سأعرض هنا لقضية شاب واحد(وإن شاء الله ما يكونوا أكتر!!) من كلية الطب
القصة كما يلي فابحثوا له معي عن الحبل(يعني اشتغلوا متل الإطفائية) :
>>>>"طالب طب في السنة الأولى (تخيلوا "سنة أولى"؟؟!!) جاي عالدوام ......(قصة طويلة)
ويوم من الأيام شاف طالبة طب (كمان سنة أولى).
الشب أعجب بها البنت ، بس قال لحاله : "بكير خيّو لسّاتك سنة أولى"،
مرت الأيام والزلمة عبيحاول ينسى.
وعدت السنة الأولى والحمد لله.
في السنة التانية الزلمة طقت الشغلة براسه وقرر يضع حد لهي الأفكار.
قرر في نفسه أنو يطبق ما يلي : " بتحط عينك على هالبنت ، بتبحبش عن جميع العيوب اللي فيها ، وأكيد أنك رح تلاقي من هاي العيوب شي يخليك تنسى وتبطل أفكارك الغبية"
وبدأ المشوار ، يوم ورا يوم ، ...،شهر ورا شهر...وهيك كان كل ما يلاقي شغلة ما عجبته يقرر الانسحاب والنسيان.
المشكلة أنه كان بعد كل انسحاب يرجع بقوة أكبر وقد اعتبر أنه البنت بصراحة ما بتستاهل يظلمها وأنه كل شي ممكن يتعدل (لا تنسوا دور العاطفة).
وهيك عدت السنة التانية وصرنا بالتالتة.
هون الزلمة "قفعت معو" وقرر أنو ينسى تمامًا وقال لحالو :"أي خيّو أنت رجل والرجل لازم هوِّ اللي يسيطر على عواطفه مو العواطف هي اللي تسيطر عليه" وهيك قرر الانسحاب.
(((((((طولو بالكن علينا لسه القصة ما خلصت!!!!!!!!!!!!!))))))))
الشب المسكين ما حسن يقاوم أكتر من الفصل الأول ، وهوِّ قرب 14 شباط والزلمة ساح (تعبير عن المبالغة في الذوبان)، وقال لحاله " خلص، انتهينا، لازم اتحرك ،ضروري احكي معا "، وهيك بلشنا في قضية جديدة: وعدت الأيام والأسابيع والأشهر وهوِّ عبيتهمهم مشان يحكي معها.
وصرنا بالسنة الرابعة والأخ من جديد قرر النسيان وقال لحاله:"خلص خيّو كل واحد في هالدنيا الو (يعني "له") نصيب ، هالبنت مش(بالمصري) من نصيبي ، لو كانت من نصيبي كان الله وفقني وحكيت معها" ، وكالعادة الأخ ما طول أكتر من شهرين ، ورجع قرر ينهي الموضوع بطريقة أخرى.<<<<
العبرة من هالقصة مو الحبكة الفنية ولا غيره ، القضية اللي رح نحكي عنها هون رح تكون موجهة للجنسين(وأرجو من كل طرف أن يلتزم بالشي اللي بيخصه):
الشباب : لو كنت مكان هادا الشخص وصرت بالسنة الرابعة ، ما رح تفكر بشكل جدي أكبر؟
بمعنى آخر : ألا ترى أن طالب السنة الرابعة قادر على الحديث في موضوع الخطبة والزواج أكتر من غيره ؟ وبشكل عام : ما هي الحلول المقترحة لمثل هذه الحالة؟؟
الصبايا السؤال حساس وهام جدًا) لو افترضتي نفسك مكان هاي البنت (بطلة القصة) شو رح تكون ردة فعلك تجاه هالشخص ؟وكتيييييييير مهم رأيك في الخطبة قبل التخرج لو افترضنا انك لقيتي الشخص اللي ممكن يناسبك ؟ وبغض النظر عن "الفعل" و"ردة الفعل" : شو رأيك بهيك شخص ؟ هل يستحق الشفقة ؟أو يستحق التعاطف؟أو يستحق الاحترام والتفكير به بشكل جدي؟...شو رأيك عمومًا؟
انتبهوا يا طلاب السنوات الألى والتانية والتالتة ، لأنه الدور جاييكن .
وأرجو من طلاب الرابع بالذات والخامس والسادس كمان أن يتحفونا بآرائهم في هالموضوع .
وبأكدلكن تمامًا أن القصة حقيقية ، ولولا حساسية الموضوع كنت قلتلكن مين صاحبها.
لذلك أرجو من الجميع التعامل مع الموضوع بشكل جدي تمامًا والابتعاد تمامًا ما أمكن عن التفرعات والتشعبات الجانبية لهذا الموضوع لأنها لا تنتهي......
(بصراحة يا شباب ويا صبايا: اللي لسّا ما حبّ ولا تحبّ ، أرجوه أن لا يشارك في هذا الحوار ، لأنه مستحيل يحسن يقدر شو يعني الانجذاب والعواطف والاستعداد للتضحية بالغوالي والنفائس لأجل عيون شريك أو شريكة حياته المستقبلية)

