مرحبا
رح أعرضلكم موجز كبير عن مرض بتعرفوه كتير منيح اسمه النقرس كنوع من التذكرة لأهمية هل مرض و شيوعه عندنا

النقرس GOUT

التعريف : هو اضطراب باستقلاب البيورين
يتميز بارتفاع حمض البول في المصل بشكل مستمر أو نوبي لقيم أعلى من 7 ملغ\ دل
و ترسب اليورات في النسج المفصلية و خارج المفصلية

طيب شو هو سبب ارتفاع حمض البول بالمصل ؟؟
منطقياً في سببين : الأول هو فرط الانتاج و التاني هو نقص الطرح

1) مرضى فرط إنتاج حمض البول :

يشكلون 10% تقريباً من مرضى النقرس
و هم يطرحون اكثر من 750_1000 ملغ من حمض البول يومياً في حالات عدم اتباع الحمية
يصنع هؤلاء المرضى كميات اكبر من الكميات السوية من حمض البول حديثة التشكل من المركبات الوسيطية او عن طريق تدرك الاسس البيورينية من الحموض النيكليوتيدية

قد يكون العيب المسبب لفرط انتاج حمض البول أما :
• بدئي : مرتبط بعيوب أنزيمية في مسار البورين
• ثانوي : ناتج عن زيادة التشكل و الموت الخلوي و هذا مرتبط ب :

- تناول الكحول
- الخباثات الدموية
- الانحلال الدموي المزمن
- المعالجة الكيميائية للسرطان


2) مرضى نقص طرح حمض البول :

يشكلون 90% من مرضى النقرس
و هم يطرحون أقل من 700 ملغ من حمض البول يومياً



اشيع أسباب نقص طرح حمض البول هي :

1) دوائية : من الأدوية التي تسبب هذه الحالة :
المدرات البولية – الكحول – الجرعات الخفيفة للاسبرين التي تتداخل على الطرح الانبوبي لليورات
2) كلوية : مثل قصور الكلية المزمن – اعتلال الكلية بالرصاص
3) وراثية : كالعيوب في الانابيب الكلوية الدقيقة
4) مرضى زرع القلب أو الكلية أو الكبد : حيث يحدث فرط حمض البول عند( 75-80)% من المرضى الذين اجروا عملية زرع قلب مثلاً , لأن وجود قصور كلية مستبطن و تناول المدرات و المعالجة المثبطة للمناعة بالسيكلوسبورين هي من العوامل المؤهبة الاكثر شيوعاً , و يميل هؤلاء المصابين لأن يعانوا من شكل مترقي بسرعة من النقرس مع تشكل توفات topi واسعة الانتشار ( رح اشرحلكم شو هاي التوفي )

( ما تهربوا للموضوع تتمة )

طيب سالتوا حالكم ياترى مينو هادا يلي بيرافق النقرس !!!!!!!!!؟؟؟
اكيد عنده أصحاب عاطلين متله رح أعرفكم عليهم حتى تتذكروه لما بتشوفوهم

الحالات المرافقة للنقرس :

1) السمنة : نلاحظ ارتفاع مستويات حمض البول في المصل مع زيادة الوزن
فالنقرس شائع عند الأشخاص الذين يزيد وزنهم ب 15 % عن الوزن المثالي ( يعزى ذلك جزئياً لنقص طرح اليورات )
2) الداء السكري : نلاحظ بان اضطراب تحمل الغلوكوز شائع الحدوث في النقرس ( قد يكون ذلك بسبب السمنة المرافقة )
3) ارتفاع الضغط الشرياني : يشيع ارتفاع الضغط عند مرضى النقرس لكن لايوجد مخطط واضح بين الضغط الدموي و مستوى حمض البول في المصل ( قد تكون السمنة مسؤولة عن زيادة معدل ارتفاع الضغط عند مرضى النقرس )
4) فرط شحميات الدم ( النمط 2 و 4 ) : من الشائع وجود تراكم بعض الليبيدات في البلازما عند مرضى النقرس
5) التصلب العصيدي : عادة مايحدث الموت عند مرضى النقرس نتيجة الامراض الوعائية القلبية او الدماغية




طيب بعد كل هل حكي معقول ما نتعرف نتعرف على هل مريض المسكين يلي عنده نقرس !!!!!!!!!!!!!!

تخيلوا معي الصورة الاكثر شيوعاً :
ذكر عمره متوسط أو متقدم المفصل المشطي السلامي لإبهام قدمه ( يعني اصبعة أجره الكبيرة ) متورم و محمر و ساخن

بس انتبهوا: ما تتقيدوا بهل صورة دوماً و خلوا خيالكم اوسع , ممكن يجي مريض صابت هجمة النقرس اول مرة مفصل الكاحل , و يشخص الدكتور الحالة على أنها ( فكشة اجر ) بالعامية " حالة مرت علي "
--------------
شوية ملاحظات قيمة بتساعدكم اكتر على تخيل المرض:

- معظم المرضى يعانون من فرط حمض البول غير العرضى المستمر لمدة 20-30 سنة قبل النوبة الحادة الاولى

