السلام عليكم..
أول شي .. ياريت تشارك عزيزي القارئ في الاستفتاء.. حتى نعرف مدى انتشار النخر بين شريحتنا الاجتماعية (طلاب الطب)
تاني شي.. أنا رأيت إنو أنزل موضوع عام شوي وما يكون تخصصي من شان زملائنا من الطب البشري والصيدلة يشاركونا بآرائهم .
أظن أن هذا الموضوع. أو بالأحرى عنوان هذا الموضوع.. يذكركم بطبيب الأسنان .. ومعجون وفرشاية الأسنان.. لكن قد يذكركم بما تحوي أفواهكم..
أخي القارئ.. هل تعلم أن كثير من النخور السنية والتي قد تكون متقدمة وقريبة من اللب.. يمكن ألا يشعر بها المريض؟؟ وأنها لا تكشف إلا شعاعياً ويمكن سريرياً تحت الفحص الدقيق؟؟
في بعض الأفواه.. وبسبب نقاط التماس بين السنية الواسعة (أو سطوح التماس ) قد لا يظهر النخر إذا ما نظر أحدنا لسن ما في فمه على المرآة!!
لنبدأ أولاً .. بتعريف نخر الأسنان: هو خسف في الأملاح المعدنية, يليه غزو جرثومي للنسج السنية المينائية ثم العاجية..
وهذا الفعل له عدة نظريات.. فمنهم من يقول أن المواد المعدنية تخسف أولاً ثم المواد العضوية, ومنهما من يقول أنهما يخسفان معاً, ومنهم من يقول أن المواد العضوية تنحل أولاً ويعد الرأي الأول هو الأقوى.
ما هي الأماكن الأكثر شيوعاً لحدوث نخر الأسنان:
إن السن مؤلف من نوعين من السطوح المينائية :سطوح ملساء وسطوح بها ميازيب..
كيف سيحدث النخر.. يحتاج لتراكم لويحة سنية لفترة معينة (عادة تبدأ بالعمل على النخر بعد 20 دقيقة من تراكمها تصوروا!)
فالشقوق والوهاد التي توجد على السطح الإطباقي للسن وخاصة إذا كانت عميقة هي المكان الأول للنخور.
السطوح الملساء تصاب عادة في المناطق بين السنية وهي شائعة ولهذا علينا استخدام أدوات التنظيف بين السنية وأهمها الخيوط بين السنية
نخور الملاط: الملاط يكون بالحالة الطبيعية مغطى باللثة والنسج الداعمة وغير مكشوف وبالتالي هو غير معرض للنخر.. لكن وفي حالات التهاب النسج الداعمة وانكشاف الجذور يصبح عرضة للنخر ويعد نقطة ضعف كبير لأنه رقيق وأقل تكلساً بكثير من الميناء وبالتالي فإن النخر سيصل بشكل سريع إلى العاج.
وطبعاً من أنواع النخور: النخور الاجتياحية التي يكون لها سبب مثل طبيعة اللعاب أو مرض ما أو تعرض للأشعة.

