سنبدأ اليوم لقاءا جديدا بعد انقطاع طويل، وضيفتنا من اكثر الاعضاء تميزا... سحرتنا بمعلوماتها الطبية المتنوعة، ووقفنا فاغري الافواه امامها في الماراتون النفسي... تفوقت بذكائها على طلاب السادس (يعني نحنا)... تحب استخدام ال(underline) لتوضيح النقاط المهمة... ناهيكم عن عزفها على البيانو (يلي لازم نسمعو)... هنالك الكثير لنسألها عنه... عرفتو عن مين عم احكي؟؟؟ برافو عم احكي عن اللوني خانم...

عم ننتظرك بفارغ الصبر...

المشاركة الأصلية بواسطة flower

مرحبا elloni
من خلال مشاركاتك أولا و ما كتبة الزملاء الاعزاء عنك ثانيا أحترمك و أقدر ثقافتك الواسعة و رايك السليم.
أتمنى أن أتعرف عليك بالمستقبل...
عندي طلب صغير..طبعا الرأي رأيك..كان الحديث عن اسمك جميل و لكن لا أعرف ما هو اسمك و الان انا متشوقة لمعرفته(اذا ما عندك مانع)؟

مرحباً flower
بصراحة أنا كمان حابة أتعرف عليك , رح أبعتلك على خاص و بنتعرف على بعض إذا ماعندك مانع شو رأيك ؟؟؟

و سؤال صغير: لو ما كنت عم تدرسي الطب الان (يعني مجموع البكالوريا ما ساعد لا سمح الله) شو كنتي درستي و لماذا؟

كنت حاطة ضمن احتمالاتي الصيدلة أو طب الاسنان لو ماجبت طب بشري ,
ماكان ببالي الهندسات لانو ماكنت قدرانة أتخيل حالي علقانة بالرياضيات طول عمري ( مع اني بحب الهندسة كتير على فكرة ), كنت بفضل العلوم , كتير حبيت كتاب علوم البكالوريا

و إذا مامشي الحال كنت عدت البكالوريا

و لو مامشي الحال كنت طلعت لفرنسا ادرس طب

بس الحمد لله جمعت طب من أول سنة و كانت الأمور ميسرة لإلي , على فكرة لهلأ ماني مصدقة أنو تيسرت أموري هيك الحمد لله

سلام

موفقة

المشاركة الأصلية بواسطة Kliopatra

السلام عليكم ورحمة الله

و عليكم السلام

مع إني سألت من قبل سؤال وما تلقيت جواب (على ما أظن) بس مو مشكلة ..

بجد كليوبترا مالقيت اني في شي ناقص ؟؟؟!!!!بيجوز في غلط ؟؟؟!!!

على كل برجع بتأكد مرة تانية و لا يهمك و حقك علي

طيب .. إيللوني خانم ..... لو عطوكي موقع web .. وقالوليك (انتي حرة التصرف فيه ولكن لازم تبنيه) .. شو المجال يلي كنتي اخترتيه لهالموقع ؟

أنا خطرت ببالي من زمان فكرة موقع متل بشري حلب , يعني موقع طبي بالدرجة الأولى مع تنوع اجتماعي , ترفيهي , ثقافي , ديني .....................

