يوميات طالب في العيادات السنية :

زملائي الأحبة ، بعد نهاية هذا الأسبوع الشاق والمضني في العيادات السنية ، أود أن اتحدث قليلاً كيف أقضي أيامي في العيادات السنية والتي تكون عامرة بالأحداث والمشاكل :

يوم الأحد : يبدأ الدوام كل يوم أحد ومن الساعة الثامنة صباحاً ، وأستقبل يومي كعادتي بابتسامة مشرقة وبالرغم من كوني ما بكون شبعت نوم وصحيت غصب من عني مشان أداوم ، أجلس أمام شاشة الكومبيوتر صباحاً مشان أشوف إيميلي حتى لو كانت الساعة 8 إلا خمس دقايق ، ما بروق الصبح إلا إذا شفت إيميلي وأشرب كاسة نسكافيه وأدخن ثلاث سجاير ..
بعد ما أروق وخلص يمشي الحال بتذكر إنو لازم أعقم أدواتي ، ومشكلتي أنا إنو ما بثق بتعقيم الكلية مشان هيك باخذ الأدوات معي على البيت وبعقمون بالفرن عندي (مونون شوي معلش) ، المهم من هل النقطة ببلش المزاج يتعكر وبطلع على الساعة وإذ بتكون صارت الساعة سبعة وربع أو نصف ، وعلى حد علمكون الأدوات بدون على الأقل تعقيم نصف ساعة على الحرارة 200 ، وببلش أركض يا جماعة .. بنظف هل الأدوات وبحطون بالفرن ، وعلى حسبتي بقول يالله خلصنا ، وإذا بتذكر إنو الصدرية البيضة (واللي مفروض تكون بيضة) مجعلكة ونزل عليها آخر يوم بقعة مثبت أو مظهر أو بطيخ مبسمر من الكلية ولازمها تنظيف وكوي ، وبرجع على الفنك والركض وبجيب هل المريول وبغسلها على إيدي على السريع وبقعد بكويها لأنو لازم متل ما بتعرفو الواحد يكون موديلو مرتب خصوصي قدام هل المرضى التحفة ..
وأنا عم اكوي بتذكر إنو لازم أرتب أغراضي ، بخلص كوي على السريع وبروح بطبق الأدوات وإذ بالساعة بتصير 8 إلا خمس دقايق ، أوف تذكرت الأدوات بالفرن لسى وبدون كمان شي 5 دقايق ، وبدون تبريد كمان 10 دقايق ، المهم بلبس على مهلي وبقعد بدخن سيجارة تانية وهيك لحتى تصير الساعة 8 وعشرة بكون كل أموري تمام وبطلع من البيت على أمل اللقاء بتكسي أو سرفيس ينتعني رأساً للكلية ..

هذا الحكي كلو ولسى ما بلشنا الحكي عن العيادات السنية ..

المهم .. أنا وعلى طبيعتي زلمة مروق ... ما بحسن أفوت على العيادات إلا إذا كنت مروق ، فبستقبل باب العيادات بابتسامة مشرقة وآخذ نفساً عميقاً قبل الولوج لأروقة العيادات ، فأرى وجوه زملائي الطلبة واقفين على العيادات عم يقعلو المرضى ويقولولن ( يا أخي والله ما في مجال نشتغلك عنا فائض من المرضى والمواعيد كلها محجوزة ، ومساكين هل المرضى ما عم يلاقو مين يشتغلون) ، المهم عند دخولي للعيادات الرائعة ، ورؤية وجوه زملائي المنتعشة من الصبح ، أرى في عيونهم نظرات استغراب ودهشة عن سبب تأخري ومجيئي بعد ثلث إلى نصف ساعة من الدوام (كالعادة) وبقولو بقلبون (لعمى شو رايق هل الزلمة كني الظاهر ما عندو مريض) وما بيعرفو هنن إنو أنا بكون متأخر وبحسبو أنو بكون مخلص حالاتي ومسكر كل بطاقاتي وأعمالي بكل المواد ...

مالنا بشو بفكرو الشباب .. المهم أنا مروق ..

بدخل من الساعة 8 والربع صباحاً وأنا بكامل صفائي الذهني وقمة الرواق لقسم التشخيص اللذي أستقبل به أول يوم من كل أسبوع ... وألج لغرفتي وأنظر إلى كرسيني فأراه فارغاً .. بقول لحالي يالله بس نحط حضور .. وأدخل غرفة الدكتور المشرف .. دكتور أنا اتأخرت شوي وبدي أسجل حضور ... هون بقى الدكتور ببلش زف البهدلة وببقى عم اناقشو لحتى يقتنع ويحطني (تأخير) يعني بتروح نصف علامة على كل تأخير .. بقول لحالي معلش منطالع الفرق بأعمال السنة ... وببلش هون نسبياً أتوتر ..
بفرش أدواتي على الكرسي وبطالع بطاقات التشخيص وبعد حالات التشخيص اللي عندي ... يالطيف لسى مو مخلص غير كم حالة ...
يا فلان انت كم حالة مخلص ؟؟؟ بجاوبني ضعف حالاتك ... لعمى ... شو هل الحكي ... هون ببلش التوتر والاكتئاب يسري في جسدي بقوة .... الساعة لسى 8 ونصف صباحاً ..
هون بقى بطلع لبرى وببحت بحت بالعيادات على مريض لأشخصلو ، بس عبثاً ، وعند هذه النقطة أدرك مغزى النظرة التي يرمقني بها الشباب وأنا فايت متأخر على العيادات .. وببلش أبحت على مريض ، موبس أنا بتلاقييني هيك ، لأ ثلاث أرباع الشباب والصبايا عم يبحتوا متلي متل عش الدبابير بتلاقونا عم نركض ، وبعد عناء ربع ساعة بضاعة ..... وقف لاقيتو على الزاوية .... واقف ختيار مهرهر عم يدخن سيجارة أو بالأحرى نسيان السيجارة على تمو من خمس دقايق لأنو مو نافضها من أول ما شغلها . ... بقرب لعندو بكل وثوق وقوة لأنو الواحد لازم يفرض شخصيتو ... وبقلو صباح الخير يا حجي ... وإذ بالحجي بيطلع نايم ... لعمى على هل القصة ... بهزو هزتين بإيدي وبفيقو .. بقلو مرة تانية (لأني أنا زلمة كتير جنتل) صباح الخير عمو ... بطلع هيك الحجي فيني وبقلي ... نعم إش بدك ؟؟؟؟ بقلو : لأ بس هيك عم صبح عليك وحابب أسألك إذا واعد حدا من الدكاترة .. هون الحجي بيفهم علي وبهز براسو من دون ما يحكي (ليش ما بيحكي ما بعرف عجب مو متعلم الحكي ولا لأنو السيجارة لسى ما طفيت بتمو ولا لأنو نعسان وخربتلو نومتو ، مابعرف) المهم بهز براسة لفوق ولتحت وهون أنا برتبك ما بفهم عليه ، عجب قصدو مواعد حدا يعني ولا لأ ؟؟ ما بعرف .. بتركو للحجي وبكمل الرياضة الصباحية بالتدوير على مريض (تشخيص).

