يا جماعة انا حبيت آخد رأيكون بهالموضوع ..... أنا طالبة بالحادي عشر العلمي ... و الحمدلله كل أموري الدراسية تمام .... عندي ميول كتير قوي لكل شي بيتعلق بأمور الكمبيوتر .... و أملي بكلية هندسة المعلوماتية.... بس بنفس الوقت بلاقي انو هيك مجال للعمل بيكون محصور و نهايته مسدودة بوجود شركات الكمبيوتر العالمية متل المايكروسوفت يعني ما بتخيل يوم من الايام يصير لسوريا مكانة بعلم الكمبيوتر عالمياً يعني بالمختصر بلاقي انو الكمبيوتر عندنا فاشل سواء كان دراسة او عمل..... و بنفس الوقت بتصور انو هندسة الكمبيوتر بتناسب الشب اكتر من البنت !!!! والدي مهندس و دائماً بحاول يبعدني عن التفكير بهندسة المعلوماتية و بيحاول يوجه تفكيري للطب او الصيدلة و بيقول انو البنت خلقت لتكون في مجال عمل إنساني و ليس مع آلات .... يعني بابا شايف اكتر مني و بيعرف شو حال المهندسين بسوريا... مهندسين كتار و مافي فرص عمل كبيرة .....
و بنفس الوقت انا ما عندي ميول للطب و ما بحب مادة علم الأحياء بفضل دائماً الرياضيات و الكيمياء... يعني خايفة اني ادرس طب و ما مارس هالمهنة بالشكل الصحيح.... علماً انو الإنسان لازم يدرس الكلية الي بتتوافق مع رغباته .... و إذا ما كان الطالب راغب بالكلية اللي عم يدرسها ما ممكن ينجح نهائياً ... و إذا كان عندو رغبة فيها رح يكون من أنجح من مارس هالمهنة.... و عندي مثال واقعي أمامي اللي هو عمي... دكتور قلبية دارس برومانيا (لأنو ما جاب علامات طب بسوريا) بس هو هلأ من أشهر الأطباء بالشام و من أنجحهم على الإطلاق .....
أما بالنسبة للصيدلة برأيي انو الصدلة فرع كتير حلو ما دام إلو علاقة بالكيميا بس بنفس الوقت إلو علاقة بالعلوم .... و اذا دخل الطالب صيدلة متل كأنو دخل طب تقريباً يعني ما ابتعد عن المادة اللي عم يتجنبها بكلية الطب .... و أنا انشالله بجيب علامات تأهلني أدخل طب بس مو عرفانة وين بدي حط هدفي و لا حتى قدرانة اتخيل حالي بكلية الطب لأنو كتير صعب انو انسجم مع هالمادة
و سؤالي انو أكتر أعضاء هالموقع من كلية الطب.... فهل دخلوا هالكلية عن رغبة أم دخلوها لأنو جابوا علامات طب؟؟؟؟ و هل الإنسان بيقدر يتكيف مع مهنة هو ما بيحبها و يصير يحبها مع الزمن ؟؟
عطوني رأيكون...... و شكراً
وعد

مرحبا ....
طبعا لن أزيد ( مهما تكلمت ) شيئا على كل ما تفضل به من سبقني من الأعضاء ....

ولأن الموضوع سابق للحديث فيه ( حيث لم تظهر نتائج امتحانات الباكالوريا للعام الدراسي 2005-2006 ) و هذا لعمري أمر مستفز !!!!..... فإنني سأفترض أنك حصلت على المجموع الذي يتيح لك اختيار الفرع الذي تريدينه .... لهذا فإن هناك بضع نقاط صغيرة أحب أن أوضحها .....

دراسة الطب شاقة حقا ، ومن العسير أن يمارسها المرء ما لم يعشق الطب أو يجبر على عشقه... و يوجد دائما وقت للهواية و الميول فاليوم يتكون من أربع وعشرين ساعة .. لايمكن أن نقضيها كلها فى الطب....
مهما كان خيارك فإن هناك دائما ذلك الهاجس الأزلي : (أخشى أن أستيقظ يوما في الأربعين لأجد أنني ضيعت حياتي بسبب خيار خاطئ اتخذته و أنا صغيرة ساذجة ....)!!!....

هنا أنت أمام حلان :
إما أن تختاري الطب لترضي ضميرك مهما كانت النتائج المستقبلية بأنك قد اخترت أفضل الخيارات التي طرحت أمامك !!!!....

أو أن تتبعي سياسة : (لحسن الحظ أنه ليس من واجبنا اتخاذ القرارات الذكية .. كل ما على هو أن ننفذ ما يطلب منى .. ومهما كان غبيًّا لا جدوى منه .. من الممتع أن يكون هناك من يأمرك بالأوامر فلا تتحمل أنت وزر ذلك أمام ضميرك ..)....