لهيك بشكر كتير يلي قاموا بإنجاح هيك مشروع و بقلهم الله يعطيكم كل عافية

طبعاً كانت مجرد فكرة طرقت على بالي

لنا عودة

بانتظار عودتك

والله ما حابب اتقل عليكِ بالاسئلة الشباب مكفيين وموفيين

بس سؤال صغير

شلون علاقة ايلوني بالطبخ والمطبخ؟؟
بتعرفي تطبخي؟؟ ما هي اكثر اكلة تنجح معك

وكمان ما هي اكلتك المفضلة

هدا هو الطبق الرئيسي خفيف وظريف

انتظري التحلية

تحياتي

المشاركة الأصلية بواسطة ammour444

لاااااااااااااااااااااااا ااااااااااااااااااااااااا ااااااااااااااااااااااااا اااااااااااااااا !! (اللا تبعت الأشرار عندما ينتصر الخير , و ينهار قصر الشر المليء بالخفافيش .... و يموت شرشبيل و تتحول المستنقعات المرعبة المجاورة للقصر إلى مروج و يزول الليل و يسطع النهار !!! )
هذا ما فعلته سنفورة (أقصد إيلّوني ) بشرشبيل المقابلة (عمّور !! ) ...
أشهد أمام الملأ بأن إيلّوني استطاعت أن تجيب بالإجابات الأفضل و لن أحكم أنا .... سأترك الجميع يحكمون !!
إيلّوني ... ثابري إلى الأمام .... أحسنتي يا دكتورة المستقبل
عنجد أجوبة رهيبة .... و أنا بعتذر ع تصعيبي الأسئلة , بس شخصيّة عميقة وواعية مثل شخصيّة إيلّوني تحتاج لمثل هكذا أسئلة لفهمها تماماً (ما بعرف إذا البقيّة بوافقوني الرأي ) ...
أنا بعترف بهزيمتي و تستحق إيلّوني لقباً جديداً هوو : قاهرة شرشبيل مقابلة إيلّوني
حلو هاللقب ما هيك ؟؟
رايح أكتبلك المرحى !!
لا تروحي و تنسي الكاتو !!::
موفّئة إيلّوني :

مرحباً عمور ( شرشبيل )

يسلمو كتير

صحيح أنت كنت مأطلق علي لقب من قبل شو كان ؟؟؟
أه قاهرة التشريح المرضي

ياعيني هلأ صرت قاهرة شرشبيل

شو هل القاب الرهيبة صارت شغلتي تقيلة

لك أأأأأأأخ طلع شرشبيل حباب كتير , و في أضرب منه و بدهم قهر
بس انشالله بكون قدها

لاتخاف عل كاتو مالهيك أنت ربحتني حتى يطلعلك كاتو طلعت أذكى مني
يلا عم استنى المرحى من زمان ما أخدتلي شي وحدة

ملاحظة : (كنت عم أمزح ماحدا يزعل مني )

موفق

المشاركة الأصلية بواسطة tartousieh

هاي إللوني.. ارجعت بس بأسئلة سهلة لاتخافي..

مسا الخير

له له معقول اني اخاف منك
بس على فكرة صحيح أسئلتك سهلة بس بخاف يكون عندي صعوبة بالتعبير عنها

1. شو هوه الشي يللي بتحبيه بحاليك و بتقولي لو كل الناس عندا منه كانت الدنيا بألف خير؟؟

بصراحة أنا مابحب أحكي عن النواحي يلي بحبها بحالي , بفضل احكي عن سيئاتي

على كل مافي شي معين أو وحيد ممكن أعتبره شي منيح لو أنو الناس كان عندها منه , يعني الدنيا بدها امور كتيرة لتكون بألف خير

طيب بحب بحالي عدم حشر نفسي و احترام خصوصيات الأخرين هاي الشغلة الرئيسية يلي بظن أنو مجتمعنا بحاجة لإلها
, الموضوعية ,التواضع , حب الاعتدال , تقبل و احترام الآخرين باختلاف أديانهم و اعتقاداتهم و مذاهبهم و طريقة معيشتهم ................ , بحب الطيبة و بريد السعادة للجميع

2.طيب شو هوه الشي يللي بتكرهيه بحاليك و بتقولي لو كل الناس عندا منه كانت خربت الدنيا؟؟

لست أدري شو يلي ممكن يخرب الدنيا ؟؟؟ في أمور كتيرة بعتبرها كويسة بأمور و مو كويسة بأمور اخرى
يمكن مشكلتي بأحيان كتيرة الخجل و بكره لما بتزيد هل ناحية عندي

