بسم الله الرحمن الرحيم

يا أخ charming
آخر أخبار 2030 ستكون كمايلي بإذن الله:
-الولايات المتحدة الأمريكية وبريطانيا تقوم بتجهيز البعثات لارسالها الى الدول العربية والإسلامية وذلك للدراسة بجامعاتها واجراء البحوث العلمية

-اسلام 5000أسير يهودي اسرائيلي وذلك بعد اجلاء الجيش الاسرائيلي عن فلسطين ، ومئات الآلاف من المسلمين من جميع أنحاء العالم تتجه غداً الى القدس ليصلوا الجمعة في المسجد الأقصى

-انكلترا وفرنسا والمانيا تعمل على تشجيع الوفود السياحية العربية بغرض توفير العملة الصعبة لديها(العملة العربية الموحدة)

-البنك العربي يبحث اليوم في طلب القرض الذي تقدمت به الدول الأجنبية

-أزمة المرور تبدأ في الساعة الرابعة صباحاً حيث يخرج الناس الى صلاة الفجر ثم ينطلقون الى أعمالهم بحيوية ونشاط.

-العثور على بقايا ملهى ليلي يرجع تاريخه الى عام 2005 وجاري الآن تحويله الى مكتبة ضخمة

-القبض على سائح أجنبي قام بانتهاك حرمة البلاد العربية وذلك بشربه الخمر في أحد الأماكن العامة .

-رفضت الرقابة التلقزيونية طلب إعادة عرض أحد البرامج التافهة القديمة التي ترجع الى عام 2005

-وفي حوار مع طلبة الثانوية العامة اللذين التحقوا بكلياتهم هذا العام، قالوا أنهم سعداء لأن كل منهم التحق بالكلية التي كان يتمناها وتتفق مع ميوله وليس حسب المجموع والعدد كما كان الوضع منذ 20 سنة

-وفي دراسة أجريت مؤخراً عن آخر العادات المنقرضة في المجتمع العربي اتضح اختفاء ظاهرة ( الواسطة ) وحلول (التوكل على الله والسعي والإتقان) مكانها، كما تبين اختفاء البيروقراطية والروتين القاتل ونجد الآن ظاهرة تسابق الموظفين لخدمة المواطن وتمشية معاملته

-الدول الأوربية تحاول تطبيق نظام الغاء الحدود السياسية والتأشيرات والجمارك والذي طبق مؤخراً في البلدان العربية.

-وأخيراً ......... الدول الغربية تدفع مبالغ باهظة ثمناً لشراء برنامج [ صناع الحياة ] لتحاول بناء نهضة في بلادها

صديقي العزيز حسن..
إنت لمتني بمشاركتك.. على التحامل الشديد غير المبرر.. على رأي كتير بسيط وفيه عفوية..
أنا حبيت بمشاركتي أوصللك هالرأي لمداه..
يعني حبيت أكون بجوابي عمق للي بيحكي هيك..
وإذا بتلاحظ برد الصديقة أم النور انزعجت من الكل.. بس شافت حكيي حلو..
علما إنك إنت فهمت فورا.. إني قصدي أفرجي شو نهاية هالمنطق..برأيك كنت متحامل..
أنا بعتقد إنو رد الصديقة أم النور بأكد إنو لأ.. الموضوع تماما متل ما أنا صورته..
في ناس هيك مفكرة..
بديهي إني أقول معك .. لا يغير الله ما بقوم حتى يغيروا ما بأنسهم..
وأقول أكتر..
إنو تغيير النفس بيبدا بطريقة تفكير جذريا مختلفه..
وعلى الأقل فيها غيبيات أقل بكتير من هالحكي.. وهي الرومانسية.. وهي الإعتقاد إنو رح نغير الدنيا.. نحنا الحاملين مشعل النور والهدى والتقى.. والصلاح.. وإنو العزة إلنا .. والحقيقة معنا..
الموضوع بيحتاج لطرح أسئلة جوهرية أكتر.. عن إنو ليش وصلنا لهون..
برايها لو مشي عمرو خالد بجهة .. بيمشي الشيطان بجهة تانية..
أنا بعتذر من عمر بن الخطاب.. لإنو هيك في ناس بتحكي عنه.. وتشبهه بغيره..
ما لإنه هو مقدس.. بس لإنو بعد 1425 سنة.. مبين إنو العالم فهمانة عمر غلط..
طبعا وأكتر من هيك.. فيني أقول إنها فهمانه محمد غلط..