وعند الوصول للساعة التاسعة .. أرى كومة من الأطفال متجمعين عند الزاوية بزيهم الأزرق المميز ، أقترب منهم وإذا أراهم يلعبون (الكلال) ما بعرف إذا فهمتو المعنى ( بس الكلال هي كرات صغيرة من البللور ، لعبة ممتعة جدا يمارسها الأطفال دون سن العاشرة) بقرب عليهون بلكي أسحبلي شي واحد منن مشان أشخصلو ، وبقلون صباح الخير يا شباب ، مع أي دكتور جايين ؟؟ بقومو بجاوبو علي (أحسن من الحجي ) وبحكو معي : والله نحن مع الدكتور أو الدكتورة الفلانية .. ممتاز (أصرخ في داخلي) ، بقوم هون بدي أعمل عملية عرض وإغراء للطفل مشان أشخصلو ، بقلو طيب شو رأيك يا حبيبي (بعد ما أكون استنضفتلي شي طفل ، بس مو بالمعنى الظاهري ، قصدي العكس يعني بكونو سنانو مفشكلات ومكسرات ومافي نخر بهل الدنيا إلا فيون) المهم بقلو شو رأيك تجي معي أفحص سنانك ، بيصفن فيني الولد وكأنو ما فهم علي أو إنو عم يفكر ، وبقلي طيب ماشي (كأنو عم يقول بقلبو أمرنا لله لنروح نشوف شو بدو هذا أبو المريولة البيضة) .. وأصل هنا لمرحلة من الانتعاش والتجدد في روحي ونفسيتي وعدم فقدان الأمل ..

الساعة 9 وربع .. جلس الطفل على الكرسي ، وشمرنا عن إيدينا ولبسنا الكمامة وغطاء الرأس وقلنا يا الله ...
وبظرف نصف ساعة بكون لونت البطاقة وهلكت فيها لأنو بكون الله بعتلي طفل عندو إطباق مختلط وسنانو منخورة كلها وشي فايت بقلب بعضو ، وما عدت أميز بين السن اللبني والدايم ، وكلو بكفة وتصنيف الإطباق عندو بكفة تانية .. يا لطيف ، وبخلص من التشيخص تبعو على الساعة 10 إلا ربع ، بفوت وبقول للدكاترة المشرفين ، دكتور .. دكتورة ... حدا منكون يجي خلصت التشخيص ...
وهنا أشهد وبصراحة تعاون الدكاترة المشرفين في هذا القسم ، بيجو بكل صدر رحب بس في عندون مشكلة صغيرة هلق بقلكون عليها..

بتمسك الدكتورة المراية والمسبر وبتبلش ، بتفصفص المريض معي شقفة شقفة ، الحمد لله تشخيصي 90 % منو صحيح ، ونحن مندخل على تصنيف اللويحة والقلح واللثة ، بحس حالي مالي علاقة بشي ، شي بتقلك الدكتورة هون اللويحة 2 بكون حاططها أنا واحد ، وهون بتقلك مافي قلح وبكون حاطط في قلح ، وهون بكون أنا متفهمن وحاطط التهاب لثة بسيط لأنو في طور بزوغ الأسنان على حسب ما فهمت من أحد الدكاترة ، بتقلي الدكتورة هذا مو التهاب هذا احمرار بسيط بعني صفر مو واحد ، وانا واقف جنبها وعم أشطب بهل الأرقام وبغيرها ، بس هي مو مشكلة لأنو على حسب ما فهمنا أنو هذول ما عليهون علامات لأنو شغلتون مشربكة شوي ..

بتخلص الدكتورة وبتوقعلي على البطاقة .. وهنا اتنفس الصعداء أنا وبقول الحمد لله هي حالة تشخيص جديدة ..

بتطلع على الساعة .... يالطيف الساعة 10 و خمسة .. بقوم بقلو للطفل يالله حبيبي الله يعطيك العافية روح لعند رفقاتك ، وهون ببلش الزمك الصغير وبتنح ما بدو يقوم لأنو عجبو الكرسي ( خصوصي انو الكراسي لونها زهري وبتغرف القلب) ، ولك ياعمو .... يا حبيبي .... يا عيني ... الله يرضى عليك انزل ، بكون عم أحكي معو وأنا عم ضب غراضي بدي أروح ... المهم أحيانا بعيفو على الكرسي وبمشي (عم أمزح) .. بتكون صارت الساعة 10 وربع .. لمخبر التقويم ، ونفسيتي هنا مرتاحة ومبسوط على حالة التشخيص الجديدة ..

وبدخل مخبر التقويم .. صباح الخير يا شباب ........... أحلى شباب والله كلون مشرقين من عند الصبح إلا ماندر.. شو أخدتو تفقد .. بجاوبوني : إيه هلق من خمس دقايق .. بفوت عند المحضرة وبكون أحد الدكاترة قاعد .. آنسة أنا هلق جيت .. بتقلي بعرف هلق جيت شو بدك ، بجاوبها : لأ ما في شي بس مشان الحضور ... بطلع فيني الدكتور وبقول : عرفتك انت اللي بتتأخر دايما ... ما بدك تبطل هل الإهمال والعادة ... الحق معون كنت تحت عم أتسلى وكزدر بالكلية لأنو ... وبعد عناء ومجادلات طويلة .. بنجح في تسجيل الحضور ...
بجلس على الكرسي في المختبر وبتنفس الصعداء ... أووووووووووف ...
بتقلي شريكيتي (مارسيل) ولك شوبك من الصبح عم تتأفأف شو صاير معك .. بقلها لأ مشي الحال حطيت حضور ... بتقوم بتقلي لكن لاتفرح كتير (ومن عادتها شريكتي إنو بتخبي لي الأخبار الرائعة وما بتقولها إلا وأنا بكون عايف حالي) بتقلي : لا تفرح كتير هلق عندنا تسليم أعال ومذاكرة ضمات و .. ووووو ....
يا خالق السموات والأرض ... أنا شو ذنبي بهل الدنيا ... يعني لأنو دخلت طب أسنان هيك لازم يصير فيني ...
بيدخلك أحد دكاترة التقويم فارداً عضلاته علينا لأنو نحن قدامو (حمير) بالتقويم ، معلش اسمحولي بهذا اللفظ ..
وببلش فينا ... جيب تقريرك يا فلان ودراساتك يا علان ، وانت جيبلي أعمالك وضماتك لنشوف شو مشتغل ..
وهون كل طالب بياكل زفة وبهدلة على طولو وعرضو على هل الشغل والتقارير مع أنو منكون اتبعنا نفس الخطوات اللي قالولنا عليهون بالدراسات التقويمية ، بس شو بدي أعمل إذا كانت هل الدراسات كلها غير دقيقة وغير مظبوطة بالـ 100 % ... المهم بقوم من قدام الدكتور وأنا حاسس حالي فعلاً أطشم واحد بهل الكرة الأرضية بالتقويم ، مو بس بالتقويم بل بطب الأسنان كلها ..
والشي اللي بيزعجك أكتر، أنو الدكاترة نفسون بقولولك هي الدراسات ابني كلها غير دقيقة بس أولية ، وبكرة إذا دخلتو اختصاص تقويم عنا هون ، أول شغلة منقلكون ياها أنو كلشي تعلمتوا بالرابعة والخامسة كبو ورى ظهركون !!! أوف لكن ليش عقدنا حالنا وعملنا كل هل الخرابيش ....؟؟ قسماً بالله حرقولنا راسنا ..
منطلع من مخبر التقويم بعد إعادة كافة الدراسات التي قمت بها ، وبقول لحالي خلص مشي حالون لازم ، وأعود لنفسيتي المتفائلة والمبتهجة لأنو صحيح أكلنا بهدلة بالمخبر ، بس أنجزنا أشياء عظيمة وصححنا كل الأخطاء بالدراسات الحالية ..

