في كل مقرر للمداواة الترميمية والمواد السنية ... يتكرر النقد والمدح حيناً للأملغم على حساب الكومبوزيت ... وحيناً خوف بالغ من الأملغم ..؟؟؟
وتتفاوت ردود أفعال دكاترتنا ... من الدكتور جمال الذي يعتبرالأملغم المادة المرممة الأولى ... إلى الدكتورة إليزابيت التي تعتقد بالكومبوزيت والGI
ونحن نستقي هذه المعلومات ... ونتعلم ترميم حفر الصنف الأول والثاني بالأملغم فقط ...
لأن هذا ما يقرر علينا في هذه المرحلة
لكن ... في عياداتنا ... بم سنرمم يا ترى ؟؟
أملغم أم كومبوزيت ؟؟؟أم مادة أخرى ؟؟

طيب كويس يا زوربا

أنا أول شي بنظري بنظر إلى الناحية الاقتصادية للمريض ، يعني أنا ما بحسن أرمم كومبوزيت بكلف 1500 ليرة لمريض مصر على أنو مايدفع غير 800 ليرة حشوة ..

ثانياً ، إذا كان ما في مشكلة عند المريض مادياً فأنا أفضل الكومبوزيت دايماً ما لم يُستطب الأملغم (عكس العادة) وخصوصي مع التطور الشديد للمواد السنية الترميمية والكومبوزيت وظهور الكمبوزيت الهجين فائق النعومة الذي يمكن تطبيقه على الأسنان الخلفية مؤمناً بذلك الناحيتين التجميليلة والوظيفية (الميكانيكية) ، يعني انا شو الله جابرني أعمل حفرة هل قد قدها مشان أعمل شكل مثبت وغيرو وآخذ كتير من النسج السنية مشان أسمع حكي بلاك (مع احترامي الشخصي لمبادئ بلاك) ، بس العلم والمواد عم تطور والكومبوزيتات الحديثة أثبتت جدارتها ..

الأملغم طبعاً هو عنصر أساسي ومهم في طب الأسنان وله تاريخ عريق ، بس أنا ما بستخدمو إلا في حال التهدمات الكبيرة التي يكون الترميم فيها بحاجة لتحقيق مبدأ المقاومة للمادة الحاشية بشكل رئيسي وعدم أهمية الناحية التجميلية ويلعب ذلك أيضاً كما ذكرت رغبة المريض والحالة الاقتصادية له .

على كل حال هذا كلو حكي ، لأنو بكرة بالعيادة الشخصية ما منعرف شو بصير معنا ، الله يعيننا ...

سلامات .. وســــــــام

zorba
عم تسألي بعياداتنا الخاصة بشو رح نرمم يا ترى ..
دائماً بتذكر دكتور نبيل بيحكيلنا نحنا كنا هيك نعمل .. نحنا كنا هيك نرمم ..
بقى يمكن تطلع مواد جديدة لبين ما نتخرج ونخلص إختصاص ونفتح عيادة خاصة فينا ( هي إذا تخرجنا ) ..
تقولي كأنو رح نتخرج بعد قرن من الزمان
طيب إنتي برأيك مين بتفضلي الأملغم ولا الكمبوزيت .. ( أنا بحب الكمبوزيت أكتر ) .. صحيح الشغلة مو على كيفي .. وإنما على كيف الاستطباب .. بس بشكل عام بحب الكمبوزيت ..