التشخيص:
كيف تشخص أنت بنفسك: هذه أنت لطلاب الطب (يعني المريض إذا ما كان بوعي كافي صعب يكشف النخر إذا ما كان عم يتألم).. ممكن إنو واحد يشخص لحالو مثلاً سن عم يلمع عليه وعليه شي أسود, صورة بانورامية للأسنان وملاحظة الظلالية الشعاعية.. بس المرضى العاديين.. لا يمكن إنو يميزو غير وقت إللي بيصير في ألم.
كأطباء أسنان:
عيانياً: تغير لوني في الميناء إلى لون بني إلى أسود
بالسبر: وذلك بضغط المسبر على المنطقة المفحوصة والإحساس بالتلين العاجي الحاصل
شعاعياً يستخدم في اكتشاف النخور الملاصقة باستخدام الصور المجنحة التي يمكن أن نفحص بها الأسنان العلوية والأسنان السفلية بنفس الوقت.
حمض أحمر الفوكسين الذي يلون العاج النخر باللون الأحمر
العلاج:
يعني علاج النخر.. واضح تحضير السن وعنا بالكلية حسب مبادئ بلاك... وحتى بالكومبوزيت..
بعد تحضير السن (تحضير طبعاً تمثل تجريف النخر, ثم تهيئة شكل للحفرة يعتمد بشكل كبير على المادة المرممة)..
اما ترميم السن: في الأسنان الأمامية لابد من استخدام مادة تجميلية وهي إما من الكومبوزيت أو الغلاس أينومير.
أما الأسنان الخلفية: فيمكن ترميمها بالأملغم أو بالمواد التجميلية ... وطبعاً كلنا ما مننسى الخلاف الكبير اللي صار بين الأعضاء حول هاتين المادتين الأملغم والكومبوزيت في موضوع أملغم أم كومبيوزيت..
في نهاية هذا الموضوع. .. أقول.. أنصح كل الشباب الذين قرأوا هذا الموضع حتى ولو شايفين إنو ما عندن نخور... أن يعملوا صورة بانورامية للفكين.. بأي مكان.. ما عم أعمل دعاية لحدا .. وأنا عم أحكي هالكلام من تجربة شخصية .. لأني أنا من الصورة البانورامية عرفت إنو عندي 3 نخور ما كنت حاسس علين أبداً وأخي كمان.. عرف إنو عندة 3 أسنان منطمرة (ضاحكين ورحى) وسن منخور ونخر كبيركمان ما كان بيعرف عنن شي أبداً .. وأنا برأيي الصورة البانورامية ضرورة لكل فرد .. وعلى الأقل ضرورية إلكن يا طلاب الطب..
وهلأ أنا خلص موضوعي ... وانتظروا الموضوع الجاية إللي رح يكون بإذن الله عن المواد التجميلية المستخدمة في ترميم الأسنان......................... شكراً لمروركم وتصويتكم..

السلام عليكم

سوري شاركت بالتصويت قبل ما اقرا هالجملة :

حتى نعرف مدى انتشار النخر بين شريحتنا الاجتماعية (طلاب الطب)

أنا عندي سن واحد فيو نخر متوقف يمكن ؟! .. بتشخيص الدكتورة زوربا !!

الله يعطيك العافية الموضوع شيّق .. ولنشوف سنان هالطلاب


والسلام

اذا من ناحية الشنان الكويسة...فالحمد لله.. شناني ممتاجة...ومافي منها..وكل شنة بعلملهن شيانة...
والدكتور قللي..انو اجا بقيت على هالحالة... كام شنة تانية... مابيلجمني لا شورة بانورامية ولا حتى شي تي...

على كل... شناني الحمد لله..بعمللهن تشييك كل 8 اشهر..وكلو تمام..واجا في شي.. بحط حشوة...

ميرشي...

والدكتور قللي..انو اجا بقيت على هالحالة... كام شنة تانية... مابيلجمني لا شورة بانورامية ولا حتى شي تي...

والله يا معلمي... أنا ضد كل دكتور بيقوا هالجملة... الصورة البانورامية ضرورية جداً جداً.. ولازم بكل فايل مريض يكون في صورة .. مهما كان وضعو... لأني متل ما بتعرف (ولافال عنك) ممكن تكشف شي تاني غير النخور.. آفات معينة أو أكياس أو تشكلات ورمية يعني. أسنان منطمرة.. شو رأيك؟؟ وممكن بكتير من الحالات فوق ما تتصور يكون المريض ما هو حاسس.. ومنقول نحنا عنو (كشف بالصدفة)..
كليوباترا... قصدي الطلاب بشكل عام.. ولو إنت على راسنا.. وإنت أول وحدة بتصوتي ..

انا ساويت بزماني صورة بانورامية .. يعني من شي خمس سنين... مشان اضراس العقل..وشلتن من هديك الايام....وصرت بلا عقل..

بس دايما بساوي فحص دوري للاسنان عند دكتوري.. والحمد لله.. كلو تمام... واذا في شي.. بيساويه..

يعني قولتك.. انو هاد مابيكفي.. ولازم ساوي صورة؟

إيه .. أنا رأيي.. لازم يصير شي روتيني.. يعني كل سنة .. مثلاً..

