السلام عليكم


حزورة ؟


أسرع وأطول ؟


ما عرفتوا ؟!!


تيب وألطف وأجنتل وأحلى شب بالكلية "عندكون" ؟





وكمان أكتر واحد بيشرب ؟؟ بيشرب بيبسي


ممممممممممممممممم ............ ؟


طيب وهي ما بتذكركون بشي ؟

أهااااااا هلئ عرفتووووووووووووه .. طبعا توربو ....... تفضل زميلنا العزيز عرف عن نفسك .. الكل ناطرين من زمان والقاعة مليانة يا عم.


المايك عندك

حبيبي توربو لا تواخذني تأخرت عليك ..... بس ما شاء الله زحمة كتيييييييييير وانت بتعرفني ما بحب ادفش ولك يا اخي ما بعرف ادفش ..
المهم هلأ عطينا ربطة خبز..
ما بعرف شو بدي اسألك... يعني ما شاء الله كل ها الصفحات ما لحقت اقراهن لذلك لا تواخذنا اذا تكرر شي سؤال بس بالاعادة افادة والتكرار بيعلم ...
خطرت ببالي هالاسئلة تسلا فيون:
شو احلى مادة درستها لهلأ وشو اسوأ مادة
شخصية معاصرة تعتبرها قدوة (بعرف اني قدوة بس مين كمان )
اللون المفضل
وبالتوفيق عزيزي
وهي وردة

احلى توربو ..............

يقول علي بن ابي طالب رضي الله عنه اعمل لدنياك كأنك تعيش ابدا واعمل لآخرتك كأنك تموت غدا

برأيك كيف الواحد بيقدر يطبق هيك مقولة بوقتنا الحالي ......وانت كشاب من هذا الزمان ( خلص خلص بطل لا تزعل )
اديش اخدة الدنيا من حياتك ....ويا ترى توربو عندو جلسات لمحاسبة النفس ....طيب شو هو الرصيد اللي ادخرتو الى يوم لا ينفع فيه لا مال ولاجاه ....وشلون بتزيد رصيدك

حسب ما فهمت انه هالشخصيات من باب الحاره...للاسف لم اشاهد هذا المسلسل

توربو صرنا شهر عم نغني بالطاحون ؟؟ بقلك أبو عصام بتقلي أبو شهاب ؟ .. أنا بلشت خربط

السلام عليكم


سؤال اليوم Free Writing


توربو يتحدث عن ماهيته فيما لا يقل عن 15 سطر


والسلام

المشاركة الأصلية بواسطة flower

كتعقيب على سؤال كليوباترا:

شو رأيك بعصرنا الحالي؟

لو خيروك تعيش بغير عصر اينه بتختار وليش؟ (ما عدا عصر باب الحارة )

سؤالك يا فلاور ذكرني بأبيات الامام الشافعي -رحمه الله- اللي كنت حاطتها بتوقيعي من زمان:

نعيب زماننا والعيب فينا****وما لزماننا عيب سوانا
ونهجوا ذا الزمان بغير ذنب****ولو نطق الزمان لنا هجانا

ما بضيف شي على هالابيات الرائعه غير انه نحن من يصنع الزمن وليس العكس....والزمن بيعكس صورة اهله.
وما بختار اعيش بغير زمن....لانه ما بتوقع يكون احسنلي ...لانه رب العالمين خلقني بهالزمن وهو ادرى بما يناسبني ولربما لو كنت بعهد الرسول لكنت مثلا مع كفار قريش ...لذلك الحمد لله على نعمته


تحياتي

عدنا

اهلا

تعقيبا على باب الحارة
شلونك انت والتلفزيون شو هي البرامج اللي بتشدك ؟والقناة والممثل(ة) والمطرب(ة) المذيع(ة)عربيا طبعا
سينمائيا انواع الافلام اللي بتحبا (اكشن ,درامي ,قصص عاطفية ))؟؟ومين هو الممثل(ة)العالمي(ة) المفضل(ة) ولماذا؟شو اسم اخر فيلم حضرانو وشو استفدت منو ؟

والله يا ايتوال مخصصاتي للتلفزيون عموما قليلة...بقعد عليه بس لما بكون زهقان وطفران من باقي وسائل تمضية وقتي.
البرامج اللي بحبها..الوثائقية بشكل اساسي..الافلام(الاجنبية حصرا)..برامج حوارية..المسابقات الثقافية بشكل اقل
قناتي الجادة المفضلة هي الجزيرة (والجزيرة الوثائقية خصوصا)
وبالنسبة للبرامج الترفيهية اكتر شي بفضل شلة الMBC
مذيعي المفضل للأخبار "جميل عازر" والمذيعة "ايمان بنوره"
ومن مقدمي البرامج بحب أحمد منصور (مقدم برنامج بلا حدود عالجزيره) بحسه من انجح المقدمين
الممثلين...متل ما قلت ما بتابع مسلسلات ذلك ما بفهم فيهم.
بالنسبة للمطربين (سبق وحكيت عنهم ) بفضل فضل شاكر بالمرتبه الاولى
المطربات...جوليا بطرس..

