ما رأيك في الطالبة الجامعية وبالأخص في كليتنا
ما رأيك في أن تكون شريكة حياتك طالبة جامعية
وماذا إذا كانت طالبة في كلية الطب البشري .... !

القصة أنه لي ابن خال تخرج هذه السنة من كلية الهندسة المدنية جامعة حلب وهو شاب ممتاز برأيي سواءً من حيث السلوك أو الأخلاق أو الدين ... فهو الآن مهندس وهو وحيد أي ليس لديه خدمة علم (عسكرية ) وحالة أهله المادية جيدة والحمد لله فمن الطبيعي أن تخطب له أمه الآن فلا شيء يعيقه وهو ليس معترض على ذلك ولكن الغريب في الموضوع أنه اشترط على والدته أن لا تكون جامعية بل يكفيه أن تكون حاصلة على الشهادة الثانوية العامة فقط
أنا استغربت كثيراً من حديثه وقلت له " أنت الجامعي المثقف الذي درست خمس سنوات في الجامعة تقول هذا والله كل فكري أنو حاطط بنت من كليتك من دفعتك ببالك وبدك أهلك يخطبولك إياها " فقال لي أنت ما بتعرف شي نسع (حتى الآن) بكره سنتين رخار (اخريات ) وبتشوف أنو اللي عبقوله صح 100 %
أنا اليوم حابب أشوف آرائكم وتعليقاتكم ويا ترى أنتو شلون شايفين القصة من منظوركم.
صديقكم قلب الأسد
وشكراً

مافينا نحكم عالقصة من جانب واحد، إذا مابتعرف شو صار معو خلال حياتو الجامعية ، يمكن سمع شي قصة عقدتلو حياتو ، خلتو يربط الثقة في البنات الموجودة في الجامعة ، بس المشكلة ، أنو هو ما بيعرف بالضبط المستوى الفكري والاجتماعي للناس اللي بياخدو البكلوريا وبيوقفو عندها ، يمكن هو هروب من هذا الوسط إلى وسط آخر لايعرف عنه شيئا
مع انو المثل القديم القائل ، أنو اللي بتعرفو أحسن من اللي بتتعرف عليه ، وهو نظرا لكون طالب جامعي ، عندو تصور عن فكر طلاب الجامعة ، وهو عالأغلب رح ينصدم لدى التجربة الأولى أو عند المرحلة الأولى من التجربة الأولى ....

fiso عم يحكي منظبوط..
أنا بعتقد إنو البنات الجامعيات أكثرهن مملات.. وما عندهن شي..
أنا بهلك للاقي صجيقة وبستغرب كيف الشباب بيقتلوا حالهن ع كلمة من شي بنت..
بس تكون حلوة وبتضجكله بتلاقيه بتشط ريالاته.. وبفكر حاله شغلة.. وبيلحقها متل ال..
علما إنها ولا شي..
بس الألعن هنن بنات غير الجامعة..
الله لا يوريكن. أيحانا بحسد الشباب لإنهن ما مضطرين يدخلو بهيك أجواء

يا جماعة لألألألألألألألألأ...........

في شوية تعفيس، ويبدو كل واحد عندو مشكلة في الكلية يليعايش فيها، وهذا شي طبيعي لأنو انت مالك ببيتك انت بالجامعة (والجامعة جامعة)

ومازال الحكي عن البنات (شريكات الحياة)، صدقوني انّو بكلوسط سواء كان جامعات أو معاهد أو طالبات الثانوي في المنيح والقبيح..........

شخصيّا بتمنى تكون شريكة حياتي طالبة جامعية واعية اقدرأتفاهم معا

يا lionheart قريبك ممكن كتير يعاني مشكلة مع شريكة حياتو الغير جامعية، إلا اذا قرر انو ينزل كم درجة لعندها وقتها ممكن.