غيفارا أنا اللي شامم ريحة مو طيبة
وبعتقد إنتِ رائعة جداً إلى حد إنك بنظري صورة من نسج الخيال
منشوف والأيام جاية !!
بالنسبة لكلمة أبي غلط
بالتأكيد أبي وأمي مفضلين على راسي بعد نِعم الله
وأنا بالتأكيد بحترمن وبعزهن كثير وبحطهن على راسي
بس لما بقول مجتمع غلط
انا جزء من المجتمع وبالتالي أنا غلط
وأبي جزء من المجتمع وبالتالي أبي غلط
بس الفرق إنه المجتمع بسلبياته ما بأثر علي متل ما بأثر علي أبي (كجزء من المجتمع)
مع ذلك أنا اعترفت لنفسي وللآخرين بإحساسي الداخلي بإني غلط
وبدأت مسيرتي في تصليح وتوعية ذاتي
والارتقاء بذاتي نحو فكر أرقى وأنضج

بدك تخليني صورة بخيالك.. خليني..
بس أنا إنسانة من جسد.. ودم..
ورح تعف أكترشو أنا.. بعد.. ما أحكي عن حالي..
بشكرك على تواضعك الفكري..
بتمنى غيرك يللي عم يمللوا المنتدى بفتاواهم وآراءهن الجاهزة.. يخففوا شوي عننا العبء..
شوي شو.. حبه حبه..
بس بسألك يا حسن.. إنو شو رأيك بهي الرومانسية. ما هي سبب للبلاء.؟

أخبار 2030 يلي انذكرت وعلى ضوء الأوضاع يلي عمنعيشا هلأ ممكن كتير تصير، بس حاليا في 2005 هي اخبار ظريفة، وهي أشبه بنكت....شخصيا بتمنى أغلبها ما تصير Ok

أم النور بحب قلك انو عندك تفاؤل اذا توزع على سكان الأرض والمريخ المستقبليين كمان (جخّي) بكفين وبزيد.
بمعنى تاني وبالحلبي (لك خيت وين رايحا بهالزحمة، قال هداك الغيم جاب هاد المطر)، بقى حاج تحلمي، ووجهي طاقاتك لشي بتقدري تحققي هلأ، أحسن من الآمال المحكوم عليها بالإعدام حتما في ساحة التقدم العربية.

تحية, أولا انت انسان راقي كتير وكاني ما بعرف يعني حاسس انو بعرفك منيح؟ (على كل هاد مو موضوعنا هلأ )
ثانيا صدقني انو انا كتير مستغرب من رد الاخت العزيزة ام النور عليك؟! كأنها ما فهمت عليك شو قصدك (بس لا تفهمني غلط انا ما عم حرضها عليك!!!!)
ثالثا: و هاد الاهم, انا مالي شايف (ومن خلال ردك علي) ان نحنا مختلفين!ّ بالعكس تماما انا متلك ضد الرومانسية( السطحية ربما) وفعلا نحنا بحاجة لأسئلة أعمق من هيك بكتير نحن بحاجة لمصارحة مع الذات ولازم نركز على سلبياتنا ونصححها وهاد أهم (بوجهة نظري) من انو نركز على ايجابياتنا ونعمي عيوننا عن سلبياتنا بس بالنهاية التركيز على الاثنين مطلوب وأساسي.
وانا بانتقادي لرساتك الاولى كنت عم انتقد تحاملك على الطريقة اللي ام النور بتعتقد انو رح تغير احوال مجتمعنا فيها, وهاد حقها انو تختار السبيل اللي بدها ياه( يعني صناع الحياة او صناع ما بعرف ايش...) هاد حقها بالنهاية ونحنا بهالصدد بحقلنا انو نطلب منها التحلي بالواقعية والموضوعية شوي لانو كترة الاحلام بتوجع الراس, واعتراضي عليك كان انك هاجمت منطلقها من أساسه. بتمنى انك تكون فهمت قصدي والسلام.........