وبعدين ببلش الصراع مع النظري ، وبتبلش محاضرات النظري ... والواحد بكون نصف مستوي بيقعد بهل المدرج اللي بكون شغال فيو المكيف على أساس على الحامي بس بيعطي هوى بارد ، بس بكل الأحوال وقت الواحد بيلفحو الهوى والأضوية بتكون نصف مطفية ، تأتي هنا الناعوسة في منتصف المحاضرة وكل شوي بهز براسي مرتين تلاتة حتى بحس الدكتور أو اللي حولي أنو أنا زلمة مخووت أو نص أهبل .. ومنستمر بمحاضرات النظري (يمكن تقولو لعمى شو جدبة حدا بيحضر نظري) بس أنا كنت من الناس اللي بيفضلو فنجان القهوة عن محاضرة النظري ،بس الوضع بالرابعة طلع غير ، وكل محاضرة فيها شغلات كتير هامة ...
المهم منخلص المحاضرات على الساعة أربعة أو أربعة وربع تقريباً .. ومنحمل حالنا ومنلملم بعضنا ومنروح على البيت ، بآكل لقمتين وعلى السريع بقول وينك يا فرشة ... بنام للساعة 8 أو تسعة وبعدين بفيق مشان ألاحق المريض الفلاني واتصل على المريض العلاني ، وهيك لحتى تصير الساعة 12 بتذكر إنو ناقصني هذا الغرض وهذا الغرض ولازم كنت أروح عند المخبر مشان هي الشغلة وهي الشغلة ... بس رغم كل هذا أبقى متفائلاً ومبسوطاً وذو نفسية مشرقة منفتحة لاستقبال اليوم التالي .......
وهذا اليوم من الأسبوع بكون أهون يوم (بالنسبة إلي ) لأنو مافيو ضغط عملي ، بس انت استنوا أحكيلكون على الأيام اللي بعدو ...
يتبع .....................

لا فضّ فوك يا وسام أحسنت الوصف

وسام
شو هاد يا طلاب الأسنان .. مبدعين بالفطرة ولّا هالإبداع وليد لهالمعاناة اليومية ..

عن جد على قد ما بسمع منكم حكيات عن صعوبة تدبير المرضى .. من هلأ رح أحجز أطفال العائلة كلها بالإضافة إلى أهاليهم .. بس مشان ما أضطر أشحد من هاد وهاد ..

وبكرة إذا دخلتو اختصاص تقويم عنا هون ، أول شغلة منقلكون ياها أنو كلشي تعلمتوا بالرابعة والخامسة كبو ورى ظهركون !!!

إش عم تقول .. وليش بقى لحتى يفتلولنا راسنا بهالشغلات وبالأخير بطلع غلط ..
ذكرتني بمخبر التعويضات كل شي بيعلمونا ياه .. بيعملوه بالعكس تماماً بمعهد التعويضات ..
هي عدا عن تضارب أفكار الدكاترة نفسهم بنفس المخبر .. وإنت بقى الفهلوي لازم لحالك تستنتج مين الكلامو صح ومين الغلط ..

الله يعينكون ويعيننا كمان ..
عم نستنى يوم الإثنين لنشوف شلون بتقضوه ..

