مرحبا...(وقفت والتفت إلى مصدر الصوت,عرفتها وكأني لم أعرفها)
قلت بجمود:أهلين (استنكرت عليها البدء بالسلام وقد كنت فيما مضى السباق بالسلام وإن لم أرحب وأهلل لم تكن لتسلم أو تتكلم معي أبداً)
متل ما انت دوم مستعجل....
بقيت صامتا ( تذكرت أيامنا الماضية التي كنا نحث فيها الخطى خوفا من عيون الناس... كنا نشعر وكأننا عصفورين نملك السماء نمرح فيها كيف نشاء... لا نفكر سوى باللحظة التي نعيشها بسعادة ...والآن تعودت المشي السريع لأشعر بأنها تمشي قربي ولا أريد لأحد أن يوقفنا ويقطع سعادتنا)
رسمت ابتسامة كاذبة على شفتيها وقالت باستغراب:شبك معقول ما عرفتني...(يبدو أنها استنكرت علي حق النسيان فالمعروف أن الجرح لا ينسى فهل من المعقول أني تداركته ونسيته... استغربت صمتي وأنا الذي كنت لا أتوقف عن الكلام الجميل في حضرتها ...استغربت كيف أني مررت بقربها ولم أشعر بها)
أجبت بهدوء:له ولو ...بعد زمان...(رغم أنه لم يكن مضى الكثير من الوقت على آخر مرة رأيتها فيها فقد كنت دائما أصحو على نفسي وأنا أسير على طرقنا القديمة كنت دائما أجد نفسي على تلك الزاوية أنظر إلى اليمين متأملا قدومها رغم أني أعرف أنها لن تأتي وإن أتت فلن أكلمها ...كنت دائما أنساق إلى كليتها لأراها من بعيد ...لا أدري إن كانت تراني ولكن كنا نتجنب التلاقي بالعيون)
إي والله شايف الحق علينا نحن الاتنين يمكن من شي سنة ونص سنتين ما حكينا مع بعض ما
بقيت صامتا شو أخبارك (وكأنها تجهلها,كنت متيقنا من أنها تعرف أخباري أكثر مني, فكلانا كنا نسأل أصدقائنا في الحي عن بعضنا أو زملاء الكلية أي كنا نراقب بعضنا عن بعد ,وكنت متأكدا كما أن صديقي يأتي وينقل لي كلامها وسؤالها عني أن صديقتها تفعل كذلك)
تمام متل ما بتعرفيني على حالي ما تغير فيني شي
كل هاد ومو متغير فيك شي(لم أكن أريد التحدث عن نفسي لم أكن أريد التحدث عن أسباب التغير وما جرى وما يجري عندي فحولت الاستغراب إليها)
أنا مو متغير فيني شي بالنسبة إلك أنت متغيرة كتير كتير (لقد ازدادت جمالا وسحرا لكني لم أستطع البوح, بذلك لقد نضج جمالها... لقد كانت شمعة تنير مدرستها ووردة تزين حارتنا القديمة, لكنها الآن منارة تشع بالجمال وتنير كليتها وباقة جميلة من الأزهار تنشر عبيرها وشذاها على جامعة حلب كلها)
عن جد... إن شا الله مو للأسوء ...
لأ ...لا تخافي(لم أستطع الإجابة بأكثر من ذلك)
طيب شو أكتر شي متغير فيني (يبدو وكأنها تستدرجني بالحديث كما كانت تفعل في ما مضى كانت إن لبست كنزة جديدة أو وضعت ربطة شعر جديدة تبقى طوال المشوار تلمح لي لأقول لها بأنك جميلة وبهذه الكنزة أو الربطة ازددت جمالا<حلوة بس القالب غالب>)
سكت قليلا ونظرت إلى وجهها الملائكي وقلت :عقلك كبران شوي...
يا إلهي ضحكة رائعة( لم أستطع أن أمنع نفسي من تذكر أحلى الأيام وأحلى الأوقات وهذه الضحكة الطفولية التي تثير فيّ الجنون)
عم بمزح معك (لم أستطع كبح جماح لساني وأن أمنعه من قول تلك الكلمات التي دخلت إلى هذه الذاكرة وحُفظت ضمن ملف جميل باسمها)
حليانة كتير كنت أميرة وهلق<هلْ لء>ملكة...
شكرا(لم أتركها لتكمل كلامها فقد راجعت نفسي وانسحبت كأن البحر يلعب بي فتارة مدا وأخرى جذرا)
يعني ما تصدقيني كلمة وبتنقال...
عادت وضحكت فعدت وانبهرت
هاد انت على حالك فعلا مو متغير فيك شي ...شوي من بره بس لساك على طبعك...
هيك شايفةإي والله...
وأنا شايفك هيك<قلتها بتثاقل>(لم أستطع هذه المرة منع نفسي من تذكر المشاكل الصغيرة التي اصطنعتها وأنا الذي كنت أمر بوقت عصيب في المنزل لكنها لم ترحمني ولم تفهمني) حليانة من بره ومن جوه على ما انت...لأ سالم عن جد من جوه متل بره وصار أحلى كمان من سنة وانا عم حاول وما عم بحسن انسى كيف اني ما داريتك....
هلق صحيتي...
بليز لا تزيدها علي (شعرت بصدق كلامها أو يمكن أن قلبي الحنون وعيوني المفتونة أثروا على عقلي وتلاعبوا به) لم أجعلها تكمل حديثها: لأ ولا يهمك مو مشكلة ما بدها كل هالشي(لم أكن أريدها أن تعتذر لأني متأكد من أني سأسامحها مباشرة وستعود لتحتل قلبي وأنا الان أريده حرا) انا نسيت...
نسيت كل شي كل شي ...
لأ نسيت المشاكل كلها وضل عندي صديقة غالية اسمها ليال....
يعني منرجع متل أول
ما بعرف ما بحسن أوعدك بشي لأني ما لي متأكد من أني رح أحسن أقرا بكتابك مرة تانية (أحببت أن أنهي الحديث هنا لكي لا تطلب مني المزيد من التنازلات والتي كنت سأقدمها لها على مضض ودون تفكير)
على كل حال برجع بشوفك مرة تانية ومنحكي أكتر
طيب ما شي الحال لأني عن جد نسيت كتابي القديم وجبت دفتر فاضي والقلم بإيدك أنت رح تمليه....
لم أستطع الرد (فاجأني الجواب لم أكن معتادا منها على هكذا إجابة كان الدمع سلاحا قويا بيدها لكنها لم تستخدمه الآن ولو استخدمته لأنهت الحرب بدون كلام)
أوك منرجع منحكي مرة تانية
أكيد
بس أخلص من الامتحان بحكي معك
أوك عم بستنى تليفون منك
ماشي باي
باي ..................................16/1/2007

