سنبدأ اليوم لقاءا جديدا بعد انقطاع طويل، وضيفتنا من اكثر الاعضاء تميزا... سحرتنا بمعلوماتها الطبية المتنوعة، ووقفنا فاغري الافواه امامها في الماراتون النفسي... تفوقت بذكائها على طلاب السادس (يعني نحنا)... تحب استخدام ال(underline) لتوضيح النقاط المهمة... ناهيكم عن عزفها على البيانو (يلي لازم نسمعو)... هنالك الكثير لنسألها عنه... عرفتو عن مين عم احكي؟؟؟ برافو عم احكي عن اللوني خانم...

عم ننتظرك بفارغ الصبر...

المشاركة الأصلية بواسطة ammour444

]و أخيراً عادت إيلّوني للمنتدى !!
الحمد لله عالسلامة أوّل شي ...

الله يسلمك و بجد لاتواخذوني عل انقطاع

thank u for ur encouragment about leaving smoking ...that's from ur kindness

لا شكر على واجب و بجد هل شي مو لطافة أو أي شيء آخر و إنما خوف عل المجتمع من هل سم و رغبة بكون القدوة ( أطباء المستقبل ) قدوة بحق و حقيق , فبجد برافو عليك و الله يثبتك

مارح أعطيكي مجال تفكري بشي ..... استقبلي هالأسئلة بليز و جاوبي !! (لسّا في غيرن خيرات الله)

المشكلة أني بحب أفكر على رواق , فأرجوك بدي شوية مجال

1-طيّب إيلّوني , في حال اعطاءك القدرة المتناهية النظير لتنفيذ 3 أشياء ...
شو رح تنفذي ؟؟ عللي اجابتك , موضّحة بالرسم إن أمكن (شغل صف تاسع )

سؤال صعب لانه كتير مفتوح , في كتير امور تنعمل , همممم طيب و باختصار

1 ) رح أسعى لنشر الثقافة و العلم بمجتمعنا و القضاء على البطالة يلي مسببة الفقر , هيك بحل مشاكل كتيرة كتيرة من جذرها بدلما اتخبط بحل كل مشكلة و بدون نتيجة
2) رح أسعى لتقوية البلاد العربية من جميع النواحي لتكون قادرة على الدفاع عن دينها و كرامتها و شعبها بدلما توطي راسها لأنها مضطرة تقبل بواقع ضعفها
3) رح أنشر المحبة و الطيبة بين الناس يلي صارت نادرة للاسف

هادا يلي خطر بسرعة و بدون تفكير على بالي

2-كنتي في قطار و لسبب ما فجأة حدث أمر مكروه (حادث مثلاُ) استطعتي أن تنجي منه بأعجوبة , أوكي ؟
كان معك في نفس (الفركونة ) 4 أشخاص هم :
A-أم لعشرة أولاد أكبرهم في الثامنة من عمره .
B-طفل كان يبحث عن أمّه لحظة وقوع الحادث .
C-باحث يعمل في مجال تخليص العالم من مرض عضال (سيفشل البحث بموته حتماً ) .
D-أحد أصدقائك الأعزّاء (أو العزيزات) .
الأشخاص جميعهم سيموتون (بعيد الشر) لاااااااااامحالة !!
و أُتيح لك أن تنقذي أحدهم , لا يمكنك انقاذ إلا شخص واحد منهم ... تستطيعين انقاذه بالتأكيد ... أما الباقين فسيموتون حتماً !
من هو صاحب الحظ السعيد و لماذا ؟؟؟

بالنسبة لإلي فمارح أتردد كتير
لما أنحط بهيك وضع لازم أفكر اني لازم أنقذ أكتير شي ممكن إنقاذه من البشر
لو بإيدي و الله كنت أنقذت الجميه بس انت مصعبها علي
لو بفكر بالمنطق و بعيد عن المشاعر رغم صعوبة هل شي , و هادا الشي الصح بهيك حالة فلازم أأنقذ الباحث
هل باحث معلق على ظهره حياة آلاف من البشر فأكيد هو أهم شخص بهل حالة لازم اسعى لإنقاذه و بدون تردد

