. إن شالله بدك ياني أصير في قسم المداواة الترميمية؟؟ ...كش برة وبعيد الله يجيرنا .. ما عم بفهم إش بختصوا بهالمداواة كله حفور وطم بقى بلاك وغيرو ... كله حكي فاضي .. صح؟ .. هلأ نحنا درسنا المداواة في السنة التانية:.. رجعنا عدناها في السنة التالتة نفسها وهلأ عم نرجع معيدها في السنة الرابعة نفسها ... وسنت الجاي أكيد رح نعيدها مرة رابعة والسبب لأنو لو في شي جديد كنا أخدناه.. الحاجز المطاطي إللي شايفينو شغلة صرلو قرن موجود (رايح يبطل ) والأملغم اخترعوا وكسروا القالب(ما بقا حدا يتلحلح ويطالعلوا شي مادة أحسن منو) كلو عبارة عن لعب بالنسب .. شوي نسبة النحاس 13% وشوي 30% (الله وكيلك عم يضحكو علينا )
منجي على التقويم يا زلمة التقويم شغلة كبيرة بدو تشغيل القدرات الدماغية علـ 24 .. الله يطعمني هالاختصاص لأورجيكون التقويم على أصوله.. أوأي اختصاص تاني ما عدا (المدواة بفرعيها والتيجان والجسور والتعويضات) وخاصة التيجان والجسو من شان ما يخطرلي بيوم من الأيام أخترع الجسر الصادقلي المجنح...
من شان هيك ..فضولي قسم التقويم في المستوصف من هلأ: ومن أولها أهونها....

أنا بصراحة مفكرة زرع - أطفال أو حاليا وسومة عم يدخللي بعقلي الجراحة
بعدين وين انسحبت يا محمد مو رح تخترعلنا الكومبو أملغم ...؟؟؟؟
منجي على التقويم يا زلمة التقويم شغلة كبيرة بدو تشغيل القدرات الدماغية علـ 24 .. الله يطعمني هالاختصاص لأورجيكون التقويم على أصوله.. أوأي اختصاص تاني ما عدا (المدواة بفرعيها والتيجان والجسور والتعويضات) وخاصة التيجان والجسو من شان ما يخطرلي بيوم من الأيام أخترع الجسر الصادقلي المجنح...
من شان هيك ..فضولي قسم التقويم في المستوصف من هلأ: ومن أولها أهونها....
انا كنت قبل مفكرة بس بعد التقويم اللي أخدناهو السنة بطلت ... وبعدين مين قال مستوصف ... مستشفى فيو غرفة عمليات جراحة فكين مشان شريكي