شو هالدخلة القوية ، مو أول مشاركة بهالموضوع ؟؟ عطينا مجال نرحب عليك ...! كما جرت العادة ...

على راسي دكتور Fiso
بس ما كان في حدا رح ينتبه لوجودي لولا أني بدأت هيك
على كل حال لسّا ما صار شي
بتحسنوا ترحبوا فيّي متل ما بدكن
بس لا تنسوا تعطونا آراءكن عن الموضوع

بالفعل دخله أويه .....
الله يقويك ............. وينيلك إلي في باللك

من كلامك يبدو ان بطلة القصة اصلا لا تعرف بمشاعر صديقك

وبطل القصة لا يملك الشجاعة لمصارحتها...

لكن و بعد اربع سنين اكيد استطاع تكوين صورة ما لهذه الفتاة في ذهنه..وبما انه اصلا يملك مشاعر تجاهها

فعليه ان يقرر ..الدنيا قصيرة واربع سنين من عمره تكفي لكي يحدد موقفا..وهذا هو السبيل الوحيد ليخرج من دوامته ..

التي بصراحة اراها مصطنعة...


اما عن رأي الفتاة فلا اعتقد ان هنالك من يرفض في الحياة حبا صادقا...

طيب اربع سنين ومو متاكد اذا البنت شايفته ولا لأ؟؟؟؟؟؟؟؟؟ طيب بلكي بعد هالعمر حكا معها وطلعت البنت ما بيعجبها الشب شو بيعمل؟؟؟؟؟ الحقيقة هي مشكلة وما فينا نقوله احكي او ما تحكي .....لأنو ما مننسى انو لساته سنة ربعة ....قضية معقدة خلينا نفكر اولا

تحية للشباب والصبايا
أنا بقول أنو الحل سهل كتير
كيف؟؟؟؟؟؟
أنا بجاوبكون
مادام الشب طاير عقله بالبنت
وصارلو 4 سنين عشقان
معناها أنو استوى الزلمة
وأكيد هذا الشي عمينعكس عليه
وخاصة في التحصيل العلمي
(سألوا مجرب)
الحل ياجماعة هو التالي
يحمل حالو ويروح لعند هالبنت
ويصارحها
بدون تردد أو خجل
لأنو صرنا صف رابع وصرنا قادرين
نكون مسؤولين عن قراراتنا
ولا يخاف أنو ترفضو البنت
لأنو أنا متأكد حتى لو
رفضت الفكرة ما رح تجرحو
أكيد رح تحترمو لصراحتو
وشجاعتو ولا لأ يا صبايا؟؟؟
وشكراً للجميع

ما أكتر قصص الحب اللي عم نسمعها بس غالبيتها عم تنتهي قبل ما تتطور العلاقة, بس ليش؟؟
أنا برأيي بما انو صرلو 4 سنين ما عم يقدر ينساها وما عم يعرف الله وين حاطوه
فاذا كان واثق من مشاعره وعرفان انو بدو البنت وممكن يرتبط
اش عم بستنى؟؟؟
يروح يحكي معها وساعتها لكل حادث حديث يا بكملو أو لا سمح الله بنسى الموضوع وبفقد الأمل

بس رح يحط ببالو انو لسه بدو سنتين ليتخرج
والناس بهالكلية ما بترحم حدا من شرها
فلازم يسمع ويطنش حتى يقدر يكمل........