3- ما هو تعريف النجاح لدى إيلّوني بشكل عام ؟؟؟

النجاح ........... شغلة رائعة كتير
النجاح هو الشي يلي بيسعى إليه كل البشر و بكل جهدهم شو ماكان هل نوع من النجاح و باي مجال
يمكن أقرب تعريف للنجاح ببالي : الوصول لما نطمح إليه

و ماهي ردّة فعلك تجاه نجاح تحققينه أنتي ؟؟؟بماذا ممكن أن تعبّري عن فرحتك بشيء ما ؟؟؟؟

ردة فعلي الاولى بشكر رب العالمين يلي بدونه و لو شو ماعملت فما كنت نجحت
ردة فعلي بشكل عام بفرح و بحس برضا كبير و بتتعزز ثقتي بنفسي و بصير بتمنى أنو باقي الامور يلي ببالي تنجح كمان , فبتنشحن طاقاتي , بالنسبة للتعبير عن الفرح فأكيد هو بكل بساطة الابتسامة يلي ما بتتخبي



[quote]أسئلتي صعبة ما هيك ؟؟ فكري و جاوبي .... بانتظار ردك !! [ /QUOTE]
لا ابداً أسئلتك حلوة

[هاي كنت مصرة ماأكتب الا لموضوع بيعنيلي كتير .................وهلأ أجا هالموضوع مممممممم..... ألونة حبيبة قلبي ورفيقة عمر بتتذكري أيام المدرسة والباكالوريا ولما نرجع من الدورات بالليل محبطين إيه000000000 أيام .
كنا دائما سوا من أول المشوار و رح نكمّل سوا إن شاء الله أنت بتعنيلي كتير و عبقلك هالحكي هلق قبل ما أموت (مزحة ولووووووو..........) الأسئلة اللي بدي ياها عالمزبوط بسألها بيني و بينك............................. لسّاتها قافلة معي بس يللا خديلك سؤال على البيعة (شو هو مفهوم الحبّ من وجهة نظرك؟؟؟؟؟؟؟؟؟؟؟؟؟؟؟؟؟؟؟؟؟ ؟: emot19

المشاركة الأصلية بواسطة Abdo-farah

الكل بدأ بالمدح وأنا أبدأ بالذم !!
الذم ولكن !!

الذم لمن عرف الأخت إيلوني ولكن لم يرها بالشكل التي سبقني الكثير ليعبر عنه .
بصراحة في البداية كنت أرى الأخت إيلوني مثالاً في الجد والاجتهاد .... ولكن ما إن تعاملت معها حتى وجدتها في القمة ..... القمة في كل شيء .......... القمة في الاحترام .......... القمة في التعامل ............. القمة في حب الخير للغير .............القمة في الدقة في التمحص في أخذ المعلومة الصحيحة ............وأكثر من ذلك مما لا سعة له أن يدون . لذلك أبارك لها بهذه الشخصية ... وأشكر السيد سام على هذا الانتقاء الموفق
وسأكتفي اليوم بالحضور دون أسئلة ، ولكن طبعاً الأسئلة قادمة .. وأسئلتي أصعب من أمريكي الكلية ... فحضري منيح

أهلين بيك أخ Abdo بصراحة أنا يلي بعتبرك قمة بكل شي , و الكل بيشهد معي على هل شي
بصراحة أنت من اكتر الناس يلي برتاح بالتعامل معهم و بثق فيهم
بجد الله يكتر من امثالك هيك بتبقى الدنيا بخير

, و بشكر مساعدتك لإلي وقت الحاجة او بالأحرى مساعداتك يلي ماقدرت أو عرفت لهلأ كيف أشكرك عليهم

