تكررت الشكوى اكثر من مرة حول "معلم" في الصف الابتدائي يشجع الاطفال على ضرب بعضهم البعض بواسطة الصفع على الوجه ، وكانت الرسائل دائما تأتي من مجهول.



وقد حاولنا كثيرا الوصول الى تلك المدرسة التي ذاع صيت "الاستاذ" فيها وهو يعلم الطلاب الاطفال على ممارسات لا انسانية دون ان نفلح في ذلك.



حصلنا مؤخرا على شريط فيديو ، يتداوله البعض عبر جهاز الموبايل ، وبالفعل يظهر احدهم في صف ابتدائي يصور طالبان يصفع كل منهما الاخر وسط تشجيع " المصور " الذي يبدو بانه "معلم" الصف على تبادل الصفعات بمزيد من القوة.

ويخاطب "المعلم" المجهول الطالبين الذين يبدو انهما يلعبان لعبة "الصفع" ويقول لهما :



"مسكوا من دانو" .. ويتابع " امسكوا من دانو واضربوا كف " ..

ولما لم يأتِ " الكف " بالقوة المطلوبة يصيح المعلم بالطالب " اقوى ولاه اقوى " ..

يستجيب احد الطلاب ( ايمن ) ويضرب الاخر "كفاً" يدوي صوته في الصف فيصيح "الاستاذ" مبتهجا .. "ايه يلعن" ..

ويشجع الطالب الاخر الذي يظهر ان اسمه " ايهم " والذي جلس متألما من هول " كف" زميله .. ينهض ويقوم هو الاخر بضرب زميله " بالكف " ضربة قوية ..

يبتهج الاستاذ اكثر و يشجعهم قائلا " اقوى .. بوكس ..بوكس " ..

ويشتبك الطفلان اخيرا وسط صيحات "المعلم" وهو يقول " ابعدو عن بعضكم .. " وتظهر الصورة بانه يحاول فك الاشتباك بقدمه ..



وينتهي المقطع .. دون ان نعرف الفاعل .. ولا المدرسة التي كان فيها الحدث ..



آملين من خلال نشر الحادثة هنا ان نتلقى اية معلومات من الذين يتعرفون على الطفلين ايمن و ايهم .. او على صوت المدرس او على بعض طلاب المدرسة التي يبدو الصف واضحا فيها ..

فيكن تروحو ع الموقع وتشوفو الفلم..

http://www.syria-news.com/readnews.php?sy_seq=47239
--------------
طبعا.. هو "يشجع طالبين.."
بس يمكن لحقارة الموقف وهوله.. الكاتب ما عرف الطالبين من الطالبان..
(بس وجب التوضيح لحتى حدا ما يفكر عم نحكي ع طالبان وأفغانستان..)
--------------
انشالله نسمع بالأيام الجاي.. إنو نعرف هدا ال....
وانشنق..
أنا من الناس (مع إني كنت من الأوائل بدراستي.) يلي آكلين قتل ومتورمين.. بالمدرسة..
معقول هيك..
شو هالإيام..
كان قبل يقولو إنو الإستاذ بيقتل معلش.. لإنو عم يربي التلميذ..
بس هلأ.. أساتذة بهدلة.. ولا علم ولا أخلاق.. وفوقها كمان بيضربو الطالب؟.. طيب وين رايحين..
أنا من جهتي عممت الموضوع ع عدد من الأصدقاء.. وبتمنى ياخد من وقتكن شوي..
لإنو هدا مستقبل...
يعني نحنا ربينا بذل، وراسنا موطا طول عمرنا.. والرايح والجاي بيسفق فينا.. منيح.. قبلنا
بس هلأ تغير الزمن.. وصار في إنترنت .. يعني ما عاد الشعب غنم بينسلخ وقت يلي بدنا .. وبينضرب وقت بدنا .. وبينجر للحظيرة..
.. إنتو شوفو تطليعات الطلاب يلي ورا..
تخيل حالك محله.. وأخوك عم يضرب رفيقه وينضرب بهالكفوف يلي والله بتبخش أكبر طبلة إدن..
وبتعمل أقلها نزف فوق الجافية.. تخيل.. عم يضربو ببعض.. وإنت عم تتفرج..
يمكن دورك يكون التاني..
شو هالمشهد؟.؟ وشو هالطفولة؟؟ شو هالحياة..
آآآآآآآآآآآآآآآآآآآآآه...
يا ليتني مت قبل هذا وكنت نسيا منسيا..

يعني نحنا ربينا بذل، وراسنا موطا طول عمرنا.. والرايح والجاي بيسفق فينا..

هي المشكلة اللي منعانيها حتى اللحظة الحالية


يعني و نحن بمرحلة جامعية و بعد كم سنة رح نصير متلنا متل هالدكاترة
بيمر دكتور مادة ال........... بدل ما يشوف شو في عنا أسئلة
بيبدا حديثو انو الاسئلة سهلة و ما رح يسمع أي سؤال
و بعدها بيتبع أسلوب التحقير و المفردات الدونية و الالفاظ الغير لائقة
و لا بالطلاب أولا و لا به كونه ..........