3. و هلق بعد كل هالأسئلة يللي مرت , شو هوه السؤال يللي كنتي بتمنني إنو حدا يسأليك ياه بس ما انسأل؟؟ و جاوبي عليه..( بشرفكون هيدا السؤال مو أحلى من الأميركي و الفرنسي؟؟)

ياعيني على هل سؤال , بس بتعرفي رح أخلي الإجابة عنه بعدما تنتهي كل الاسئلة شو رايك ؟؟ بركي ساتها بيخطر على بالي شي سؤال ما انسألت عنه

سلام

سلامة و أهلين بيك (على فكرة ماعرفت مين أنت بجد بركي بتعرفيني على حالك بالكلية إذا ماعندك مانع)

[quote=Mr.Sam]

Hi everyone... it looks like u r enjoying this interview

...
أهلين بيك مستر سام , و الله مبسوطة بكل المقابلة و الحمد لله

let's go back to the tough questions....

ماشي
جاهزة

remeber the painting i put in the begining... tell me what u see in it (in details) and how does it make u feel

طيب

شفت بنت قاعدة عم تعزف عل بيانو و مستغرقة بمعزوفتها , قام إجتها أختها الصغيرة و حطت أصابيعها الصغنوطة لتعزف نوطة , البركة بدها تكبر و تصير بتعرف تعزف متل أختها الكبيرة

و هل نوطة , هل صوت يلي طلع من كبسة هل نوطة فرحها من كل قلبها

هون التقت نظرات الأختين و هل نظرات مليانة محبة و أخوة و فرح

كيف خلتني اشعر : بالسعادة , بحب اشوف مشاعر المحبة و الأخوة , بالعادة كانت الاخت الكبيرة بهدلت أختها انو عم تنزعلها معزوفتها بتخبيصها , بس هون يلي صار مختلف , الأخت الكبيرة انبسطت أنو الصغيرة رايدة تشاركها و تتعلم عزف

يلا انشالله نشوفهم بعد كم سنة عم يعزفوا ( كتر مان ) سوا

خلتني أتذكر لما كنت لسا صولفيج و أخي يلي أكبر مني بديان بيانو و قلي انو شو أيك نتدرب على (كترمان) لنعزفها يوم راس السنة لأهلنا , و علمني كيف أعزف و تدربنا سوا كتير , كانت معزوفة حلوة

و لا لما افتتحنا حفلة البيانو يلي انعملت لما كنت سنة أولى بيانو بمعزوفة أنا و هو


أيه ذكريات جميلة

ملاحظة: ( كتر مان ) يعني معزوفة بتنلعب بأربع أيدي ( يعني بدها عازفين )

u told us that u was compared to older people when u was a child, so did u have enough of ur children? do u wish sometimes to be that little child again? i hope i'm making sense...

أنا مابعتبر ابداً أني انحرمت من طفولتي عشتها أكيد و إلها ذكريات حلوة كتير بمخيلتي , بس برأي انو طفولتي كانت أقصر من غيري ( هيك حسيت )

ما بتمنى انو أرجع طفلة هلأ كبرت خلص
أكيد بشتهي أحياناً انو أنطلق متل الأطفال بس مابساوي

على كل بحب الأطفال كتير , و كل شي بيتعلق بالطفولة

اليوم رحت أخد اختي الصغيرة من المدرسة و قعدت أتأمل الاطفال و هنن عم ينصرفوا من المدرسة , بجد حدا جرب يتامل هل منظر كتير حلو و بيسعد

let's say u have a yellow tulip, a red rose, and a pink blossom, to whom would u give each?

طيب أول شي الوردة الحمرا فهي رح تكون ليلي رح يكون شريك حياتي
التوليب الصفرا رح أعطيها لأهلي شمس حياتي
أما الزهرية فرح أخدها إذا بيصير أخدها لأني كتير بحب الورد و كتير بحب اللون الزهري

what is ur favourite dish?

هممم طيب هلأ رح أجاوب عنه مع إجابتي لتوربو بسؤاله عن الأكل و الطبخ

what does "sacrefice" mean to u? and to whom u r willing to sacrefice? and how much?