أنا بانتظار اسئلتك و منيح طمنتني أنها امريكي لأنو الاسئلة الفرنسي صعبة شوي

المشاركة الأصلية بواسطة rose

أهلا و سهلا فيكي يا اللوني المحترمة
ما بعرف اش ممكن أحكي عنك ما شاالله الطلاب ما قصروا

أهلين بيك rose

اللوني الواعية اللذيذة المحترمة الخلوقة اللطيفة المرحة ( بحب ضحكتك كتير بتبعث في نفسي التفاؤل )
جدية وقت الدراسة ذات أذن موسيقية الموسيقا اللي سمعتيني ياها كتير رائعة

بصراحة روز أنت إنسانة كتير لطيفة و رقيقة و صحبتك كتير حلوة بجد اسم روز كتير لبقانلك , إلك مني أضحكلك على طول

بتتذكري ايمت تعرفنا على بعض و لا أذكرك ؟؟ طيب بتتذكري الأستاذ محيي الدين ؟

بتعرفي و أكيد رح تزعلي مني كلما اشوفك أقول ياترا من وين بعرف روز قبل الكلية ؟؟؟!!! من وين ياترا ؟؟؟!!! , بقا بدورة اللغة تعرفنا على بعض , بجد لاتواخذيني ذاكرتي ضعيفة بالوجوه و الأسماء

طيب سؤال ؟؟ أحياناً هالأستاذ كان يحكي كلمات ما نفهمها أو ما منعرفها.... إنت وقتها اش كنت تعملي ؟ تقاطعي كلامه و تسأليه فوراً؟ و لا تقطبي حواجبك ؟ و لا تعملي حالك إنك فهمتي عليه و خلص؟ أو تسألي اللي جنبك ؟

رجعتني لأيام هل دورة أه بجد قديش عملت دورات لغة بس سبحان الله مافي متل هل استاذ
يمكن دورته أكتر دورة بستفيد منها
متلما عم تقولي كان يحكي كتير و يذكر كلمات جديدة علينا كتير , بس الشي الحلو هو انه كان يكتبهم عل لوح على طول فأنا كنت حاطة دفتر خصوصي لهل كلمات و هلأهم عندي
أنو أعمل حالي فهمت و أمرقها فما بقدر عليها , الاختيارين الباقيين فهون حسب الحالة
الاستاذ كان ذكي و بيهمه طلابه كتير , لهيك متما حس انو في نقطيب حواجب او علامات نقص فهم كان لحاله يرجع يشرح أو يفسر
يلي جنبي كانت على طول تسألني بنص الدرس و تقطعلي سلسلة أفكاري فبتروح علي و عليها لهيك انا مابفضل اسئل يلي جنبي إذا كانت مركزة عل درس

أنا بشكل عام برفع إيدي و بسأل مابخلي شغلة تمرق هيك بدونما افهمها و بفضل اختار وقت مناسب

طيب سؤال تاني
لما بتحسي حالك محبطة لسبب من الأسباب اش بتعملي؟

الأحباط شي بنتعرضله كتير بحياتنا , كتير امور ممكن أعملها لما اكون محبطة
عم أحاول اتذكر شو أكتر شي بعمله بهل حالة ................. همممممممممممم بسمع موسيقا ( أيام زمان أيام الفضا كنت أقعد عل بيانو ) , بحب كمان لكا اكون بهل حالة أنو أغير شكل أطلع من البيت أشوف عالم و ناس هل شي بينسيني حالة الإحباط و بيخليني افكر بأمور إيجابية أكتر

طيب إذا كنت عم تحكي مع شخص , من كلامه عرفتيه إنه عم يكذب عليكي .. بتورجيه إنك إنت عرفتيه عم يكذب ؟؟ و لا بتضلي ساكتة و بتقولي لحالك يسطفل ؟؟

