بسم الله الرحمن الرحيم
في اول مشاركة لي ..وددت أن اطرح هذا الموضوع وابين وجهة نظري فيه ....هو موضوع الصداقة بين الرجل والمرأة وموضوع شلة الصبايا والشباب كما يسمونها.
للأسف في السنوات الأخيرة ازدادت هذه الظاهرة كثيرا في الجامعة , انا لست متحجر العقل ولا متعصب كما يسمونني بعضهم , كما انني لا اتكلم باسم اي ديانة اوعادات على الأقل الآن .
انا فقط افكر ... فكروا معي ... انا لا أقول انه لا يوجد علاقة طاهرة وبريئة بين رجل وامرأه لايربطهما شيء ,هي موجوده, وانا احترمها , لكن بشرط ان تبقى هذه العلاقة ضمن حدود وخطوط حمراء
يجب عدم تجاوزها , يجب ان لا تكون هذه الصداقة كالصداقة بين رجل ورجل أو بين انثى وأخرى , فتلك الفتاة التي تصادق شاباً تجالسه اكثر مما تجالس اخوها واهلها , تأكل معه وتدرس معه ويجلس بجانبها ويلمسها ويتمازحان واحياناً يسافران معا ضمن شلتهم واخيراً يراقصها تلك الرقصات الخليعة في تلك الرحلات او الحفلات المثيرة للاشمئزاز ... كل هذا بداعي انها صديقته ومتل اخته ... يا جماعة ماذا تركت لزوجها ليفعله اكثر من هذا الصديق , ماذا خبأت لشريك حياتها وابو أولادها ومسكنها غير النوم في سرير واحد , اهذا هو الفرق بين الزوج والصديق , اذا كان كذلك فانا غير مضطر لدفع ذلك المهر وتحملها وتحمل طلباتها وتلك المسؤولية الكبيرة فقط من اجل هذا الفارق بيني وبينه .
ارجوكم لا تزعجوني وتتكلموا عن المعاني السامية للصداقة التي لا اعرفها , واني ارى ذلك في الناس لاني اراه في نفسي , فكلنا نعرف , واذا كان ذلك الشاب يعتبر نفسه فعلا صديق لتلك الفتاة فليحترم انوثتها وليحترم رجولته ويضع ذلك الحاجز بينهما فهما يختلفان عن بعضهما .
اخيراً بالمشرمحي الله خلقنا دكر وانتى , يعني تستسترون واستروجين لنتكاثر لا لنتصادق و نؤلف شللاً ,.... اصحوا وحاج تفاهه
الله يستر على نساء امة محمد ويرزقنا رحمته والعفو والعافية وحسن الختام...

صديقي أوبيوم أنا بهالحوار ما بعرف غير إنت وشنكول، وأوبتمستو بس!!

فيعني ما عم أتهجم شخصيا ع حدا، والشب جديد على المنتدى فيعني لسا ما عرفت شو شخصيته، بس أنا عم أنتقد طريقة تفكير..

وأنا عم حلل طريقة تفكير، شريحة من الشباب وعم حلل نص مكتوب لإنسان،



قلت أكتر من مرة يا أوبيوم، إنو أنا ما عم أحكي عن الدين، ,.. حاج بقا طلعولنا من هي القصة..

أنا عم أنتقد رواسب مجتمع متأخر عم تتخبى ورا التدين وعم تتستر ع مشاكلها بإنو والله هو من عند الله، أنا بقله، بل هو من عند أنفسكم.. منيح هيك، خلونا نمشي خطوة لقدام..,

قلت سابقا: (

تناقضا أساسيا في شخصية الشاب في مجتمع الكبت، والتأخر ،

شباب يرتدي التدين زيا ويخبئ الكبت بطانة ،

ينشأ تدينه عن كبت حنسي، ويزداد تطرفه بازدياد شعوره بالحاجة الجسدية مترافقة بعجزه عن تلبيتها)

وقلت أيضا

(ولأقف وراء أرضية صلبة أختبئ وراء التدين، ففيه ملجأ لي، (وأضيف هنا وهو مرجعية اجتماعية أساسية)
- فيتهمونني بالتعصب، أهرب من التعصب بالدعوة للتفكير،)

يعني ليش مصر إنت وغيرك إني لازق بزيق الدين، لجاوبك ،

بقللك حاج يللي عم يتستر ورا الدين ليخبي مشاكله يستخدم الدين، الدين أسمى من هيك، ما تسقط تصورات مسبقة عني وتحاسبني عليها، وبالمقابل لا تسألني عن ديني...! ما بخصك..

