أعلنت شركة انترنت جديدة في سورية عن خدماتها بتأمين سرعة ADSL على الإتصال العادي بسعر خيالي (125 ليرة سورية لـ 15 ساعة ..لا علاقة لها بكلفة الإتصال العادي) وتدعي هذه الشركة أنها تقدم لزبائنها سرعة انترنت أكثر بـ 19 ضعفاً من سرعة الإتصال العادي وأنها " تقنية فعلية لتسريع الإنترنت"

يتطلب منك الحصول على هذه السرعة الخيالية شراء بطاقة تحوي كلمة سر وإسم مستخدم وتحميل برنامج من الانترنت وتنصيبه إلى جهاز الكمبيوتر يقوم هذا البرنامج بتسريع التصفح عن طريق تخفيض دقة الصور والفلاشات أو عدم إظهارها ( لاعلاقة لهذه التقنية بالـ ADSL لامن قريب ولامن بعيد) .

إضافةً لذلك يمكن الحصول عليها دون الحاجة الى هذا البرنامج عن طريق خيارات الانترنت الأساسية الموجودة أصلاً في الكمبيوتر أو يمكن تنصيب برنامج يقوم بنفس المهمة من الإنترنت مجاناً.

أي أن الفرق الوحيد هو أنك أخف ثقلاً نتيجة دفعك للـ 125 ليرة سورية (أو أكثر حسب الرغبة) وعندما قمنا بسؤال مهندسي كمبيوتر وخبراء انترنت أكدوا لنا أنه لايمكن الحصول على خدمة الـ ADSL إلا عن طريق خط رقمي مخصص ومودم خاص (بمعنى لايمكن الحصول على الخدمة على الإتصال العادي)..

ربما تكون إعلانات الشركة مطاطة فهي في إعلاناتها التي ملأت الشوارع والمحال تقول : " ضاعف سرعة الانترنت حتى 19 ضعف احصل على سرعة ADSL على اتصالك العادي"وهذا حسب مهندسوا الكمبيوتر وخبراء الانترنت غير صحيح وغير ممكن ولدى اتصالنا بخدمة الزبائن قال لنا المسؤول أن هذه الخدمة تقوم على مبدأ خفض دقة الصور لزيادة سرعة التصفح وعندما قلنا له أن هذه الميزة موجودة أساساً في الكمبيوتر نفى الموضوع ... غير عابئ بخبرتنا ولا بكلام مهندسينا ..المهم من هذا الموضوع إذا كانت فعلاً هذه الميزة موجودة أساساً في الكمبيوتر دون الحاجة إلى شراء وتنصيب البرنامج

من رخّص لهذه الشركة ومن يحمي المواطن من قانون ( القانون لايحمي المغفلين) ؟!من يحمي المستهلك من مثل هذا الاستغلال لعدم معرفته أو لحلمه بالحصول على سرعة انترنت كبيرة؟

فهل من المعقول بيع الماء في حارة السقايين، وأين جماعات حماية المستهلك من عملية الاحتيال واستغلال جهل الناس بالانترنيت لبيعهم ما وفره لهم مجاناً بيل غيتس بعظمة شركته وأمواله مجاناً .

يامن حسين : موقع الجمل 18/2/2007

حسبي الله ونعم الوكيل..
إمتى رح يتطور الانترنت عندنا؟ ونصير متل الخلق برا؟!
مو حرام يستنى الواحد فينا دقيقتين وتلاتة إذا مو أكتر مشان يحمل ملف حجمه 2 ميجا فقط بينما الناس برا بيحملوا المية والميتين ميغا بدقائق قليلة؟!!
عن جد وضع الانترنت عندنا بيخجِّل.. وكل ما بتفتح شركة جديدة بتطلع متل اللي قبلها..
لنشوف آخرتها.. إمتى رح تجي الشركة المنافسة وتقدم الخدمات والسرعات المميزة بالأسعار المعقولة والمعروفة في غير دول؟!!..
الله كريم.. الله كريم..

ضافةً لذلك يمكن الحصول عليها دون الحاجة الى هذا البرنامج عن طريق خيارات الانترنت الأساسية الموجودة أصلاً في الكمبيوتر أو يمكن تنصيب برنامج يقوم بنفس المهمة من الإنترنت مجاناً.

شنكول.. شو أسم هالبرنامج اللي بيسرع الانترنيت مجانا...واذا في كذا واحد..شو هوي الأحسن ؟

كين التسريع logical وليس physical

مبدؤه تخزين الملفات الّتي تفتحها من الانترنت ... وعند طلبها مرة ثانية يمنع تنزيلها من الانترنت ..
أي أنه يقلل حجم الـ download من الانترنت عن طريق اختصار الملفات ...