حسب هل شخص و حسب حالة الكذب , يعني إذا كذبه مابيأثر علي لا من بعيد و لا من قريب بيكفيني أني كشفت كذبه و خلص بسايره و بعمل حالي مو حاسة و خلص ليش لأعقد الامور الله يسامحه و يهنيه
بس إذا الكذب فيه ضرر او إساءة لإلي او لغيري فبحاول و باسلوب ديبلوماسي افهمه أنو أنا كاشفته و أنو أحسنله يبطل كذب و يحكي الصراحة لانها افضل

بتآمني إنو ممكن يكون عندك رفيقة تحسيها تماماً تماماً متل أختك ؟ أخت إلك عنجد يعني بتحكيلها خصوصياتك و تفتحيلها قلبك ؟؟ و لا بتفضلي الصداقة السطحية ؟؟

أنا بفضل انو يكون عند الانسان كل أنواع الصداقات و بكل الأعماق ,عندي صديقة بحكيلها عن خصوصياتي ............ بس بالوقت الحالي ماني حاسة أنو إلي صديقة عميقة بالشكل الكافي , بيجوز بالمستقبل بيصير عندي ما بنعرف ........................

إذا شخص بتفكريه إنو هو محترم و ما في متله .. جرحك ( ما بتعرفي إذا بقصده أو من دون قصده أو قلة تصرف منه) ... بتفكري إنك تنتقمي منه أو بس على الأقل إنك ترديله ياها

إذا هو محترم و مافي منه , إن كان بقصده و لا لاء فما رح أحاسبه أو أردله ياها , خلص رب العالمين بيحاسبه
أنا مابحب شغلة الانتقام , يلي رح أساويه هو أني رح أبعد شوي شوي حسب كمية التجريح , يلي بيجرحني بيخسرني
على كل صبري طويل و بفضل أسامح , و انشالله ما أجرح حدا و ياريت إذا جرحت حدا أتسامح , هيك الحياة أحلى مو هيك ؟؟؟

عندك نموذجين من البنات ..أي وحدة بتفضلي تكوني؟؟

البنت الطيوبة كتير( و بركز على كلمة كتير ) اللي ما بتريد الأذى لأحد نهائياً و لا تقابل الإساءة بالإساءة – رقيقة – حساسة – هادئة – اللي بقلبها فوراً ع لسانها و ما بتعرف التصنع و لا المكولكة و لا تمسيح الجوخ

و لا البنت اللي أد الشغل ( يعني اللي بيقولوا عنها قادرة ) قوية – ما بتسمح لحدا يأذيها بكلمة و بتقابل الإساءة بالإساءة مباشرة – ( عكس البنت الحساسة اشو : القوية ) – عندها القدرة إنها تحط أقنعة على وجهها بس لحتى تمشي وقتها ..

بالنسبة لإلي فبفضل الدمج بين هل بنتين , يعني تكون قوية وقت القوة و مع يلي بدهم هل شي بس قلبها طيب بنفس الوقت , بتعرف تحط قناع وقت الحاجة بس غير متصنعة
أكيد هل شي مو سهل و لو بإيدي لكنت فضلت أنو كل البنات يكونوا من النوع الأول بس نحنا بحياة بتتطلب قوة و طيبة بنفس الوقت هيك رايي

هللأ كل واحد فينا إلا ميكون في عنده دافع إنو يدرس باجتهاد
اش هو دافعك لحتى تدرسي أكتر ؟؟

عندي دوافع كتير منها حبي للدرساة , طموحي للنجاح , رغبتي بأنو أكون طبيبة ناجحة أقدر افيد مرضاي , يمكن من أكبر دوافعي ضميري , مابقدر اعمل شغلة بشكل مو كويس , يعني طالما عم اعملها فلازم أتقنها أو على الأقل ابذل جهدي فيها و إلا فبلالي هل شغلة لأنو دراسة الطب مسؤولية إذا مابدي ادرس منيح و أتعب على حالي لاطلع دكتورة فهمانة ليش لأدخل طب بالاصل ؟؟ في ارواح بالموضوع

