انه لمن المؤسف ان نبتدئ المحاضرات الاولى للفصل الجديد بسماع جمل خارجة عن حدود اللياقة والادب تطال الجنس اللطيف الشفاف الرقيق ،تفوه بها اشخاص لطالما حرصوا على وجود الانثى خارج اطار الطب او اي ممارسة اخرى قد تؤذي ملامحها المرهفة,دون ان يعلموا انهم بجملهم تلك قد آذوا هذه الملامح بطريقة اشنع وافظع مما تفعلها رؤية الجثث المتفسخة او الجروح المندحقة.
وانني فعلا لاحسد كل طالب لم يتسنى له حضور محاضراتنا اليوم التي تجرأ هؤلاء الى تحويل اطارها العلمي البحت الى نافذة لاطلاق عبارات آذات سامعيها كان من المفترض الا تصدر من طلاب محترمين نالوا شرف الجلوس على مقاعد مدرجات كلية الطب.
ـــــــــــــــــــــــــ ــــــــــــــ
مع فائق احترامي وتقديري

إني لم أسمع اليوم شيء من هذه التعليقات ؛ ولكن فعلاً هذا الموضوع مهم ويجب أن يطرح ، فأنا شخصياً أنزعج من هذه الكلمات (اللي ما لا طعمة، ولا تعتبر نكتة لكي نضحك) وكثيراً ما نصحت بعضهم ليكف عنها ، ولكن كل واحد مقتنع برأيه .
والله المستعان

يسلمو كتير يا جماعة ....

بالنسبة إلي أنا حضرت وشفت .. وبما انو الموضوع انفتح وانفتح فلازم يوصل كلامي لكل (بناتنا الغاليات... جماعة الجنس اللطيف)....

أولاً: ما بحياتو صارت كلمة في كليتنا كان الهدف منها (الإساءة) لا للبنات ولا لغيرهن .... بزمانو صارت قصة علي بسبب شعري الطويل وتمسخر علي الدكتور وقلي حطلو قوس وساويلو ربطة ... والكلية كلها قضتها علي مسخرة ... أكيد ما تدايقت لا من الشباب ولا من البنات .. لأنو بعرف انو عم يحكوا بهدف تلطيش.. تسلاية .. بس أكيد مو إساءة.

كون الشباب تمسخروا على حديث الدكتور فهادا شي بيخص الموقف .... وبيخص المحاضرة ... طبعاً نحنا ما خطرلنا أبداً لا اللي حكا ولا اللي سمع انو هادا شي خاص ببنات الكلية ... نحنا بس حسينا إنو شر البلية ما يضحك ... يعني من بين كل هالقراب هون طلعت العقدة؟ ... يعني دولفين منقول يالله، شمبانزي والله بنقبلها شوي على حالنا .... أما موضوع انو عم نتمسخر على حدا معين؟ .. حرام عليكن .....

ثانياً: نحنا مو طلاب سنة أولى ... صرنا منعرف بعض منيح وصدقوني عم نكون سوا يومياً أكتر ما عم نكون بيوتنا ومع أهالينا.... مو حلو أبداً فتح هيك موضوع على سبب كتير بايخ وسخيف بشوفه.... وشو صار؟ ... حكينا كلمة... ومشي الحال..... ووالله لما كان كل دكتور يحكي على الشباب هيك كل كلمة قدها .. كنا نحنا نتمسخر على حالنا وعالدكتور..... مو مشكلة يا عيوني

ثالثاً: ... يعني إذا من الدكتور ما قبلتو المزح .. بالعكس تصرفه كان كتير ذكي..... وحاول يرجع الموضوع لإطار المزح ..... هلأ ليش هي اللي زعلتو منها بالتحديد؟ ... فيه مزحة عن الحمل والإرضاع سوا تذكرتوها؟ ..... كمان هي حكينا كتير عليها وكلو مزح بمزح ... وما صار شي....

