مقدمة: قالوا عنك سلسلة جديدة، تهدف إلى جمع آراء الأعضاء حول أحدهم، وتهدف إلى زراعة الحب والمودة أيضاً، ليس لقاءً وإنما استعراضاً للآراء ... آراء المحبين ... وحتى غير المحبّين ...

باختصار ... سألناهم عن كليوباترا ... فقالوا ...

ها هي كليوبترا في أول حلقات المسلسل الجديد....(قالواعنك...)...

لا توخذيني اذا اجيت شوي متأخر... بس حبيت شارك بدون ما ابعت رسالة لشنكول.... (مشان ما زدلو مشاركاتو ....أو بالأحرى مشان زيد مشاركاتي... )...

وين بدو يطلع معي الحكي بعد 4 صفحات من المديح بحضرتك... وبصفات حضرتك...
أكيد ما بعارض أي منها... بس راح أكد على بعضها واللي أهمها....

انك أحد اقدم المشاركات بالمنتدى ...(يعني بيجوز أقدم مني!!!... )
الك إلمام واسع بمجالات كتير ... وأكيد منها الطب... ولولاها أكيد ما كنتي طولت بالك علينا لهلأ...
دائما بتحبي يكون محور الحديث عندك...(لاحظت هالشي بالتشات...وعدة مرات...)

مشان هيك راح افرض انك بالمقابلة... وأكيد راح أسألك السؤال...( أي شخصية راح تتقمصي اذا رحتي على حفلة تنكرية...؟؟؟ )...

ما تعذبي حالك... انا راح جاوب عنك هالمرة... (لأنو الموضوع اسمو "قالوا عنك"...)...
انا شخصيا بتخيلك مذيعة شي برنامج....وخاصة البرامج اللي فيا ضيوف كتير... متل ..."أكثر من رأي" ...اذا بتتبعي الجزيرة...

وشكرا"....عذبناكي معنا.....

لما كانت تطلعلي العبارة اللي حاططها شنكول عن موضوع [ قالوا عنك]...كنت مفكره متل اللقاء المعتاد..

و لأني بعرف إنو كليوباترا ما كان بدها ينعمل معها لقاء..ما بعتت شي..بس اكتشفت متأخر إنو راحت علي و الكل شاركوا من عداي

على كل متل ما قالوا الزملاء أن تصل متأخراً خير من ألا تصل أبداً..

كليوباترا...

شخصية فريدة من نوعها..مزيج من روحانية الشرق و تطور الغرب...

و غالباً هالنوع من البشر بيكونوا مؤثرين و بيتركوا أثر مميز بالنفوس..

في إجماع على كونها مثقفة ..هالشي واضح و ما بده براهين..اقرأ مشاركاتها بتعرف.

جاي عبالي حط مقاطع من مشاركاتها بالمنتدى , بس اتذكرت إنه حطيتهن بمشاركة عيد ميلادها..

و كمان نشيدة God save the queen حطيتها من قبل..

على فكرة الجانب الإيماني عند كليوباترا بدو وقفة طويلة... نادراً بهالزمان ما تشوف إنسان آمن عن اقتناع..

يعني غالباً إيمان موروث من الأهل أو تقليد لأشخاص..أما إنو شخص يقرأ و يبحث و يقتنع..نادر..

لكن كليوباترا من هدول الناس...لما بتكتب بهالمجال بالذات بفهمها ..

فيها كمان صفة حلوة..كليوباترا موجبة كتير..يعني يمكن أكتر عضو بالمنتدى بيحط معايدات للأعضاء الباقين..

كليوباترا: الله يوفقك و يثبتك و يرزقك على قد نيتك..

موفقة..

ألف مرحبا بك عزيزتي كليوباترا....

رغم أني ما بعرفك إلا من خلال مشاركاتك الكثيرة ( ماشاء الله) والحلوة ( يسلموا دياتك)...

وصحيح إني ما علقت إلا على واحدة او تنتين يمكن ... بس أكيد إني قرأتهم كلهم ، استمتعت فيهن كلن .. واستفدت من بعضن . (مثل للعزابي)).. وفي بعض منهم ذكرتيني بأمور كنت ناسيتها ( مثل اية وفكرة )..... وفي بعض منهم رجعتيني لشقاوة الطفولة ( مثل ليلى والديب )....ووووو

كلهن مع بعض رسموا لي صورة لشخصك... صورة فتاة مميزة و اجتماعية - ومثل ما بيقولوا : "مثل الطبق الصيني وين ما طرقته بيرن "....أو بما معناه

ارجو ان أتعرف عليك اكثر قريبا

وادعو لك بالتوفيق

السلام عليكم

سنفور ..
توصلك الرائع "يبدو انه استنتاجيّ" إلى أن المنتدى بدوني كان صار "منتدى بدوني" طريف .. بدو وقفة تأمل !
ممكن نستخلص منو عبارة ذكية ((المكان الذي لم أزره هو المكان الذي لم تدسه قدمي)).