طب انتو ليش لغيتو فكرة انو يتجوز وحدة مخلصة ثانوي تازة(جديد) و بعدا تكمل جامعة و هي ببيت جوزا...هالشي موجود كتير و انا الي تجربة شخصية مماثلة و ناجحة
+ يا جماعة لازم ما تربطو المستوى الثقافي للانسان بكونو جامعي او لأ
طبعا الجامعة بتساعد على تطوير الطريئة اللي بفكر فيا الانسان..بس مو دائما بالجهة الصح..و طبعا انا هون بئصد بطرئية التفكير العلم و ليس الثقافة و الحياة الاجتماعية...يعني بعمرا الجامعة (بالاخص عنا) ما رح تغنيلك ثقافتك ...هاد الخطأ (الخلط بين العلم و الثقافة) للاسف وائع فيو كتير من شبابنا و مفكرين انو كونون طلاب جامعة فهالشي بخليون احسن من كل العالم اللي مو دارسة..بحب ئلون لهدول انو ئرايت كتاب (غير كتب الجامعة), جريدة, مجلة..الفرجة عالتلفزيون..السفر..حتى التواصل اليومي مع العالم (متل تاجر يعني)
هدول الببنو ثقافة الانسان مو فحص عم تئدمو بمادة حاذف نصا
و نظرة الاستعلاء اللي بينظرلا الجامعي لشريكة حياتو المو جامعية هي السبب بكتير من المشاكل اللي بتصير بيناتون

الموضوع يذكرني بالمقالة التي كتبها سنفور عن الأسرة أظن هذا الشخص المشترط مصاب بعقدة التفوق الذكورية في المنزل وبنفس الوقت ثقته بنفسه ضعيفة لذلك يريد طفلة ثانوية يتفوق عليها..... واحسافا على الثقافة المفترضة

وين ما رحنا في المنيح وفي العاطل، وكوني جامعي (وإذا ضليت عايش رح أصير دكتور إن شاء الله) ما رح يكون عندي أي مانع إني أرتبط بإنسانة مو جامعية (بس يُفضّل إنها تكون جامعية) وإذا كانت آخدة الثانوية أكيد رح تكون ناجحة شحط لأنها لو جابت علامات منيح كانت دخلت جامعة، أنا بعرف نفسي إنّي بمستوى فكري قادر على رفع المستوى الفكري لفتاة مثلاً آخدة الثانوية بس، وعندي قدرة على المناقشة والإقناع، مع إنّي كتير مفتخر بنفسي كإنسان بحاول دائماً إني أكون الأفضل وأطور رأيي للأفضل وأحسّن معاملتي للأفضل، رغم فخري بنفسي ما عندي مانع إنّي أرتبط بإنسانة مستواها العلمي أقل من مستواي وليس بالضروري إنها تكون فكريّاً أقل مني، وحتّى لو كانت أنا ماعندي مانع أناقشها وأقنعها وأفرجيها فين الصح وفين الخطأ، وبجوز هي تكون بمستوى فكري أعلى مني وتعلمني وين الصح ووين الغلط، يعني إذا كنت طبيب ما قرأت في حياتي غير كتبي الطبية وكتب علمية تانية، وأخدت (يعني اتجوزت) وحدة معها بس ثانوية وما تركت كتاب فكري أو أدبي إلا ما قرئته، مين اللي بده يكون بمستوى فكري أعلى؟ أكيد هيه
على كل حال الجامعة؟ أكيد بترفع المستوى الفكري للإنسان مو بكتبها، بل بالعلاقات الإجتماعية الممتازة اللي ممكن للإنسان إنه يقيمها، يعني صديقي وحبيبي الرجل الحديدي كتير أنا مرتاح معه ومبسوط معه ومرتاح بمستواه الفكري وكتير مندخل أنا وهو بنقاشات ومنتوصل لنتائج وقرارات مهمة كتير (طبعاً مو هو اللي رح يصير شريكة حياتي هو صديق حياتي) يعني اللي بقصد أنا استفدت منه في تطوير فكري كمان أكيد هو استفاد مني بالمقابل، وكل الحكي مشان أوصل في النهاية إنه الحياة الجامعية الاجتماعية السليمة بترفع الإنسان فكرياً.
بالنسبة للبنت اللي أنا بدي ياها ما عندي أبداً شرط بخصوص الدراسة: أنا بدي وحدة حلوة وأمورة ولذيذة وتكون قادرة على التفاهم (وهالقدرة ما بكتسبها الإنسان في الجامعة بل في الحياة) والنقاش (طبعاً أنا مستعد على تغيير فكرة بحملها إذا زوجتي أقنعتني بأفضل منها بس الإقناع بالمنطق والمنطق وبس) وتكون فهمانة ومدركة شو يعني أسرة وبيت وتتحمل مسؤوليتها تجاه الأسرة متل ما بدي أنا أتحمل مسؤوليتي، وإذا كنت بدي أرتبط بإنسانة جامعية ما حسمت أمري إنها تكون من الطب أو مو من الطب متل ما قلت الدراسة ما كتير رح تأثر بس الطبيبة سؤال بيطرح نفسه عليها كيف بدها تربي أولاد؟؟
يعني الطبيعة خلقت الرجل يشتغل برات البيت ويأمن مستلزماته الداخلية والمرأة تشتغل في البيت من جواته وتربي الأطفال وتدير بالها عليهن، ما لي ضد عمل المرأة بس الطبيبة اللي مضطرة تفتح عيادة ما بعرف كم ساعة في النهار كيف بدها تربي ولادها؟؟؟
ما حدا يقلي بتحط الأولاد عند حماتك أو عند أمك أو بتجيب شي بايبي سيتر لأني ما برضى بهالحكي.