والله يا زوربا بدك تنزلي على هالبلد وتتفرجي على الحشوات التحفة الموجودة وأنا بزمناتي شفت وتعلمت كيف أن حفرة MOD حفر + حشي = ربع ساعة وبدون مسندة وبدون تبطين !!!! وحاولت أسأل نفسي لماذا هذا؟
بالحئيئة في سببين الأول هو إنو الدكتور ما هو حضران محاضرة الأملغم لما كان طالب والسبب التاني إنو المريض ماعم بيدفع وبالتالي الدكتور ما بدو يشتغل غير على قد هالمصاري.
يا ست زوربا الكومبوزيت حشوة رائعة وما بتبين (يعني تجميلية) بس لها مساوئ أولها عمرها القصير الذي لا يتجاوز ال 5 سنوات وهذا برأيي قصير جداً (مع احترامي للأراء الأخرى) والأملغم كذلك الأمر له أثر غير تجميلي وبالأحرى هو حشوة تبشيعية بس عمره كتير طويل وهي أحلى ميزة فيه
إذا بدنا نحكي على الواقع العالم الحقيقة هيجمة على الكومبوزيت من شان خواصه التجميلية وهنا تكمن المشكلة ألا وهي أن الكومبوزيت مادة حديثة ومعظم الدكاترة ما بيقروا عنه وبالتالي بيستعملوا متل ما بيستعملو الأملغم (يعني لا عزل ولا تبطين و لا تجفيف) وبالتالي نتائج مأساوية
برأيي هناك استطبابات حسب رأيي الشخصي أعرضها كما يلي:
نستخدم الأملغم في ما يلي:
جميع الحفر على الأرحاء العلوية
حفر الصنف الأول والثاني على الضواحك العلوية
حفر الصنف الخامس على الأرحاء السفلية
يستخدم الكومبوزيت فيما يلي:
حفر الصنف الثالث والرابع
حفر الصنف الخامس على الضواحك العلوية والسفلية والأرحاء العلوية الأولى
حفر الصنف الخامس على الأسنان الأمامية
حفر الصنف الأول والثاني على الأرحاء والضواحك السفلية (لأنها تظهر عندما يفتح المريض فمه)
لكن علينا الانتباه إلى الدقة في العمل في كلا النوعين من الحشوات لأن التقيد بما أخذناه من الدكتور نبيل بالذات سينتج عنه حشوات رائعة ومثالية واسألو مجرب
أما إنت يا أبو السوم فأسعارك غالية شوي يعني إنت غلواتي من هلأ بقى شلون تفتح عيادة ؟؟
على كل حال أنا مفكر آخد أكتر من هيك ... بعدين بتشوفوا..
أما أنت يا سيدتي المجد فأرجو ألا تقعي في حب الأملغم ولا في حب الكومبوزيت لأنهما مالون ولاد حلال!!
واسأليني أنا لأني تعقدت منهن ومن تركيبهن الكيميائي ومن النسب ومقاومة الضغط ومقاومة السحل إلخ.....
وبالمناسبة توقيعك يا ست المجد كتير حلو ...
وأخيراً للجمع بين خواص الأملغم والكومبوزيت أقترح اسم مادة المستقبل وهي الكومبوزت الأملغمي (كومبوملغم) ويالله هي أنا اخترعت الاسم ومابقي عليكن غير تنتجوا هالمادة ....
سلام

أحلى أبو حميد والله .. هذا الحكي اللي بينسمع ..

خصوصي هي ال (الكومبوملغم) برأيي لازم تاخذ عليها برائة اختراح (الحشوة الصادقلية) ...

أنا من ناحيتي أسعاري هي اللي بدي أشتغل فيها (ويمكن متل ما قلت انت يا صداقلي آخذ أكتر) لأنو أنا زلمة ما بحسن بشتغل غير على الأصول ، وبطاقتي في المداواة الترميمية تشهد بهذا الشيء يعني أنا لهلق وصرنا بآخر السنة ما خلصت غير 5 حالات ترميمية) يمكن البعض يسمي اهمال أو كسلنة أو ملكعة بس أنا هيك بشتغل .. واللي ما عجبو من المرضى لا يجي لعندي على العيادة ، هو صحيح أنا رح أتبهدل أو فترة سنتين ثلاثة أو يمكن أكتر ، بس بعدين ببين مين اللي رح يبقى ومين اللي رح يطير اسمو من السوق .. لأنو أهم شغلة الإنسان يحترم نفسه ومكانته ، هذاك الوقت المريض غصب اللي عنو رح يحترمك ..

المهم .. يمكن تسموني _مداح نفسو كذاب) .. بس الحمد لله الله شايف شو عم يصير بهل الدنيا ..

بس بدي أسألك شريك .. ما قلتلنا شقد بدك تاخذ على حشوة (كومبوملغم) ؟؟؟؟؟

ســـلام ...

