سنبدأ اليوم لقاءا جديدا بعد انقطاع طويل، وضيفتنا من اكثر الاعضاء تميزا... سحرتنا بمعلوماتها الطبية المتنوعة، ووقفنا فاغري الافواه امامها في الماراتون النفسي... تفوقت بذكائها على طلاب السادس (يعني نحنا)... تحب استخدام ال(underline) لتوضيح النقاط المهمة... ناهيكم عن عزفها على البيانو (يلي لازم نسمعو)... هنالك الكثير لنسألها عنه... عرفتو عن مين عم احكي؟؟؟ برافو عم احكي عن اللوني خانم...

عم ننتظرك بفارغ الصبر...

إلوني لقائك ممتع جداً

صحيح ما فيني أدخل وأسأل كتير ... بس متسر سام ساعدني ونشر أسئلتي اللي يبدو إنه فيهم إحراج لذلك طفيتيهم ...

بس أنا ما بقبل لازم تجاوبي عليهم

لقائك جميل وحضورك جميل أيضاً

وبالتوفيق

طبعاً أنا متابع اللقاء من البداية ...

لقاء هادئ وجميل

المشاركة الأصلية بواسطة Shank00l

طبعاً أنا متابع اللقاء من البداية ...

لقاء هادئ وجميل

يا جماعة إش كني استنسخوه لشنكول

و سبحان الله ربحت فيه فرنسا الكأس , شقد فرحت و احتفلنا مع اهلي كتير

لهيك طبعاً بشجع المنتخب الفرنسي مابدها سؤال

الله أكبر... شفت TheMan طلع في حدا غيري وغيرك بيشجع فرنسا

اقتباس:
المشاركة الأصلية بواسطة Shankool

اقتباس:
المشاركة الأصلية بواسطة Elloni




برأيي عمري الداخلي 21 , و غلط أقول اني أكبر

تعلمت بهل سنين أمور كتيرة , و غلطت كمان أغلاط كتيرة لازم أتعلم منها , لسا بدي خبرة بهل حياة , لسا بدي ابحث عن ذاتي اكتر وأكتر , لسا بدي اتعلم أثق بنفسي اكتر , يعني لسا بدي كتير كتير ...................

لهيك مارح اعطي لنفسي عمر اكبر من عمري الحقيقي

الافضل اعيش كل عمر بوقته
و ما أتابع الغلط يلي صار علي بتقدير عمري

لماذا الربط بين العمر والخبرة؟ أنا أرى أنهما منفصلان تماماً، فهناك أشخاص أكبر منك وأقل منكِ خبرة؟ ماذا تقولين في ذلك؟ وما هي العوامل الّتي تحدّ الخبرة برأيك أو تزيد منها؟

هممم بصراحة أنا ربطت بين العمر و الخبرة بشكل كبير لأنو كان السؤال عم يسألني عن شي اسمه العمر الداخلي لهيك كنت مضطرة أحكي بلغة الأعمار , و إن كانت الخبرة ما بتتقدر بعمر معين او بتنربط بعمر معين بشكل سهل

بس على كل و بكل صراحة أكيد انو العمر و الخبرة إلهم ارتباط , كلما كبر الانسان بتزيد خبرته و ما ممكن ننفي هل شي , كل شخص مننا يتذكر شلون كان السنة الماضية و كيف كان بيفكر و يتطلع هلأ قديش تغير بهل سنة و قديش تعلم امور جديدة ( هاي بس لو سنة فكيف لو نرجع سنين لورا و نطلع على حالنا )
و اكيد كتير ممكن ألاقي ناس اكبر مني و عندهم خبرة أقل مني , هيك الحياة
بس بشكل عام القاعدة يلي اكبر مني لازم يكون أخبر مني , لو بنعمل مخطط مقارنة الخبرة و العمر بنلاقي انهم بيتماشوا سوا و بيطلعوا سوا و أكيد في تباين بين الناس

