بسم الله الرحمن الرحيم والسلام عليكم ورحمة الله وبركاته
ان شاء الله من خلال هل الموضوع رح بحاول أعرض آخر التغييرات المتعلقه بالاختصاص بالمملكه المتحده مع عرض سريع لمتطلبات ومتغيرات الامتحانات البريطانيه ........
هدفي من هل الشي هو تكوين صوره اقرب ماتكون للواقع بحيث اي طالب عبفكر بالاختصاص في هذه البلاد يعرف شو يتوقع وشو يحضر ......
رح بكون سعيد جدا للاجابه على تساؤلاتكوم سواء من خلال تجربتي ومن خلال تجارب الشباب اللي عبختصوا في هل البلد ومن خلال الجهات المعنيه اذا كان بطلب الامر .
اللي دفعني افتح هل الموضوع هو حجم الصدمه اللي عانيناها نحن شباب كلية طب حلب واللي كانت ناجمه عن جهل شديد بطبيعة النظام الصحي والتعليمي في بريطانيا على الرغم من اني قضيت حوالي خمسة أشهر في ستاجات في المشافي البريطانيه قبل التخرج .
بادئ ذي بدء خلوني اعرضلكون احصائيه صغيره كتير وبضم الاطباء اللي تخرجوا من جامعة حلب خلال العامين 2003 و 2004 (يعني اللي هنن مجايله معكون) واللي طبعا قصدوا بلاد الانجلو السكسون لمتابعة التحصيل الطبي:
عدد الطلاب اللي تقدموا الى امتحان البلاب بجزئه الاول (14)
حالات الرسوب في البلاب (1) : (2)
عدد الطلاب الذين تقدموا للبلاب (2) : (10)
حالات الرسوب في البلاب (2) : (2)
(طبعا من البديهي القول اني اللي رسبوا بالبلاب 2 غير اللي رسبوا بالبلاب 1)
عدد الذين استطاعول الحصول على عقود عمل حتى تاريخ كنابة هذا الموضوع : (3)
القترة اللازمة للحصول على عقد عمل : في حالتين من اصل الحالات الثلاثه كانت منوسط الفتره 6 اشهر , في الحاله الثالثه (واسطه) كانت الفتره اقل من ذلك
طبعا تقصدت عدم الحديث عن فحص Ielts لاني في الحقيقه وجدت اني هل الموضوع قد اوفي حقه في عدة مواضيع على كل انا مستعد للاجابه عن اية تساؤلات
طبعا العبد الفقير لله كاتب هذه السطور لم يستطع تامين عقد عمل حتى تاريخه بس رجائي بالله كبير .....
وللحديث تتمه...............]

بارك الله فيك أخ بكري...
بس ما نكون عم ناخد من وقتك ونلهيك....
بس ثوابك عند الله كبير...

المهم.. يمكن سؤالي بكير عليه شوي... بس خليه ببالك لو سمحت وهو: هل طلعة الستاج كتير كتير ضرورية للشخص اللي ناوي يكمل بيريطانيا ...لانو في عالم هيك بيقولوا انو كتير كتير ضرورية وعالم تانية بتقول ما بتأثر كتير..

يعني المهم انت ياريت تفيدنا من خبرتك بهالمجال... والف شكر سلفا

المشاركة الأصلية بواسطة Optimisto

بس ما نكون عم ناخد من وقتك ونلهيك....

هو بصراحه انا حاليا فاضي ماوراي شي يعني كل اللي عبساويه اني ببعت application forms مشان الشغل وعبساوي بحث حول الوفيات في الجراحه القلبيه يعني بنزل على المشفى كم ساعه وبرجع وهادا الشي اللي خلاني أتشجع وأفتح هل الموضوع الا الفكره كانت عبتخطرلي من فتره

المشاركة الأصلية بواسطة Optimisto

المهم.. يمكن سؤالي بكير عليه شوي... بس خليه ببالك لو سمحت وهو: هل طلعة الستاج كتير كتير ضرورية للشخص اللي ناوي يكمل بيريطانيا ...لانو في عالم هيك بيقولوا انو كتير كتير ضرورية وعالم تانية بتقول ما بتأثر كتير..

