وحدي ساكن.. من شهور..
ببيتنا، يمكن كنت بشتكي دائما من الوحدة،
اليوم صاير عم أشتكي من التنين!!

طلعت من كم يوم فارة..
صغيرة لازم تكون بحجم الكف.. لتقدر تنزل وتطلع من البلوعة..
بس لما بشوفها بحسها كبيرة..
وهي عم تتمشى بثقة أو بخوف (ما بعرف) بالمطبخ بين البلوعة والبلوعة التانية..

مفترض إنها فارة.. مع إنو الإحتمال الأكبر.. قياساً للونها الأسود القميء..
وقياساً لمدى الرعب يلي بتعمله عندي.. إنو تكون جربوع ما فارة..
مع إني من بقيت لحالي (من شي 9 شهور) وأنا مكركب بحالي وبوحدتي بالبيت..
وعم نادي من شان شي حدا يشاركني وحدتي.. وخبزاتي والزعتر
بس اكتشفت مؤخراً إنو وجود حدا معك بالبيت، حتى لو بس بده يطل عليك بين وقت وتاني..
(مع إنو عم يشاركك وإنت ما شايف) يمكن كل هالشغلات السابقة..
ما بالضرورة يحل المشكلة..
يمكن يكون عبء عليك.. ويكركبك بزيادة..

بحاول لما بشوفها أتذكر جيري.. (فارة حلوة أليفة، خفيفة دم..)
بلكي.. بخف شوي الغثيان عندي..
بس.. ! ما في فائدة..
(بالفعل رهيب هالشخص يلي حوّل الفارة (أو الجربوع) من كائن مثير للإشمئزاز إلى شي funny وبضحك.. شلون قدر يعمل من الفارة الكريهة شي بينحب.. يعني بيدخل للقلب !!
(ما فارتي أنا.. بتقرف.. بتدخل ع البلوعة كل ما بتشوفني.. وبعيدة كتير عن القلب)

الغريب إنو ممكن الفارة تكون مني خايفة.. يعني ما بس أنا خايف منها!!
الخوف متبادل..!

هلأ.. هو يلي عندي.. ما خوف خوف.... (ما حدا يقول سنفور بخاف من فارة..)
هو شعور خلطة من القرف، ع الاندهاش، ع المفاجأة.. ع شو.. مفرني.. ع شوية خوف..
بصراحة.. مو خوف خوف.. هو شي متل .. الهلع..

طيب.. يعني حط حالك محلي.. (أو حطي حالك..) إنو تدخل ع المطبخ..
تشوف كتلة لحم وسخة سودا ع بنية إلها ديل عم تمشي حد إجرك.. طالعة من البلوعة أو رايحة إلها..! طيب.. والله ما منيحة هالشغلة..
جربت أسد البلوعة.. بس رجعت طلعت.. (بالحقيقة ما بعرف إذا طلعت.. أنا شفتها بس وهي عم تنزل....)
حدا عنده حل لهالمشكلة؟؟

يجاوبني ع واحد من السؤالين..

شلون فيني أخلص منها بالمرة- وهدا بكون أحسن.. بكتير.. بشرط إني ما أقتلها، ولا أشوفها ميتة عندي وأضطر لشيلها!

إذا كان لا بد.. وباقية معي..
شلون فيني أعتبر الفارة شغلة كويسة متل جارة وحلوة ببيتي.. وأعتبر وجودها أليف معي.. ومؤنس..
لحتى بس ع الأقل ما ينط قلبي كل ما شوفها.. !!

منيح وضحتلنا الغرض الفلسفي من قصة الجردون والبلوعة ...

يا سيدي أنا بقلك ليش الله خلق الفارة ....

مشان يدايقك فيها ... وهيك بتتذكره وبتفكر فيه !

ع مبدأ ليش الله خلق الذبابة.؟
من شان توقف ع هداك الشي.. وترجع توقف ع إنفه للمتسائل...
وتفرجيه قدره عند الله..
ويبطل يسأل هيك أسئلة..

ما اقتنعت معك هاني.. لاقيلي غيرها

يا سيدي موضوعك كتير حساس

عجب الله خلق الفأر مشان نجري عليه التجارب ؟؟؟

كويسة هي الصور.. كليوباترا..
وشكرا إلك.. يمكن هي من أحسن الطرق.. يلي ممكن تعمل معي إزالة تحسيس Desensitization من شوفة جربوعتي الحلوة.. (شايفة شلون تغيرت اللهجة.. )

ع فكرة..
أنا الموضوع يلي كتبته.. هو من هالباب..
لما الواحد بفكر بالشغلة.. ممكن يشيلها من راسه.. ويتعامل معها بطريقة مختلفة..