انا صوتت على نخر واحد بس كان عندي 2 بس عالجلي ياهون اخي ...واذا هيك بيكون صاروا تلاتة ...
نائل اذا كان عندك عقل وراح انا ضراس العقل ما هن موجودين عندي لهلق يمكن بشي صورة بانوراما يطلعوا متخبايين بس يصير عندي عقل بيطلعوا او ما بعرف يمكن بس يفكروا انون يطلعوا بيجيني العقل . ..
على فكرة مرة قريت موضوع ما عدت اذكر وين انو هدول ضراس العقل(طبعا ما ألهون علاقة بالعقل بس يمكن اسمهون هيك لأنون غالبا بيطلعوا بال18وما بعد يعني الواحد بيكون عقل شوي)مثال على التطور والتأقلم يعني تكيف الانسان مع الحياة الجديدة وظروفها والحكاية انو اجدادنا قبل ما يكتشفوا النار كانو ياكلوا لحمة نيئة كتير وهي بمعلومكم بدها طحن كتير وبهيك كان بيلزمون كتير وجود هدول الضراس وبعد النار ما عاد طحن الطعام او اللحمة بدو كل هي الطواحين فقل استخدامهون ومتل ما بتعرفوا اذا شي قل استخدامو بيضمر(متل العضلات مثلا)وبهيك ومع تقدم الزمن صاروا يضمروا شوي شوي وتوتة توتة ما خلصت الحتوتة لأني رح ابحث عنها واحاول انزلها هون او اذا جاهزة عند حدا منكم يتحفنا فيها وينزلها ويوفر علي شوية عذاب واكون له من الشاكرين وشكرا الكم جميعا
سلام... .

يسلموا دياتك صادقلي..
لفتة مهمة، وفكرة التصويت حلوة كتير..

المشاركة الأصلية بواسطة Mr.sad

نائل اذا كان عندك عقل وراح انا ضراس العقل ما هن موجودين عندي لهلق يمكن بشي صورة بانوراما يطلعوا متخبايين بس يصير عندي عقل بيطلعوا او ما بعرف يمكن بس يفكروا انون يطلعوا بيجيني العقل . ..
على فكرة مرة قريت موضوع ما عدت اذكر وين انو هدول ضراس العقل(طبعا ما ألهون علاقة بالعقل بس يمكن اسمهون هيك لأنون غالبا بيطلعوا بال18وما بعد يعني الواحد بيكون عقل شوي)مثال على التطور والتأقلم يعني تكيف الانسان مع الحياة الجديدة وظروفها والحكاية انو اجدادنا قبل ما يكتشفوا النار كانو ياكلوا لحمة نيئة كتير وهي بمعلومكم بدها طحن كتير وبهيك كان بيلزمون كتير وجود هدول الضراس وبعد النار ما عاد طحن الطعام او اللحمة بدو كل هي الطواحين فقل استخدامهون ومتل ما بتعرفوا اذا شي قل استخدامو بيضمر(متل العضلات مثلا)وبهيك ومع تقدم الزمن صاروا يضمروا شوي شوي وتوتة توتة ما خلصت الحتوتة لأني رح ابحث عنها واحاول انزلها هون او اذا جاهزة عند حدا منكم يتحفنا فيها وينزلها ويوفر علي شوية عذاب واكون له من الشاكرين وشكرا الكم جميعا
سلام... .

إذا ما عندك أضراس عقل فعلاً فلازم تصور صورة بانورامية مشان تكشف وضعها وهل هي موجودة لكن منطمرة أو مهاجرة إلى غير مكانها، أم أنها فعلاً غير موجودة، لأن الدراسات الحديثة كشفت أن الكثير من الناس لديهم غياب كامل للأرحاء الثالثة ( أضراس العقل )، واعتبروا هذا كما قلت أنه مترافق مع الزمن وصغر أفواه الناس مع الزمن، إضافة إلى تغير الأطعمة الحديثة وطبيعتها عن العصور السابقة.. أما عن اسم ( ضرس العقل Wisdom Tooth ) فهو طبعاً لا علاقة له بالعقل واكتماله، إنما سمِّيت بهذا الاسم بسبب بزوغها المتأخر في آخر مرحلة المراهقة ونضج العقل..

ودمتم ودامت أسنانكم بخير..

je te remerci infiniment