السلام عليكم ورحمة الله وبركاته


زملاء الأعضاء في المنتدى .. وطلاب كلية الطب في حلب

صرلي مدة معكم بمنتداكون الحلو .. وهايدا أول موضوع بشارك فيه .. وأفكار مش جديدة, وببالي من زمان
فاللحظة المناسبة حانت لطرحها

للعلم أنا ما بدرس طب ولا صيدلة !



ليش اخترت كلية الطب ؟


طبعا مع احترامي واعجابي بطلاب الطب, والأطباء (الأشراف منهم-أبعدكم الله عن الطب التجاري) وكل واحد أدر يجيب بالبكالوريا المجموع الشبه تام (مناضلين بكل معنى الكلمة) ودخل كلية الطب

طبعا ... ممكن الجواب يكون ... معئول حدى يجيب المجموع الشبه تام .. ويفوت كلية تانية ؟


طيب ........ رح احكي بشكل عام الوضع عنا (وهايدا مش وضعكون يلي دارسين بسوريا) .. وكذلك احترامي لطلاب الطب والصيدلة في الخارج (بما ان عندنا مافي تفريق طب او صيدلة)

مئات الطلاب السوريين .. وخليني قول 90% منهم (مجموعهم في روسيا ورابطة الدول المستقلة حسب آخر احصائيات وزارة التعليم العالي السورية - والاتحاد الوطني لطلبة سوريا = 5825 طالب وطالبة)

وأنا متأكدة أن أكتر من 4000 منهم دخلوا الطب أو الصيدلة بمختلف المدن ومختلف الجامعات والأكاديميات الطبية في روسيا


يلي آخد بكالوريا أدبي بالزور .. عم يجي يدرس طب
ويلي آخد بكالوريا وناقصو 3 علامات ليدخل الطب بسوريا .. عم يجي يدرس طب
ويلي حالف أبوه ما يطلع إلا دكتور .. عم يجي يدرس طب
ويلي محسب أن اذا أخدت شهادة طب صار شغلة عظيمة .. عم يجي يدرس طب


وكل مرة بنسأل ( ليش ما درستي طب والله أحسنليك ؟ )
وكل مرة بنخنئ من هالسؤال ......

طيب ... وانتوا ليش اخترتوا الطب ؟
وشو رايكون بزمالة الخريجين من الدول التانية (بالعمل) معهم مستقبلا ..... ؟
مع العلم أن كترة الدكاترة بتأدي إلى بطالة متزايدة يوما عن يوم ...... ليس بسبب التنظيم في سوريا ..
بل عقلية الشعب ........ أن شهادة الطب .. بتجعل من الانسان غير !



ما بعرف .. وصلت الفكرة ؟

وبرجع بعتذر للجميع . ما أصدي الإساءة ... ولكن ... أطباء سوريا ...... إلى أين ... وكم عددهم .. وما نسبة العاطلين منهم .. وما نسبة المختصين .. والجيدين ... والموهوبين ....... ؟


ومشكورين


والسلام

موضوعك حلو و بدو شغل كتير ونحن هلأ بوقت فحص فبدك تعذرينا شوي....

و الله انا ما كانت فيرقة معي : طب- صيدلة- هندسات
لذلك كان السبب الأول لدخولي الطب هو ضغط الأهل

سندريلا جوابك هو الجواب الحقيقي لطالب طب حقيقي ............
اعذرينا كليوباترا بس فعلا فوق راسنا مليون شغلة .......... اهم من انو نفكر بهاد السؤال ..............
انا رح جاوب عن حالي ..........
في ناس بالدنيا ما بترضى غير بالأفضل ........... انا بظن الطب هو أفضل مهنة إلي ...........
خصوصي انو البابا تبعي ماعندو سلسة معامل يورتني ياها
شو في احلى من الطب (مصلح بني أدميين ) وجود بالمجتمع + مصاري + خدمة للأنسانية
شو الواحد بدو أخسن من هيك !!!!!!!!!!!!!!!!!!!!!!!!!
و كل البنات بيحبوا الدكاترة .......... خصوصي طالبات الأداب ...
يعني اذا في مهنة تانية بتعطيكي كل هل الأدفانتج ....... ؟؟؟؟؟؟ ما بظن !!!!
مع الأحترام أخت كليوباترا ........ اثبت الزمن أنو فعلا الدكاترة هنن غير ......
بفض النظر عن بعض الأمثلة !!!!!
هادا الشي مو موجود من هلأ ............ هادا الشي موجود منذ غابر الزمان !!! يعني اذا بتحبي تستفيدي أكتر
جيبي كتاب تاريخ الطب سنة خامسة و قري ..............
يعني الله لا يدخلك مستشفى الهي !!!!!!!!!! بس اذا دخلتي هونيك بتشوفي أنو الدكتور هو فعلا مصلح البشر
و رح تلاقي حالك عم تلفي و تدوري حوالين هالدكاترة ..... و الجواب الحيد يلي رح يجيكي منون هو جواب سندريلا
ماني فاضي هلأ .......... عندي بشر بدي أصلحون !!!!
ومشان الشغل ......... الطب متل كل مصلحة تانية ........ شغل كتير للي بحب يشتغل .. و ما غي شعل للكسالى