هذه الوظيفة موجودة افتراضياً في أي متصفح ولا أدري ماذا يُمكن أن يضيف عليها أي برنامج آخر

منذ زمن لم أستعمل هذا النوع من البرامج
ربما 3 أو 4 سنوات

كان لدي برنامج اسمه sonic

سأبحث وأفيدك

ليش مو مذكور اسم الشركة ؟؟؟

اسم البطاقة سوبر نت SuperNET

وكلها نصب واحتيال
بيعتمد مبدأ تسريعها للنت على انو تقلل دقة الصورة الموجودة بالصفحة ... مو اكتر ... فبتطلع صفحة النت مشوهة ... اضف الى ذلك في صفحات ما بتفتح بوجود خدمة السوبر نت

وبتقدر ببساطة تعرف انو كل الموضوع كذب بمجرد تحمل اي ملف من النت فبتلاقي انو السرعة ما اختلفت ...

على اعتبار اني اشتريت بطاقة وجربتها ... فلذلك بعتلهون ايميل للشركة زفيتون فيه

اعلن و بكل فخر انني كنت من احد المغفلين الذين لا يحميهم القانون...
اشتريت البطافة بعد ما قريت الاعلان و انا كللي تفاؤل...أول صدمة كانت لما اكتشفت انو لازم يكون عندك خط انترنت منشان تنزل البرنامج اللي المفروض انو بيسرع النت...قلت يالله بسيطة..مننزل البرنامج...نزلتو...و اذ بي اكتشف انه كما قال اخونا شنكول يعمل على تخفيض جودة الصور...ليش فقط تخفيض الجودة بل و تشويه الصور...
لا و النكتة انو لما بتحط من ضمن الخصائص انو تكون جودة الصور اسوأ شيبتطلعلك رسالة بتقلك قديش انت عم توفر وقت...مثلا بيقلك انك عم توفر 9 ثواني...خلال ساعة!!!!!!!!
يعني اذا بدكن تجيبو البرنامج و مفكرين انكن رح تقدرو تعملو فويس تشات مع اهلكن و اصحابكن بشكل افضل...فلا تجيبوها...او اذا بدكن تجيبوها منشان منشان تنزلو برامج و العاب و اغاني...فكمان لا تجيبوها...
و السلااااااااااااااااااااا اااام

اه يا بلدي
مازال وضع الانترنت سئ لدينا .
انشاء الله بيتحسن .
هنا خدمة DSL 24/ 24 بسرعة 2 ميغا بالثانية حوالي 350 درهم شهري و ليس له علاقة بالهاتف . انا لدي 256 ك ب بالثانية و فعليا"رائعة و تكلفتها 150 درهم اي 2500 ل س / شهريا".
طبعا"هنا ليست ذات قيمة اذا كان راتبك 8-10 الف درهم .

السلام عليكم


هي الميزة منيحة ليلّي بيفوت يعمل شاتينغ 24 ساعة
أو يلي بيفوت على مواقع XxX يلي ما بتحتاج داونلود. بس صور

ولمين كمان ؟ ... يلي بيفتح إيميلو مرة بالشهر

ألف مبروك

أنا رجعت من سوريا. لاقيت مزودي الانترنيت مضاعفينلي السرعة وصارت 512 ميغابت .. هيك من حالون لحالون (الله يحرسون) وهلئ انتقلت على تعريف جديد بسرعة 1 ميغابت بالثانية اعتباراّ من الشهر القادم. وذلك بمقابل 25$ بالشهر فقط.

يا هيك انترنيت الخلق يا بلا !!!!


يا حرام ................ بتزعلوا





والسلام عليكم

كليوباترا .. لا تتمسخري علينا لحتى ما تصيري متلنا ...

=-=-=-=-=-

كين .. تذكرت برنامج Google Web Accelerator من شركة Google

System Requirements
Operating System: Win XP or Win 2000 SP3+
Browser: IE 5.5+ or Firefox 1.0+

أنا جربته في بدايته وما عدت جربته ... رح أنزله من جديد ...



ما عندي وقت أدور في البرامج . وأختار أفضلها ... ولكن عندي ثقة شبه مطلقة بشركة Google وبمنجاتها ... وبنصحك على العمياني إنك تستعملها ...

أنا رح أنزّل البرنامج وأجربه بدون ما أشوف غيره ... طبعاً برامجي القديمة ما بتفيد ... وخاصةً إني بستعمل Firefos

ما تتوقع تشوف نتيجة فورية ... ولكن مع الوقت رح تلاحظ فرق ... الصفحة وقت بتفتح أول مرة دائماً بدها تستغرق وقتها الطبيعي ولكن في المرة التالية رح تفتح أسرع ...

ما اختلفنا ... الغوغل أظهر تفوقو بالبرمجيات بس لا حدا ينزل غوغل توك عالعميانة. لأن ماسنجر فاشل

شكراً عكل حال ........ ميلو .. ما عم بتمسخر عم بستهزأ !!!


والسلام