سؤال مو سهل
التضحية ...............

التضحية مابدها تعريف برأي
التضحية لو بدي اختصر هي عطاء بدون مقابل

يلي رح أضحي منشانهم هنن عائلتي زوجي و أولادي ( لما يصير عندي طبعاً ) بكل بساطة رح أعطيهم روحي و قلبي و عقلي , رح أبذل كل وقتي و جهدي و اضحي براحتى لأقدر اربي أولادي و اخليهم ناجحين و سعيدين بحياتهم

على فكرة تعريف التضحية عندي قريب من تعريف الحب إذا لاحظتوا : هو عطاء بدون مقابل

لهيك بعتبر التضحية هي لكل من احب , اكيد في دائرة اوسع بكتير من يلي ذكرتها بتستحق مني تضحية

المشاركة الأصلية بواسطة Kliopatra

السلام عليكم ..

و عليكم السلام

ياي طلع اسمي بالتلفزيون

بس وين العزيزة إيللوني بس ما يكون صاير معاها شي لا سمح الله ... شتقناليك ..... بخاف تخلص المسابقة ولسه مو مجاوبة على سؤالي ...

شو هل حكي ؟؟ هاي أجيت و انشالله مابنقص بأي جواب

والسلام عليكم

موفقة

المشاركة الأصلية بواسطة The Man

انا كمان بدي ما اروح علي فرصة بعض الاسئلة وإن كانتElloni تعبت من هل المقابلة او من كتابة الردود بشكل عام ...

مرحباً THE MAN
بجد أنا كتير مرتاحة و ماني تعبانة ابداً من المقابلة ) الله يسامحك على هل حكي )
بس صار أنو المنتدى ما اشتغل معي مبارح و ماقدرت احط ردود هادا كل الامر
آسفة إذا حدى أتضايق مني

ما رأيك في الاشخاص الذين يتحدثون باسم الدين كثيرا وهم ابعد ما يمكن عنه ...

هدول الناس صغار كتير كتير بعيني , ما بعرف شو بدي اقول بس بجد المشكلة أنو في منهم كتير و كلكم بيعرف
كتار بتلاقي صلاتهم ماشاء الله ما بيفوتوا فرض , بنات محجبات , ناس بيعرفوا كل الاحاديث حفظانين قرآن ...........................................

بس بتدور على المعاملة و الأخلاق : صفر

بس على فكرة لو ركزت على حديثم بالدين بتلاقي انو أكتر شي بيركزوا على الأمورالصغيرة بالدين و بيتمسكوا كتير فيها و بيتناقشوا ساعات كل مين بيفتيها على كيفه
بس المشكلة أنهم بينسوا الامور الكبيرة و الهامة و بيعتبروها هي الأمور الصغيرة

مارح اقول غير الله يهديهم و يهدينا أجمعين

وما رأيك بالاشخاص الذين يودون فرض طريقة تدينهم على الااخرين ...

الفرض غلط , أنا مابفرض ديني على غيري هيك بالفرض و بعتبر نفسي صح لأنو هل طريقة هي طريقة مكرهه و منفرة لغيري أكيد
ممكن أرغب العالم بديني لما افرجيهم كيف اني ملتزمة , كيف معاملتي , كيف أخلاقي , كيف أني مبسوطة بديني و مبسوطة بالتزامي , كيف أني مقتنعة بديني و عم أعمله من كل قلبي مو بس عم احكي فيه كمظهر
, مو قاعدة عم أطلع على هاي شو عاملة و أقول أنو دينها غلط و أنا يلي ديني الصح

يعني بعتبر طريقة الترغيب و الإقناع افضل من طريقة الفرض
أنا بعتبر لما حدا يفرض علي دينه بيكون عم يقلل من احترامي و ماعم يحترم ديني
و لما ما بيتم احترام أفكاري بيصعب علي أحترم أفكار غيري أو أو أقدر اخد بيها

متى تبدأ الحياة عند Elloni و متى تنتهي ؟...