بالنسبة لرايي اذا كان الشخص مناسب فليش ما تصير خطبة قبل التخرج؟؟
عالأقل بيخلصوا من القال و القيل

ببساطة أنا مع رأي أنه يصارحها و يخلص.....الموضوع ما بده كل هالخوف المفروض الشب و البنت بالسنة الرابعة يكونو على قدر من المسؤولية و الوعي تخلي هيك خطوة ممكنة
يمكن كلنا لما بيصل الأمر لأكتر شخص منحبه منتردد و منخاف تكون محاولتنا هيي الأولى و الأخيرة و لهيك منستنى و نعيش على أمل انها ما تكون الأخيرة بدال ما نحاول.....يعني من باب على الأقل ما نخسره....بس لو فكرنا رح نلاقي حالنا خسرانينه بكل الأحوال و لو ضلينا هيك يمكن يحب أو ينخطب و يتجوز و نحنا لسا عم نقدم رجل و نأخر رجل
بعدين لما بيتحرك أخيرا و بيحصل على جواب رح ينهي هالمشكلة...إما يتحقق اللي بباله و ينبسط أو يزعل يومين كلاتة...لك خليهن سنة بس بيرتاح بعدين و هو هيك هيك رح يزعل هالزعلة!!

أولا السلام عليكم

و أهلا و سهلا فيك أخوي dingo و حيّاك الله أخ و زميل جديد في المنتدى

ثانيا : بالنسبة لقضية صديقك ....... يا أخي الموضوع بسيط و ما بيحتاج لكل هالتعقيدات ........

يعني الشب بيحب هالصبية .... و باني آمال و أحلام .....هل برأيكم الحل انه يبقى واقف و عبيتفرج لحد ما يجي حدا تاني يخطبها و بعدين يقول آآآآآخ يا ريت اللي جرى ما كان .؟؟؟؟؟

فالحل إذا """"" يكلمهـــــــــــــــا"""""" يعني الموضوع لازم ينحسم بعدين يا عزيزي - فاز بالهوى و الحب من كان جسور -

لكن العقبة اللي بظن انها عبتمنعه انه يكلمها ..هي خوفه من رفضها له ........

يا أخي الزواج قسمة و نصيب و كل انسان رب العالمين كاتبله نصيبه و رح ياخده اذا كان بالصين ..... يعني هالبنت اذا هي من نصيبه رح توافق و اذا مو من نصيبه ليش الزعل ؟؟؟؟

بعدين أنا رح دلك على طريقة يكون صاحبك مبسوط فيها مهما كان ردها ...... أوك ؟؟

شوف عزيزنا هلق نحن اتفقنا انه لازم يكلمها يعني كل الزملاء قالوا هالشي ....." و مع احترامي الشديد بيكون جبان و ما بيستحقها هي و لا غيرها اذا بيضل متردد "

طيب قبل ما يكلمها - قبل بيوم - مثلا ..... يسوي صلاة استخارة ......و يدعي الدعاء ...... و يروح يكلمها ....طبعا الدعاء قمة في الروعة ... و أظن الجميع بيعرفه .....

هداك الوقت إذا وافقت معناته صار اللي بده ياه و رب العالمين يسر عليه .....أما إذا رفضت معناها انه ما فيها الخير و أظن ما أحد عاقل بيزعل ان ابتعد عن الشر ...... انا ماقصدي البنت شر أبدا لكن الزواج منها ممكن يكون شر .....طبعا هذا نص حديث الإستخارة شوفوا ما أروعه ..... و فيه تسليم الأمور لله ليختار هو سبحانه الخير يعني متل ما بيقولوا " شيل من ذمتك و حط بذمة الله سبحانه "

((اللهم إني أستخيرك بعلمك و أستقدرك بقدرتك و أسألك من فضلك العظيم فإنك تقدر ولا أقدر و تعلم ولا أعلم و أنت علام الغيوب ، اللهم إن كنت تعلم أن هذا الأمر خير لي في ديني و معاشي و عاقبة أمري فيسره لي و يسرني له و بارك لي فيه ، و إن كنت تعلم أن هذا الأمر شر لي في ديني و معاشي و عاقبة أمري فأصرفه عني و أصرفني عنه و قدر لي الخير حيث كان ثم أرضني به يا أرحم الراحمين))..


بعد هذا ما بظن انه فيه كلام ينقال ......
الله ييسر على صاحبك أموره و يقسم له الخير