السلام عليكم ..


ساندريلا والله صح معاكي حئ ؟! .. طيب اهلا وسهلا فيكِ ايمتى ما فضيتي

بيسو .. ما شاء الله عليك شو مطيع .. الله يوفقك يا رب .... على فكرة انا كمان فتت على اختصاصي بضغط من الاهل ؟!

أوميغا .. وهايدي حالة كل الطلاب , وانا كمان عندي امتحان ... لول بس عشئت المنتدى ومجتمعكون وما فيي ما فوت لهون كل كام ساعة
عراسي يا طيب الطبيب من أقدر الناس , وانا بحترم كتير الأطبا على إنون أخدوا على عاتقون رسالة الإنسانية
وصح هايدي أعلى مهنة انا معك ... لكن, انا بنتقد المجتمع, يلي بدو كلو يكون من هالمهنة
طيب ما اختلفنا .. طموح كل واحد يكون يصير طبيب .... طيب وبعدين ؟ .... رح يكونوا أطباء على حساب المهن التانية
بسوريا انتوا ما بتحسوا بهالشي وانتوا طلاب طب, لأن في تناسق بين الكليات, والأفضل (هالشي بيبين بالبكالوريا) والمميز فقط بيحصل على فرصة ليثبت نفسه بهالمهنة ....... لكن طيب انتوا شو شعوركون لما الواحد منكون بيتخرج وبنفس الوئت بيتخرجوا س من برا, وممكن ياخدوا عليه هالفرصة العمل الباقية المتبقية في مجتمعنا يلي لسه ما شغلها شي دكتور.
أنا مش بنتقدكون إلكون .. أنا بنتقد مجتمعنا يلي ببالو أن إذا درس طب بيكون صار أفضل انسان .. وبالتالي الكل بيدرسوا طب لكن هالشي رح يأدي للبطالة

طيب ... ممكن تئولولي أن نسبة يلي بيطلع يدرس برّا قليلة ..... طيب مهون المشكلة .... أن هالقليلة ما عم تدرس إلا الطب والصيدلة؟

انتوا من نفسكون, مبسوطين ان متخرجين (غيركون) يلي درسوا طب (عن غير جدارة) يزاحموكون مكانتكون الطبيعية بالمجتمع ... ؟!
رح تئلولي: شو بدنا نساوي ؟!

اما يلي انا بقترح نساويه .... هو أن نغير طريئة تفكير المجتمع .. بأن يخلوا مجال كل انسان ياخد مكانتو, الطبيب والمهندس والصيدلي ........ ويلي منفتقر إلو عنا هو العلماء, أو بالأحرى, العلماء السوريين موجودين لكن برات سوريا ... يلي لازم يصير أن لما نفهم هالقصة نحنة (الجيل الواعي) نحاول نطور الفكر الاجتماعي ونوفر الشروط المناسبة لكل انسان كفرد ..

ونشيل مفهوم ......... يا ابني انا ما بدي شوفك غير دكتور السائد عند نسبة كبيرة من هالمجتمع

(يعني أبسط مثال, جوبروا فوتوا على صف .. لك ياخي صف سادس, وتطلبوا من التلاميذ بالدور كل واحد يقول شو بدو يصير بالمستقبل؟ .. اكيد 99% رح يقلولكون اطباء (هالتجربة مجرّبة) ... طبعا مش كلهون حيصيروا دكاترة, لكن مجرد هالفكرة طالما موجودة براسون فبتخلي شلل وحياة غير طبيعية بجيلهون .. فبالتالي بكل المجتمع لأن مش بس تلاميذ الصف السادس بيفكروا هيك .