بالنسبة للفصام الجماعي،

أنا ما هيك حكيت، ومن حقي أسأل عن الغايات من نشر هيك إشاعات عني!!

أنا قلت إنو من الذي الصواب، هل هو الكثرة؟

يعني لو آمن مليون شخص في مجتمع من مليون وواحد بالحجر وآمن فرد بالشمس،
سيسمى هو فصاميا
لماذا لا يسمى البقية فصاميين جمعيا.؟ ويكون هو على صواب؟؟

بتمنى إنو تحذف هي الإشارة من عندك، لإني ما بضمن حدا يقرألي من بعد هيك إشاعات ! بعتبرها مسيئة كمان..

كتير.. كان حلو منظر البنات برحلة قاعدين عم يتفرجو، والشباب عم تدبك بالنص، ما حدا قدرت تتحرك بطبيعة إنو الحكي رح يمللي الكلية بعد يوم، .. طبعا المانع شو.؟ رح يحكو عليها، إنو رقصت، ! وإنها لإحدا الكبر..

أنا بستغرب إنو حدا بيقدر يسمع إيقاع وأغنية شعبية بتحرك الدم المتخثر وما يحس إنو في شي كل جسمه عم يتحرك بدون إرادته،

عيب البنت ترقص، وما عيب إنو الشب يقول عن زميلة إنو يكتب مقال عن قبلة من إحدا الطالبات لزميلها الطالب!!!

يعني معلش أنا بقلله إنو كإنو ما قرا ولا مرة لشعر قديم، ما قرأ، عن الشاعرة يللي أعطي قبلتي من يشتهيها؟

أو يمكن ما سمع صباح فخري وما غنى ولا مرة، أنا ماني شحاد عطيني بوسة دخيل الله (وع حد علمي ما حدا كتب بالهامش لهي القصائد ولعمل تقديم للغنية، إنو الشيخ فلان كتب كتابهما قبل القبلة..! )

وطالب أطعم صديقة بيده،

لو كنت عم تقرف بالفعل فحاج تحكي عن الموضوع لإنو بالفعل أنا بعتقد كل مين قرأ قرف كمان..

بس بظن كمان إنو مو المشهد هو المقرف، (لإنو يمكن كلنا شايفين تلفزيونات وشايفين صبايا عم يرقصو، وما هو الأزمة..

المقرف طريقة السرد..

..... [تعديل من قبل الإدارة - رد على الأمثلة الّتي أوردها Xavi وفيه تكرار للأمثلة]

طبعا رح تقللي غيرة على البنات.. ! (يمكن صعب علي أصدق، .. وبعتقد صعب على كل مين قرأ ردك يصدق، لإنك عم تسمي لا بل عم تعمم.. على مجموعات من أشخاص كلنا بنعرفهن)

الى الزميل سنفور :
مع اني غير متفق مع كاتب هذا الموضوع عن طريقة تفكيره وعرضه لهذه الافكار واعتبارات كثيرة عن الذكر و الانثى وما قيل في هذا الموضوع اشبه بمتاهة كبيرة ولكني اريد ان استوضح منك (سنفور) عن العبارة التي وصفت بها ان تدين البعض ينشأ عن كبت جنسي ؟؟؟ و ماهو هذا الكبت الذي تحدثت عنه وإن كان موجودا فكيف نشأ الدين عنه وما هي العوامل التي ربطته بالدين وإن كان موجودا لدى البعض فكيف تصف نفسك خارجا عن اطار ما وصفته , مع احترامي لك ولجميع اعضاء المنتدى واتمنى ان يكون الحوار محترما وهادفا للوصول الى صيغة مشتركة وشكراا.