بالنسبة للسينما..بحب افلام الدراما والبوليسية والجرائم والاكشن والكوميدي اذا كانوا هادفين.
الممثل العالمي المفضل: Al Pacino
والممثلة: ساندرا بولوك.
لماذا؟ هيك المحبة من الله!!!
لا جد بالنسبة لآل باتشينو بعتبره من اعظم الممثلين في السينما عنده قدرات هائلة بتقمص الادوار من اكتر الادوار الناجحة اله كانت بفلم scent of a woman و "دوني براسكو"
بالنسبة لساندرا...امورة وبتنحب

آخر فلم حضرته كان مبيرحا بالليل اسمه Arlington Road بطولة Jeff Bridges
فلم رائع واحداثه غير متوقعه..بيحكي قصة بروفيسور جامعه مهووس بمتابعة الاعمال الارهابية والتحقيق فيها لدرجة بيوصله هالهوس انه يكون هو السبب في احدى العمليات الارهابية ضد الـ FBI
تعلمت منه انه ما يكون الواحد كتير غلبه متل بطل الفلم...لانه بالاخير هو كان سبب نجاح العملية

حلوة هالهواية بتعبر عن وجود حس فني راقي

شكرا

شلون اكتشفت موهبتك ؟

والله عن طريق الصدفة...اول كاميرا ديجيتال اشتريتها كانت كتير بسيطة ورخيصه وبدائية وبلشت اتعلم عليها بعدين شوي شوي تطور الموضوع معي وحسيت هالشغلة حلوه وبتسلي وصرت اهتم اكتر وانميها وأقرأ مقالات ودروس عن التصوير لحتى صرت ممكن اقول على حالي "هاوي" تصوير

وشلون بتحاول تطورها ؟

متل ما قلت بقراءة المقالات والكتب عن التصوير...وكمان الممارسة...لانها هي اساس الخبرة وبتعطي للمصور النظرة الفنية اللي بتخليه يحول اي مشهد عادي بنشوفه بالحياه اليومية لعمل فني يلفت الانظار.

ليه ما بتتخذها مهنة ؟

والله صعب اترك الطب واشتغل مصور ...بس اذا كان قصدك كوسيلة لأطلع منها مصروفي كطالب حاليا...عم بفكر بهالموضوع...خصوصا انه هواية التصوير بدها صرف كتير لحتى يصير عندك المعدات الكاملة واللازمه ومتل ما بيقولوا "التصوير درب التفليس" لانه شي بيجر وراه شي تاني
عالعموم عم بدرس موضوع كيفية تحويل هالهواية لمصدر يجيب مردود مادي.

الهواية تعبير عن الذات وتفسير للشي اللي عميدور بالداخل مثلا بالعزف بتعزف موسيقى صاخبة بوقت بتكون معصب وهادي وقت بتكون رايئ هواية التصوير كيف ممكن الواحد يعبر عن ذاتو من خلالها ؟

كمان التصوير ممكن يعبر فيه الواحد عن مشاعره...بس اهم شي بالتصوير انه يكون الواحد رايق ومركز لحتى تطلع معه افكار خلاقة..يعني صعب اصور وانا معصب او مكتئب...يعني لازم يكون في مزاج خاص
التعبير عن المشاعر بيكون بحسب موضوع التصوير...وفكرة الصوره مثلا ممكن الواحد يصور وردة دبلانه وعم تموت كتعبير عن الحزن والاسى...بينما ممكن يصور ورده مفتحه ومتألقة بألوان زاهية كتعبير عن السرور والتفاؤل...وعلى هالمنوال....

ما دام دخلنا بالفنون
رتب الفنون التالية حسب اهتمامك بها
موسيقى ,رقص ,رسم ,نحت ,تصوير ,مسرح

تصوير-موسيقى-رسم-نحت-مسرح-رقص
بظن آخر 3 فنون ما عندي فكره او اهتمام عنهم اصلا...بس لو اهتميت فيهم هيك رح يكون الترتيب

شكرا ايتوال على هالوقفة الفنية الممتعه

تحياتي

المشاركة الأصلية بواسطة BigBoss

ليش ما قالولك !!!