وكمان ...... وبدال ما نفكر نطلع لبرا لنأمن مستقبلنا ... نحاول نأمن مستأبل ولادنا وبالبلد مش برا ......



أنا شخصيا لسه كام سنة وراجعة وما عاد اطلع من سوريا بنوب بنوب (طاول طاول) ورح حاول بكلشي فيني إني طوّر أو فيد اقتصاد بلدي ... اذا الله راد

وعذرا إني طولت

اللي بعدو ؟!!



والسلام

بس لأني جبت مجموع الطب
والأهل وعدوا بتقديم الدعم والمساندة اللازمة إذا دخلت طب
قالوا لي حدا بجيب الطب وما بدخله!!!
فدخلت
ومشان المصاري والراتب
المرتبة الاجتماعية كويسة الحمدلله بالأصل
ما فرق معي غير قولة دكتور
أهلين دكتور وأهلين دكتور !!! (المكولكين كتار على فكرة)
وبالنسبة لزمالة شباب دارسين برا ليش لأ
أكيد الاحتكاك مفيد

سلامو

شنكولو .. عراسي والله دكتور

يبئى أليا وين رح تفتح عيادتك (والأفضل المشفى تبعك) .. بس بدك تراعينا ها

والله يفتح بوجهك بواب الرزء بالدنيا والاخرى ... وان شاء الله شوفك اشهر دكتور بحلب


طبعا عئبال كلياتكون شوفكون اشهر دكاترة بحلب وبغير حلب .. وعئبال تخرجكون ... وكلكون تكونوا متفوقين





يلي بعدو

انا صرت سنة خامسة وماخطرلي أفكر بهالسؤال ! أنو ليش دخلت طب ، مادخلت غير كلية ...

يمكن موضوع يستحق التفكير ، خصوصي قبل ما أطلع من الكلية ، لازم واحد يسأل حالو هيك سؤال ....

على كل رح فكر بالموضوع وبرجع بردلك خير ، إذا طلع معي شي

أنا بدي أسألك سؤال ؟ ليش ما أدخل طب ؟
صحيح صارو الدكاترة متل البذر ولكل شخص بلتقى دكتور بس كل المهن هيك يعنى ما أكتر من الدكاترة غير الصيادلة وما أكتر من الصيادلة غير المهندسين وكتير منن بلا شغل
ومتل ما قالو قبلي بيبقى الطبيب الو مركز اجتماعي مرموق ومحترم من قبل الشعب
وبالأخير بيبقى التوفيق من رب العالمين

السلام عليكم

الاخ فيصو - فيسو (ما بعرف شو الصحيح)

وهايدا سؤالي ... ليش بدون ما الانسان يوئف يفكر شوي ..... دغري بينقاد بحسب العادات نحو الطب
طبعا ما اصدي عليك شخصيا ... انا ما بتمنالك إلا كل الخير ... وشوفك دكتور كبير وناجح يا رب


الاخت سنو وايت عجبتني كتير طريئة تفكيريك .. عن وعي دخلتي كلية الطب .. الله يوفقك ويحميك ويحئئلك اعلى المراتب
المشكلة ... هلئ بأليك وين ........ مش بالدكاترة ولا بالصيادلة ولا بالمهندسين يلي معبيين البلد !!
المشكلة بالاختصاصات ......... ؟
يعني عنا بسوريا وبكل كل كل أسف ما عنا غير الكليات العامة .. ومافي كليات متخصصة ...
يعني كمثال .. فقط مجرد مثال خطر ببالي .......
رفقاتي هون إجوا من سوريا ليدرسوا اختصاص اسمه (نطق الصم والبكم) , واختصاصهون الادق (طب نفسي للاطفال الصم والبكم) .... يعني يا الللللللله شو محتاجين لهيك اختصاص .. لهيك جمعيات بتهتم بالصم والبكم (لاحظي الاطفال - يعني التخصص في مجال ضيّق ولكن مفيد) ... مع العلم ان هيك اطفال - او هيك ناس بشكل عام - مش قلال بسوريا وبيعانوا من نقص الاهتمام .........
وطبعا عشرااااااات .. بل مئاااااااات من الاختصاصات متل هايدي .........
فليش .. لسه سنويا بيطلعوا مئات من الطلاب من سوريا لهون ليدرسوا طب بشري ؟؟؟؟؟
طيب مو حرام .......... ؟؟؟




والسلام