منيح يا سنفور إنك وضحت وجهة نظرك. لأنو هالقصة انحكا فيها كتير, وكان لازم نسمع منك.
طالما أنت ما قلت هيك. فهذا اللي بدي أعرفوا, وكل الشباب اللي سمعوا شو حكى الدكتور بالمحاضرة لازم يعرفوا إنو الدكتور فهمك غلط.
(أنا ما هيك حكيت، ومن حقي أسأل عن الغايات من نشر هيك إشاعات عني!! )
أنا ذكرت اللي فهمه معظم الطلاب من كلام الدكتور,وبالتالي هذه لا تسمى إشاعات. وكان ضروري تدافع عن حالك ,هذا من حقك كما أنه واجبك , لأن كل إنسان مسؤول عن يللي بيحكيه.
بعدين إذا ما بتعرف شو معنى فصامي. فهذا بيعني أنك ما عندك القدرة لتحلل شخصية حدا بالأسلوب الغريب السابق.

اللي منشوفه بالتلفزيون حتى السوري ما بيعني أنو نحنا منقبل هيك تصرفات تصير بمجتمعنا.رجاء لا تخلط الأمور.
يعني بطلة مسلسل أو فلم( خاصة إذا كان أمريكي) ممكن نحبها مع أنها لابسة شي بهدلة وقلة حياء وبتتصرف تصرفات غير مقبولة أبداً بالنسبة لنا, ولو شفنا بنت لابسة مثلها بالمجتمع لكنا نظرنا لها بإحتقار.
ما رح نحول الموضوع للنقاش حول القبلة, تقييمها بالنسبة لنا أمر مفروغ منه.
كذلك مفهوم القرف أمر مختلف كثيراً .يعني في ناس بتقرف من أكلة الملوخية..........والشي اللي بيقرف منه فلان مختلف عن اللي بقرف أنا أو أنت منو.

مشالله الموضوع شيدد الكل.....
ياجماعه الئصه باختصار الصح مبين والخطأ مبين..... و كلنا منعرف وين الصح بس منحب نراوغ....
الصداقه الا محلا بس بحدود.....
و بأكد بحدود......ورغم هالشي رح يتم في خلط بالمفاهيم......ما في حل.....

طبعا أنا أخدت الموضوع السابق بحسن نية..
ورديت،
بس ماني مضطر إنو والله واحد يقللي كل شوي، إنت قلت مرة هيك كلمة وجاوبني،
والله إنت كان رأيك بمسألة موزمبيق هيك، جاوب لنشوق.
هالأسلوب الأمني ما حلو.. .. وما مضطر أتعامل معه هون..
بس كان ناقص ينعمللي مجلس استتابة، ودراسة لقناعاتي, :emotions1 وشو آرائي بالحياة وبعد الحياة.
ومين بحب .. وليش عم أحكي مع هداك الشب..
منيح إنك انبسطت ع توضيحي.. بس منيح منك ما تشتغل بهي الطريقة غير مرة..
حبيب قلبي وايزمان..

بس بلا صغرة وايزمان، عم تقول نحنا بنقبل وما بنقبل، مين قصدك بنحنا؟

يعني مين إنتو.؟
ويا ترى مين معكن ومين ضدكن،
ما نحنا بمجتمع سوري فيه من كل الأفكار، والأديان، والقوميات، وطرق الحياة..
اللادقية غير حلب، والشام غير حمص، وحماة غير الرقة..؟
عملتلنا إنو والله نحنا فيك تعبر عن حالك إذا بتحب.. بس تاخد كل العالم معك بالعبطة..؟ مشكلة..
علما إني لما حكيت عن القبلة جبتلك مثال من التراث العربي وهي كانت أميرة بالقصر الأموي بالأندلس.. ، ومثال من الأغاني الشعبية.. لصباح فخري وهو أكبر مغني شعبي حلبي..
يعني هدا هو الضمير للمجتمع، وهي عقلية.. ليش ما عم تعتبرها.؟
ولا الصداقة، معلش يعني نصف طلاب دفعتك من الجنسين تقريبا بتحكي مع بعضها، وتلات ارباع الصف الرابع، ويمكن لو طلعنا بباص ممكن أكترهن ما عنده مشكلة يقعد حد بنت.. وعم نقعد بالدروس، ..
عملتولنا ياها قصة الزمن، إنو والله شلل فسق.. وفجور..؟ ما هيك..