تحية إلك يا غيفارا,
ردا على سؤالك يا زميلتي، انا ضد الرومنسية لما بيتعلق الامر بموضوع حيوي وهام متل مستقبلنا وهويتنا وفكرنا ووجودنا, يمكن الرومنسية مناسبة لشغلات تانية كلنا منعرفها بس مو هالشغلات.

بينما بهالشغلات المصيرية نحنا بحاجة لوقفة مصارحة مع الذات, ولحظة بل سنوات من التفكير الجدي حول ما آل إلو وضعنا.

انا يمكن بختلف معك بشغلة, لأ انا مابعتقد انو هالرومانسية هي سبب البلاء, بعتقد انو سبب البلاء هو قصورنا عن فهم المتغيرات واتكاليتنا اللامحدودة وبيجي هون دور الرومنسية انو بتعطينا الامل الكاذب, بمعنى كل ما خبصنا خبصة بترجعنا مئة سنة لورا منقول (ايه معلش! نحنا شعب الحضارة نحنا رافعين راية الصلاح ونحنا.... واكيد رح يجي اليوم اللي رح ننتصر ونسود) وصدقيني يا اختي انو اخر شي ببالنا هو هداك اليوم!!! ومنرجع من جديد منخبص خبصة تانيةو تالتة وهكذا...

لذلك لازم نتحرك ونشتغل وكل واحد فينا يحاول ويبدا من نفسه مشروع التغيير للأفضل. والسلام

السلام عليكم ورحمة الله وبركاته

أولاً يا سنفور أنا لست ساذجة كي لا أفهم قصدك وقد أشرت في ردي لذلك لكن يبدو أنك لم تفهم علي
وعموماً لنفرض أنك أخذت الموضوع بسخرية واستهزاء وأنا فهمته بالجدية والأمل الذي يملأ كياني لنفرض
بس حاسب على ألفاظك ولا تغلط في ناس لا أنت ولا أنا قدهم.

وأنت يا غيفارا ، أنا فرحت كتير لما دافعت عن صناع الحياة وعن عمرو خالد ضد مشاركتي(حتى لو فهمتيني غلط) لكن يبدو أنك أخذت الآن اتجاهاً آخر!!!!!!!

يحزنني اليأس الذي يطغى على مشاركاتكم ، ولكن أنتم معذورون يبدو أنكم لم تذوقوا حلاوة العمل من أجل النهضة
لكنني أقول لكم: بإذن الله نحن -صناع الحياة- النهضة نراها بأعيننا ، فكونوا معنا لأنه سيأتي ذلك الوقت الذي سيقول فيه المتفرجون( ليتنا كنا معكم فنكون من الفائزين)
ورح أذكركم بعد عشرين سنة إن شاء الله وعلى هالمنتدى إذا الله أبقانا وأبقاه

أنا بعتذر صديقة أم النور.. إذا كان ردي ما لطيف..
وبتمنى إنو نكمل حوارنا بهدوء. على مختلف القضايا.. طبعا بعد ما تقبلي إعتذاري.
أكيد إنو كل واحد ممكن يتسرع بحكي.. شي بعبر عن قناعاته بشكل ممكن ما يكون لطيف..
بس بالفعل أنا عم أستفيد.. وبتمنى إنو يتحسن أسلوبي الحواري..
متل ما بتمنى يكون صدر لاجميع متسع للكلام يللي ممكن يكون بدون قصد

شكرا إلك صديقي حسن..
أنا الشي يللي بيعجبني بصناع الحياة إنهن بريدوا يشتغلوا..
وعم يشتغلوا الجماعة.. كنت بتمنى يكونوا أكتر انفتاحا على التانيين..
ويتقبلوهن على إختلافهن.. ما يحكوا معهن بفوقية الشخص يللي مهتدي وعم يتطلع ع كومة كفرة..
أو كومة ضاللين..
ما بعتقد أنا وياك مختلفين..
أكيد رح نحكي هون أكتر عن تفاصيل تانية.. ممكن يستمر فيها حوارنا..
أنا بعتقد إنو الأمة يللي أحلامها أكبر من واقعها هي ما كتير بتقدر تعمل شي..
الأمة يللي بتختصر كل القضايا بالشعارات وبالحكي، ما هي أمة عم تشتغل..
يمكن قالها أحد الأصدقاء بالمنتدى.. إنو في كتير حكي بالكتب.. بس في شي بينتقنا هو ناس تكون عم تشتغل..
عم تعمر..