بالنسبة لإلي فالحياة بدأت يوم يلي ولدت و رح تنتهي لما رب العالمين ياخد أمانته

بيجوز بنفكر على طول انو رح تبدا الحياة لما نوصلل للي بدنا ياه
, يعني مثلاً متما رح أدخل طب رح أعيش حياتي ووووو
متما خلص الفحص رح نعيش ...........
متما و متما ...........
متما كبروا الولاد بنعيش
متما ختيرنا بنعيش .....
متما .........

لهيك برأي هاي هي نفسها الحياة , و لازم نعشيها بكل حذافيرها , بحلوها و مرها , بسعادتها و شقائها

و ما نضيع منها لحظة ما نستفيد منها

هل تحبين بشكل عام الحياة الهادئة المستقرة القريبة الى الملل في بعض الاحيان او الحياة الصاخبة التي تحمل اليك الجديد في كل يوم ولماذا ...

بصراحة بحب انو تكون حياتي بشكل عام هادئة و مستقرة و مريحة , مع بعض الفواصل من الصخب و الجديد

ليش؟؟؟ لأني هيك بحب الحياة , بحب الاستقرار و الرتابة بيعطوني شعور بالراحة النفسية و السكينة
, بس بمل منها احياناً و بشتهي كتير أني أغير شكل و كتير بعمل هل شي بحياتي
لأنو تغيير الشكل بيعبيلي طاقاتي من جديد ( بيشحن البطارية ) , بيجدد حبي للحياة , بيجدد مقدرتي على مواجهة الأمور الصعبة , بيقوي إيماني , المهم انو التجديد حلو كتير بس المهم انو مايكون مستمر على طول

اسئلة رياضية ...

اي منتخب تشجعي في كأس العالم ...(طبعا سوريا مو بكاس العالم)

طيب انا بصراحة ما بتابع كرة القدم , بس تابعتها بمرحلة وحدة بس و بشكل كامل لما كان كأس العالم بفرنسا
و سبحان الله ربحت فيه فرنسا الكأس , شقد فرحت و احتفلنا مع اهلي كتير

لهيك طبعاً بشجع المنتخب الفرنسي مابدها سؤال , و إن كنت متعاطفة شوي مع البرازيل ( كان رونالدو رجله عم توجعه كتير )

هل هناك لاعب كرة قدم تفضلينه او لا ...

زين الدين زيدان

لديك هوايات رياضية في التنس او غيرها ...

هواياتي المشي أكتر شغلة بشتهي عليها لما يكون الطقس حلو , بس للاسف ماعم أقدر الاقي محل ينمشا فيه بهل بلد

السباحة: تعلمت السباحة من صغري و لهلأ كتير بحبها

أما التنس فبخاف من الطابة أكلتلي طابات كتير بوجهي و صار عندي خوف

ما رأيك باللاعب الرائع زين الدين زيدان ... وخاصة انه فرنسي الجنسية ...

القصة مو أنه فرنسي الجنسية لما كنت عم اتابعه و إنما انه لاعب بالمنتخب الفرنسي وأصله عربي
لهيك كان إله اهتمام خاص اكتر من البقية

حاج اسئلة اليوم ... بس انشالله يعجبوك ...

كتير حلوين , اسئلة إلها طعم خاص و بتمس قضايا بتهمني

شكراً لإلك

المشاركة الأصلية بواسطة Elloni

سلامة و أهلين بيك (على فكرة ماعرفت مين أنت بجد بركي بتعرفيني على حالك بالكلية إذا ماعندك مانع)

له له يا Elloni .. في حدا ما بيعرف مين tartousieh ؟؟
يا جماعة والله من السنة الأولى وأنا بعرف إنو ما في بنت طرطوسية بالدفعة غيرها

غريبة في حدا ما بيعرفها؟؟

المشاركة الأصلية بواسطة Elloni

سلامة و أهلين بيك (على فكرة ماعرفت مين أنت بجد بركي بتعرفيني على حالك بالكلية إذا ماعندك مانع)