الخبرة بيحدها : قلة التجارب
تسكير العقل و رفض النظر للجديد و الواقع
البقاء بعيدة عن تجارب الآخرين , الانعزال و العيش بشكل موازي للحياة

بيزيدها :الوعي بشكل رئيسي لأنو كتير ناس بيتعرضوا لتجارب أو الحياة بتفرجيهم شي بس هنن ما بيلاحظوه أو بيتعلموا منه على الأغلب السبب الرئيسي لإله قلة الوعي أو التفكير

انو الانسان يجرب من نفسه , الوقوع بالغلط و التعلم منه
الانتباه لما حولنا و تأمل الواقع و الناس لملاحظة كيف تجري الامور
التعلم من تجارب الآخرين
ظروف الحياة يلي بتخلي شخص بيتعرض او بيشوف أو بتفتحله الحياة عيونه على امور ممكن غيره ما ما صار معه هل شي

خلينا نبعد أكتر بالحوار ... بس مو بعيد كتير ... أعمق ... داخل إلوني ...

إذا وقفتي أمام المرآة ونظرتي إليها ... ماذا ترين؟ غير انعكاس صورتك؟

سؤال مو سهل أجاوب عنه

بس رح احكي باختصار بنظر لعيوبي و بحاسب نفسي
شو بشوف ؟؟ بشوف نفسيتي و أعماقي
و هاي انا مارح أحكي عنها رح أخليكم أنتوا تكتشفوها بعد كل هل صفحات يلي عبيتها

هل أنتِ صادقة مع نفسك؟ هل أنتِ لوامة لنفسك؟

مشكلتي أني صادقة مع نفسي زيادة , صدقوني هاي مشكلة , على فكرة بأيام كتيرة بتمني اني أقدر اكذب على حالي أكيد كنت قدرت أرتاح أكتر

بلوم نفسي ؟؟ أكيد و كتير كمان
كتير بحاسب نفسي إذا غلطت و لاء لاء و بعاقب حالي لما أحس اني تصرفت بشغلة ما غلط , او أني ماعملت شي صح تمام

صحيح أنو كلنا بشر و من حقنا أنو نغلط , بس بحس أنو أغلاطي بتحاسب عليها بشكل كبير مدري ليش ؟؟ لهيك أحسنلي انو ما اغلط

ماذا عن اليقظة وأحلام اليقظة؟ عندما تسرح إلّوني وتبتعد عن واقعها ... أين تكون؟ وفي أي زمن؟ هل تلجأين إلى الماضي أم إلى المستقبل؟

لما بسرح أحيانا بروح للماضي و بتذكر ذكرياتي ( السيئة أو الجميلة )
بروح للمستقبل و بحلم فيه , أو بخاف منه لما افكر بشكل سلبي
بروح للخيال البعيد بروح لعالم الأحلام
بروح لعالم من التأمل , بتأمل هل عالم كيف ماشي , و هل بشر كيف عايشة , هل ناس المبسوطة و على وجهها السعادة , هل بشر التعبانة يلي كانت معاها الحياة قاسية
و هل كون سبحان الله , هل مطر يلي عم ينزل ,أعالي الاشجار , هل نسيم العليل , هل بحر قديش كبير و عميق و غامض

يمكن أكتر عالم برحله هو عالم التأمل يلي بينمزج بالأحلام
بس ماني على طول من النوع الحالم و إنما في امور م بتفتحلي هل عوالم .......................

عبّري بما ترينه مناسباً عن كل من الأعضاء التالية أسماؤهم:

سؤال مو سهل و بصراحة ما بحبه كتير يعني خلص كل شخص يسألني و بعبرله بنفسي عن رأيي فيه , بس يلا مارح أخجل شنكول

و رح أقول يلي ببالي و بكل صراحة

Mr.Sam

المسؤول عن القسم النفسي , و هادا القسم بيشدني كتير إلي فعلاً اهتمام كبير فيه , لهيك اهتميت بشخصيته و آرائه
بحس فيه طيبة كبيرة و درجة كبيرة من الشعور و الحساسية , بيحاول بعمل حاله شرير ليخفيها ( حرام هل مرة ضل حباب بمقابلتي مارح أنساله ياها ) , عنده غموض كبير , لهلأ مافهمت آراءه بأمور كتير , يمكن ما بيحب يعطي رأيك ؟!!!!
بتمناله كل التوفيق

