بدي حل لمشكلتي!!!
يدور هذا النقاش حول بدي حل لمشكلتي!!! في قسم اجتماعيات في الملتقى الطبي السوري; -->
يا جماعة انا حبيت آخد رأيكون بهالموضوع ..... أنا طالبة بالحادي عشر العلمي ... و الحمدلله كل أموري الدراسية تمام .... عندي ميول كتير قوي لكل شي بيتعلق بأمور
| |||||||
 أنت تتصفح الموقع كزائر، للحصول على مساعدة في التسجيل أو استرجاع كلمة المرور اضغط هنا. |
 |
| | LinkBack | أدوات الموضوع |
|
#1
Mar, 30 2005, 20:04
| |||
| |||
| بدي حل لمشكلتي!!! يا جماعة انا حبيت آخد رأيكون بهالموضوع ..... أنا طالبة بالحادي عشر العلمي ... و الحمدلله كل أموري الدراسية تمام .... عندي ميول كتير قوي لكل شي بيتعلق بأمور الكمبيوتر .... و أملي بكلية هندسة المعلوماتية.... بس بنفس الوقت بلاقي انو هيك مجال للعمل بيكون محصور و نهايته مسدودة بوجود شركات الكمبيوتر العالمية متل المايكروسوفت يعني ما بتخيل يوم من الايام يصير لسوريا مكانة بعلم الكمبيوتر عالمياً يعني بالمختصر بلاقي انو الكمبيوتر عندنا فاشل سواء كان دراسة او عمل..... و بنفس الوقت بتصور انو هندسة الكمبيوتر بتناسب الشب اكتر من البنت !!!! والدي مهندس و دائماً بحاول يبعدني عن التفكير بهندسة المعلوماتية و بيحاول يوجه تفكيري للطب او الصيدلة و بيقول انو البنت خلقت لتكون في مجال عمل إنساني و ليس مع آلات .... يعني بابا شايف اكتر مني و بيعرف شو حال المهندسين بسوريا... مهندسين كتار و مافي فرص عمل كبيرة ..... و بنفس الوقت انا ما عندي ميول للطب و ما بحب مادة علم الأحياء بفضل دائماً الرياضيات و الكيمياء... يعني خايفة اني ادرس طب و ما مارس هالمهنة بالشكل الصحيح.... علماً انو الإنسان لازم يدرس الكلية الي بتتوافق مع رغباته .... و إذا ما كان الطالب راغب بالكلية اللي عم يدرسها ما ممكن ينجح نهائياً ... و إذا كان عندو رغبة فيها رح يكون من أنجح من مارس هالمهنة.... و عندي مثال واقعي أمامي اللي هو عمي... دكتور قلبية دارس برومانيا (لأنو ما جاب علامات طب بسوريا) بس هو هلأ من أشهر الأطباء بالشام و من أنجحهم على الإطلاق ..... أما بالنسبة للصيدلة برأيي انو الصدلة فرع كتير حلو ما دام إلو علاقة بالكيميا بس بنفس الوقت إلو علاقة بالعلوم .... و اذا دخل الطالب صيدلة متل كأنو دخل طب تقريباً يعني ما ابتعد عن المادة اللي عم يتجنبها بكلية الطب .... و أنا انشالله بجيب علامات تأهلني أدخل طب بس مو عرفانة وين بدي حط هدفي و لا حتى قدرانة اتخيل حالي بكلية الطب لأنو كتير صعب انو انسجم مع هالمادة و سؤالي انو أكتر أعضاء هالموقع من كلية الطب.... فهل دخلوا هالكلية عن رغبة أم دخلوها لأنو جابوا علامات طب؟؟؟؟ و هل الإنسان بيقدر يتكيف مع مهنة هو ما بيحبها و يصير يحبها مع الزمن ؟؟ عطوني رأيكون...... و شكراً وعد  |
|
#2
Mar, 30 2005, 23:19
| |||
| |||