الحديث بسيط ولا يتجاوز بضع أسطر لكن المشاعر والأفكار تفوق قدرتي على التعبير لا أدري ماذا سأفعل لكني سأبقى حذرا....وعلى الأغلب أني أريد قلبي ...لم أحسم الأمر بعد...

هذه أحلى ما قرأته لك ... لا أدري لماذا أحلى ما يُكتب يُستقى دائماً من الواقع ..

لماذا نشرتها في اجتماعيات ولم تنشرها في هديل الروح؟ هل تعمدت هذا؟ أم كان عفوياً؟

أحييك mr.sad على طرحك لتجربة شخصية, فعلا بدها شجاعة أنك تطرح على العلن مايدور في قلبك وعقلك...

mr.sad على الرغم من عدم معرفتنا للتفاصيل...... بس أنا راح قوللك رأيي مباشرة : كونك كتبت هالكلام الجميل عنها, فهدا يعني أنك لساتك بتعزها...... خبرها وأحكي معها تلفون..... ورجع اللي راح.... والأحسن ماتستنى لوقت مايخلص الفحص! ........ ارجعوا لبعض ...أصدقاء أو أحباء.......هالأمر يعود أليكم.... ولكن المهم في مثل هيك حالة أستمرار التواصل .... صدقني التخاطر عن بعد, وأنتظار البادئ لن يفيدك شيئا.... كن أنت السباق....

لأنك أنت .... الرجل ..

سلامي ألك يا سيد حزين.. وأعذرني على تدخلي في ما لا يعنيني...

السلام عليكم


أعشق هذه الطريقة في الكتابة ... الحوارات وما بين كلماتها .. وصف الأحاسيس في الحوار ووصف ردات الفعل تأتي أبلغ من كتابة نص. ... وهو أسلوبي المفضل.