Shery

يلي بحبه بشيري هو أنو بحس فيها نظرة صدق بعيدة عن الخباثة , بحسها أحياناً بعيدة و أحياناً بتقرب بدون اسباب واضحة , لطيفة و مذوقة كتير بالتعامل , إلها شي خاص بها ماحددت شو هو , بعزها كتير

ammour444

من الناس يلي كان في غلط بتقدير شخصيته لما كنا ببداية مشوارنا بهل كلية , لست أدري الظروف خلت الحياة تصير هيك , انسان قلبه طيب طيب لأبعد الحدود , يلي بقلبه على لسانه , مندفع , ما بيخاف من التعبيير عن نفسه او يلي جواته , بالمنتدى متل بالواقع بتعرفه فوراً ( و هاي نقطة مي موجودة عند الكل ) اول مادخلت على منتدى و من اول مشاركة لإله عرفت أنو هادا هو عمور , عنده رغبة كبيرة للوصول للأفضل و بحيي فيه هل شي و كتير بحب اشجعه
موفق عمور

The Man

انسان بكلنه احترام كتير كتير كبير , فيه أكابرية و ذوق لا يخفي على أحد , بيخاف على مشاعر غيره , للاسف ماصحلي اعرفه كتير لاقدر احكي اكتر , بس يلي بعرفه عنه كافي لأقول انه من الناس الكويسة يلي بينوثق بيها الله يثبته على هل شي , إله كل تقديري و احترامي

Fiso

للاسف مابعرفه كتير , بالمنتدى مشاركاته قليلة جدا , و بالحياة ماكتير شفته
يلي شفته انو بيعرف انكليزي منيح و خدوم ( بمحاضرة الأدوية يلي إجانا فيها دكتور أجنبي طلع و تطوع ليترجم بعدما شاف الخلق مو فهمانة شي و هل شي حلو منه )
بيحب الحياة و بيعيشها تمام
مابعرف كيف بيفكر أو او فما فيني احكي أكتر

snowwhite

همم مابعرف شو بدي احكي لأنو بالفترة يلي دخلت فيها عل منتدى كانت مشاركاتها تقريباً معدومة , و بالكلية عرفت مين هي من يومين بالصدفة , بعرفها من بعيد كتير كتير و مافيني احكي ............... انشالله الأيام بتخليني اعرفها أكتر

Shankool

شنكول الشرير صاحب الاسئلة العميقة
طيب هو من الناس يلي عرفت معدنهم عن طريق المنتدى و عرفت مين هنن بحق و حقيق و كيف بيفكروا
بتعجبني أفكاره و بحس انو في تقارب مع أفكاري , يلي حلو فيه هو الاعتدال , الوعي , قدرة التحكم بالأوضاع بشكل مناسب , الدبلوماسية , و التفكير قبل القيام بعمل , بشكرك كتير على انشاء المنتدى و تعبه عليه و بقدرله كتير هل شغلة , بيحترم يلي قدامه فالتعامل معه مريح , شخصيته فيها عمق كبير
بحترمه كتير و بتمناله كل التوفيق يلي بيستاهله