وحلو كتير أن عم تعمل دعاية اللمسة الخاصة تبعيتي بموضوع جارتك الجردونة !!! معناها عجبتك .. وهادا اهم الشي.
أكيد .. الشعار القديم ما تخليت عنو .. لأن مافيك تتخيل كليوباترا بدون حب .. والحب أكيد بيودي لعشتار .. بالتالي .. وصلت للتفكير أن عشتار متقمصة جسد كليوباترا .......... فكان الـ"الشعار" بيجمع التنتين
للي ما لحقوه فالشعار كان:
أنا عشتار سلطانة العشق .. أنا كليوباترا ملكة الجمال .. أنا كالموت إن عرفتني فلن تعرف بعدي

بس ليش عم تتسائل كيف حكون بعد سنة ؟ ويا ترى انت شو بتتوقع ؟

سنفور .. لما بيبصم بموضوع ... بدك وئت تأعد تفك الخطوط المسامية لتعرف من وين بتبلش ووين بتنتهي ... هي ميزة ردودو ..... أن أفكار اللي بيقراها ممكن تتراقص لكن بالنهاية إلما تصل لمبتغاه.

مشكور كتير عالمرور .. والبصمة كمان !

والسلام عليكم

السلام عليكم


أخي حازم .. أكيد رسالتك وكلماتك شرف إلي (لأن مو كل مين بيصحلو يحصل على شهادة تفوق من المعلّم)
ومتل ما دايما بدعي ربي .. أن ما يغيرنا .. إلا نحو الأحسن ..
ما يغير فينا الشي يلي حبيتوه .. يلي تعودتوه ويلي شفتوه مميز فينا ..
أن نضل دايما ........ عند حسن الظن

خصوصي .. يلي لمسته باليوم الاول من عيد الفطر .. هههه وئت اللي نطيت من الكرسي وصرخت برافو ؟
لهلئ بتخيل هديك اللحظة .. !!! ..
وان شاء الله كل إيامك أعياد وسعادة وعئبال تخرجك .. وفرحتنا فيك.
الله يوفقك .


والسلام عليكم

وعليكم السلام ورحمة الله وبركاته ... أختي حبيبتي البتول ...


تتواضعين كنجم بعيد مضاء .. لكن الظروف تباعاً تبين مدى عظمة نفسك .. ورقة روحك ... وأفكارك المتراقصة على صفحات إلكترونية تسبقها عبارة :

لكن ذخيرتي من الكلمات قليلة .. وأسلوبي في التعبير ضعيف

وأرى عزيزتي أن الوصف .. حالة نسبية

فمن يرى في الوصف نقص .. فليعلم إنه في الكاتب وليس في الموصوف...

تحبيني .. فتكتبين ما ترين .............. ومن لا يستشعر ذلك فليس لأنك قصرت بكونك الكاتبة .. بل لأن مشاعرك الصادقة قد لا تصل إلى الجميع .......

وأبقى أتعلم منها الكثير

إن كان من معلم بيننا فهو قلبك .. علمني أشياء كثيرة أولها الصدق وآخرها التواضع .... وما بين الصفتين الكثير الكثير

وتبدأ الطبيعة التي تحملنا رياحها وترمينا معاً بعيداً عن ضوضاء المدينة ...... في أكناف من أحببناها معاً.. في السماء التي نطير بها بحرية ..............
(اللهم أعد علينا هذه اللحظات على الواقع !)

سبحان الله ... كيف اجتمع جسدانا قبلاُ في ظروف أخرى ... ولم تجتمع عينانا بالمحبة. أم أن القدر كتب قصتنا بطريقة ثانية وأهداف أخرى .... ؟

الدعاء لك محفوظ في كل يوم ... كما تعاهدنا يوماً ما ............. !!

أراك على خير أيتها القريبة


والسلام عليكم

السلام عليكم

شكراً زميل هاني لكلماتك الموجهة لشخصي .. والاعتراف الفذ !! ...

ورغم اني ما اختبرت شخصيا ، بس بظن أن قلبها طيب ...

والله يستر من الاختبار !!! .. بس شو يلي خلاك تظن هيك ؟

ومشان النكهة المميزة فان شاء الله تضلوا تتذوقوها.

موفق

شكرا إلك ..


والسلام عليكم

أهلـــيـــن والله !

أخيرا".. كليوباترا.. إعذريني.. كان لازم كون من أول المشاركين .. بس ظروف منعتني و أخرتني لهلق..

أخيراً ايه نعم منيح إنك إجيت وسمعناك بخير .. وان شاء الله الظروف عادية وما خطيرة ؟؟!!!