قال أبوصالح استقال .. ما عم يلحق على هم الولاد والعيلة ومسؤوليات الزعامة .. قام ترك ..
وحاليًا المنصب شاغر .. بقى على هالحالة .. إذا بدك تضل هيك .. من ترقية إلى ترقية .. فشكلك رح تصير جدير بهالمنصب .. سن سنانك ..



والسلام عليكم

هههههههههه والله ما عم بنسى شكل ابو صالح اليوم لما قلناله انه استقال من زعامة الـ gulf united حسيت شريط حياته مر من قدامه خلال هاللحظه

مو حرام عليك هيك تعمل بالزلمه؟؟

بس بما انه بشرني اني رح اكون خليفته وولي العهد...لازم احليكم بهالمناسبه

تحيااااتي

حبيبي توربو لا تواخذني تأخرت عليك ..... بس ما شاء الله زحمة كتيييييييييير وانت بتعرفني ما بحب ادفش ولك يا اخي ما بعرف ادفش ..
المهم هلأ عطينا ربطة خبز

دكتووووووور افندي هنا...عم بقول المقابلة كان ناقصها شي.....وهلأ كملت

خطرت ببالي هالاسئلة تسلا فيون:
شو احلى مادة درستها لهلأ وشو اسوأ مادة

أحلى مادة...الفزيولوجيا..وهي اكتر مادة تعمقت فيها
التشريح المرضي خارطه مشطي هاليومين...وعم بغوص فيها...بس خايف لا أغرق بالـ Robbins

اسوأ مادة...طبعا ما عدا المواد اللي ما الها علاقة بالطب كالنبات والحيوان والعربي...الخ
اسوأ مادة طبية كانت الكيميا الحيوية...ما كتير هضمتها الحمد لله خلصت منها

شخصية معاصرة تعتبرها قدوة

بصراحه مافي كتير شخصيات معاصرة عليها القيمة وبتستاهل تكون قدوة
بس في شخصيات بحبها من المناضلين...متل اسماعيل هنية رئيس الوزراء الفلسطيني وعمر المختار..

عالميا وعلى مستوى الابداع والنجاح (والنصب حاليا) بيل غيتس

اللون المفضل

الأخضر

شكرا على مشاركتك دكتور

وهي وردة كمان

تحياتي

:

المشاركة الأصلية بواسطة dr.nour

احلى توربو ..............

يقول علي بن ابي طالب رضي الله عنه اعمل لدنياك كأنك تعيش ابدا واعمل لآخرتك كأنك تموت غدا

برأيك كيف الواحد بيقدر يطبق هيك مقولة بوقتنا الحالي ......وانت كشاب من هذا الزمان ( خلص خلص بطل لا تزعل )
اديش اخدة الدنيا من حياتك ....ويا ترى توربو عندو جلسات لمحاسبة النفس ....طيب شو هو الرصيد اللي ادخرتو الى يوم لا ينفع فيه لا مال ولاجاه ....وشلون بتزيد رصيدك

احلى نور

هالمقولة كتير بحبها.....

بحاول اذكر فيها اللي حوالي دائما

للاسف هالايام الناس عم يطبقوا نصفها ويتركوا النص الآخر...
يعني اما انهم يعملوا للدنيا كأنهم سيعيشون للأبد....وينسوا انه في موت وآخره وحساب
او العكس انه يترك الدنيا واللي فيها ويعيش بصومعة لحاله
طبعا الحاله الاولى اكتر واوضح بمجتمعاتنا
يعني عم نشوف هالناس راكضين ورا هالدنيا...وما بيشبعوا منها والانانية والطمع بيعمي عيونهم وبالاخير ما بيطلعوا منها بشي

انا كشاب (او بطل ) من هذا الزمن...بحاول اوفق بين الامرين...
بس بصراحه بشوف حالي مقصر كتير بما يخص عملي للآخره..وبتمنى اني اصير افضل من هالناحية
بالنسبة لمحاسبة النفس...بحاسب نفسي بس مرات بزودها شوي وبصير احسب كل صغيرة وكبيرة صارت معي واتوهم شغلات كمان...وبتكون هي اصعب اللحظات بالنسبة الي

في كتير شغلات ممكن الواحد يعملها مشان يزيد رصيده...الحمد لله باب الخير واسع
بيكفي قوله "وتبسمك بوجه أخيك صدقة" بحاول دائما اكسب حسنات من ورا هالشغلة


تحياتي لك

المشاركة الأصلية بواسطة Kliopatra

توربو صرنا شهر عم نغني بالطاحون ؟؟ بقلك أبو عصام بتقلي أبو شهاب ؟ .. أنا بلشت خربط

وانا كمان بلشت خربط