إن كان الخلاف القديم نشأ من التثاقل أو سوء الفهم .... فبأمل كبير أدعو أن تعودوا .......
أما إن كان غير ذلك .......... فالأمر يستدعي التوقف والتفكير ...... الجدي .....
فالحسرة والمشاعر والأحلام وحدهما لا يبنيان نجاحاً في العلاقة

بالتوفيق


والسلام عليكم

شكرا الكم شكرا شنكول انا كنت رح أضعها في هديل الروح لكني في اللحظة الأخيرة غيرت رأيي ووضعتها باجتماعيات وأكتر شيء

شجعني على ذلك الوعي الكبير الذي لمسته في مناقشات عدة مواضيع طرحت في الفترة الأخيرة على منتدانا مثل الارتباط ما قبل

الرسمي او الحب عبر النت او غيرها الكثير فأحببت أن استنير ببعض آرائكم ولو أني وضعتها في هديل الروح لما رضيت أي نقاش

حول آرائي أو أفكاري بالأحرى أحساسيسي لأن هديل الروح للروح والروح أمر شخصي بالنسبة لي أما أني وضعتها هنا فاريد

مشاركة جدية منكم وهذا ما سأصل به لمشاركة الأخ العزيزkeaneواقول له ليس تدخلا في أمر شخصي بل أنا من طرحه للنقاش

لأني فعلا أحتاج مساعدة صديق وكما تعرفون الآن امتحانات وصديقي مشغول بامتحاناته وأفكاره مهما كانت لا بد وان تكون مشوشة

لكن النقاش الجماعي مفيد ويوجد نقطة أخرى وهي مشاركة الأخوات وبدأت بها أختي الكبيرة كليوباترة والتي لها رأي مهم في هذا

الموضوع والخلاف لم ينبع فجأة بل كان محوريا بالنسبة لي هل هذه التي ستكون عونا لي عندما تحل بي المصائب المستقبلية وهذا كان

أكبر سبب للفراق اما بالنسبة للكلام الجميل والوصف الرائع لجمالها فهو موضوع آخر كنت أعبر فيه عن مشاعر قديمة مكبوتة والأهم

أني كنت أحاول أن أقترب من الواقع بهذا الوصف فهي تستحقه بالواقع وليس بنظرة عاشق <سابق>...
من ناحية تانية :
ملكتنا كليوباترة شكرا لأني أسلوبي عجبك اطراء حلو منك...

السلام عليكم


الأخ سالم ... هلا فيك

بس يعني ............. أن تطرح ........... موضوع عاطفي خاص فيك ................ للنقاش بالمنتدى ............... ؟

ما أمر غريب ........................................ ؟

هادا قرارك انت وحدك ......................... !!

وانت أدرى بالأبعاد ...

فيي فيدك بكم نصيحة ... حاول التفكير بموضوعية شوي، يا ترى الوضع بيناتكون مناسب لاستكمال كل العمر سوا ؟ ..... لا تتبع أحاسيسك بس.
والخلاف المحوري يلي حضرتك حكيت عنو، ممكن أن ينحل ؟؟
إذا كل هالأد محوري وبيسبب مشاكل بالمستقبل. فبيضل قرارك انت تتبعو وتضل تحاربو طول عمرك !!!

عكل حال برأيي ... الحب وحدو ما بيستاهل أن نضحي كرمالو لازم يكون في تفاهم واحترام.

مشان ما تتعذب كتير ...... لما بيخطرلك الموضوع والذكريات ......... اشغيل تفكيرك بشي تاني
ابتعد عن الأغاني الحزينة
إذا عندك إشيا بتذكرك فيها ضبون بكرتونة
حاول تعبي أوقات فراغك مشان ما يشتغل تفكيرك ... بالدراسة مثلاً

يعني إذا رفيقك مشوش وعندو امتحانات ... هون ما حدا بيوش ومشوش ؟ والشعب فايئ ورايئ؟ عجبتني