RWTH

اعتبرته كاخ , انسان قلبه طيب كتير , معدنه كويس , مانه ملعب ابداً بنقدر بوضوح نشوف داخليته , بيحب الخير كتير , بقدرله كتير تعبه على الأيتام و على أسماء و بقول الله يهنيهم عندهم روث ليعتني بيهم ,
بيتعب كتير لغيره و هل شي بيدل على نفسية كريمة
مشكلته التسرع أحياناً بسبب تفكيره بمشاعره مما يسبب له المشاكل
, انسان واعي و ثقافته واسعة , بيحب الطب للطب و بيتعب على علمه , و أهم نقطة بقدرله ياها بالمنتدى انشاؤه لمشفى بشري حلب , الله يعطيه كل العافية
من الناس يلي بيندعاله بكل الخير لأنو جواتهم خير كتير

honey

بالمنتدى ماعرفتها منيح و ماصحلي احتك بيها كتير فما بعرف آرائها أو تفكيرها منيح
بالكلية : بشوفها بنت حلوة لذيذة , بتحب الحياة
انشالله بتعرف عليها أكتر بالمستقبل

kliopatra

إلها معزة كبيرة و انبسطت أنو تعرفت عليها بالواقع , بحس فيها تميز كبير عن غيرها , بحس انو بينبع من عيونها قوة كبيرة , ما بتخلي حدا ياكل حقها و مابينخاف عليها ابداً , بتحب الكتم
بحييها على دينها و آرائها القوية يلي نابعة من ذاتها و من قناعاتها مو من مجتمع عم يفرضها عليها أو مجتمع متعود عليها , لهيك بشوف قوة بإيمانها و بتمسكها أكتر من غيرها , لهيك بحترم كتير آرائها و بقدرها و بفكر فيها حتى لو ماكانت على طول متل آرائي
ألها كل تحيتي و محبتي

Bashari

بشري أها , سبحان الله من وقت مادخلت المنتدى و عم اتفكر مين بشري ؟؟؟ ليش ماله وجود ؟؟؟ ليش ماله مشاركات ؟؟؟ ليش كان بيشارك من زمان ؟؟؟ شو هل صورة المخيفة يلي حاططها ؟؟؟
براي هو شخصية من الخيال

Elloni

مين هي ؟؟؟
بس أتعرف عليها بحكيلكم عنها

Turbo

شخصية بعرفها بس من المنتدى و ماعندي فكرة مين هي بالحياة
من الشخصيات يلي اثارت انتباهي و أدهشتني كتير
يعني توربو اسم على مسمى
ذكي , فهمان , دريس . بيهمه العلم , ادهشتني سعة معلوماته على الرغم من صغر سنة ( قصدي انو طالب سنة تانية ما بيلم بكل هل معلومات ) بيتعب على علمه كتير , بيحب يضل حيادي بأمور كتيرة , عنده اعتدال و موضوعية , بحس فيه وعي كبير , منقض على الحياة و الدرساة اندفاعه حلو
انشالله يضل على هل وتيرة و ما يتعب , شايفتله مستقبل كتير حلو

BashariAlep

منتدى حبيته كتير و إله شكر كتير كتير كبير , ما بتتصورا قديش اكتسب خبرات و علم عن طريق هل منتدى
اكتر شي بحبه كونه ساحة للجميع بكل اختلافاتهم , بحس فيه ( على الرغم من بعض المشاكل يلي صارت فيه ) رقي كبير
خلاني أتعرف على شخصيات و أفكار وووووووو بحياتي ماكان ممكن اتعرف على هل كم و بكل هل قرب العميق , و هل شي بيوسع الأفق كتير
انشالله يدوم و يرتقي للأفضل

Dr.Nas

بكل صراحة dr.nas من البنات يلي كنت اشوفها كل يوم الصبح واسلم عليها و انا ماشية بس بدونما أعرفها , شخصية عجبتني كتير , كتير حبيت آرائها , راقية لأبعد الحدود , كتير محترمة , مستحيل انو ما تقدر تحترمها بتنتزع الاحترام انتزاع , بتعجبني طريقة تعاملها , حساسة , كتير عندها صدق و طيبة قلب , فيها شي مختلف عن غيرها
متوازنة و راكزة كتير , مكانها و معزتها كبيرة عندي
إلها كل محبتي و احترامي و تقديري