يعني المهم انت ياريت تفيدنا من خبرتك بهالمجال... والف شكر سلفا

والله موضوع الستاج موضوع كتير مهم وبصراحه كان غايب عن بالي , هو يعني حقيقة الامر انو الستاج مارح يفيدك بإيجاد شغل بسرعه او يزيد فرصك بالحصول على عقود افضل (وهي احدى الاكاذيب حول الستاجات) ولكن اذا بتعرف شلون تستغل الستاج مزبوط ..... فالستاج ممكن يكون جدا جدا مفيد :
1 – حاول ننعرف على أكبر عدد من consultants والافضل يكون عرب او مسلمين اذا كنت مسلم او مسيحيين اذا انت مسيحي (ياجماعه مابتصدقوا شقد الواسطه بتلعب دور مهم بإيجاد فرص عمل بهل البلد)
2 – خلال الستاج حاول تتعلم من طلاب الطب ومن الدكاتره Junior يعني أهم نقطه تفهم النظام هون شلون بشتغلوا شلون بتعاملوه مع بعضون شلون بتعاملوه مع المرضى شلون بدرسوا حاول تظهر حالك شغيل يعني اذا قالولك بتحب تساوي presentation قلون انا اللي بحب واذا ما قالولك روح وقلون انا حابب ساوي presentation
3 – حول تفهم نظام البلد , برامج التلفزيون , المحلات , يعني عرف شلون هل الناس عايشه ......
المحصله اللي لازم تطلع منها من الستاج هي
انطباع جيد عنك لدى المشرف تبعك , قائمة اسماء لـ consultants يمكن ان يعتمد عليهون لما تطلع بعد التخرج
معرفه جيده للبلد والنظام الصحي

ومن خلال تجربتي الشخصيه ومقارنتها مع الشباب اللي ذكرتون في احصائيتي (8 اللي نجحوا البلاب 2) لاحظت اني اللي مساوي ستاج بزمناتوه بتعزب أقل من يللي مو مساوي (بس الكل عبتعذب) ......
البديل الوحيد اللي اذا توفر بقلك اني مافي داعي للستاج هو اذا عندك واسطه بهل البلد والا فبنصحك تطلع تساويلك شهرين بس خلي النقط اللي ذكرتون ببالك والاهم تتعرف على Consultants

وللحدبث تتمه ..... ان شاء الله

التمكن من موادك _اذا بتسمي اللي عم ناخده مواد_
مهم لانها اساس الفحص لكن بعدين ماراح تفيدنا لانها بدها تصحيح
اما بالنسبة للاوكسفورد فانا بتصور انه كتير مهم لاني سمعت عنه من كتير طلاب هون او برا
و بيساعد جوا المشفى كتير خصوصا اذا مافي حدا جنبك يشرحلك
و كومار مابيختلف عن منهاجنا من حيث الكمية بالعكس اقل منه و منظم و ملحق فيه صور و جداول
وشامل لكل الداخلية وحتى جزء من الجلدية و الطب النفسي و التغذية و كيفية التعامل مع المرضى(الاداب الطبية)
و فيه كتاب تاني اسمه ديفدسون رائع وملحق فيه باول صفحة من كل قسم طريقة الفحص السريري لهذا الجهاز سواء عصبي او قلبي او تنفسي_شو رايك فيه د.بكري؟
فمن شان هيك ماكتير عم تختلف المعلومات اللي عم تندرس لانه حفظه متل حفظ العربي اللهم اختلاف اللغة
و انت اذا لغتك قوية فماراح تلاقي صعوبة
اما اللي لغته موزيادة فلازم يبلش يقرا فيه لانه اسلوبه بسيط و بيحتاج شوية تدريب على المصطلحات لا اكتر
و بتمنى حدا يقللنا على كتب خاصة بالمصطلحات الطبية متل كتاب شابنر اذا حدا سامع فيه
عموما لما الواحد بيدرس المحاضرة و بعدها بيقرا كومار او ديفدسون او اوكسفود بيساعده لتدريب لغته
لانه على الاقل هي الكتب اللي معتمدة في الخارج على حد علمي
و يعطيك العافية على هالمساهمة د.بكري

