مرحبا ياجماعة
رح أحكيلكون اليوم عن الاختصاص في ألمانيا و كيفية الحصول على اختصاص في دولة ألمانيا الاتحادية
بتمنى بس تدعولي إنو الله يوفقني و يساعدني على اجتياز المصاعب إللي ممكن أواجهها و يوفقني للخير "بتدعولي؟؟؟ أمانة ها"
المهم
لمابدك تفكر باختصاص في دولة ألمانيا الاتحادية بدك تفكر بإيجابيات و سلبيات هالدولة
طيب
السلبيات هي :
1- اللغة : مسألة اللغة هي عائق مهم ،خاصة كونها صعبة ، و بدهون على الأقل ست مستويات و هناك حديث عن تحويلها ل 12 مستوى يعني إللي مفكر يطلع على ألمانيا لازم يفكر بالتعلم اللغوي من السنة التالتة و أي تفاصيل عن موضوع اللغة أنا جاهز للإجابة بس لا تنسى عمتخسر الانكليزي هون
2- العائق التاني هو الراتب: يعني لما بدك تبتدأ الاختصاص بتبداه كطبيب زائر بدون راتب ممكن تحسن تدبر مناوبات تعيش على أساسها غالباً كافية إذا استطعت تأمينها، بعدين شي ستة أشهر أو سنة ممكن تدبر راتب نظامي
3- العائق التالت : إنو ما بتحسن تستمر في ألمانيا بعد الاختصاص فيها إلا إذا أخذت الجنسية أو تزوجت ألمانية
طيب المزايا :
1- معظم الاختصاصات متاحة بس المهم تحاول تساوي ستاجات أكتر ما يمكن في الاختصاص إللي بدك ياه ، يعني الجماعة مو فارقة معهون جراحة ،داخلية، أذنية متل بعضها المهم بدهون دكتور شغيل
2- فيك تسافر بعد التخرج أو حتى بعد الاختصاص منشان تعمقه و الاختصاص السوري معتبر في معظم الأحيان و معدل في ألمانيا
3- المعيشة في ألمانيا مو غالية متل فرنسا أو انكلترا و بالتالي ممكن توفر من أقل راتب بينعطى إلك
هي مقدمة صغيرة و أية أسئلة تانية من خبرتي المتواضعة أنا جاهز لأعطيكون ياها
دعاؤكم
تحياتي
حازم

المشاركة الأصلية بواسطة red volcano

طب سؤال اخوتي الكرام
حدا منكم بيعرف شو الوضع باسبانيا
او عندو معلومات عن امتحان MIR الاسباني للمعادلة
وشكرا

معلومات عن الاختصاص في اسبانيا : الاختصاص في إسبانيا

على فكرة نسيت اقول انه سنة الامتياز هي حسب ما فهمت ما مطلوبه من كل الجامعات...بتعتمد على الجامعه والمدينه في منهم بدهم في منهم لأ

بالنسبه لطب الاسنان ما عندي علم

تحياتي