لذلك بطلت أتزوج وخلص ما بقى بدي ولا حدى يفتحلي هالسيرة بنونب بنونب

انشاله ما ينفتح المنتدى بكرا.. من شان طلبات الزواج..

وللا ليش لأ..شو الغلط..؟ ما يعني رح يكون أحسن من المكتبة.؟ شوفوا كم عريس وعروس.. تخروجوا من مكتبتنا العظيمة..؟؟

أنا مع هي الحركات.. بس مو عينك عينك..

ليش مو عينك عينك.. ما دام بالحلال.؟



بالمناسبة شنكول.. أنا لو عندي أخت صغيرة( والحمد لله إنو ما عندي أخت صغيرة.. لنفس السبب) كنت بزوجك ياها..

شو وين رح ألاقيلها خرطوم شنكولي أطول من خرطومك.؟

بعتقد يا قلب الأسد..إنو الطالبة الجامعية هي شخص تجاوز كذا اختبار بنجاح بحياته،

هلأ يمكن ما النجاح بالإمتحان هو المؤشر بس أكيد

إنو الفشل هو مؤشر خطير..

التقارب العقلي بين الطرفين بعتقد شرط هام..

في ناس حتى بتفضل إنو يكون في تقارب اجتماعي اقتصادي..

وهو عامل غيابه ممكن يعمل مشاكل ما قليلة، بس ما هو سبب لإفشال المشروع بين تنين في بيناتهن توافق..

في نسبة غير قليلة من المتعلمين جامعيا عم يكونوا ميالين لإنهن ياخدو غير متعلمات، غالبا بتكون زيجات ضمن العيلة، يعني من الاقرباء.. وهي ممكن تفشل لإنو هو ممكن يكون شايف دنيا وهي ما طالعة من البيت.. وما عم يفهمو عبعض.

وفي نسبة كمان معقولة من المتعلمات جامعيا عم ياخدو غير متعلمين.. غالبا بكون فيها الشب (ممكن ما بكون شب.. بكون ختيار) زنغيل..

(والتانية هي برايي العيب يللي حكيت عنه بمقالتي.. ممكن تنجح!!! بسبب رغبة البنت بحياة هادئة مستقرة،( سيارة وسرلنكية، واستقبالات، وتلفزيون..) بيصرف عليها الرجل وهي بتتستت يعني ما قيمة الشهادة غير إنو حسنتلها فرصها بالحصول على الشريك..