يعني هل برأيك أخ بكري . انو الواحد يردس الoxford بالخامسة ويدرس للتخرج من kumar مثلاً ولا كافي انو نحضر للبلاب 1 من الoxford بعد التخرج ؟؟؟؟؟وانا سؤالي مو كسل لانو انا معك تماما أن الكتب شابقة الذكر هي كتب قيمة جدا ودراستها متعة كبيرة , بس حابب أعرف الحد الأدنى المطلوب.

وبالنسبة لمستواي باللغة فأنا ياأخي العزيز وصلت للمستوى التامن من أصل 9 مستويات لدورات التقوية في معهد أرض اللغات (يعني خلصت السابع وقفت عند التامن ) فهل برأيك هدا كافي لحتى بلش دراسة الايلتز , وعلى فكرة انا بصدد ادخل دورة لغة طبية بهالصيف لتسهيل الدراسة من المراجع , شو رأيك ؟؟؟؟
وبالنسبة لل listening&speaking فأنا عم اشتغل عليهم من زمان .

وبالنسبة لموضوع الدورة الافرادية , فأنا سمعت انو تكلفتها بحدود 10,000 ليرة سورية , فهل المبلغ صحيح ؟؟

وشكراً جزيلاً سلفاً وانشالله بتلاقي أحسن شغل بأسرع وقت (قولو ياجماعة المنتدى...... آمين ....)

Plab 1

بسم الله الرحمن الرحيم
بالنسبه للخطوه الاهم في مرحلتكون من بعد الـ Ielts هو البلاب
بشكل عام البلاب فحص سهل وبصراحه اني المشكله الوحيده اللي ممكن يتوقف عليها نجاحك من بعد توفيق الله هي سرعتك في حل الاسئله .
طبعا الفحص هو عباره عن 200 سؤال : 140 سؤال Matching واللي ماعندو خبرا بهل الاسئله فأنا مؤمن اني هي أصعب من الـ 60 سؤال من نموذج الخيارات المتعدده (رغم كل الجدل حول هل الموضوع) .... بس برجع بقول إني الفحص بشكل عام سهل .
حالتين الرسوب اللي ذكرتون بالاحصائيه سابقة الذكر كانوا بسبب :
1 – عدم القدره على حل الاسئله ضمن الوقت المحدد واللي هو 3 ساعات ز
2 – 3 أشهر فقط لتحضير البلاب 1 (للأسف يبدو اني هذه الفتره لم تكن كافيه رغم اني الطالب كان يعد من الطلاب المتميزين يعني دريس) .

فإذا طريقة التحضير للبلاب 1 :
اذا كنت سنه تالته او رابعه فرجاء هادا هو الوقت المناسب لحتى تفتح كتاب طب انكليزي وتقرا منو مو مهم شو هو الكتاب مو مهم شو هو الموضوع المهم انك في السنه الخامسه لما تفتح كتاب انكليزي وتقرا منو ماتحتاج تدور على معنى كلمه هون وكلمه هنيك كل ماتقرالك سطرين يعني
Be familiar with the medical English
طلاب السنه الخامسه : الحد الادنى انك تغطي مواد السنه الخامسه (الداخلييتين 3 – 4) بالاضافه لداخليه 2 من Oxford (قرأه فقط) ومن ذاد على ذلك من Kumar or Davidson فخير يفعل .
أما أعزائي طلاب السنه السادسه (فألف مبروك على الترفق) وياحبايبي بس ماخلصتوا معسكر الانتاجي بليز فتحوا Kumar or Davidson وبلشوا وعلى مهلكون ادامكون سنه كامله (وبكفي قراه متمعنه بدون حفظ)
اللي لازم نحفظوه خلال هل السنه هو الـ Oxford ولاتنسوا اني هنن اتنين ازرق واصفر وأقول الازرق اولا لاني الكل بنساه للاخير وبعدين مابلحقوه .
(طبعا هادا هو الحد الادني للتحضير بالنسبه الي مازدت عن ذلك سوى كتابين :
Lecture notes : general surgery
High yield : Psychiatry
ولا تنسوا تركزوا على الطب النفسي لاني بدوتي والدوره الي قبلها كانوا كتير كتير حابين النفسي .