no one

من البنات المميزات بل كلية و صار احتكاك كتير بيناتنا , بس لست أدري رغم هل شي ضل في بعد كبير بيني و بينها , بحس انو بنشترك بنقاط كتيرة كتير أكتر من غيرها , و بنفس الوقت بنختلف كتير بالشخصية
بحس انو بالمستقبل ممكن نكون قريبات كتير
بعيونها في قوة و حب كبير للحياة
شطورة و علاماتها تمام , انشالله الله يوفقها

d.zf

طالب طب عل تمام دريس كتير , فهمان كتير , بشكره كتير على جهوده هو و علاء على ملخص الداخلية تبعنا مع أنه سنة سادسة انشالله يكون عم يستفيد , كتير خلوق و محترم و راكز , عندي إحساس انو إله مستقبل طبي كتير كويس
انشالله الله مايخجله و ما يضيعله تعب

zorba

بنت سبحان الله غير البقية , كتير بحب كتاباتها , هي من الناس يلي إلهم موهبة الكتابة , شوفتها بتسعد , بتحيط فيها هالة من الشحنات الإيجابية ( عم أحكي بلغة المنجمين ) بتخلي يلي حواليها مبسوطين , بتحب الحياة , إلها آراء حلوة كتير , ما غصت بأعماقها كتير , بس يلي شفته هو أنها انسانة حساسة كتير كتير
بتمنالها كل السعادة و ببعتلها تحياتي

Rasha.D

رشروشة رفيقة لإلي , شو بدي احكيلكم عنها ............ في كتير لينحكي ............
اكتر شي مميز فيها تمسكها بالدين و سعيها لإتقانه و بحييها على قوة إرادتها بهل شي , بتعرف يلي إلها و يلي عليها , التعامل معاها كتير مريح , بثق فيها كتير , كتومة , بتعرف تتصرف , حساسة كتير و بتخبي هل شي , مابتحب حدا يحط راسه براسها
من البنات العميقات أو يلي بيحبوا الغوص بالأعماق لهيك إلنا نقاشات كتيرة عميقة ماصحتلي مع باقي البنات , بتحب الخير كتير حتى على حساب نفسها
كتير طيبة , مذوقة
مارح أحكي اكتر المهم انو إلها مكان كبير عندي , و انشالله رب العالمين يوفقها بحياتها

Yasminana

ياعيني عم تسألوني عن رفيقة المشوار ؟؟؟ ياسمينانا تعرفت عليها أيام البكالوريا بس هيك من بعيد لبعيد , لما سبحان الله دخلنا طب و باعتبار اسمها بعد اسمي بشوي , فعلى طول كنا سوا بالعملي , لهيك بعتبرها رفيقة المشوار , شقد مقضيين و إلنا ذكريات سوا .................
هل بنت روحها حلوة كتير , و صحبتها بتسعد كتير
ظريفة لذيذة , بدها مسايرة , حساسة و كل شي إلا زعلها
الله يعينها علي بهلكها , على طول مركضتها على عملي
شخصياتنا مختلفة جذريا بس رغم هل شي كتير مرتاحين مع بعض و متفقين , كل وحدة بتعطي من عندها , فبحس اننا بنكمل بعض
مستحيل أنو ماتنحب

عضو تختارينه ولم أسألك عنه

وذلك من خلال المنتدى أو الواقع

خلص شنكول هدول و حاج

أخيراً شقد عم يعذبك الاقتباس؟

ضروري الفضايح
هو لهلأ ماظبط معي الاقتباس متل الخلق و العالم , بيجوز طريقتي بالاقتباس ريحتني , المهم تكونوا فهمتوا عليها