المستقبل .... بتخافي منه ؟؟

بصراحة بفكر كتير بالمستقبل و بخاف منه أكيد , على كل احسن شي التوكل على الله بعدما أعمل يلي علي

السعادة ... اش هيي بالنسبة الك ؟؟ و ايمت بتحسي حالك سعيدة و مبسوطة لأبعد الحدود ؟؟

السعادة ....... بظن أنو مابدها تعريف ماحدا مابيعرف شو هو الشعور الرائع يلي اسمه السعادة
بحس حالي سعيدة بكتير حالات منها لما أحقق طوحاتي , لما اشوف يلي حواليي سعيدين و الفرح عم يشع من عيونهم
لما أشوف أهلي مرتاحين و مبسوطين , لما أكون رضيانة عن نفسي لما .................. لما ...................

عنوان لقائك لفتلي نظري كتير ..تعالوا نتحدث بصراحة مع من نكن لها الاحترام
سؤالي بالمقلوب .... بصراحة مين هيي أكتر بنت بتكني لها الاحترام ؟؟

كتار يلي بكنلهم الاحترام و ماعندي بالوقت الحالي احترام خاص لبنت
بس اكتر مرأة بكنلها الاحترام و التقدير فهي امي

يللا حاجتك هيك أسئلة
عم بنتظر أجوبتك بكل صراحة
مع فائق احترامي لك

أي و الله حاجتي
مع كل احترامي لك

المشاركة الأصلية بواسطة drmohi

ما بصير هيك أنا صاحب المقعد الأول يعني أنا اللي لازم أبلش
على كل ما صار شي...هلق منسأل...

س 1 .. إش أكتر صفة بتكرهيها بالبنات؟؟؟وبالمقابل إش أكتر صفة بتكرهيها بالشباب؟؟؟

أكتر صفة بكرهها بالشب و البنت المياعة
إذا بدي اخصص فبقول عند البنت قلة الذوق
عند الشب الجبن و الخوف

س2 ... إذا كنتي بتعرفي عن شخص إنو شخص جيد ومحترم وفجأة إجا شخص جيد ومحترم غيرو وحذرك منه بتضلي على قناعتك بإنو الأولاني هو المحترم ولا بتغيري قناعتك مع تحذير الشخص التاني؟؟؟

ماني من النوع يلي بيغير آراءه بكلمة من شخص آخر , أنا طالما اخدت رأيي عن شخص بأنه شخص كويس فأكيد إلي سبب بهل شي , و طبعاً إذا شخص منيح حذرني منه فأكيد إله سبب من هل شي , لهيك مارح أفقد قناعتي بالشخص الأول بس اكيد رح أفتح عيوني اكتر و انتبه منيح لاشوف إذا في صحة بتحذير الشخص التاني

س3 ...إذا كان إلك مصلحة بشيء معين وإجا شخص قلك إنو مستعد يوصلك لهالشي اللي إنت بدك ياه بس بالمقابل عن طريق مساعدتك وبدون ما تعرفي كان عبحقق مصالح شخصية إلو ربما ما بتتوافق مع مبادئك بس بنفس الوقت إنت مو متضررة ...يعني هوة بس عبيعمل شي مخالف للمبادئ اللي إنت ملتزمة فيا ... وفجأة عرفتي باللي عبيصير ياترى بتمشي ورا مصلحتك وبتقولي (أنا اش بدي... يعمل اللي بدو ياه) ولا بتتنازلي عن مصلحتك مقابل الوفاء لمبادئك؟؟؟