أما مفتاح النجاح في هذا الفحص فهو والله اعلم ومن بعد توفيق الله : حل أكبر عدد ممكن من النماذج والاسئله (أنا بالنسبه الي فالله يعطيني العافيه وكذلك مضر وانطوان) كتبنا 150 من اصل 200 سؤال (بس المشكله مابعرف وين صاروا بس اسألوا الا تندلوا عليهون وطلبوا من الشباب اللي رح يقدموا قريبا اني يكتبوا اسئلتهون لاني بنك الامنحان مو كتير كبير فكتير ممكن اني الاسئله تتكرر (متل ما سمعنا اني البنك فيوا حوالي 2000 سؤال والله اعلم ولكن طبعا في زياده مستمره)

بالنسبه لكتب الاسئله فهي كتيره وأبسط طريقه للحصول على المجموعة كاملة بطلع شي أبضاي منكون لعند مكتبة غسان بجيب اش في كتب اسئله وبرجع)
بس انتبهوا من شغله وحده اني كتير من الكتب هنديه وكتير من كتب الهنود فيها أخطاء فانتبهوا (وبصراحه أنا ما بنصح بالكتب الكبيره الي فيها 2000 او 3000 سؤال وبكون مؤليفنهها هنود)
وفي موقع اسموه onexamination.com كتير كتير كتير مفيد واسئلته كتير معقوله بس مشكلتوه انو بدوا اشتراك (حاولوا تتشاركوا عليها اكتر من واحد) .

بالنسبه للتكتيك يوم الفحص :
حل بسرعه وبدقه حاول ما تترك اسئله غير محلوله اذا رح تضيع وقت كتير على سؤال معلش تركوه او حلوا شلون من كان (على الاغلب مارح تحسن ترجع تراجعوه؟؟؟؟؟)

الخلاصه :
أبدا بالتحضير باكرا ما أمكنك
جميع الكتب المذكوره للقرأه فقط عدااااااااااا Oxford (the BLUE and yellow) فابصموهن بصما .
حلوا أكبر عدد ممكن من الاسئله
تدرب انك تحل بسرعه وتفهم السؤال بشكل جيد (اثناء تحضيري انا وصديقي مضر كان متوسط الوقت اللي نحل فيه 200 سؤال حوالي ساعتين الى ساعتين وربع) ملاحظه : يوم الفحص لاانا ولا مضر لحقنا نراجع الاجوبه اما الشب التالت اللي كان معنا فما لحق آخر 25 سؤال ؟؟؟؟؟؟!!!!!!!!!!!!!!!!!!!
وللحديث تتمه...................

المشاركة الأصلية بواسطة الرجل الحديدي

وبالنسبة لمستواي باللغة فأنا ياأخي العزيز وصلت للمستوى التامن من أصل 9 مستويات لدورات التقوية في معهد أرض اللغات (يعني خلصت السابع وقفت عند التامن ) فهل برأيك هدا كافي لحتى بلش دراسة الايلتز , وعلى فكرة انا بصدد ادخل دورة لغة طبية بهالصيف لتسهيل الدراسة من المراجع , شو رأيك ؟؟؟؟
وبالنسبة لل listening&speaking فأنا عم اشتغل عليهم من زمان .)