بقا خلونا شوية نعقل وخلونا كبار ... مو حلوة أبداً حدا من برا الكلية يفوت عالمنتدى ويعرف انو طلاب سنة رابعة هيك بيتعالقوا...

وأكيد من كل قلبي بتمنى التوفيق للكل.....

ولا حب خارج حدودي
نونة

يعني لا تنسوا إنه نحن لما كنّا صغار رضعنا من نفس الحليب ... الحليب الإنساني القريب بصفاته وتركيبه من حليب أنثى الحمار ...

خلص مو مشكلة ما تاخدوا على خاطركم ... حقكم علينا ...

عفواً يا جماعة , أنا اليوم كنت حضران المحاضرة و كان آعدين حوالينا بنات , بس ما بظن أنّو صار أي تعليق بيجرح كبرياء البنات (بجوز يكون صار من قبل زملاء , بس الدكتور أنا ما شفت منّو شي ) ...
يعني كلنا منعرف أنّو الولد بيرضع من صدر أمّه , و كلنا رضعنا من صدر أمّهاتنا ... في شي غلط بالموضوع ؟؟
تاني شي , ما فيها شي إذا ضحكوا العالم إذا حكا الدكتور أنّو أقرب حليب لحليب الأم هوو حليب الإتان (أو حليب الكرّة بالعامي) يعني وين الإهانة للنساء بهالموضوع ؟؟؟
بالعكس , إذا افترضنا أنّو في اهانة فهيي كانت للجميع لأنو اللي انتبه عالمحاضرة منيح , فالدكتور أكّد أنّو حليب البقر للبقر , و حليب الإنسان للإنسان , يعني لمّا رح يكون الانسان الذكر بيحسن يستعيض عن حليب أمّه بحليب كرّة فيعني هالشي أنّو هوو حمار ......فما أظن كان هون ئصد الدكتور هوو الإهانة للإناث أو حتى الإهانة بشكل عام !!
بتمنى أنّو الزميلات العزيزات تخفف درجة الـ sensitive عندن لأنو كتير من الأحيان بيفهمو الأشياء و كأنها موجّهة 100% ضدّن مع أنّو ما بيكون ئصد الدكتور غير الخروج عن الجو الجامد بالمحاضرة ....
سلامة ...

السلام عليكم :
الشي اللي صار مؤسف
اللي ممكن يطري الموضوع شوي انو أكيد ما حدا قاصد الاساءة أو التجريح
بس أكيد كالعادة الموضوع متقبل من الدكتور و غير متقبل من الزملاء.
و هالموضوع كان لازم يطرح من زمان مو مشان اطلاقو او اثارتو
بس من شان يوضعلوا حد مفهوم من الكل و ما ندخل بحلقة مفرغة من سوء الفهم كل ما صار شي بالمدرج
الكل يتذكر بعض محاضرات السنة الثانية و الثالثة و ما كان يطلق خلالها من تفاهات بداعي الفكاهة او أي داعي كان قائلها يقصد
بس أكيد كل واحد ضحك ضحك على مضض و نظر نظرة استصغار بل و احتقار لقائلها المعروف
و هالموقف ما يصدر عن ولدنة الله يكبرن ( على حد تعبير احدى الزميلات )
من شان هيك أطلب من الزميلات يكبروا عقلن شوي مو لأنو عقلن زغير (و هالشي أكيد منفي على أرض الواقع)
بس من شان نكبر سوا
مع فائق احترامي و تقديري للزميلة أفروديت.