| أختي وعد أنا سنة رابعة من خمس سنين كان وضعي متل وضعك تمام وميولي متل ميولك تمام ووالدي متل والدك تمام مهندس وما بحب الهندسة وكان بده ياني أدخل طب أول سنة بكالوريا 204 دخلت رياضيات كلية العلوم تاني سنة 230 وكان بدي صيدلة (على رغبة أهلي) ولما جبت هالمجموع جبروني بالعيني والروحي على الطب أنا كنت بتمنى إني أدخل غير فرع بس ما بقى في مجال للتراجع علي المواجهة نصيحتي إلك حدّدي هدفك من دون تدخل أي شخص واشتغلي لتحققي هدفك ولا تدخلي شي ما بدك ياه ملاحظة: أنا بعرف إنه مستقبلي بالطب وإذا دخلت معلوماتية مثلاً فرصتي في النجاح عملياً في الحياة رح تقل لذلك رضيان بالطب حالياً على أساس العيشة الكريمة اللي موعود فيها لي عودة |
|
#3
Mar, 30 2005, 23:43
| |||
| |||
| أنا كمان كنت بدي أدخل المعلوماتية , بس لما شفت طلاب المعلوماتية شو عميحكوا عن كليتن بطلت وقررت أترك الكمبيوتر هواية.وأنا بعد كل هالوقت صرت بحب الطب ومقتنع فيه.(ما أحلاني والله وما أكون مقتنع فيه) من جهة ثانية في عنا طلاب (عباقرة) بالكمبيوتر وبعد كل هالفترة بقي الكميوتر في أول أولوياتن قبل الطب. بيعملوا دورات بالكميوتر على مستوى عالي كتير وبيشتروا كتب الكمبيوتر قبل كتب الطب, فهيك شباب لو دخلوا كلية المعلوماتية يمكن كانوا عملوا شي. لأنو حتى الطب إذا الواحد بدوا يكون مميز بدوا مايكتفي بالشي اللي عمياخدوا من الكلية. بعد كل هالحكي إذا كنت مثل هالشباب فبنصحك تدخلي المعلوماتية. أما إذا كنت بتحبي الكمبيوتر كتير وبس فكل إنسان لازم يكون بيعرف منيح بالكبيوتر مهما كانت مهنته_ الأمي في هذاالعصر هو الذي لا يعرف على الأقل لغتي برمجة (طبعاً في مبالغة شوي)_وطبعاً هدا مو مبرر تدخلي كلية المعلوماتية. وبالأخير بيبقى القرار إلك, ولما بتجيبي علامات الطب رح تدخلي الطب لأنو هداك الوقت الشغلة (بمنتهى الديمقراطية )مو على كيفك. إسأليني أنا. مشان هيك ما في داعي تتعبي حالك بالتفكير, وقت بتطلع علاماتك, أهلك مارح يتركوك تتعذبي بإتخاذ القرار بالكلية اللي بدك تدخليها( ويمكن ما يكون هالشي دائماً سيء, يعني الو ايجابيات). |
|
#4
Mar, 31 2005, 00:09
| |||
| |||
| انا بشوف انكون ظالمين الهندسة ...... و متفائلين زيادة بالطب اخي شنكول لسا ئدامك 8-9 سنين لتئدر تفتح عيادة و تشتغل يعني كتير بكير عالحكي بالدخل .... و لسا بدك مصاريف خير الله بالمقابل المهندس بيبدا حياتو العملية مباشرة بعد التخرج ..... يعني يا سيد شنكول اللي من ئدك و درس هندسة صرلو شي سنة عم يشتغل ..... و سدئني التنين متل بعض (المهندس و الدكتور) ... و لحتى تسدئ نزيل و تفرج شئدفي دكاترة ئاعدين بعياداتون عم يكشو دبين اما بالنسبة للاخت وعد .... فبدك تحددي ميولك ..... طب ما بتحبي لذلك بنصحك بلاه وخاصة انو مشوارو طويل كتير (حوالي 12 سنة) صيدلة حلوة و لذيذة اذا بتحبي الكيميا و لاتخافي مالا علاقة بالطب كتير اما الكومبيوتر فبدك تحددي.... مهتمة بالبرمجة او بالتصنيع و التصليح وتصميم القطع الالكترونية تاني وحدة صعبة ببلدنا ..... نظرا لانعدام الخبرة عند اللي عم يدرسو مواد المعلوماتية بكلياتنا و كمان في الحياة العملية ( كون مافي مصانع لهيك تقنية متطورة بسوريا ) اما البرمجة فمجالها واسع و كبير .... و بطلب قدرة عالابداع .... و مخيلة واسعة .... يعني مثلا شو المطلوب من البرنامج .... و سهولة تعامل المستخدم معو .... و مدى قدرته على التعامل مع متطلبات السوق و التنافس مع غيرو من البرامج ...... هدول كلون بدون مبرمج ذكي و متطلع عالموضوع اللي عم يشتغل فيه .....