لهيك ما منقدر نقول غير انو هي النفوس المريضة أكبر عائق في مجتمعنا

عوجا

أنا كنت مشاغب كتير ومتقلع كتير من الصف ومفصول من المدرسة بس ما حدا داعبي بأنامله ولا بالعصا ولا انضربت لا من استاذ ولا موجه ولا بالبيت والحمد لله بس انو يكون في انسان _وللاسف انو انسان غصب عنا بس مريض غصب عنو_يشجع اطفال على ضرب بعض امام باقي الزملاء هي مهزلة على ما اعتقد هاد الاستاذ عم يدرس مادة جديدة ما كانت على زمانا او انو هاد اسلوب جديد تطور على طريقة ارفس واضرب لتتعلم وتنال اكمل الدرجات...
اسلوب التعليم تغير والمنهاج تغير وتقسيم المراحل(ابتدائي واعدادي وثانوي )تغير لكن ياترى هل تغير للأفضل ؟هل حقق فائدة مرجوة لبناء جيل أحسن من جيلنا؟ولاااااااااا ...وللأسف انا شايف ولاااااااااااااا.........

يعني يا سيدي ساد تريد أن تقول أنك قد فصلت وطردت ولم يمسح أحدهم الأرض بك كيف حدث ذلك ثم لم تأكلها علقة ولا مرة بالبيت يعني لابد أنك قد تعرضت الى رصت أذن أو صاروخ بالستي مشترى من ماركة شحاطة أرض جو

والله لا بالمدرسة ولا بالبيت ...بالبيت لأسباب عائلية خاصة ما بتنذكر هون وبالمدرسة كنت مطبق الموجه فصلني على الورق قدام باقي الشباب بس بعد كلامك تذكرت كف يمكن ما في غيرو طبعا بالبيت مو بالمدرسة كنت صف تالت على ما اذكر وآخ ياريت يتكرر بلكي بصحا شوي....سلام وبصراحة سنفور صرت أدور على المدرسة وأحاول أجمع أخبار عن الموضوع بس ما سمعت عن هاد الموضوع برا المنتدى سلام واذا في شي جديد خبرنا...

ألي معارف في السلك التعليمي...أنطرح مرة هالموضوع..ومع أنو هنن مالون وحوش ولا ساديين..بالعكس كتير حبابين.. بس لاحظو أنو بعد ما أنمنع الضرب بالمدارس زادت المياعة والجلاقة واكل الهوا..ز وبالفعل عم لاحظ طلاب أبتدائي عم يعملو عمايل ما وصلنالها لهلا... يعني الجماعة عميحتاروا شو بدهن يساوو مع الطلاب..وخصوصا نحنا التعليم كتيييييير أدواتو متوفرة, والطرق الحضارية بالتربية والتعليم متوافرة جدا!!!!!
مثال: طالب شاغب شوي وكان زعيم الصف.. شاغبو الشباب معو مشان يتونسو .. بس ما وصلو لحد الفصل.. وبالتالي لا عقاب.. وتعود الحلقة المفرغة..مع أنو بشدة اذن ناااااااااعمة ( بس مو لدرجة نقلعها من مكانها أو , او كف بسيط ممكن كان يتربى شوي الولد.. اللي من المحتمل اكل قتل الى ما شبع منو بالبيت وبالتالي.. صار الاسلوب الناجع نوعا ما وتعود عليه...... ما بعرف مع أنو أنا ضد الضرب لانو شغلة مو حضارية ..بس مشاكل مجتمعنا صرت يائس من ايجاد حلول الها لأنو متشابكة متل طابة خيطان الصوف... ماعدنا نعرف أولها من أخرها... يعني هالموضوع بالزات فيني عالسريع أطالعلو ميت ألف مشكلة متصلة فيه... سوء التربية من الأهل.. سوء تدريب الكوادر التعليمية.. قلة الرواتب.. قلة الأدوات التعليمية وشحها.. تخلف المجتمع ( بصورة عامة طبعا) ....الفساد الو علاقة كمان.. و ..و... الخ.. والحل بايد مين؟.. يمكن الزمان بيحلها...مش هيك....

سلام

المشاركة الأصلية بواسطة keane

ألي معارف في السلك التعليمي...



مثال: طالب شاغب شوي وكان زعيم الصف.. شاغبو الشباب معو مشان يتونسو .. بس ما وصلو لحد الفصل.. وبالتالي لا عقاب.. وتعود الحلقة المفرغة..مع أنو بشدة اذن ناااااااااعمة ( بس مو لدرجة نقلعها من مكانها أو , او كف بسيط ممكن كان يتربى شوي الولد.. اللي من المحتمل اكل قتل الى ما شبع منو بالبيت وبالتالي..

والله الحل مو بشدة الادن اكيد
لانو اذا بتلاحظ في استاذ بيدخل علصف ... بدون مايستعمل ايدو ... ماحدا من الطلاب بيسترجي يفتح تمو بكلمة
بينما بيدخل استاذ تاني ... بتلاقي الصف كلو قايم قاعد ... ولااستاذ ولا كأنو موجود

فالمشكلة بشخصيات هالسلك التعليمي... مو بوجود الضرب او لأ
على الاقل قبل مايعينو استاذ بالواسطة ... لازم يشوفو هالشخصية العظيمة بتحسن بتدرس ولا لأ

بالفعل سفالة ماضل بعدها سفالة بس انشالله بنال المدرس جزاتو لانو هادا مو مدرس هادا متوحش