أول شغلة بعملها بيومي هو إنو أفيق لأني إذا ما فقت بتروح علي وبكون الله أخد أمانته
يعني أنا بكون مطبق غراضي قبل بيوم ومجهز حالي ع الـ 24 ومتوقع إنو أسلم جهاز التعويضات اليوم (خلص حاج يعني) بعد ما أفيق بتذكر إنو ما حسيت على صلاة الصبح بقوم توضا وبصلي وأنا ساجد بدعي الله يسر علي هاليوم
بعدين بتذكر إنو لا زم أفيق واحد بروفيسور معو دكتوراه من ألمانيا ألا وهو مريضي (لأني بيقلي إذا ما فيقتني ما بجي ) بتص فيو بضل التليفون عم بيرن ساعة ليرد (ألوووووو) وهو عم يتاوب وأنا بكل أدب (صباح الخير خاي) وهو(صباح النور أهلين مين؟؟) بقلو أنا محمد (لسا مالي متعود أقول عن حالي دكتور) بقلي مين محمد؟؟؟؟ بقلوا قصدي الدكتور محمد بيقلي إيه إش بداك !! بقلوا منشان (تتفضل) لأسلمك الجهاز اليوم بقلي إيه تكرم عينك (أبو حميد)
على كل حال هادا كلو وأنا لسع لا لبست وما شربت قهوة ولا صحصت والساعة صارت 7.5 (يعني بالمشرمحي بصير يوصل مريضي قبلي) ماهي مشكلة بلبس بسرعة وبوقف بقا على المراية وبزبط شعري وهادا أكتر شي بيطول معي بصرحو من هون بتخرب من هون (لكا !! من شان تكمل) وبالأخير بزبط شوي بنتع جنتاية السفر تبعيتي إللي بلا يمين تقلا شي 10 كغ على الأقل وبنزل (بيتي بنزلة الزبدية) بطلع الطلعة وبوصل عند موقف الباص وشوفو لألكون على الشوفة من عند الصبح شي 200 واحد واقفين بيستنو ست الحسن (الباص) إللي عم يتمشى تمشاية على الخط (يا خيو فاضي) ولو تشوفو شو بيصير لما بيجي باص وخاصة لما بكون أنا قدامه بقا شي بيجي بعيني وشي بيجي براسي وشي بيجي.... وعلى كل بطلع بهالباص وبتعفس تعفيسة الكلاب (سامحوني متل ما سامحتو وسام) بقطع هالبيليت وبضل واقف طبعاً لأني ما في محلات .. منطلع من الموقف الأول بكون امتداد الباص mpeg منوصل على الساحة منصير Mp3 من كتر ما بيعبي عالم عالطريق (مخلل) بنزل وبدي أركب بسيرفيس الشمالي وهيك لأنزل على العيادات السنية وأدخل ورأسي مرفوع ومتفائل وببدى الركد على الخزانة إللي وقت اللي بفتحها بتذكر سوء الجمعة (عجب ليش؟؟) وطبعاً بقوم بالتنقيب عن أغراضي وبالنهاية ما بلاقي شي (لأني كلو مستعيرينو الشباب ) وبفتل عالشباب لأبوس إيديهون ليعطوني شوية أجينات أو ملوقة..
بطلع عالتفقد وطبعاً بتسجل حضور (ما بحب المشاكل) وبيجي المريض عالدقيقة) الحمد لله لهون كلشي تمام بحط الجهاز بتمو !!!!!!!!!!!!!!! كأني هادا الجهاز مو إلو بكبس ما بيمشي الحال روحج بقا يا محمد انزيل على الطابق الأرضي لتجيب القبضة بروح عالأصنصير (طبعاً نحنا مللين عنا أنصنصيرات كل أصنصير بيسع بقرتين وفيل) بلاقي نفس المنظر إللي شفتو عند الباص الصبح (لأني من 3 أصنصيرات في واحد بس عم يشتغل وكأنو كان علقان هديك اللحظة والزمور الهيلب كان شغال ) ما في قدامي غير الدرج (هي أول نزلة )
بجيب القبضة وبروح بستعير موتور وبركب القبضة وبحف شوي من الجهاز وبحطو بتم المريض وبينزل !!! تمام .. أصدي لهون تمام.. عض .. بيعض .. لعما عيلي شوي (شوي = 5ملم = نصف السماكة اللثوية الطاحنة للأسنان) روح سحال ... وأنا عم بجرب بتجي شرطة المرور لعند الكرسي إللي جنبي وبتكبلو مخالفة لزميلي لأنو ما هو حيطط نيلونة على الطاولة الدهب إللي جنبو . وطبعاً بتعرفوني ما بحب المشاكل نزلت جبت نيلون وحطيتها على طاولة الذهب (عن جد ذهب أصلي عيار 24 تعو لعنا وشوفو) وأنا عم بنزل الجهاز بيجي صبحي وبذكرني إنو في إختراع اسمو ورق عض من شان تنزيل الجهاز وطبعاً أنا سفقت حالي على جبيني وقلت يا لطيييف على هالنسوة ونزلت (هي تالت نزلة) ورحت لعند أورور وجبت ورق عض وقلتلا سجلين علي (حسابي صار بلاوي) بحط ورق العض وبطلع عيلي بروح عالموتور وبشوف نفس الشوفة إللي شفتها عند الأنصنصور إللي شفتا كمان عند الباص 700 واحد بدون يخفضوا الإطباق بستنى بقا دوري وبالأخير بينزل وبدي أسلمو بحط إيدي على ورقة الاستلام ما بشوفها وينا ياحزركون ؟؟؟؟ (امتحن نفسك3) هي في الخزانة التي هي في الطابق الأرضي يعني بدي أنزل مرة رابعة لأجيبا جبتا وحطيت المريض على الكرسي وشاف الدكتور الجهاز ومشي الحال وسلمتو وهيك صارت الساعة عشرة و10 لملم غراضك عالسريع وروح على اللبية مناخد تفقد ومنبدا توسيع بهالأقنية (الرحى السفلية أخدت معي أربع جلسات 3 للتوسيع و1 للحشي طبعا صرت أحضر إضافي من شان هالرحى) هيك على الأسنان المقلوعة وبكرة على المرضى شلون ما بعرف (قلع وإعادة زرع)
بالأخير سلمنا هالتعويضات وهالمداواة وإجا وقت النظري (يعني إجا وقت النوم) بشغل هالمسجلة (لتسجل المحاضرة وبسحبها نومة (نايم وعيوني مفتحة متل السمكة) وطبعاً بدي أنزل أنا هالمحاضرة (لأني إذا ما نزلت ما حدا بينزل ) فوق كل هالهم عم بنزل تلات مواد (تقويم وتشخيص وتعويضات ) وعم بشارك بتنزيل اللبية والتخدير والقلع والتقويم العملي ..
يعني الحمد لله على كل حال .. تعب بتعب الدنيا كلها تعب .. يللا كمل أبو السوم لا تواخذنا قاطعناك
ســــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــلام....

أنا رح أحكي عن أكره يوم بحياتي يوم الاتنين
ببدا نهاري ساعة 7 ونص تليفون لشريكي العظيم اللي ما فينا نقطة مشتركة غير النوم :
بحكي معو بحسسني وكأنو مفيقتو من أول الضو مو الساعة 7 بسألو ( نازل شريك عالكلية ) إي نازل شي عشر دقايق
باخد حالي وطبعا جميع مشاريع المكياج وتزبيط الحال والشعر منسية والكعب ملغي لأنو منندبح بالكلية فبنزل منكوشة وموديلي هربانة من فيلم رعب وبنزل عاللبية ...
باخد حضور وطبعا عشر مرات بصلح للمخبرية لفظ أسمي عبث ...
أنا مرسيل مو مارسيل أو مراسيل أو برسيل ؟؟؟؟؟
وطبعا العشر دقايق تبعيت شريكي بيصيروا ساعة المهم ... بالجلسة الوحدة مضطر تصور خمس ست صور ولحق إذا بتلحق وما في طفرة ما بتتركا فيك الأشعة
بيجي شريكة والابتسامة المشرقة على وشو الصبوح وما نو عرفان شي
وأنا من الصبح موجز الأنباء
بعدا تعويضات ....مخبر بيحسسونا أنو ولاد قال إذا تأخرنا خمس دقايق بيحطوا الفئة كلا غياب إلا أذا حدا اتشفعلنا ؟؟؟ وبسكت هيك وبتذكر سمعانة هالكلام من قبل
أي صح معلمات صف الأول هيك كانوا يقولولنا والله بعد زمان
بعدين بستنا المريض ؟؟؟ والمريض لا حس ولاخبر
وتبدا التكهنات ؟؟ معقول ما يجي ؟؟ معقول مات ؟؟ معقول انتحر ؟؟
وتبدأ الدموع ( تصورو دكتور عم يبكي على مريض ؟ ؟؟؟)
وبعدا بيجي المريض مع ابتسامة ويتحجج بالطرقات وبعدا بتجي المشكلة الأهم الكرسي وبعد الانتظار يحين دورنا على الكرسي منخلص ننتظر صبحي ؟؟؟ ويا صبحي ما عم ينزل الجهاز
وبعدا بدك تتذكر هالشقفة الورقة تبعيت الاعمال اللي الله ما طعمن يسووا كرتونة وين محطوطة ( أنو ليش مابيتركوا عندن ؟؟؟ ) وبعدا بسمع موعظة من شريكي عن فوائد حضور النظري ومساوئ الغياب بقول يلا يا بنت نظري نظري
بحضر بنام شي ساعة وبطلع

يوم الاثنين :
أصحى كعادتي على الساعة 7 تقريباً وغالباً على رنة الموبايل (اللي بلشت أتعقد منها) بتطلع هيك ، أوف مرسيل ؟؟؟ شو بدها من الصبح ؟؟؟ بعدين بتذكر أنو عم تفيقني مشان أنزل على الكليةلأنو دوامنا على الساعة 8 كالمعتاد ...
ألووووووووووو .. تقولها مرسيل بلكنتها الفريدة ... أهلين ميمو صباح الخير ... شو هلق فايق ... إيه ...
نازل على الكلية ............... يالله ربع ساعة بكون بالكلية إن شاء الله ... ومنسكر هل التلفون..