على راسي يا أبو السوم
منشان القراء من الكليات الأخرى أكيد ما عم بتفهموا علينا (أملغم وكومبوزيت وكمبوملغم) أكيد عم بتقولو هي مسخرة طب الأسنان وما إلى ذلك..
أكيد 95 % منكم في بتموا شي حشوة أملغم أو حشوة كومبوزيت
الأملغم
هي الحشوة المعدنية أو كما تسمى بالعامية الفضة أو الرصاص والأملغم عبارة عن مادة حاشية تتألف من سائل ومسحوق أما المسحوق ياعزيزي القارئ فهو يتألف من عدة معادن موضوعة بنسب مختلفة مثل الفضة والنحاس والقصدير والزنك ويأخذ الفضة والنحاس النسبة الأعلى
أما السائل فهو الزئبق .. وعند مزج السائل والمسحوق مع بضهما بيصير بيناتون تفاعل يسمى التملغم إللي بيعطينا هالحشوة ونحنا بدورنا بنحطا بالحفرة ونبدى نشكلها ضمن زمن عمل لا يتجاوز ال 20 دقيقة والفنان هو اللي بيطالع شكلها متل السن وتعتبر حشوة ذات عمر طويل جداً
أما الكومبوزيت
فهو مادة حديثة ومتطورة يوماً بعد يوم يوجد منها نوعين بالأسواق
ذات تصلب كيميائي: يتألف من معجونين يصلبان بمزجهما مع بعضهما البعض ومن أهم مساوئها هو سرعة التصلب وعدم التطابق اللوني مع السن وكذلك عدم الثبات..
أما النوع الثاني فهو الكومبوزيت الضوئي والذي يقول عليه بعض الأطباء للأسف الليزري مع أنه ليس لليزر أي دور بالموضوع أما عن مبدأ هذه الحشوة فيعتمد على إحداث تفاعل التصلب ضمن الحشوة تحت تأثير ضوء ذو طول موجة محدد ولونه أزرق حيث نسلط الضوء على الحشوة فتتصلب
ويأتي مع هذه الحشوة دليل لوني نختار منه اللون المناسب ونختار من الكومبوزيت الذي يأتي بعدة ألوان اللون المناسب
أما خطوات العمل فتكون كما يلي:
التجفيف والعزل والتبطين
التخريش الحمضي وهو تطبيق حمض الفوسفور على الميناء لخلق غؤورات مجهرية ضمنه لتثبت الكومبوزيت
تطبيق المادة اللاصقة وهي كومبوزيت سيال يساعد على التغلغل ضمن الغؤورات السابقة ويتم تصليبه ضوئياً
وضع الكومبوزيت وتشكيله(هنا فترة العمل طويلة ولا يتصلب الكومبوزيت إلا بتطبيق الضوء المصلب) ثم التصليب الضوئي
إن حشوة الكومبزيت الضوئية إذا طبقت بطريقة صحيحة وتم اختيار اللون بطريقة صحيحة من الصعب جداً جداً كشف وجود أي حشوة على السن وله خصائص لونية وجمالية مبهرة لكن مشكلته في عمره القصير الذي يلعب سوء التطبيق وعدم التقيد بالتعليمات دوراً كبيراً به
وعلى كل حال في حال التطبيق المثالي للكومبوزيت تدوم الحشوة خمس سنوات
أما عند التطبيق الجيد للأملغم فإن الحشوة تدوم 20 سنة وحتى أكثر من ذلك
أما بالنسبة ((للكومبوملغم)) فهي من خيالي العلمي وأرجو أن يتحقق ليصبح حقيقة ولا بد أن يأتي اليوم ليخترع أحد أبناء بلدنا حشوة تماثل الكومبوزيت بجمالها والأملغم في عمرها ومقاومتها وليس هناك شيء مستحيل وننتظر هذا الاختراع .........
مع كامل حبي MOHAMED SADEKLY

sadekly
لا هو من ناحية النظري لا بحب الأملغم ولا الكمبوزيت ولا حتى الحشوات المصبوبة .. بس قصدي من الناحية العملية .. لما بتخلص من حشوة الكمبوزيت بتطلع على طاولتك بتلاقيها نضيفة تماماً .. مو متل هداك اللي ما بيتسمّى الأملغم بتلاقي حالك كأنو كنت بحرب ..
توقيعي حلو .. مقدم لكان
على فكرة .. دار ببالي سؤال .. لمّا كنت عم أقرأ تلخيصك لمفهوم الكمبوزيت والأملغم شقد شفتها شغلة بسيطة .. ليش نحنا بالكلية وقت بندرسهم بنلاقي حالنا كتير عم نتلخبط .. يمكن رهبة الفحص والمذاكرات إلها دور بالقصة ..
قلتلّي كومبوملغم .. إش هالتسمية الخلابية هي .. ليش ما تقول ملغمزيت لأ كمبوملغم طلعت أحلى

Wesambassout
ليش هيك قلبك قاسي عالمرضى .. مو حرام .. طيب فرضاً إجاك مريض درويش ومعتّر وما معو .. معقول هيك ترفض تعالجه ..
طيب اعتبرها صدقة .. بكرة الله بيعوضك عنها أضعاف أضعافها ..