يعني رفعت سعرها بعبارة فجة..





قد يوجد يا إيفريف جامعي غير مثقف، بس يا ترى فيك تلاقي غير جامعي مثقف.؟

يمكن في شي اليوم ضروري هو التعليم العالي.. كحد أدنى..!!

(التعليم الجامعي هو ما بس وسيلة لتحسين فرصة لاشخص بالحصول ع شغل.. هو لرفع مستوى الناس..

في فكرة حلوة قيلت إنو الجامعة هي جامعة.. يعني فيها كل شي، طبعا كل شي بيجي على الجامعة بس ما مفروض إنو يطلع منه نفس الشي.. يعني ما لازم يضل ع حاله بيطلع متل ما دخل.. يفترض الجامعة تساعد الناس لحتى تختلط مع بعضها وتتعرف على أنماط تفكير وطرق حياة غير.. على ناس من غير دين، من غير محافظة، وحتى من غير ثقافة، غالبا النماذج المتطرفة المحافظة المغلقة هي نماذج بتربّي الخطأ.. يعني في مثل بقول إنو الكويس "مبندق" (وبعتذر عالكلمة ما لقيت غيرها..) يعني إنها أصله ما شريف ، يعني ما إله أصل نقي وموروثة أب عن جد، لأ.. فيه عرق من كل محل.. بخليه أحسن من كل شي نقي..

كان ممكنللجامعة إنو بتساعد على تطوير الطريقة اللي بفكر فيا الانسان.. لو في تواصل إنساني بالجامعة..

بس جامعاتنا كإنها صايرة بس للتعليم...(وكتيرين بقولوا إنو حتى تعليمنا فيه مشكلة..)

التعليم ما هو الثقافة، بس هو شرط للثقافة..

والمتعلم هو أكثر فرد بالمجتمع مهيأ لحتى يحمل ثقافة، (ثقافة بالمعنى المعرفي.. )





نظرة الاستعلاء يا شعاع ما بعرف إذا فينا نردها للذكورية، يعني ممكن المرأة إذا كانت متفوقة بشي إنها تستعلي على الرجل..

يمكن إلها أساس بنظرة للعلاقة إنو هي تناحر وليس تشارك، وكإنو مين بدو يكسر راس مين.. بغياب الحب.. وأحيانا بحضور حب مشوه..

لشخصيات مشوهة ما محققة توازنها وانسجامها مع ذاتها.

يعني أنا لما ما بكون مقتنع بشخصيتي، وحاسس بنقصي.. وقتها بحاول أثبت إني أحسن من غيري..

للأسف في مشكلة جوهرية.. هي إنو التعليم عندنا معزول كتير عن الحياة.. يعني تنين متعلمين وجامعيين بس ما عندهن شي معرفة بفن العيش إذا بدك.. أو بالحياة، يعني لسا نفس العقلية يللي دخل فيها الشخص على الجامعة طلع فيها.. وهي يللي أخدها من أسرته.. هي غلها علاقة برأيي بإنو ما عم يصير في تفاعل إنساني بالجامعة..

يا شنكول الموضوع ما بهي البساطة، القصة ما بس تغيير مستوى فكري، على فرض إنو هدا سهل..

الموضوع طريقة حياة، على فرض إننو الزوج هو أفضل،

طبعا .. مجتمع مشوه عم يطالع ذكور مشوهين وإلهن عقدهن. .وإناث مشوهات إلهن عقدهن. كمان..

غالبا رح يكون عندك قدرة على المناقشة والإقناع لسبب بسيط هو إنو شريكتك ما رح يكون عندها هي القدرة.. يعني آخد شخص سلبي شايفك شغلة عظيمة وعم يعبدك إلا شي.. وشو ما بتقله بقللك صح.. بس ما هيك العلاقة..