بقوم من الفرشة وكأنو واحد عم يجرني جر لأنو (وخصوصاً بالشتاء منظر الجو في الخارج خلاب وبيعقد ومع زخات المطر وعدم وجود الشمس ) يعني الواحد بيبتهج من على بكرة الصبح ...
ونفس الحكي تبع كل يوم ... نسكافيه ... دخان ... إيميلي ... مشان تحصيل الرواق الصباحي ...
بس بجي قلبي بعصني على الساعة 7 ونصف ... لعمى نسيت أعقم أدواتي .... بعدين بنط من الفرح لأنو اليوم بس عنا لبية وتعويضات ، وشغلة التعويضات كلها مراية مسبر ... بكون زايد عندي من اليوم السابق من الأدوات المعقة (هذا إذا ما استعار حدا من الشباب أو الصبايا بضعاً من أغراضي .. وهي لحالها قصة تانية إلنا حكي فيها ) ... المهم ... الوضع تمام ... أدوات موجودة ، يالله لكن لنطبق غراض اللبية ... هون بطلع أوف .... ولك نسيت أنو اليوم لازم أحشي الضاحك ، وأبلش بالرحى السفلية ... يالطيف ..... ولك ما عندي رحى سفلية .... يالله مندبر شي وحدة من الشباب ...