الحياة أخد و عطا هاي قاعدة , قلال يلي بيعملوا شي بدونما يحققوا مصالح شخصية
لهيك الأفضل مع هيك ناس أنو مايكون إلي بالاصل مصلحة أو أطلب منهم مساعدة
بس اكيد هل شي بيتباين , يعني حسب المصلحة الشخصية , يعني أنا أكيد بريد اشكر يلي عم يساعدني بمصلحة ما و بريد أنو ينرد عمله و ما يبقى دين بذمتي و مارح أتفاجأ أبداً إذا حدا عم يعملي شي و إله مصلحة من وراها لأنو هيك الحياة
, بس لما يوصل هل شي عند مبادئي فهون مافي داعي افكر الموضوع منتهي من أساسه

أسئلة تخيلية نوعا ما بس خطرتلي....

بانتظار الإجابة ....
والقادم أعظم..

لا بالعكس اسئلة واقعية كتير

مع التحية
محمد

إلك تحية كمان

المشاركة الأصلية بواسطة Mr.Sam

first pardon me, for typing in english....
و لو بسيطة

so, if not piano, if the choice was yours back then to choose a musical instrument to learn, what it would be?

أنا ماندمت أبداً أني اخترت هل آلة لما كنت بموضع الاختيار , و بظن أني كنت أخدت نفس القرار لو الأيام تعيدني للوراء
لهلأ بحب البيانو كتير و انبسطت كتير اني بهل عطلة ( الأسبوع الطويل ) رجعت قعدت شوي عل بيانو بعد انقطاع طويل و مو ببالي أبداً أنو أتخلى عن هل آلة , رح أضل انشالله مثابرة عل عزف

what does playing the piano mean to u? how does it feel?

العزف بحد ذاته بالنسبة لإلي بخليني افرغ طاقاتي و مشاعري , كيف لو أنك تصيح مثلاُ هل شي ممكن يشعرك بالراحة بعده العزف إله تاثير مشابه بشكل بشكل افضل
, كمان بيخليني انسى يلي انا فيه و بيصفيلي ذهني من الأفكار أن كنت محبطة أو متدايقة فبعدما اعزف بكون روقت و نسيت
العزف سبحان اللع بيروق الانسان كتير و بيخليه بعالم آخر عالم الموسيقا طبعاً هل شي بيكون للي بيعزف من قلبه و بيحبه

مابعرف شو بدي اقول بس اكيد في كتير عم يقروا هلأ و بيعرفوا يعزفوا فأكيد رح يفهموا علي

that's what i could think of right now... i'll be back for more

أنا بانتظار المزيد

السلام عليكم و رحمة الله و بركاته

جميلة جدا آراء الزملاء و الزميلات في الزميلة الوني

يعجبني فيها الطيبة و البساطة و النفس المحبة للآخرين(أن تحسن الظن بأخيك فتندم أفضل من أن تسيء الظن به فتندم) الوضوح و الصراحة و.........يعني اللصفات الظاهرة على الزميلة الوني الي كلنا بيعرفها
كتير بحترمها و بعزها

أكتر من هيك ما فيني أقول لاني ما تعرفت عليها كتير فما فيني احكم
و أذكر الدعاء:

اللهم يا مصوب خطأ الدعاء بألا يجيب
فلذلك تحمي من الضر من يدعوا بالشر دعاءه بالخير

علمتنا ألا نحكم في ما لا نعلم

حتى لا نحكّم الأهواء

في تزيين ما نشاء

و حسبنا من قولك عسى أن تحبوا و عسى ان تكرهوا ما أيده الواقع في خير مما نحب أو في شر مما نكره.

بقول انشالله يكون من خير الواقع وجود الزميلة العزيزة الوني في دفعتنا

بتمنالك التوفيق في شتى مجالات الحياة

بتمنالك تحققي آمالك و طموحاتك

بتمنالك تحققي كل شي بتحبي

تحية خاصة مني لوالدتك

كالعادة أنا متأخر .. بس هالمرة... كتير.... 5صفحات....