أيا كان الحل الذي لجأت إليه فأنصحك بأن تفكري دائما أنك أنت اخترت الخيار الأكثر أهمية في حياتك بالفعل ... أم الخيار الثاني الذي يتطلب تريثا شديدا يتعلق بالسيد ( صح ) Mr.Right كما يقول الأمريكان ... هذا خيار مهم و خطير لكن لا تقلقي ... سوف تكونين محاطة بالأطفال الوقحين الصارخين وقتها , فلن تجدي وقتا للندم ... و عامة سيتحول اسمه وقتها إلى Mr.Zeft كما تطلق الزوجات على أزواجهن عادة !!!!....

مع محبتي ....

بسم الله الرحمن الرحيم :
الأخت وعد بالنسبة لي أنصحك بأن تتركي هذا الموضوع جانبا ريثما تنتهي الفحوصات فيبدوا لي أن هذا لموضوع يشكل لك مصدر قلق و إزعاج لذلك اطلبي من أهلك أن يؤجولوا البت في هذا الموضوع .
أنا رأي الشخصي أن مهنة الطب مهنة صعبة جدا للبنت فماذا لو أضفنا لها أن البنت لا ترغب في ذلك أعتقد أن ذلك سيحملك عبئا ثقيلا جدا لذلك أنصحك بأن تدخلي في رغبتك طبعا كما أمعني التفكير بالصيدلة فإنه فرع مناسب جدا للبنات وأنا اراه يعني حل وسط بلنسبة لمشكلتك . أنا متل ما قلت لك أنه اتركي الموضوع جانبا هلأ مو وقته أبدا.
كما أنصحك أن تستخيري الله عزوجل فإن الله حتما سيختار ما هو مناسب لك ولأهلك وللأمة جمعاء .
ومع تمنياتي بالتوفيق والنجاح .

أخي بالله إيفريف :
أنا ما قصدت أنه التخطيط لبكره شي غلط بالعكس يلي مابيحسب لبكره مابيسلم وهذا شي أكيد مابنختلف عليه ..........
كل اللي قصدته متل ما قال سنفور أنه بكير على طالبة حادي عشر تضيع حالها من الآن بشي مو ملك ايدها ........
لكل مرحلة دراسية لذتها و حلاوتها.. .. و حرام تشغل حالها باستقصاء يمكن يشغلها عن تحقيق هدفها الأساسي و اللي
هو تحصيل ثقافة و علم ينفعها شخصياً و ينفع مجتمعها .........و بعدين لا تروح لبعيد الواحد منا لما بيفكر بالمعدل و الاختصاص و فحص الشام بيحس رأسه بدو ينفجر .....كلامك صحيح يا إيفريف إنه لازم يكون للواحد منا تخطيط مستقبلي بس كمان كل شي بأوانه حلو.......بنخطط صح و بنتمنى صح بس ندرس أول ونساوي اللي علينا ونترك الباقي على رب العالمين و ما حدا بياخد إلا نصيبه ......... وبرأيي الشخصي أنه البكالوريا في سوريا بحد ذاتها بتنمي طالبنا و بتوسع أفقه في تحديد المجال اللي بده يدرسه........بظن بعد ما تنهي وعد الثانوية رح تكون بوعي و نضج أكثر يسمحلها تحدد فرعها اللي رح تكمل دراستها فيه بإذن الله و بكل ثقة

اختي العزيزه


كلام الاخوة منطقي وجميل واريد ان اقول التالي (مع اني متأكد انه ذكر من قبل لكن باسلوب آخر)

طبعا لتحددي الكلية التي تريدينها لازم تحددي المواد التي تحبينها وانت قلتي انك تحبين الرياضيات والكيمياء ولا تحبين الاحياء يعني ميولك ليس في مجال الطب او المجال "البيولوجي"

مادامك تحبي الرياضيات فالهندسات هي يجب ان تفكري فيها لانها مبنية على الرياضيات خصوصا المعلوماتية

لكن للاسف...
المعلوماتية عندنا في سوريا يمكن ان يقال عليها فاشلة من حيث المناهج المتخلفة والخبرات القليلة جدا وكذلك التطور التكنولوجي هنا في سوريا المتأخر جدا عن العالم كله
لذلك اذا كنت تريدين دراسة في مجال الكمبيوتر فكري بالدراسة خارج سوريا (وهذا صعب كما أظن على فتاة)

وكذلك هناك نقطة أخرى هي انه التكنولوجيا في تقدم مستمر ومهما كان ما ترسيه متطور فانه عند تخرجك مثلا بعد 5 سنوات ستجدي ما درستيه اصبح من العصور الحجريه !!! وهذه مشكلة التكنولوجيا بشكل عام

لذلك انصحك تبقي في مجال الهندسات لكن غير المعلوماتية وطبعا ميولك بالكمبيوتر يجب الا تتركيه ابدا بل يجب ان تطوريه وتنميه في اوقات العطل والفراغ فهو سيساعدك بلا شك في دراستك مهما كان اختصاصك
فأنا مثلا ادرس الطب لكن اعتمد بشكل كبير على الكمبيوتر والانترنت في دراستي بكثير من الاشياء مثل المراجع والمعلومات والصور التي احصل عليها من الانترنت بغاية السهولة...