أنا من ناحيتي أسعاري هي اللي بدي أشتغل فيها (ويمكن متل ما قلت انت يا صداقلي آخذ أكتر) لأنو أنا زلمة ما بحسن بشتغل غير على الأصول

يعني قصدك إنو الأصول لازم تشتغل وتاخد حق الحشوة كاملة من المريض واللي ما بيعمل هالشي رح يطير اسمو من السوق .. ليش الشغلة بتنقاس مين بياخد أكتر .. وإذا ما عملت هالشي بيكون الطبيب مو محترم نفسه ومكانته ؟؟؟

مرحبا...
أنا يا زوربا أؤيد رأي صادقلي بإنه لكل حشوة استطبابها، بس كمان برأيي إنه رأي المريض مهم، فإذا كان نخر كبير وصنف أول على رحى فالاستطباب أملغم، لكن إيش أعمل إذا المريض مصر على حشوة تكون تجميلية؟ وكمان إذا إجاني مريض مدخن أسنانه كلها مصطبغة بشكل رهيب، ولثته منحسرة عن جذور سوداء، فأنا ما أتوقع أبداً إني أفكر بالكومبوزيت للصنف الأول على رحى. وكمان حكي ابو السوم صحيح بأنه بكرة بيجوز نغير رأينا، وكل مجتمع بيطلب شي معين.
ويا صادقلي عجبتني فكرة الكومبوملغم، والله كريم، نشوف مادة بجمال الكومبوزيت وقوة الأملغم وتكون متل ما قلت على إيدين حدا من بلدنا، والبركة فيك محمد.
مع تحياتي...
أخوكم:
عبد الحليم غريب

المجد
والله يا أنسة المجد إنت غلطانة كتير من ناحية الأسعار وبكرة بتشوفي لما بتصيري في العيادات السنية (هي إذا ما غيرت الكلية ) وبتشوفي شلون بدو ينكسر ظهرك لبين ما تخلصي تجريف العاج النخر (يللي الدكاترا ما بطيقوا .... طول الجلسة بيقولوا جرف جرف جرف جرف بتخلص الجلسة وبتيجي الجلسة اللي بعدها :جرف جرف جرف ( وهيك بياخد التجريف ثلاث جلسات وبعدين بكل بساطة والدكتور هو عم بضحك بقلك (حولي على اللبية لأني اللب مكشوف من زماااااان ) وإذا ما نكشف بتكملي كسر ظهرك بالتبطين بماءات الكالسيوم التحفة اللي مرة بتطلع مبرغلة ومرة بيتصلب إنت وعم تمزجي ومرة ما بيتصلب أبداً ومرة ما بتلاقي ماءات كالسيوم أبداً (ما بيعطوكي لأني خلصت الجلسة) وأنا شخصياً تعقدت من شي إسمه تبطين من ورا هلماءات الكالسيوم التحفة الموجودة في العيادات .. هلأ بلا طول سيرة إذا تبطنت معك الحفرة منجي ع الأملغم إللي نصو زئبق وبقضي الجلسة كلها وأنا عم بستنى الحشوة للتصلب من شان اصقلها وأخلص والله شي بكسر الظهر يعني 800 ل.س قليل على الحشوة والأيام ستثبت لك كم أنت اخترت مهنة صعبة جسدياً وعقلياً ونفسياً وختى خطرة عليك صحياً...
عبد الحليم
شكراً لك يا صديقي على تفاؤلك بي بهذا الشكل وأنا رح أعمل جهدي لأفيدكون متل ما عمبفيدكون أثناء الدراسة إن شاء الله رح أفيكون بعد التخرج وما بدي منكم إلا الدعاء والدعم
والله بيعين M.S

sadekly
يا سيدي إذا مشان الاسعار حدث ولا حرج .. الدفع الي بيدفعوه الطلاب مو قليل بنوب ( وخصوصي إذا كمان فايتين موازي فوق حقه دقه يعني ) .. مرة اضطريت أنا ورفقاتي نشتري كمبوزيت .. ودفعنا هالمبلغ الفلاني بس مشان نلحق نحشي بالبيت مشان نقدر نسلمه بالجلسة القادمة ..

(هي إذا ما غيرت الكلية )

ما في أحلى من كليتنا ما بغيرها لو شو ما صار بإذن الله

طيب ليش ما بتدبروا حالكم .. بتعرف المتل اللي بيقول ( المالو حيلة قطع راسو أَولى ) .. طيب طالما الحشوة فيها زئبق كتير .. اعصرها وطالع الزئبق الزايد منها ..

والأيام ستثبت لك كم أنت اخترت مهنة صعبة جسدياً وعقلياً ونفسياً وختى خطرة عليك صحياً...

وكمان رح تثبتلي الأيام كم أنني اخترت مهنة إنسانية جداً ..

بتعرف من فترة حطينا اسامي بديلة لبعض المخابر أنا ورفقاتي ..
مخبر التيجان : اسمه مخبر عرّض خط الإنهاء ..
مخبر المداواة : اسمه مخبر عمّق الجدار اللبي ..
وهلأ ما بعرف اش اسمها المادة اللي حكيت عنها .. رح نحطلها اسم : جرف العاج النخر
يالله بالتوفيق للجميع وإن شاء الله ما يحكيلنا هلأ المشرف .. لا تطلعو برة الموضوع