الشباب والصبايا ما تركولي شي أكتبه.... بقه شو ما كتبت راح يكون مكرر.....
بس بصراحة ... elloni...من أكتر بنات الكلية لباقة ... وأكابرية...وزوق....وأخلاق...وش طارة ... والتزام... وحب للعمل والدراسة.... (شفنا جهودك بالـCDs) ....
وقد ما كتبت ما بيطلع نقطة ببحرك.....

هلأ صار وقت الأسئلة....وأكيد مع سؤالي الممل...
اذا انعزمتي لحفلة تنكرية.... شو راح يكون الزي أو الشخصية اللي ممكن تتنكري فيها....؟
سؤال جديد...
ولمين بتحبي تسمعي من الموسيقيين..(عازفين ... مطربين....)...؟

المشاركة الأصلية بواسطة subzero

وهلأ ............إللوني على كرسي الاعتراف

منبلش :

الحياة مبدأ..........

ماهو المبدأ أو الفكرة التي تعيش لها إللوني .........تؤمن بها .........وتسعى لبلوغها ؟؟

المبدأ يلي عايشة من شانه , هممم مابظن أنو الانسان بيخلق ليحقق مبدأ واحد او فكرة واحدة
في كتير امور و مبادئ بسعى إليها
إذا حكينا عن الفكرة الأساسية يلي بسعى لبلوغها فهي فكرة أنو رب العالمين أحسن خلقي متلما احسن خلق كل البشر و علي أنو ما افرط بهل خلق و أحسنه و أطوره , يعني هدفي دائماً هو الوصول للأفضل , بهدف للتقدم و ببحث عنه على طول , ببحث على طول اني أحسن نفسي و خلقي و ديني و علمي .................... , ما بتحمل اضل واقفة على يلي انا عليه
التقدم بالنسبة لإلي لازم يكون متوازن و متوازي بكل المجالات حتى اعتبر اني كنت اهل لهل امانة يلي رب العالمين عطاني إياها ( حياتي )

هالدنيا صعبة ..........وكليتنا بتفلج وبتقصر العمر: ( الله يمد بعمر الكل طبعا .........)
ودائما في مشاكل وهم وغم ...........
وسؤالي هو :
من أين تستمد إللوني طاقتها ........ لتواجه كل ذلك ؟؟

بظن مصدر طاقتي هو الأمل و الصبر , يلي بحس مصدرهم مصدره الإيمان ,
بكتير امور بحس انو بالي طويل كتير و بتقبل امور كتيرة ماني مضطرة اتقبلها
يلي بيساعدني كتير هو تأمل الواقع و الحياة و الناس و محاولة فهم ليش هيك عم يصير ( ليش هل كلية عم تفلج ) فلما بفهم يلي حوالي كيف عم يفكروا و ليش عم يصير هل مشاكل , بكون قادرة أكتر على مواجهة المشكلة و تقبلها , فالواقعية و الموضوعية بالنسبة لإلي اساس لتحمل الواقع

هدول اللي خطرولي هلق.........

و هاي هي الأجوبة يلي خطرتلي انشالله أكون عبرت صح

تحياتي

أهلين بيك و تحياتي ليك

المشاركة الأصلية بواسطة TERMINATOR

سؤال بسيط ل ((دكتورة مع مرتبة الشرف)) :
باللحظات الصعبة بحياتك..أو خلينا نقول : بأسوأ لحظات عشتيها ..
شو هوي الشي اللي كنتي يمنحك الأمل ؟؟
((حالة إيمانية , شخص , فكرة))..........

بظن أنو الأمل متعدد المصادر يعني هو اجتماع كل يلي عم تقوله
بس أكبر مصدر للأمل فهو الحالة الإيمانية يلي بتخليني احس انو اي مشكلة رح تعدي انشالله و أنو يلي علي هو أنو أتصرف صح و أدعي رب العالمين أنو يهون علي هل لحظات السيئة

مع خالص المودة

شكراً لإلك