شكراً إلك

شكراً لإلك انت

المشاركة الأصلية بواسطة mr.yellow

هذه مشاركتي الأولى بالموقع

اهلين بيك mr.yellow و شرف لإلي انو تكون أولى مشاركاتك بالموقع بمقابلتي

لن أمدح وأعبر بكلمات دبلوماسبية كباقي زملائي فقد سبقوني بذلك ولكن سأذكر بعض الخصال الجميلة التي رأيتها بنفسي للزميلة (Elloni) بالمشفى صيفاً
فاجأني وأثار إعجابي اهتمامها بالمرضى وحرصها الشديد على راحتهم وخدمتهم بكل رحابة صدر000حتى أني تمنيت (لكن لا تضحكي): أن أكون مريضاً (بعيد الشر عني000فال الله ولا هالفال:
أيضاً أذكز تعاملها واحترامها لزملائها وتواضعها معهم
أمتن لها بتعليمي تعليق السيروم وأشياء أخرى (رغم أني من سنة أكبر بس مو عيب الواحد يتعلم من رفقاته سواءً أكانوا أكبر أم أصغر ووإنما العيب هو الخجل من طلب العلم) وأذكر أنها كانت تكرر طوال الوقت عبارات التواضع حتى لا تحسسني بأنها أفضل مني بس الواجب أنو أشكرها وأحمل هذا الموقف لها في ذاكرتي

بصراحة كانت أيام حلوة و تعلمنا فيها امور كتيرة
على فكرة أنا تعلمت تركيب السيروم من بنت دفاع مدني و علمتني امور كتيرة كمان و أكيد ماخجلت من حالي اني طالبة طب و عم اتعلم منها و هي بس عاملة دورة شهر (بشكرها كتير و إلها كل امتناني )
المهم انو ما اخجل اني اقول اني مابعرف و أتعلم بالوقت المناسب يلي بقدر اقول فيه أني ما بعرف

بجد حلاوة هل دوام أنو تعلمنا فيه كل الامور البسيطة الطبية يلي لازم يلم بيها كل طبيب و قدرنا نعلم بعض و نتعاون لنحسن علمنا و هادا كان أحلى شي

بشكرك كتير و بتمنالك كل التوفيق

هل تعرفي شيئاً ستضحكين عليه : عندما قرأت اسم Elloniتساءلت عن سر الاسم وراح ذهني لبعيد وفكرت إنك سميت حالك بهالاسم تضامناً مع تيسير العلوني مراسل قناة الجزيرة ( لا تئولي شئد خيالو واسع:: 00ضحكي بس مو كتير) بس بعدين حليت هاللغز( الحقيقة أنت حليته مو أنا )
أخيرا فعلا هي فتاة مهذبة وخلوقة ولا شك أنكم تلاحظوا ذلك في الكلية فهي تجبر أي شخص على احترامها مهما كان (طبعه) فتخيل يا رعاك الله00
M.Krayeam
]

هاي الغلطة بفهم اسمي ammour كمان وقع فيها , و كل مرة يكتب علوني و أنا اقول سبحان الله شلون عم يتكرر معه الغلط كل مرة لنبهته لعرفت سبب غلطه بإسمي و ماكان خاطر على بالي ابداً هيك تفسير

بشكرك كتير على المرور و أنا كمان بكنلك كل الاحترام

موفق

المشاركة الأصلية بواسطة TURBO

والله ما حابب اتقل عليكِ بالاسئلة الشباب مكفيين وموفيين

و الله كلك ذوق

بس سؤال صغير

شلون علاقة ايلوني بالطبخ والمطبخ؟؟
بتعرفي تطبخي؟؟ ما هي اكثر اكلة تنجح معك

علاقة إيلوني بالطبخ كتير كويسة , كتير بحب الطبخ
بعرف اطبخ و عندي اهتمام كبير بالطبخ الصحي الطيب القليل الكالوري و المغذي بنفس الوقت
أكتر اكلة بتنجح ..............هممم و الله كله طيب ( حسب قول اهلي ) مافي شي بينجح أكتر من غيره بالنسبة لإلي , لاني ببذل جهدي كله على كل طبخة شو ماكانت

وكمان ما هي اكلتك المفضلة

البيتزا بدون منازع , في كمان اليبرق و المعكرونة , عدا عن الخضار ..........

هدا هو الطبق الرئيسي خفيف وظريف

أي و الله سؤالك أطيب سؤال

انتظري التحلية

يلا أنا بالانتظار

تحياتي

شكراً لإلك