عفواً من الواضح أنو صار في سوء فهم للموقف من طرف البعض ...
البنات اللي نزلوا الموضوع و أظهروا استياءهم من الشي اللي حصل اليوم ما جابوا سيرة الدكتور بالنص و لا عمموا ع كل الشباب اللي كانوا حاضرين ...
كل ما في الموضوع أنو في كم زميل ( الله يهديهن و يسامحهن ) أساؤوا بتعليقاتهن كتير و ما راعوا أنو يا عمي حواليك قاعدين بنات و عم يسمعوا تعليقاتك .... و في بنات اتهموهن بأنهن عديمات الحس لأنو ما تفاعلوا مع النكت اللي اشتغلت ... هاد الشي اللي ما منقبله و هاد الشي اللي ما كل الزملاء اللي دخلوا عالمضوع سمعوه ...
الاعتراض ما كان ع الدكتور و لا عالمعلومة .... أساساً أنا شخصياً لما سأل الدكتور سؤاله كنت بعرف الجواب و قلتلها ياه لزميلتي اللي بجواري قبل ما يحكيه الدكتور ....... مو معقول نقف عند هي !!!!!!!!

أولاً:أتمنى من كل قلبي أن يكون كل من شارك قد عبر عن وجهة نظره الفعلية ...لأنني عندها سأعتز فعلاً بوجود نخبة من الزملاء تستحق أجل تقديري واحترامي ...شكراً لكم جميعاً.
ثانياً:شكراًجزيلاًDr.Nasعلى التوضيح.
فبالنسبة لي شخصياً،أحيطكم علماً أن ما اعتبرته إساءة كان أكبر من تعليق عادي حول نوع الحليب الأقرب تركيباً للحليب الوالدي (التي بررها البعض بأساليب مختلفة )مع أنها غير مبررة من وجهة نظري.
وأؤكد لكم أنني لم أكتب ما كتبت بناءً على استياء شخصي فحسب وإنما من وجهة نظر عامة.
ثالثاً: إن كان بعض الزملاء يعتبر أن فتح هكذا موضوع ساحة معركة أو ميدان اقتتال ،فأنا في الواقع اعتبرته فسحة تعبير ونقاش ومحاولة (فش خلق)و إصلاح لا أكثر و لا أقل.
ـــــــــــــــــــــــــ ـــــ
مع فائق احترامي وتقديري

شو ياجماعه شايفه الوضع متوتر هاليومين...... لسه ماقلنا بسم الله!!!!!!!!! صحيح انا ماحضرت وماوصلت البلد اصلا ومابعرف كيف صارالموقف بس بعتقد انو الموضوع كله شوية سوء تفاهم واللي صار مانو مقصود..........والقصه ومافيها انو كل واحد منا يحاسب حالو قبل ماحدا يحاسبه في كل تصرف بصدر منه.......... فلا حدا يعصب ولا حدا يزعل وبطلو شغل ولاد صغار وإلا
وعفكرهdr nas انا مشتاقتلك كتييييييير هيك مابتسالي ....... طيب بس ارجع

المشاركة الأصلية بواسطة palestinian

وعفكرهdr nas انا مشتاقتلك كتييييييير هيك مابتسالي ....... طيب بس ارجع

قال مو سائلة قال .... في عنا متل بالحلبي بقول : ضربني و بكا ... سبقني و اشتكى ...
وحشتوني أنتي و أتاسي ... دي ارجعوا بقا

يا بناااااااات لا تكبروا الموضوع خدوها على اساس معلومة علمية ونحن كلياتنا ضحكنا بالعكس ما تاخدوا الأهانة انها موجهة لألنا بالعكس هي للناس اللي استعاضوا عن حليب الأم بهيك حليب ....واللي ضحك ضحك واللي ما ضحك ما ضحك وين لمشكلة وانا بصراحة كنت قاعدة للأخير مابعرف شو اخوانا الشباب علقوا قدام بس على حد علمي الدكتور ما اساء بشي بالعكس الحلو فيه انو قلبها لطرافة مشان ما يصير احراج
عنجد ما بدنا نبداها بخناقة والله ما لحقنا لسه

شدوا الهمة يا شباب ويا صبايا
صحي مبروك الصف الأول بطلابه الجديدين