خرجنا من البيت ووصلنا للعيادات السنية بخير وسلامة وعلى العادة دايما متأخر ... ونظرة الشفقة والاستغراب تطل من عيون الشباب (الوقيفة) على العيادات السنية واللي الله يوفقن ما خلولنا ولا مريض ... صباح الخير يا شباب ... وأنا بكون عم أركض وألبس المريولة (وعلى فكرة اختصاراً للوقت والجهد صاير عم ألبس المريول بالبيت وبطلع فيها لبرى متل المهابيل ) ....
منقوف مننتظر هل المصعد ... وياعيني على المصعد يا صادقلي ... الواحد بيستنى سنة ليوصل .. بس أحسن بكون الواحد التقط أنفاسو .... وهو بيجي المصعد ... طبعا واحد شغال واثنين مصيفين ... منصير محشورين فيو ومننضغط مو MP3 منصير معفوسين عفس وتحمل روايح إذا ببتحمل ، هذا اللي يمكن بحياتو ما فرشى سنانو ، وهذا اللي صارلو اسبوع مو متحمم ... إلخ مع انو على أساس نحن من أرقى شرائح المجتمع ومنظر كل واحد لازم يكون TOP ، بس الحق مو عليهون .. أنا بعذرون ... هيك جونا وهيك وضعنا بالكلية ....
مندخل قسم اللبية ... والدكتور طبعاً صار حافظني .... بقولي ... "لليش" انت دايماً متأخر ... والدكتور مو حافظ من اسمي غير "لليش" ... بس الظاهر عاجبتو .. خليها تعجبو ويروق عليها المهم عم يحطني حضور دايماً ...
بدخل على الكرسي بشوف مرسيل مكتئبة .. ولك شوبك ... بتقلي : اليوم لازم نسلم العمل الثالث ، يعني الرحى السفلية .......... يا ستار .... لعمى لسى ما حشينا الضاحك .... وهون لحق إذابتلحق تصوير وحشي ، ومنفضي على كل عمل علبة أقماع كوتابيركا ... وبالأخير مناخذ هل الصورة للسن المحشي وبتروجيها للدكتور .... بقلك الدكتور ، ولك ليش هيك ... في تجاوز للذروة عندك بمقدار 0.000001 مم ، بس يالله معلش منقبلك ياها انت خلقة مصيف وما بتعرف تشتغل ...
يا سلام سلمنا العمل التاني ... مرسيل خلصت الضاحك وانت شو صار معك .. بتقلي وانا كمان ، وطبعاً بتكون الساعة حوالي تسعة ,.... تسعة وشوي ....
هلق منعلق بمشكلة تدبير الرحى ... وهون منفتل على كل طلاب الدفعة فرداً فرداً ، يا جماعة الخير .. في حدا حواليه رحى سفلية ... طبعاً كلون نفس الجواب ... ياريت رايد أخدمك .. والله مفي يا شريك .... وبعد شوي بكتشف إنو أحد الصبايا كانت مقطوعة من الرحى وشلون خلقت عندها الرحى بظرف تدوير ثواني ما بعرف ...
المهم بتصير الساعة تسعةونصف منكون الحمد لله دبرنا رحى من عبد الله مجدمي أو شعبوق الله يعطيهون العافية ... ولي على هل القصة .. لازم نحطو بالإكريل .... ومافي معنا إكريل ... منعمل جولة تانية على الإكريل ومنلاقي إكريل ... منمزجو ومندحش السن فيو ... وهون غير ربك ما بخلي هل الإكريل يتصلب ... هو الجو خلقة بارد بوظ ، والإكريل اللي صاير بين إيدينا كلو ...بـــــــ .... بـهوي ..... وما بيخطرلو للأكريل يتصلب إلا لبعد ربع ساعة بتكون صارت الساعة عشرة إلا ربع ...
دكتور بدي أستلم الحالة ... بطلع فيني الدكتور .... (لليش) ولك ليش متأخر بأعمالك لهلق .... يالله روح افتح الحجرة على السريع ....
ومنروح لعند المحرضرة ... صباح الخير آنسة عطينا قبضة توربينية الله يسعدك .....
مافي ... مو زايد كلون موزعات .... لا إله إلا الله ... شو الشباب عم يتسابقو مين ياخد قبل التاني ...
منروح لجنب شي واحد عم يفتح حجرة ومنقلو شريك بدي أفتح الحجرة ، بيقلي طيب ... وبيرمقني بنظرة واحد بيقول للتاني هلق وقتك مو شايفني عم أشتغل ، بس أنا بقدر وضعو لأنو معو حق وبكون وضعو أبشع من وضعي ....
وقصة فتح الحجرة اللبية موضوع تاني (لأ لازم يكون صارت قصة تالتة) .... يا جماعة بتنزل بهل السنبلة وبتنزل وبتنزل وغير ربك ما بيكشف الحجرة اللبية ، عكس ما بصير معنا بالترميمية تماماً بكون الواحد ما لحق يشمم السنبلة تشميم بتلاقي المريض صار يولول بتجيب الدكتور ، بقوم الدكتور بكل قوة وتركيز بيمسك المسبر وبطلع وبيعين هيك على عاج لونو زهري ، وبيسفق المريض هذيك السفقة ويخرج السائل المحمر النازف من الحجرةاللبية الضحية ... بقلك الدكتور ... مبروك حولو على اللبية .... طبعاً بعد ما تكون انت صارلك ساعتين عم تحضرلو بالحفرة وبتجرف العاج النخر ...
المهم ما بدنا نطلع عن اللبية ... بعد معاناة شديدة ... بينكشف اللب ,, بروح لعند الدكتور بفرجيه الحجرة اللبية .. بقلي ... إيه صح النوم ضربت مفترق الجذور .... ولك يا دكتور كيف هيك .. ولك لسى الأقنية مو مبينة شلون ضربت مفترق الجذور ,, ما بعرف ... بقلي يالله خلصني .. اسبر القناة وصور وجيب الصور ة ... منحط هل المبارد .... ومنصور .. وجهاز التصوير بتلاقي عم يرقص بإيدك رقص ، مشان هيك منطر أحيانا أمسك القمع بإيدي وأصور ، بلا أشعة بلا بطيخ .. ماحدا بموت إلا الخلصان عمرو .... مناخذ هل الصورة .. وتاعى بقى حمض الصورة إذا كنت معلم ....
بتدخل على قسم التميض في اللبية ,, بكون المحاليل بايتة من يومين .. يعني بدك 10 دقايق بالمظهر و10 دقايق بالمثبت .. وعلى حظنا نحن بتخلص فئتنا بغيرو المحاليل لأنو بكونو الطلاب كفرو من المحاليل ولقولون حلة .. بس نحن مو قئتنا من الساعة 8 ، مسان هيك مناكلها ...
خلصنا التحميض ، وصارت الساعة 10 ومشي الحال ... منفرجيها للدكتور ، بيقلك اسحبال المبرد نصف ملي واشتغل الطول العامل على أساسو ... أنو يا اخي شقدون دقيقين هل الدكاترة ، بقلو يالله دكتور جلسة الجاي ببرد وبوسع لأنو صارت الساعة 10 ، هون بقوم بنط الدكتور الأولاني بقولي : "لليش" انت كتير متأخر بأعمالك شلون بدك تلحق ... ولك قسماً بالله صارت راسي يحترق حرق ... وفي الجلسات التي منبلش فيها برد وتوسيع وحشي بتلاقينا طالعين نازلين من قسم الأشعة لقسم اللبية وبالعكس شي 7 مرات بظرف ساع ونصف نو المحاليل ولالجهاز غالباً ما عم تكون عايفة التنكة ...
المهم بتطلع هيك على الساعة .. لعمى : 10 وخمسة .. وبتنزل على التعويضات وانت عم تلهت لأنو إذا بتتأخر أكتر من خمس دقايق مستحيل تتسجل حضور إلا بشفاعة على قولة مرسيل ..
وبيجي بقى الدكتور بعد ما ياخد التفقد بالتعويضات ، بيعطينا محاضرة طويلة عريضة عن الأخلاق الطبية وعن سلكونا الفاشل وعن ، وعن ......... بروحلنا شي نصف ساعة ... ولك يا دكتور المريض برة ولسى طبعة أولية ما اخذنا .... بقلي وليش لهلق مقصر رفقاتك سلمو أجهزتون ، طبعاً بكون واحد فقط مسلم جهازو وهو غالباً صبحي ، لكن شلون صارو كل رفقاتي مسلمين مابعرف ..
المهم بيخلي سبيلنا الدكتور على العشرة ونصف .. وين كالمريض ... لعمى كان واقف برة .. بتروح بتلف عليه الكلية كلها وما بتلاقي .. وبعد ربع ساعة فتل برجع على القسم هلكان ومكتئب وعايف التنكة وإذ بالمريض مزروع أما القسم عم يستناني .. ولك يا عمو وين رت صار لي ساعة عم دور عليك ... بقلي والله يا ابني لافحني البرد أمس ، وكنت ....... وطولت شوي بالحمام .. ما بدنا نحط حتى ما تقرفو ....
طيب أمرنا لله ... تفضل فوت لناخدلك طبعة .... وإذا الواحد ما كان مروق غير الله ما بيخلي الطبعة تزبط معك ، بجي لأقعد على الكرسي ، بلاقي واحد من غير فئة قاعد على الكرسي ... أبو شريك بدي أشتغل .. بقللي يالله خمس دقايق بس عم أخذ العضة ... بقلو : والله يا شريك أنا لهلق ما أخذت طبعة أولية ... مشان هيك يا ريت على السريع ... بيقعد هون الزميل العزيز 10 دقايق وبالأخير ما بيزبط معو شي بروح بيسرخ لصبحي بيجي بياخدلو الطبعة وبيمشي الحال ، وبستلم الكرسي على الساعة 11 ونصف ... يالله منمزج هل الألجينات ... ومنحطها على الطابع ,... وشي المريض بيسعل ، وشي بيحرك سنانو وشي بتقلب معدتو ، يعني مناخد الطبعة شي عشر مرات ولحق ألجينا لحتى بالأخير تطلع صبعة نصف ناجحة ، منروح منفرجيها للدكتور مشان يوقع عليها .. بتطلع هيك الدكتور ... وشو بدو يحكي ... يعني طبعة صف فاشلة بقلي عيدها .. يا دكتور الله يسعدك هي عاشر مرة باخد كبيعة فيها والساعة صارت 12 إلا خمسة وعندي بعدها تشريح مرضي عام (لأنو محروم من العملي تبعها هذيك السنة لأنو الدوام الساعة 8 الصبح) ، بطلع هيك الدكتور وبهز برساو هزتين أو تلاتة ، بقلي ، يالله صب الطبعة خلصنا هات لنوقع ، بقى هون شو بيوقع ما بعرف .. وبصراحة كنت بالأول أتضايق إذا ما كان علامة منيحة ، بس هق بس بدي أحط وقيع ، لأنو بعد أسبوع ونصف تسليم الجهاز واليوم لحتى أخذت طبعة أولية ....
منحط هل الطبعات بكفوف ومنفخون مع شوي ماء ، من أجل حفظ الطبعة من التشوه تبعاً لتعليمات الدكتور دباس .... ومنقلو للمريض عمو تعال يوم الأرباعاء الساعة 12 ظهرا لأنو عم أحضر مع غير فئة بلكي بلحق لأنو بكون عندي فراغ بين ال12 وال 2 ،بطلع فيني الحجي باستغراب ، وبقلي ليش ما خلصنا ، بدو الزلمة يستلم الدكة بظرف يومين .. ولك يا حجي لسى بدنا ناخد طبعة تانية ، بقوم الحجي بدير راسو للطرف التاني ، ومدري شو بيحكي وببرطم هون ، بقلو خير عمو شو في ؟ بقلي والله يمكن ما أحسن أجي الأربعاء بدي أنزل عند بيت أبني أنا عندون وبيتون بعدي من هون .. ولك يا عمو الله يوفقك ما بقى وقت ولسى عنا شغل كتير .... برجع بدير راسو للطرف التاني وببرطم مع حالو ، وبعدين بقول .. يالله ماشي الحال ،ن امتى الأربعاء ؟؟؟ بقلو الساعة 12 ، بقوم من عل الكرسي وهو مزعوج كيفو وبيحمل حالو وبروح وهو مودع بما استقبل به من حفاوة وتكريم من قبلي .....
صارت الساعة 12 و10 .. خلصت لملمت غراضي ونزلت على مخبر التشريح المرضي ، طبعاً في هذه الأثناء بكون في عنا محاضرة E ، وعم تنعطى بس شوي بدي أعمل ..
بوصل على المخبر بالزي المميز لطلاب العياداتالسنية لأنو بكون لسى نسيان أشلحو وماشكة بالنوات الطبعات بإيدي اليسار وحقيبة الأداوت باليد الأخرى .. يعني منظر كاريكاتوري ..
بدق باب التشريح اللي بكون مسكر ، بيفتحولي ، وطبعاً بكون الدكتور باسل مخلص نصف الشرح ، بس الزلمة بدخلني وما بيحكي معي ولا كلمة ، لأنو هو بطلع على منظري البائس ، بس بأشر بإيدو إنو فوت ...
وهون بقى يا شباب .. أحلى جلسة عملي ... براسك بكون مليون شغلة ومليون موعد لمريض والأمور النفسية والعملية والعاطفية والمادية وكل شي مخلوط براسك خلط متل الكوكتيل ، بما أسميه بـ (كوكتيل العيادات السنية) ، وخليك زلمة إذا بتفهم شو عم يحكي الدكتور .. أورام وسرطانات وبطيخ ومدري شو ... ومجاهر وبدك ترسم الدفتر .. يعني صرعة .. بس أبداً .. أنا دايما أحافظ على هدوئي وبسطي ورواقي ... بخلي جلسة التشريح المرضي بالنسبة إلي جلسى ريلاكس .. ببرد فيها اعصابي وبهدي حالي وبحاول أعزل مخي عن الوسط المحيط والدكتور عم يشرح ، وهو بخلص شرح ، منقوم أنا وعبد الله مجدمي اللي حامل التشريح متلي ، ومناخد إذن ننزل نحضر المحاضرة ، وما منشوف لا مجاهر ولامن يحزنون ...
مننزل على المدرج الكبير . بكون الدكتور خلص 3\4 المحاضرة ، منفوت على المدرج ، بقول الدكتور ليش لهلق يا أساتذة ... والله يا دكتور كنا بالتشريح المرضي العملي ... فوتو لنشوف ..
مقعد شاعة بضاعة وبتخلص المحاضرة ومنكون ما فهنا الطيخ من البطيخ ....
بروح الدكتور من هون على الساعة 2 ، ما بتلاقي غير الدكتورة إليزابيت على الثانية بتجي على المحاضرة ، ولك يا جماعة الخير خلونا نلقط نفس بس شوي ، ننزل نشربلنا شغلة أو ناكلنا بسكويتة ، بس هل الأمر حلينا لأنو صرنا نحسب حسابنا وندخل معنا البسكويت على المدرج ، وهو بخلص الدكتور محاضرتو منكون نحن على السريع مناكلون .....
بتخلص الدكتور ة وبيدخل بعدها مباشرة دكتور اللبية ، وخود افهم شي إذا بتفهم ... مخك بكون سكر وفصل ، والجو بارد رغم تشغيل المكيفات ... والواحد بكون نعس وفرط ، خصوصي برمضان ... يالطيف ..... وبرجع لحالتي اللي كل شوي بهز وبنفض راسي مرتين تلاتة مشان أصحصح متل المجانين والهبلان ....
ومنخلص محاضرة اللبيةعلى خير وبكرة ... ومنقوم من عل الكراسي مشان نحرك حالنا لأنو منكون تكلسنا بمحلاتنا .. بفوت دكتور التعويضات على السريع ، بس بقلنا يالله معكون خمس دقايق اللي بدو يريح على السريع ... منطلع لبرى أنا وشلة المدخنين ، ومنشفط السيجارة شفط وبينزل عماد على خزانتو بيجيب ترمس النسكافيه اللي بكن صارلو يومين بالخزانة والنسكافيه باردة بوظ .. بس مناخد كل واحد شفة على السريع مشان ننتعش وننصحصح ..
ومنفوت على المحاضرة .. وأحلى أجواء بمحاضرة التعويضات ... الأضواء مطفية ... والسكون يغلب الجلسة ... والبرد يسر في أوصالنا .. يعني لوما لطف الله وطريقة الدكتور خالد بإعطاء المحاضرة كنا نمنا على الكراسي نظامي وما حدا حس علينا ...
منخلص من المحاضرة على الساعة 5 وربع ...
بتقوم بقى بتطلع من باب العيادات ، ومتل ما دخلنالها الصبح من دون وجود شمس مشرقة ، منطلع منها ونحن مانا شايفين الشمس كمان ، حيث أن الدنيا صارت ليلاً ...
ولاقي موصلات إذا بتلاقي .... المهم ... منوصل على البيت بحدود الساعة 6 مساءً ... وبكون مخي فاصل على الأخير وما عم طس بعيوني ............ وجوعااااااااااااااااااااا اان ...
مناكل هل اللقمين .. وبحط راسي وبندفس وينتهي يومنا الحافل .....
يتبع ....................