- مستوى حمض البول عال غالباً بس انتبهوا ممكن يكون منخفض خلال النوبة الحادة
- تذكروا مو كل مريض حللناله و طلع عنده ارتفاع بحمض البول معناتا رح ينصاب بالنقرس , بس أكيد منطقياً رح يكون احتمال إصابته كتير عالي

- احتمال تشكل البلورات بيزيد عند ارتفاع حمض البول و عند انخفاض الحرارة , لهيك بنلاحظ انو النقرس توزعه محيطي

- ممكن تنصاب النساء بالنقرس بس بالعادة بعد سن الياس ( بسبب تأثير الاستروجين على تصفية حمض البول )
- بدء الالتهاب النقرسي الحاد في عمر المراهقة او العشرينيات غير شائع و غالباً ما يترافق مع وجود سبب بدئي او ثانوي لفرط حمض البول
--------------
طيب من المهم كتير أنو احكيلكم عن سير المرض ..............


سير النقرس :

عادة ما تختفي الهجمات خلال ايام عديدة ( لكنها قد تمتد لعدة اسابيع )
و تعود المفاصل إلى الحالة السوية بين الهجمات
قد تحدث أصابة متعددة المفاصل في بعض الحالات
كما قد يحدث الترقي النموذجي من إصابة وحيدة المفصل في البداية إلى متعددة المفاصل و ذلك بالامتداد إلى المفاصل المجاورة


ترقي المرض :
إذا كان عندنا مريض مأهمل حاله عل أخير شو رح يصير فيه ؟؟؟

- رح تكتر الهجمات شوي شوي و تصير عديدة المفاصل و اكتر شدة , و ممكن عند البعض يصير عندهم التهاب مفاصل التهابي مزمن بدون فواصل غير عرضية ( و هون رح يصعب علينا نحن الأطباء نفرق الحالة عن التهاب المفاصل الرثياني )
- آخر مرحلة للمهملين هي النقرس التوفي المزمن و بيصير بعد شي 10_20 سنة من ترسب اليورات غير المعالج

طيب شو هي التوفة يلي صرعتكم فيها ووين ممكن نشوفها أكتر شي حتى نتعرف عليها ؟؟؟ و جخوا رح أفرجيكم صورتها كمان

بكل بساطة التوفة عبارة عن تجمع كتل بلورات اليوراتمحاطة بالخلايا الالتهابية مع تليف متفاوت الشدة


أكتر أماكن ممكن نلاقيها فيها هي :

صيوان الاذن , سطوح المفاصل المصابة بشكل مزمن , العظم تحت الغضروف , السطوح الباسطة للذراع , الكيس الزليلي للزج الزندي, وتر آشيل , الوتر الرضفي

بعد كل هل اللعي و الحكي اللي ماله طعمة بدنا الحكي المهم كيف بدنا نعالج المريض حتى يرجع على عيادتنا و هو جايب علبة حلو ليتشكرنا فيها



علاج النقرس :


طبعاً العلاج حسب حالة المريض


1) مريض عنده ارتفاع حمض بول في الدم بس لاعرضي :
بشكل عام هدول المرضى بنحاول بس نصلحلهم الأسباب المستبطنة , و ما بيحتاجوا معالجة اكتر من هيك
الأطباء بيفضلوا ينصاب المريض بالهجمة الحادة حتى يبلشوا المعالجة

2) مريض عنده التهاب مفاصل نقرسي حاد :
هون بنستخدم معالجة دوائية و بتكون فعاليتها القصوى لما بتبدأ المعالجة باكراً جدا من بداية الاعراض ,
بالإضافة للراحة و تثبيت المفصل

المعالجة الدوائية :

a) الكولشسين : ممكن نستخدمه بشكل وريدي بالهجمة الحادة او بشكل فموي ( بس بالفموي رح نعاني من التاثيرات الجانبية المزعجة متل الغثيان و الإقياء و الإسهال قبلما تنجح المعالجة )
- من المهم أنو ننتبه لما بنعطيه عند المرضى المسنين والمصابين باضطراب كلوي أو كبدي حتى نمنع زيادة السمية النقوية و السمية العصبية العضلية

b) مضادات الالتهاب اللاستروئيدية NSAIDS: غالباً بستخدمها بجرعات عالية بس بنسحبها بسرعة بشكل تدريجي ,
- لازم ندير بالنا من الساليسلات و الديفلونيزال لأنها بتاثر على تصفية حمض البول
بشكل عام الأندوميتاسين هو الدواء المفضل فهو اكثر فعالية و سرعة من البقية ( إذا كان المريض بيتحمله بشكل جيد)

c) الستروئيدات القشرية : ممكن نستخدمها على شكل حقن مفصلية بمفصل واحد خصوصاً إذا كان عندي مضادات استطباب لباقي الأدوية

d) لازم نتجنب بالهجمة الحادة الأولوبيرينول و البروبنسيد ( هون أكيد رح تضربوا راسكم و تقولوا معقول نقرس و نتجنب الألوبيرينول حبيب قلبنا !!!!!!! )