البداية بدي اقول انو انا ضد فكرة انو التدين عند البعض جاية من خلفية الكبت الجنسي...
وبالتال انا ضد سنفور كليا بهالفكرة.. وكتير أفكار غيرا
ومالي عم دافع عنو...
بس السؤال... لكل اللي عم يهاجموا سنفور لانو قال حكي ما بيعجبون طيب مو كمان في حكي غير لائق ذكرو الاخ xavi وهو حكي عيب وبيخجل..

مو مشان شي بس مشان يكون في عدل، ومو معقول اللي شاف حكي سنفور غير لائق ما يكون شاف حكي xavi غير لائق كمان!!
ولا عملتو من سنفور محامي الشيطان؟؟ وكل خطأ مصدرو سنفور وكل هجوم لازم يكون على سنفور..

مالم يكن كلامنا مستنداً الى الدين الذي أرسله الله لنا لينظم أمورنا فيم سنتكلم؟؟؟؟
ولماذا تعترض سنفور على مرجعيات البعض سواء الدينية أو غيرها و انت تستند الى الأغاني و المطربين(يعني والله اذا صباح فخري و شادي جميل و غيرهم بيغنو كم كلمة صارت هالاغاني مبدأ مجتمع!!!)
مادمت تملك مصدرا تستقي منه معقتداتك فاترك للآخرين مصادرهم
والا صار الحوار بلا معنى ولا هدف
بصراحة لا اعتقد ان الاغلبية يقنعهم حوار في زمن الجاهلية الذي لم يكن فيه ما ينظم امر الناس الا وجهات نظرهم الاجتماعية و النفسية و التعصبية.
مارأي البقية؟

و الطريف هو الاعتقاد ان العيب في بنت ماعندها دم(لانه حتى الدم المتخثر يرقص للغناء) و ما بتحس فما قامت و رقصت !!!!!حرام يا اخي تقبل لبنات الناس ما لا تقبله لاختك..... [تعديل من قبل الإدارة - إساءة]
هذا ان قلنا ان الامر عيب_من وجهة نظر رجعية_اما في قولنا انه حرام فالادلة كثيرة و كما قلت سابقا لا يوجد حرام لانه حرام فقط
بمعنى لو أردت رأي المجتمع ف 90% لا يوافقك
و هذا امر يصعب الخلاف عليه
اما رأي الدين_مهما كان هذا الدين_ ف 100% لا يتفق معك
اتمنى رد الزميلات و رأيهن؟؟؟؟

واضح ان الموضوع سيطول و يطول و لا يوجد له نهاية
و باي حال النقاش مالم تدعمه الادلة و النتائج مضيعة للوقت
عدا عن ذلك فلا يمكن لاي من طرفي هذا النقاش ان يقنع الاخر
و لن يتغير شيء فلن ينهي المؤيدون علا قاتهم مع صديقاتهم و لا اولئك المعارضون سيتخذون الصديقات
و سيبقى المؤيدون على حالهم من انتقاد و ذم للمعارضين و كل سيقول عن الاخر ما كان يقوله مسبقا
وكما قال سنفور عيب نحكي في هذا الموضوع و الناس في الخارج تدير ماهو انفع من الحوار
و لو ان مرد ذلك الى سعة افق الحوار في مجتمعنا
فما رأيكم؟؟
لو ظلت السفينة على هذه الحال فستغرق
على احد ان يبقى في اليمين و على احد ان يبقى في اليسار
لن تجتمعوا و لا تجتمعوا
(مابعرف شو مشكلة الرموز كل ما اخترت واحد بيطلعلي واحد تاني)