والله منيحة هالشغلة كل واحد يحكي عن كل يوم من نظره
أما عن يوم التلاتاء بالنسبة إلي
يا سيدي يوم التلاتاء كتير مميز بالنسبة إلي (دوامي الساعة 10) بس طبعاً بفيق الساعة سبعة على رنة الموبايل إللي أنا بعيرو (مرسيل ما بتخبرني بكفيها البلوة إللي عندها) يا سيدي بعيير الموبايل 5 مرات على الشكل التالي 8 إلا ربع و7 إلا 10 وو 7إلا خمسة و7 و7 وخمسة و7 وعشرة وبالأخير يكمن أفيق الساعة 7 ونص (يعني كأني ما عيرت الموبايل) بفيق بسرعة وبلبس لبسي وبحمل حقيبة السفر بإيد والنوطة تبعيت التخدير والقلع بإيد (لأنو اليوم في عندي مقابلة على المريض) وطبعاً مالي رايح على الجامعة رايح على الكلاسة ... ليش الكلاسة .. أنا بقلكون ليش من شان أروح أفيق نانتي لأني هي مريضة القلع الوحيدة اللي حسنت أدبرا بروح على الكلاسة وبدخل هالدخلات وبطلع هالطلعات وبتعبا طيان (خاصة الدنيا مطر ) وبيروح البويا والكوي والأمبلاج إللي عيملو من شان بنات كليتنا التحفة .....على كل حال بصل على بيت نانتي وبدق الجرس وبدق الباب وبكسر الباب لحتى تفيق نانتي بالأخير بتفيق (صباح الخير حجيه) أهلين إبني موه.. موه... (هادا صوت البوسات) .. مرحبا شلونك إن شالله اليوم مرتاحة .. الحمد لله بس حاسة حالي تعبانة شوي (ولي .. بس ما يكون مرتفع السكر وتروح علي جلسة القلع) على كل حال باخدها على المستشفى وبعملها تحليل السكر وبطلع 200 (أنا طبعاً مابكيف ظاول لهانتيجة) بسأل الدكتور تبعها بيقلي معليش قلعلها سن واحد بس .. مشي باخدها على الكلية (طبعا صارت الساعة 11 وأنا جلستي الساعة عشرة ) بفوت على هالعيادات وراسي مرفوع وكأني عمبقول (يا شباب طلعوا علي معي مريضة ههها) بدخل على قسم القلع وبضل نص ساعة عم بدور على كرسي فاضي وأحياناً بفكر إنو أنا بخربط وجاي على غير فئة لأني ما في حدا من فئتي عم يقلع كله من غير فئات .. بحط نانتي على الكرسي وبركد ركيد على سوء الجمعة وبنقب غراضي منه وبروح لآخد ورقة تشخيص وبشخص لنانتي وبجيب الدكتور (إينا دكتور يا حزركون ؟؟؟؟) طبعا الدكتور حبيب ... بقلو دكتور هي نانتي بقول أهلين حجه شلونك .. يلله إبني قلعلا عالسريع بس بدون أدرينالين .. ةبروح لعند أورور وباخد أنبولة أدرينالين وهنا يكمن السؤال ... ليش بلا أدرينالين أغلى من مع أدرينالين ما بعرف .. كل هالشي الأدرينالين ما عليه القيمة ... بعدين بروح لعند المحضرة وبمد راسي من الطاقة (ليش كل هاد صغيرة ما بعرف ) وبقلها بدي كلابات .. إنت سنة رابعة .. إيه .. لكا روح لهديك الطاقة .. بسحب راسي وبروح على الغرفة الطاقة التانية وبمد راسي منو .. شو اسمك .. محمد صادقلي .. بدي كلابة ثنايا علوية .. مافي طيب ضواحك علوية .. مافي .. وهيك لنوصل لكلابة الجذور العلوية .. في 0000(كل الكلابات رايحة ) بالأخير مناخد هالكلابة والعدة وبقعد .. دكتور حبيب أخدر... يالله خدر ... أقصع الرباط.. يلله قطاع (بدون ما يشوفني على بياض .. صرنا معلمية بالقلع) أقلع.... قلاع بالأخير بينقلع هالسن وأنا بكيف عليه بمسكو بإيدي وبطلع بتجول فيو فعالقسم (كأني شايل قوس النصر) وبدور عالدكتور حبيب وبشفو .. جيب بطاقتك .. بروح بقا عند نانتي .. الله يعطيك العافية إيدك خفيفة .. الله يعافيك ياحجة ... بوقف هالنزف وبقلها تيسري .. وهيك بقيان على ربع ساعو لتجي جلسة التقويم ... بضب غراضي وبأسرع على جلسة التقويم تبعيت الفئة الرابعة (إللي كنت أحبون كلن بس هلأ صار في استثناءات) بطلع على أبو السوم ولا بشوفو ميسك مرجع أجنبي هو ومرسيل عم يدرسو منو تخدير وقلع (بكرة عندون مذاكرة) إش هالشطارة ما عاد يعجبون شي عربي كلو إنكلش .. بفرش غراضي وبستنا التفقد .. وين الدراسات ؟؟؟ اليوم آخر يوم تسليم أولي .. ولي أنا ما بعرف شي عن الدراسة السيفالو مترية وهون بقا بدي أكل الهوا الفئة كلها بدا تقعد جنبي من شان أفهمون طريقة الدراسة السفالومترية .. لك يا شباب والله أنا ما بعرفها وهيك بنسإل شي 782 سؤال من أول الجلسة لآخرها وأنا عم بردد شعار ..ما بعرف ما بعرف ما بعرف مابعرف.. بالأخير بتطلع معي دراسة تحفة عم بقلكون (رحت على البيت كبيتها كلها ) بروح عند لدكتور .. ما خرج أستلم منك خلصت الجلسة (طبعاً لسا في 1/2 ساعة بس الدكتور مشغول شوي يعني) ماهي مشكلة على كل حال سلمت تسليم أولي ونهائي بنفس اليوم (تخبيص دون خطة معالجة ولا تشخيص ولا بطيخ مبسمر) هالمادة طلعت منا من المولد بلا حمص ما فهمت الطيخ من البطيخ .. قال تقويم وما منعرف نصنف الإطباق لسا.. بعدين بيجي بقا وقت النظري .. اليوم عنا محاضرة تخدير وقلع للدكتور عداس... طبعاً بيجي عالدقيقة ويمكن قبل بخمس دقايق بيدخل وبيحط هالسيدية بهالكومبيوتر وبيبدا بقا بمثلث التوائم وفروعه القليلة (شغلت خمسين فرع) وكل خمس دقايق .. لازم تراجعو تشريح سنة أولى كله مطلوب.. شو بدنا نراجع لنراجع إذا بالسنة الأولى ما درسنا متل الخلق بقا هلأ بدنا ندرسو.. وطبعا هو عم يحكي ونحنا فاتحين فمنا عالأخير .. صار معنا تنفس فموي من ورا التشريح.. وبهذا الأثناء تكون الست زوربا عم تكتب الخواطر الشعرية التي تتحفنا بها .. تشريح وشعر.. يا سلام عالرواء يازوربا .. وآخر صف من المدرج عندن ما في تغطية لأنو صوت الدكتور بوصل لعند أول صفين بس وبما أنه لايوجد تغطية والدنيا عتمة والمكيفات شغالة على البارد في غز الشتا كتير من الأحيان بسمع صوت شخير جاي من الصفوف الأخيرة... بتخلص هالمحاضرة ومعها ينتهي دوام يوم التلاتاء بنزل على سوء الجمعة تبعي وبحاول أزبطو شوي بالأخير بيصير سوء الخمخيم .. بعبي غراضي بهالجنتاية إللي بتفاجأ إنو ما عدت أحسن أرفعها من عالأرض .. على كل حال بعدي على مركز التصوير وباخذ محاضرات اللبية إإلي ناشلن إدوار من الكشاف (لأني مالي حيل أروح عند الكشاف) وبنزل على الساحة وبشوف هالوفود إللي متجمعة(بتعرفو زحمة الـ4.5) شي عم يستنى الشمالي وشي عم يستى حلب الجديدة وشي عم يستنى الباص أنا بوقف مع جماعة الباص وبطع بتعفس تعفيس ماعدا الروايح (خاصة الناس راجعة من شغلها والطالب راجعين من محاضراتن ومخمخمين) بدخل على البيت وبدخل على الغرفة إللي قايمة قاعدة ...حرامي فوق الكومبيوتر كتبي على التخت وأدوات التشميع على الطاولة لأني أخوي كان سهران مبارح عم بيشمع من شان التسليم
برتب هالغرفة بعدين بقعد باكلي لقمتين وببدا أدرس وهن بتكون ختمت معي على الأخير بضلع أربع ساعات بنص صفحة وبالأخير ما بفهم شي بزت هالكتاب وبقعد عالنت وبدخل على البشري حلب من شان أتسلالي شوي .. وينتهي يومي كالعادة بنوم لا يخلو من الأحلام المزعجة ......

