أحب أن نفتح موضوعا جديدا قديما..

هو ربما واسع جدا، وقد نتشعب من بعده إلى اكثر من محور..

ولكن أريد في البداية كي يشترك الكل في النقاش، أن يكون طرح المشاكل قبل النقاش من قبل الجميع،..

ليس مطلوبا أكثر من خمس كلمات.. أو خمسة أسطر.. أو كما تريد..

تتحدث فيها عن مشاكلك باعتبارك شابا/ فتاة ( أي في سن الشباب..)

ولنحاول عدم توجيهه وإخراجه من الاستقطابات المعروفة..

وأن يشارك أكبر عدد..

طبعا محتار أن أوجه الدعوة لفرد وأنسى آخر..

فالكل مدعو أولا.. (والذي لن يشارك سأدعوه باسمه:emotions1 ..)

بعد الطرح الأولي قد نعمل تبويبات، أو كل منا يكتب عن بمشاركات خاصة..

آآآآآآآآآآآآآآه......عللي جرى...أنا حالياً عم مر بأسوء حالاتي..
قطع أبوي عني المصروف!!!
بمعنى آخر:
1-كيف بدي أدخل عالمنتدى؟؟
2-منين بدي جيب حق دخان؟؟
3-شلون بدي أدفع فاتورة الموبايل؟؟
ممكن أنو حدى يجي يتفلسف علي, و يقلي: لك يا أخي الله يجعلها أكبر المصايب..في ناس بأفريقيا عم تموت من الجوع
بعرف ...بس يا أخي والله صعبة علي!!
يعني لو كنا متل الشباب الغربي اللي معظمه بيدرس و بيشتغل و بيطالع مصروفه..مو كان أحسن من البهدلة اللي عايشينها ؟؟
و لسه في ناس بالمنتدى عم تجي و تنظر علينا و تحكي كلام أكبر من حجمها سواء بالسياسة أو الدين...
و لهؤلاء أقول: روح اشتغل و طالع مصروفك و لا تمد إيدك لأبوك..
روح صير زلمة و بعدين تعا حكي...

انا شفت انو أبوك عنل هالشي لصالحك لأنو :
ما في انترنت = دراسة أكتر
ما في دخان = تبطيل هالعادة السيئة
ما في موبايل = كمان دراسة أكتر والنتيجة 3-0 لصالحك

ما بدي أعلّق على الموضوع أبداً في الوقت الحالي
كل شي بدي أقلك ياه
ادرس حتى ينتهي الفحص وتنجح
بعدها لكل حادث حديث
مريت بزماني بظرف متل ظرفك
بس مو مشكلة
أهم شي دير بالك على دراستك

نسيت أقلك إنه وفّر قد ما بتحسن
دخّن حمراء لبين ما تنفرج عليك
ولا تدخل على الانترنت ليمشي الحال
والموبايل بلاه
أصلاً إذا تسكر
بتركض أمك بتقله
راح الولد

أنا ما شايف مشكلة بالمرة حبيبي فلامنكو..
يا ريت أهالي كم واحد يقطعو عنهن المصروف كمان.. من شان ما يدخلو..ع المنتدى.. إذا بدك الأسماء.. ببعتهن على البرايفت..
بالنسبة للدخان.. منيح هي يمكن أبوك سمع بنداء الاستغاثة تبعك.. من فترة.., ولقى احسن طريقة.. من شان ما تتدخن..
جرب تستغل هي الفرصة.. أصلا هو من كتر ما كان مصروفك كبير.. كنت عم تصرفه على الملذات الشخصية والتدخين.. !!
والله يا سيدي.. التوبة..
بعدين بالنسبة للموبايل.. خللي رامي مخلوف يخصر شي ألف ليرة.. كويسة..
بس خوفي يطالعها من جيبتنا.. لإنو هيك الواضح.. إنو يعني بيلعبو بسعر الفاتورة لعب.. ع كيفهن.. وخايف خسر منك شوي.. بطالعهن مني ومن شنكول..
بعدين لشو هالبطر..
روح شوف.. الهنود الحمر.. عم يستخدمو الثابت وما عندهن موبايلات..
بعدين من وين جايبلنا هي القصة.. يعني لحتى نصير نطالع مصروف بنصير زلم؟؟
والله خبرية هي..
نحنا رجال ولاه.. رجال.. يعني رجال.. !!
وإللي ما مصدق..!!! لا يصدق.. مشكلته..

لا تزال الحرب العالمية الثالثة قائمة عندنا في البيت....
يمارس علي والدي أبشع أنواع التمييز العنصري و الحصار الإقتصادي....بس ولو..
يا جبل ما يهزك ريح
و كحل مؤقت بعت الموبايل و بدلته بواحد أرخص....
عندي غيتار كويس و مكفول...حدا بيشتريه؟؟

ما تبيع الجيتار
حرام والله حرام

على كل حال يا أبو الشناكل , سنفور عرض أنو يشتريه مني...
شو رأيك ؟؟

و بعدين يا شريك مصريات الموبايل قربوا يخلصوا...
بس و حياتك لساتني صامد
و يا جبل ما يهزك ريح

إذا بعته ياه رح تضل بلا غيتار
أما وضعك مع أبوك في النهاية بدها تُفرج
بس إذا بعت الجيتار ما حلوة
رح تخصر موهبتك
إياك ثمّ إياك
بعدين ليش ما عم توفر
بلا الانترنت عندك فحص
روح دروس أحسن من الانترنت
مضيعة وقت ومال
وفي شي أهم حالياً من الانترنت
بيع السكودا قبل الغيتار
أحسن
وفي النهاية الموضوع بعود إلك
ويا جبل ما يهزّك ريح