لحتى ينجح بتصميم هالبرنامج يعني بالنهاية البرمجة مجال واسع كتير و ممتع كتير ... و مستئبله عنا بالبلد مو كل هالئد سيء .... و اهم نئطة مو متعب جسديا و ما بيطلب تجهيزات معقدة .... حتى امكانية العمل داخل المنزل موجودة .... بالمقابل بيطلب ذكاء و تمكن من اكتر من تلات او اربع لغات برمجة بالاضافة لبعض البرامج الاخرى متل برامج معالجة الصور و برامج التصميم .... و الاهم رغبة و قدرة على متابعة التطور السريع لهذه التطبيقات هي فكرة موجزة بتمنى تساعدك باتخاذ قرارك ..... و اذا في اي سؤال نحن جاهزين للمساعدة . نصيحة اخيرة .... اذا قررتي تدرسي معلوماتية عملي جهدك تجيبي علامات عئد المعلوماتية مو تتشاطري و تجمعي طب  |
|
#5
Mar, 31 2005, 00:48
| |||
| |||
| أختي وعد الصراحة حوالي 60-70% من طلاب الطب دخلوها بدون رغبة وحتى في منهن ندمو أو عميستعدوا ليندمو المشكلة في الطب انو اذا بدك تدرسيه لازم تكوني سوبر يعني قدرة هائلة عالحفظ و سرعة بديهة وقت الاسعاف و فهم متكامل لهالجسم البشري اللي خلقو رب العالمين و ذكاء لوضع التشخيص و قدرة على المقارنة لاختيار الدوا الأفضل و تمكن جيد من الحالات المرضية لوضع الاستطبابات الجراحية أو الداخلية يعني شغلة لازم تندرس عن محبة لأنو غير قابلة للتحمل بدون هيك . و الصراحة مناهجنا الها 3 احتمالات إما كويسة و هو الأقل احتمالا أو غير كافية و تحتاج معا لمطالعة من كتب تانية أو كبيرة على قلة فايدة يعني كواقع طبي مو كتير حلو فإذا وجدت نفسك عملية أكتر و خصوصاً في مجالات تقنية متل ما تفضل إيفرايف و شرحلك فبعتقد الأفضل انك تتجهي للمعلوماتية المهم حاولي تدخلي شغلة عن محبة لأنو هي رح تكون شقفة من حياتك و رح تعيشي معا كأنها جزء منك و الله يوفقك |
|
#6
Mar, 31 2005, 01:27
| |||
| |||
| بعد السلام والتحية يا أخت وعد : بحيي فيك هالوعي بإنك تسألي أهل الشأن لتستفيدي من خبرتهم في هذا المجال و هالشي حلو كتير للي بعمرك .....  ...... بس بنفس الوقت بحب أنصحك بإنك لا تضيعي حالك بهالدوامة :emotions1 .... صدقيني لكل فرع جامعي عنا ميزاته و حسناته ...( لا الطب هو الأحسن متل ما بيظن الأغلبية و لا الهندسة كمان و غيره ....)لذلك نصيحتي لك إنك ما تفكري بهالشي حالياً .... خلي هاجسك الأول و الأخير إنك تجتازي الثانوية بمجموع جيد و صدقيني بعدها بتقدري تحددي بشكل جيد( لأ و حتى ممتاز ) الكلية المناسبة ........ المهم حالياً تطبقي قول سيد المرسلين محمد (ص): ( اعقلها وتوكل )......  |
|
#7
Mar, 31 2005, 09:27
| |||
| |||