منين جبتلنا هالموهبة الكوميدية الحلوة يا وسام , و الله لخّصت حالة كل طالب سنة رابعةمن كلية طب الأسنان.
الله يعينا و يخلصنا من السنتين على خير.
على فكرة كتابتك كتير حلوة و مسلية ، و طويلة منين عما تلاقي وقت لتكتب كل هالكتابة .
اللي بشوفها بيحسبك فاضي و عندك وقت زيادة, بس أنا بجاوبه بأنك وجدت هالوقت الآن بعد ما انتهينا و سلّمنا أعمال العملي الحمد لله , و بدأنا نستعد لللفحص الذي أصبح يطرق على الأبواب

سلملي على نانتك يا صادقلي .. عجبتني كتير الحجة شكلها رايقة متل حكايتي ..

والله رح أسلملك عليها.. بس في عندي ملاحظة ... استنتجت من كلامك يا أبو السوم وبصراحة إنو إنت بإيدك عم بتعزب حالك.. خيو ضروري تنام للسبعة ونص فيق الساعة سبعة ما تخسر شي ... وعلى مهلك زبط وضعك وتعا بكير على الكلية وبتشوف الدنيا غير شكل ... يللا هلأ خلص الفصل جرب نصيحتي بالفصل التاني إذا ضلينا عايشين وما فقعنا من الفحص اللي صار على الباب.... سلام رايح أفتح للفحص لأنو وصل لعندي......