السبب انو هل أدوية بتسبب تغير بتراكيز حمض البول بالدم , و هل تغير بالتركيز لحمض البول ( زيادة او نقصان ) ممكن يطيل مدة الهجمات ,
إذا كان المريض اخد دواه الألوبيرنول و خلص بنحاول ما نغير الجرعة ( يعني ماحدا يخرطله يتفهمن و يزيد الجرعة حتى ينقص حمض البول بسرعة و يطيب المريض أسرع )
[size="5"]
3) علاج النقرس ما بين النوب الحادة :
بنحاول نمنع حدوث هجمات جديدة فبنعطي معالجة وقائية , جرعات قليلة من الكولشسين ( 0,6)ملغ لمرة او مرتين يومياً , أو جرعات قليلة من ال NSAIDS

4) علاج النقرس المزمن او التوفي : هدف المعالجة هو السيطرة على حالة فرط حمض البول في الدم فبنحاول ننقص يورات المصل لما دون 6 ملغ/دل , هيك بنقلل حالة فرط الإشباع باليورات و بتتحرك الترسبات النسيجية لحمض البول , و بيتم هل شي عن طريق استخدام

a. الادوية اللي بتزيد الطرح الكلوي لحمض البول و بنسميها الأدوية المدرة لحمض البول ( البروبنسيد , السلفين بيرازين ) :
ممكن نستخدمها عند المرضى يلي بيطرحوا أقل من 700 ملغ من حمض البول باليوم , ووظيفتهم الكلوية سليمة , و ما عندهم قصة حصيات كلوية

b. الادوية اللي بتقلل إنتاج حمض البول متل مثبطات الكزانتين أوكسيداز ( الالوبيرينول ) : بنفضل هل ادوية عند :
 المرضى اللي بيطرحوا اليورات بكميات اكبر من 1000ملغ/دل
 المرضى اللي بتكون عندهم تصفية الكرياتنين أقل من 30 مل /د
 المصابين بالنقرس التوفي
 اللي عندهم قصة تحصي كلوي


المهم نتذكر هل شغلات :

 لازم نخفض الجرعة عند مرضى القصور الكلوي لنتجنب السمية الدوائية
 التأثيرات الجانبية للالوبيرنول هي عسر الهضم و الإسهال و الطفح الجلدي و نسبتها 3-10%
 ممكن يصير بشكل نادر متلازمة فرط الحساسية تامة المظاهر و بتسبب معدلات وفاة عالية نسبياً 20-30 %












انشالله تكونوا استمتعتوا بالموضوع و استفدتوا منه
يلي عنده أي تساؤل أنا جاهزة

لاخد العلم استقيت معلوماتي بشكل رئيسي من مرجعين هنن ( NMS , المرجع المصور في الطب السريري )
و يلي حابب يتفرج على صور إضافية يروح لهل عنوان http://www.mediscan.co.uk/cfm/result...log=nk&res=any

إلوني شو مشان الحمية؟ وتحديد البروتينات؟

مرحبا
آسفة كنت نسيانة الموضوع

هاي شوية ملاحظات عن النظام الغذائي للأسف راح من عندي اسم الموقع بس على كل هي معلومات عامة


النظام الغذائى لمرضى النقرس

يجب تجنب الأطعمة الآتية:
1. الأكلات الدسمة والدهون.
2. العدس والبقول أثناء النوبات الحادة.
3. اللحم والسمك والدجاج أثناء النوبات الحادة.
4. الكبد والكلى والمخ والسالمون والسردين خ والملوحة والمحار.
5. حساء ( شوربة ) اللحوم والسمك.
6. الباذنجان والقرنبيط والبسلة والسبانخ والخرشوف أثناء النوبات الحادة.
7. المربى المحتوية على بذور.
8. التوت والفراولة والتين.
9. التوابل والبهارات والمخللات أثناء النوبات الحادة.


بعض الأغذية التى تفيد فى علاج مرضى النقرس:

عصير الليمون له أثر فعال فى علاج داء النقرس، اذ يذيب الأملاح المترسبة فى المفاصل.
الأناناس مفيد جدا فى حالات السمنة والتهابات المفاصل.
عصير العنب يعمل على تخفيف نسبة حمض البول فى الدم ..
التفاح: يفيد مغلى قشر التفاح أو عصير التفاح المطبوخ فى علاج النقرس .
الخيار يفيد فى علاج النقرس.
الكراث مفيد فى علاج النقرس والتهابات المفاصل.
أكل الفجل يسكن أوجاع النقرس وألام المفاصل.

يعطيك الف عافية

انا مصاب بارتفاع حمض اليوريك كما تبين التحليلات المخبرية والطبيب المعالج نصحني بتناول اقراص واتباع حمية خالية من اللحوم و الاسماك واتبعت التعليمات لمدة 3 اشهرلكن في الاخير ابانت التحليلات انني مازلت اعاني من ارتفاع حمض اليوريك الذي لم ينخفض بنسبة كبيرة مع العلم انني مصاب بداء السكري منذ سنة 2000وعمري 50 سنة