| مع احترامي ئلك اخ سنبل ..... هاد هو الخطأ بعينو .... التخطيط لئدام هو اهم شرط للنجاح .... و مع الاسف اللي بخططو خطوتين لئدام هنن اقل من 10% بمجتمعنا .... مثلا انت طالب سنة خامسة .... طيب انت فكرت بشو ناوي تختص ..?? و لا همك هلأ هو النجاح بالخامسة و لتصل عالاختصاص بحلا الحلال ?? (طبعا مو الئصد انت بالذات بس بأكدلك انو 60% من دفعتنا مو مقررين) يعني الانسان لازم يحط اهداف بالحياة .... و بعدين بيسعى لتحقيق هالاهداف ...... مو يسعى و بعدين على مهلو بقرر ورا شو عم يسعى و انا بأكدلك انو اذا الاخت وعد ما فكرت و قررت من هلأ فرح تلائي حالا بعد الثانوي ضايعة و رح يكون اختيارا للكلية غير مدروس ...... لانها بالاساس ماعندها هدف .... يعني شو ما دخلت ماشي الحال ....وهون تحديدا بيظهر تأثير الاهل اللي ممكن يوجها لاختيار الفرع الخطأ ..... شو رأيك بهالكلام ....??? |
|
#8
Mar, 31 2005, 10:48
| |||
| |||
| شوفي اخت وعد......انك بتخافي من علم الاحياء مشان هيك مو رايده الطب فأنا بدي الك دراسة الجامعه مالا علاقه بالثانوي ابدا.... و مشان هيك تجربة التثقيل اثبتت فشلا عكل المقاييس...... وانو حدا يقلك دراسة الطب معضله.....فبتصوري و حسب تجربتي لهلأ نحن اسهل كليه ع الاطلاق وما تستغربي صدقيني ما عم بالغ.... انا عندي اخت بالهندسه بتدرس اثناء السنه اضعاف ما بدرس و بتجيب اقل مني......و هاد طبعا مو عن غلط منا بس نحن بدخول الأتمته حلينا عقد الكليه....و بدي الك اني وحده من البنات الي ما بيدرسو لشهر الفحص و الحمد الله بيمشي حالي و بعلامات منيحه كمان..... بس كل هالشي بكفه و ئصة فتاة بكلية الطب ئصه تانيه....يعني كل هالميزات ما رح تفيدك لما بدك تعلئي بمشوارها الطويل و قرحها... بصراحه هي الكليه انخلئت للشباب مو النا..... يعني تصوري حالك من اول شهر عم تشرحي ضفدع بوئت انت كنت بتئرفي مالصرصور....... او بتدخلي المشرحه بوئت رفئاتك الي من سنك بيخافو يشوفو ميت بالأفلام؟...... و لسا كتيير...... على كل بتم حرية الأختيار الك......المهم تثقي بقرارك.... |
|
#9
Mar, 31 2005, 12:00
| |||
| |||
| بالحقيقة أنا لو كنت محل وعد.. لكنت فتت بألف حيط.. من هالآراء يللي كل واحد فيها عم يحكي شكل.. وطبعا لما بدي أحكي أنا.. فما رح أحكي إلا رأي متل هالآارء.. يمكن صعب نتفق إنو الطب منيح أو ما منيح، ولا ألهندسة أحسن وللا لا.. لإنو كلواحد عم يقسيها على حاله أو ع قرايبينه.. وكل واحد حالته شكل.. بيناتنا الفوق الريح.. وبيناتنا يللي قرايبينهن.. تحت الأرض.. بعتقد إنو التفكير لقدام منيح يا إيفريف.. إذا كان القرار يللي رح آخده رح أبدا أشتغل عليه من هلأ.. (يعني إلك أو إلي، لازم نحدد من هلأ، أمريكا، ولا بريطانيا، ولا دراسات عليا.