أنا كنت مثلك بصراحة احب الكمبيوتر كثيرا وكنت انوي دراسة لها علاقة بالكمبيوتر لكن اكتشفت اني لا اطيق الرياضيات ابدا !! ووجدت ميولي نحو الكيمياء وعلوم الأحياء ... لذلك قلت ان الطب مناسب لي
لكن ما زلت مهتم بالكمبيوتر وهو يساعدني كما ذكرت

لذلك اختي العزيزة اتمنى ان تضعي هذه النقاط في ذهنك وكذلك النقاط التي ذكرها الاخوة والاخوات ثم تقرري فأنت سيدة قرارك

أختي الكريمة,

هو الإنسان لما بيوصل لمنعطف طرق بحياته لازم أنو يختار الطريق الصحيح, ولما بدو يختار المهنة(مثلاً) اللي لح يقضي فيها بقية العمر لازم يكون متأكد أنو هالرغبة هي اللي بتناسبو, وبصراحة أنا لما كن بعمرك كنت متلك تمام, بس هذا اللي صار معي وهي أنا سنة خامسة, بس هذا ما بعني أبداً إني هلأ ما بحب الطب...


على كل الأحوال من فترة سمعت محاضرة للدكتور طارق سويدان عم يحكي فيها عن اختيار الفرع الدراسي وقال أنو ليحقق الإنسان نجاح في فرع ما لازم يحقق معادلة اسمها معادلة رفق:


1 _ الرغبة: أي أن يكون للإنسان رغبة في الفرع الذي سيختاره

2_ الفرصة: أي أن يكون هنالك فرصة للعمل في المجتمع بهذا الفرع

3_ القدرة: أي أم يكون للإنسان قدرة على دراسة ومتابعة هذا الفرع


وبالنسبة لوضع الكليات فكل الفروع تعبانة, وأي كلية لح تدخليها ما لح تعطيكي غير الشهادة سواء طب أو معلوماتية أو أي شي , الأمر بيرجع إلك ولشغلك الشخصي, لذلك لازم يكون عندك الدافع لدراسة الفرع لأنو الأمر مو سهل , وبالنسبة للمعلوماتية فهي إلها مستقبل كبير ولا تصدقي أنو مالنا دور في المعلوماتية بالمقارنة مع الوحوش متل MicroSoft و SunMicroSystems, لأنو بس إذا الحكومة طرحت مشروع أتمتة الدوائر الحكومية فصدقيني لحيصير الIT يتقل بالدهب


عكل القرار لازم يكون شخصي ولازم أنتي اللي تختاري وتتحملي مسؤولية الاختيار...


وأدعو الله لك أن يختار لك الخير والسلام:emotions1

السلام عليكم يا جماعة الخير


ايه انا وبعد (جهود طويلة) ما اقتنعت وقررت بدراستي من ورا قراءة هالموضوع والىراء بلشت شك بحالي !!

بئى شو حال هالمسكينة يلي سالتكون ...........................


الله يكون بالعون


والسلام عليكم

-----------------------------------------------------------------------------------------

طيب وهي نصيحة من عندي للأخت وعد :

شو ما درستي رح تواجهيك صعوبات .. ويا أما رح تقولي (يا ربي ليش طاوعت أبي) أو (يا ربييييي ليش ما طاوعت ابي)
((سدئيني حتمر عليكي هيك غيام))

بس شو ما دخلتي بالأخير (ربنا ينجحك ويوفقك ............ لا تندمي ابدا أبدا

ونصيحة من اختك ام الكوك كمان تركي هدول الفروع وادرسي اتقصاااااد لأن فرع حلو وسهل وإله مستقبل
أهم الشي ... ما تكوني من الحزب يلي بيعتبر الاقتصاد كلية الفاشلين

أنا انفتحت كل الطرق ادامي (بما إني عم بدرس برّا)
وشخصيا انا .. فضلت اختار اختيار اهلي (يلي كانوا يشوفوا فيني بزنس وومان !!) , ومع أن أحيانا بتحسر ... لكن ما بندم

وبتعرفي شغلة .. يمكن يكون جنان .......... لكن بعد ما خلّص اقتصاد .. رح ادرس برمجة .......

---------------------------------------------------------------

لا تندمي على أي شي بتتخذيه

وبشوفكون بخير



(بما ان البنت حادي عاشر .. فلسه وئت النصيحة ما خلص !! .. عليكي جمل يا حلوة )


والسلام عليكم ورحمة الله وبركاته