بس بضل السؤال الجوهري.. ليش انخلقت الفارة..
والجربوعة بالمعية..

من شان نطعميها حليب..؟ ونحن عليها.؟

المشاركة الأصلية بواسطة سنفور

أو يعني الطاعون كويس طيب يا الله دخيلك؟؟
يعني قرية كاملة.. مثلا عن بكرة أبيها.. بعصية هانسن.. مثلا Mycobacterium leprae..؟

عصية هانسن.. إذا كانت هي يلي بتعمل الطاعون..
اسمها Yersenia Pestis
وليس Mycobacterium leprae يلي هي المتفطرة الجذامية..

يا ريت السنة التالتة.. صحابنا..
يصوبولنا.. إذا كان في شي ما ظابط.. ما يتركونا هيك ع عماها..
بعدين بلكي جتنا بالفحص.. ؟؟

طيب رح أعطيك السبب المنطقي ...

الفارة هي جزء من نظام حيوي متكامل ، ومشان هيك الله خلقها .... يعني مشان تكتمل السلسلة الغذائية و هالحكي ...

ما بصير تفك مكثفة مثلا من على لوحة إلكترونية وتجي تقلنا لشو هي ؟! ...

وبعدين شغلة تانية ... حاج بقى رومانسية وبدك تعمللي الجردون شغلة حلوة وبتغرف القلب ...

يوجد في هالدنيا شغلات مقرفة ولا يمكن أن تطاق ... لازم نتقبل هالشي ونعيش معه ...

هدا اسمه ( نضج عاطفي ) ... يعني ما بصير الواحد يضل في حالة انكار وبدو يشوف كل شي حلو وممتاز ...

بأمرك أنا.. هاني.. إنت بس خدني بحنانك.. شوي
الجردون مقرف.. متل ما بدك.. وأكتر
بس آخر مرة لما قلت إنو عم أعمل إزالة تحسيس..
هي ما بتعني إنو هو رح يصير حلو..
رح يضل بشع.. بس ما ضروري البشع.. يعمل عند الواحد ردة فعل عنيفة..
شفت الصورة يلي حطتلك ياها كليوباترا..
الجرادين مع البشر عايشة ومتعايشة..
..

حتى هيك ما بدي وصل أنا.. بدي ياه بس ما يطلع لعندي..
وانشالله ينفلق بالبلوعة شو بدي فيه..
خلقه من شان النظام الحيوي المتكامل؟
ولشو بالله هدا النظام الحيوي المتكامل..؟
مثلا لو الحية بتاكل الشغلات البشعة يلي بياكلها الجردون... ما كان بيمشي الحال؟؟
شو خربت الدنيا.؟ وخرب النظام الحيوي المتكامل..؟ لو بلا هالجردون؟

المشاركة الأصلية بواسطة سنفور

عصية هانسن.. إذا كانت هي يلي بتعمل الطاعون..

كمان ع مبدأ التصويبات بملخصاتنا
بينزل خمس صفحات تصويب بآخر الملخص
بعد كم يوم..
بينزل للتصويب 10 صفحات تصويب

عصية هانسن بتعمل الجذام..

أما الطاعون فبتلعمه اليارسينيا الطاعونية كما ذكر.. وهي ما بتقربها لتبعيت هانسن
بتقربها لهديك اليارسينيا يلي بتعمل إلتهاب معدة وأمعاء..

ولو يا سنفور ... شو أمري ما أمري ... انت أميرنا كلنا ...

عراسي أحلى سنفور ...

بس ما فهمت الرد تبعك ...

يعني بدك تقول انو لو لغينا الفيران والجرادين والصراصير والدبان والبق والبعوض والنمل ومتفطرات هانسن ويارسينا الطاعون ، وكل هالشغلات اللي ما بتحبا ... بدك تقول انو ما رح يصير شي ؟

ولا رح تفرق بالنسبة للطبيعة والتوازن الحيوي ؟ ... حتى العلم ما قال هيك ...

وبعدين في نقطة مهمة جدا غابت عن بالك ...

لا تنسى اننا حينما نحاول التوصل إلى حكمة الله في جميع الأمور فإننا نضع عقولنا البشرية القاصرة في موضع أكبر من قدرتها .... لأننا نريد حينئذ أن نُعمل هذه العقول المخلوقة في فهم حكمة صانعها وخالقها الذي أوجدها ... وهذا لا يستقيم ...