هون.. لإنو لازم ندرس ستبات أو بلاب أو عربي..) أما لصبية بالحادي عشر.. هالحكي ما إله معنى.. أنا بعتقد يا وعد، إنو إنتي لازم تشتغلي هلأ على كل الجهات.. بشكل موسوعي.. يعني لازم تحاولي تحصلي كل شي بتقدري عليه، من علوم، ومن ثقافات.. ووقت الإختيار بعد سنتين بتقرري حسب مزاجك وقتها وحسب ميولك يللي نضجت.. أنا بالعاشر متت حبا بالكمبيوتر، بالبكالوريا، كنت بحب أمور الفضاء.. بالخامس الإبتدائي كنت بحب شغل القصابين.. والواحد بيتغير. . أنا ماني كتير مع التعويل على ميول الشخص.. !!! ما تفهموني غلط.. قصدي إنو ميولنا غالبا غير واعية، يعني بحب الطب لإنو المريول والسماعة بخللي الطبيب شغلة حلوة(هيك كنا لما كنا صغار) بالنسبة إلك، عندك إمكانيات أدبية كبيرة. . بس ما بيعني إنك تدرسي أدب عربي.. بيكتشف كل من دخل كلية حسب "ميوله" إنو الكلية كتير مختلفة عن الفكرة يللي كان مكونها عنها.. كتير بيحكوا عن مستوى متدني جدا للهندسات عننا.. وهي فيكي تسألي عنها طلاب الهندسة، في أزمة مخابر، بحث علمي شبه مستحيل ما في إمكانيات.. بالنسبة للهاي تيك.. وعلوم الكمبيوتر هي كلها علوم حديثة.. ونحنا أصغر أستاذ عنا بالجامعة عمره 40 سنة.. عموما يللي بيمشي حالهن مهندسين بأوروبا وأمريكا.. ما بيرجعوا على البلد.. لإنو ما شغل.. (بيتناسب مع الطموح.. ) بالنسبة لطب، على مشاكل كليات الطب.. عنا ميزة إنو المرضى بين إيديكي.. والمراجع كلها متوفرة.. وأساتذة كمان في كتيرين متميزين.. أنا بحب الطب، مع إني كنت بكره العلوم كرهي للقومية ، وكنت بحب الرياضيات والفيزيا.. هلأ.. ما بتصور حالي غير بالطب.. نصيحتي .. عيشي شبابك، وحياتك.. وانبسطي .. ما تشيلي هم، حصلي علم منيح، وكمان.. ثقافة عالية.. وبعدين الخيار بيجي بوقته.. |
|
#10
Mar, 31 2005, 14:55
| |||
| |||
| يا اخت وعد اذا رح تسمعي لكل الناس رح تتعبي وتضيعي ... انا برايي لازم تدخلي الكلية اللى بتحبيها وبتحسي حالك رح تبدعي فيها.. يعني اذا دخلتي طب او صيدلة بدون رغبة منك بجوز بكرا كل ما استصعبتي شغلة تلومي نفسك و اهلك وتندمي لانو ضيعتي حلمك... ولا تطلعي عل الدراسة كل الكليات بدها شغل من معهد الفنون وحتى كلية الطب ما في شي ما بدو تعب, بس لما بتتعبي بشغلة بتحبيها بتلاقي فيها عزاء وبتصبري عليها لانو بضل هاد اختيارك وطموحك.... وبعدا من ناحية انو الهندسة ملائمة للشباب اكتر نفس الشي الطب (يعني بدك قلب قوي يتحمل كا المناظر) ........ بالنسبة الي انا اكبر اخوتي ومن وقت ما خلقت واهلي بقولوعني ( هي الدكتورة) يعني انا انزرع فيني هالطموح وما بقى افكر بغيرو... (يعني كانو اتبرمجت على هالفكرة من طفولتي) مع انو الي ميل كبير للرسم والهندسة... مدري ليش معظم الاهالي بدون ولادون يدخلي يا طب يا صيدلة... يمكن لانو هل مجالين اكتر شي الن مستقبل عنا ..... برجع بقلك انو فكري منيح وانشاالله بتدخلي كلية تنبسطي فيها... ولا تقولي انو هالكلية ما لها مستقبل او ممكن ما اشتغل بشهادتي لانو ممكن انت بس تتخرجي تعملي شي ما عملو غيرك...  |
|
| Bookmarks |
| أدوات الموضوع | |
| |
المواضيع المشابهة | ||||
| الموضوع | مبتدئ الموضوع | المنتدى | الردود | آخر مشاركة |
| ماذا حل بزماننا .... ماذا حل بأذهاننا | rose | هديل الروح | 12 | Dec, 04 2005 03:07 |
| ترح حل مشكلة الستاجات | maxcool | شؤون عامة | 9 | Sep, 01 2005 11:17 |
كل الأوقات حسب GMT +2، والوقت الآن 21:27.