فعلاً اللقاء تبعنا كان حلو .. ومميز بوجود عيونك الحلوين يلي دبحوني كلما تطلعت فيون .. برغم طرطوسية إلي كانت مجرد طيف .. نسمة .. بتطل بالمنتدى وبتختفي ....... لكن لما ضربت جذورها بين الصفحات حسيت بعمقها وحلاوة تفكيرها وبساطتو ..... معقول كلامي يكون إلو تأثير ؟!

المهم انك بيناتنا وفيني حاكيكي وانا عم بتخيل عيونك بكل وئت ... وعئبال ما ارجع اسرح فيون ..

بشوفك بخير .. وشكراً لطلتك الحلوة

السلام عليكم ..

ما بعرف إذا بيحق لي أشارك مرة تانية بالموضوع ؟؟؟ بس كل شوي بتذكر شي عن كليوباترا .. و هالمرة ذكرني فيها توربو ..

ولو .. فيك تشارك إيمتى ما بتحب ووين ما بتحب ..

عموما التوقيع الجديد كمان حلو ...

لا تشك بقدراتك العقلية ما شاء الله عليك .... امبلى كنت شايفو هون !!
وحلو يعجبك توقيعي الجديد (المشترك مع حبيبة قلبي زوربا اللي بدها عزيمة لتفوت عالموضوع وتكتبلي رسالة مودة)
ويعني .. ... انا مزبطة التوقيع عالفتوشوب ... فأكيد قصدك عالشكل حلو مو بس عالكلام ما هيك ؟

أما عن زوربا فمشغولة شوي وما بتتاخذ ... أكيد بس يصحلها حتفوت وتكتب .. ولو ما فاتت وكتبت فحتتصل فيني وتقلي هالحكي .... يعني مو مشكلة

و أكيد لي عودة ... للموضوع الحدث ... كليوباترا

الله وسهلا والله يعين


والسلام عليكم

السلام عليكم ...

أهلا زميل نائل .. المبسط صدره دائما للنقاش والمساعدة

لا توخذيني اذا اجيت شوي متأخر... بس حبيت شارك بدون ما ابعت رسالة لشنكول.... (مشان ما زدلو مشاركاتو ....أو بالأحرى مشان زيد مشاركاتي... )

ومو مشكلة جيتك بأي وئت .. ولو ..... يعني أنا كمان لمان فتت ولائيت شنكول عم يزيد مشاركاتو شوي استغربت .. .. لكن أكيد القصد منها شريف (الله يذكرك بالخير شنكول)

أد ما كان في صفحات انكتبت .. أكيد عند جديد !! .. ما بتعجز

انك أحد اقدم المشاركات بالمنتدى ...(يعني بيجوز أقدم مني!!!... )

بيضل الصدر إلكون والبلكون إلنا

الك إلمام واسع بمجالات كتير ... وأكيد منها الطب... ولولاها أكيد ما كنتي طولت بالك علينا لهلأ...

والله أحيانا بقول لحالي : شو عم تعملي هون ؟؟
وبحس بالتطفل لما بشوف أن مشاركاتي أكتر من كتييييييير زملاء كبارية هون .....
فلذلك الشكر إلكم على تطويلة البال ..................
أما مشان معرفتي بالطب .. فالفضل إلكون ........ حتى أحيانا بتمنى لو اني عم بدرس معكم ..
لكن الله إلو أحكام تانية

دائما بتحبي يكون محور الحديث عندك...(لاحظت هالشي بالتشات...وعدة مرات...)

إذا قصدك هالمرتين تلاتة يلي استلمت فيهون الحديث بالشات .. فلأن المتشتشتين كانوا كتار والحديث كلو بس سلامات وكل واحد بديرة .. ففتحت موضوع مشان يشترك الجميع ... وأروع حديث طبعا كان عن الأدوية والمورفين. لكن وئتها فتحت الحديث لأني كنت بحاجة وليس لأني بحب الحديث عني ........ الله يعطيكون العافية يعني عالمساعدة.

مشان هيك راح افرض انك بالمقابلة...

لأ أكيد هادا دليل غير كافي لهالافتراض الخطير

وأكيد راح أسألك السؤال...( أي شخصية راح تتقمصي اذا رحتي على حفلة تنكرية...؟؟؟ )...

أطب إيدي عالمصحف كنت بدي جاوب عهالسؤال قبل ما انك تكتب المشاركة اصلا
بس أكيد ما رح اختار لبس المذيعات ههههههههههه .. يعني ان كان ولا بد .. ممكن تتخيلني مذيعة حفلة طلابية .. أمسية شعرية .. مؤتمر طلابي ..... بس أكيد مو برنامج تلفزيوني

أكيد لبس كليوباترا الملكة هو الألبق على الإطلاق .. مع مكياج عيون أسود تحكيلة وشعر أسود كاريه ...... روعة !!
وممكن كمان لبس الأم إيزيريس .. يلي كانت كليوباترا الملكة تلبسون بالاحتفالات

والسلام عليكم ..

!! .. الأسئلة ممنوعة .. !!