وبتمنالك كل الخير ... وتتذكر القرار يلي بيريحك


والسلام عليكم

بالنسبة للمشاركة الأصلية آخر سطر نا قص كلمة مهمة هلق انتبهت عليها حاولت اعدلها ما حسنت رح أضيفها هون
أني أريد قلبي حرا....لم أحسم المر بعد....
طرح موضوع عاطفي للنقاش هو خاص بيني وبينها وشو رح أتصرف هاد شي اكيد ومفروغ منو...بس انا بدي شوية أفكار ونصائح لأني بصراحة مشوش ومن مدة مجمد تفكيري بكل هالمواضيع وكما ذكرت منذ سنة ونص لم أتكلم معها مباشرة أتابع أخبارها من بعيد لكن مهما كانت أخبارها فلم تكن هذه الأخبار لتغير شيء عندي....الحب ما بيستاهل انو نضحي مشانو هاد رأيك ؟عندي تحفظ على هي النقطة وبصراحة بالنسبة للأغاني الحزينة فأنا مدمن عليها قبل ما أترك الخانوم يعني ما كان الها علاقة بهاد الموضوع وأني اسمي مستر ساد أكيد مو بسببها لأنو أحيانا في شغلات كتير كتير أهم من حب الشب والبنت أو علاقتهون مع بعض...وبالنسبة للكرتونة فأنا حرقتها من زمان وللذكريات يمكن ما بقيلي منها غير الشي الحلو والطريف الي ما بعذبني أبدا بالليل....وانا متل ما قلت عن جد حابب يضل قلبي حر بس واقف عن نقطة نحن بمجتمع شرقي وانو تجي بنت لعندك وتعتذر وتطلب فهاد شي كبير كتير عنا وشو انا بعنيلها...انا شو ما كانت خليفة الموضوع ما رح تأثر علي متل ما رح تأثر عليها خاصة في حال اني تجاهلتها ابدا او طلبت انو نرجع معرفة على الخفيف ما بعرف شو رح تكون ردة فعلها وبالنسبة يا كليوباترة اني آخد القرار الي بريحني سهل كتير انو الواحد ما يفكر غير بحالو بس مو حرام لازم افكر فيها شوي واراعيها ولو هي ما راعتني بس بضل انا اهدى منها وبضل انا الشاب الشرقي وهي الفتاة الحلوة اللي بيتمناها الشب بمجتمعنا ورح قلك كليوباترة اني لو اتبعت احاسيسي يمكن ما ارجعلها بس عند برجع بفكر بالعقل الشرقي يمكن ارجعلها يمكن الآية مقلوبة بس ما رح احكي بالموضوع كمان ورح خلي الأمور تمشي على حالها وشلون ما انتهت تنتهي انا مارح أتأثر كتير يمكن المشكلة عندها والطابة بملعبها........

ويمكن تعتبروا النقاش الي كتبتوا قطعة نثرية وما هي من الواقع بس مجرد أفكار خيال واذا بحسن العزيز شنكول ينقلها على هديل الروح ما يقصير ما عندي مشكلة......

شكرا كتير كليوباترة على اهتمامك ومناقشة الحلوة.......

مستر ساد .. عطيها فرصة .. بتوقع إنها بتعنيلك كتير ...

بالمناسبة أنا لا أؤيدك بطرح أمر كهذا على العلن وخاصةً ذكر اسمها ... هذا خطأ برأيي ..

بالتوفيق

السلام عليكم

سهل كتير انو الواحد ما يفكر غير بحالو بس مو حرام لازم افكر فيها شوي واراعيها ولو هي ما راعتني بس بضل انا اهدى منها وبضل انا الشاب الشرقي وهي الفتاة الحلوة اللي بيتمناها الشب بمجتمعنا

احفاظ هالملف كلو عندك وارجاع اقراه بعد 3 سنين !!!

بضمنلك تفكيرك حيتغير تماماً !!

والسلام عليكم

شكراً مستر ساد عل طرحك الجريئ للموضوع

برأي الحبيبة ما ممكن أبداً ترجع صديقة غير إذا ماكانت بالاصل حبيبة مزبوطة و إنما مجرد مشاعر عابرة ( فهمتوا علي شي ؟؟ )

الي بريحني سهل كتير انو الواحد ما يفكر غير بحالو بس مو حرام لازم افكر فيها شوي واراعيها ولو هي ما راعتني بس بضل انا اهدى منها وبضل انا الشاب الشرقي وهي الفتاة الحلوة اللي بيتمناها الشب بمجتمعنا

متلما ذكرت عدة مرات أنك شب شرقي فهون لازم تفكر مزبوط
أول شي غلط كبير انو تكتب اسم البنت , شب شرقي ما بيعمل هيك خصوصاً إذا كان بده يراعي البنت , شو رأيك أنت بهل نقطة ؟؟؟

النقطة يلي لازم يتفكر فيها هو ياترى شو رح تكون نهاية العلاقة ؟؟؟ و من هون بتقدر تنطلق

إذا نهاية العلاقة طريق مسدود فبرأي حرام تعذب حالك و تعذبها و خلوا النسيان و البعد يلي صار و تعودتوا عليه أحسن شي , ليش لتعذبوا حالكم مرة تانية ؟؟

إذا العلاقة ممكن تجوم طول العمر و تقدروا ترتبطوا فهون ممكن ترد المياه لمجاريها


بس إذا فعلاً عم بتفكر بالبنت و عم بتراعيها ففكر بمصلحتها , و مصلحتها انو تنتهي هل علاقة بالارتباط

مابتكون عم بتراعيها إذا عبيتلها مشاعرها و حكيت معاها شوي


برأي الشب الشرقي لازم تكون ميزته أنه بيصون أي البنت و بيخاف عليها متل خوفه على أخته


بالنهاية بتمنالك كل التوفيق