والله أعلم يا رجل الحديدي تستطيع ان تبدا بالتحضير للـ Ielts ما بعرف اذا انت هلا نجحت على الخامسه فخلي هدفك تقدم الـ ielts مع بدايه السادس يعني اذا الله لا يقدر ومامشي الحال من أول مره يكون عندك وقت كافي ويبدو هي الطريقه الانجع في تدبير امر الـ Ielts
بالنسبه للدوره الفرديه فأنا دفعت 9000 نفس سعر دوره British council فما مابعرف اذا صارت أغلى بس ممكن اسألك انت شو توقعاتك من الدوره يعني شو متوقع اني الدوره رح تفيدك بناء على هل الاجابه لازم تقرر وين تساوي الدوره .
وبالتوفيق ان شا الله

الله يخليك يا بكري..
ويوفقك ..
ويعطيك بكل خطوة سلامة.. وتوفيق.. وعلامة كمان..

والله يخليك للشعب هون..
وحياتك نحنا ناس كادحين.. ومساكين..
ويعني لولا دعم أمثالك من الطيبين الطاهرين المنتجبين.. كنا تشرذمنا..
فالله يخليك..
يا بكري..
الله يخليك
يا بكري
الله يخليك
يا بكري

ياسيدي انا وعلى حد علمي انو دورات الايلتز بالقنصلية أربع مستويات وكل مستوى بيكلف بحدود ال10000 متل .
فاذا اضطر الواحد انو يحط الأربع مستويات فمعناها رح تكلفه الشغلة تقريباً 40,000 .أما الدورة الفردية فعلى حد علمي كمان انو الآنسه بتستلمك لحتى تصير قادر على تقديم فحص الايلتز , وبس مقابل 9,000 فهل كلامي مزبوط ؟؟؟؟؟
فاذا كان كلامي مزبوط فالدورة الافرادية برأيي أحسن لانو أوفر , ومداها طويل ..............؟؟؟؟شورأيك أخ بكري .

المشاركة الأصلية بواسطة الرجل الحديدي

ياسيدي انا وعلى حد علمي انو دورات الايلتز بالقنصلية أربع مستويات وكل مستوى بيكلف بحدود ال10000 متل .
فاذا اضطر الواحد انو يحط الأربع مستويات فمعناها رح تكلفه الشغلة تقريباً 40,000 .أما الدورة الفردية فعلى حد علمي كمان انو الآنسه بتستلمك لحتى تصير قادر على تقديم فحص الايلتز , وبس مقابل 9,000 فهل كلامي مزبوط ؟؟؟؟؟
فاذا كان كلامي مزبوط فالدورة الافرادية برأيي أحسن لانو أوفر , ومداها طويل ..............؟؟؟؟شورأيك أخ بكري .

والله هي اول مره بسمع منك انو في اربع مستويات للـ Ielts في british council على كل على هي الحاله يبدو الدوره الخاصه افضل بس متل ما قلتلك الدوره الخاصه لازم تتعب على حالك أكتر وتعرف تماما شو هي الجوانب اللي بحاجه تحسنها وشد همتك ورح تشوفها في البدايه شوي صعبه وخصوصي شغلة الحكي مع انوا نحن شعب كرار بس يمكن تلاحظ اني مخيلتك رح تخلو من اي افكار لما ينقلك احكي دقيقتين عن الموضوع المعلاق التالي
على كل التدريب والتدريب والتدريب عليك باكبر قدر ممكن من التمارين والنماذج ورح تشوف حالك كتير عببتحسن بس لما بتلتزم بالتدريب .....
وموفق

To be continue

يمكن معظمكون ماكتير مهتم بتفاصيل كتيره عن هذا الفحص بما انو بعيد شو عنكون لذا سأوجز ما استطعت الى ذلك سبيلا

بلاب 2 هو اول فحص مهني طبي حقيقي ممكن تتعرضوله وفي الحقيقه هو الفحص الاول بحياتنا كطلاب سوريين مابيعتمد على بصمنا للامور (مع انو فيو شوية بصم)
الفحص عباره عن 16 محطه (واحده من المحطات غير محسوبه بالعلامه بس مارح يخبروك اي محطه غير محسوبه يعني رح تبقى سر حتى بعد ماتطلع العلامه وواحده عباره عن استراحه وبالتالي في 14 علامه)
علامة المحطه الوحده هي من A to E لحتى تنجح في الفحص لازم تجيب على الاقل 10 علامات c ومافوق ولازم مايتجاوزا عدد E الواحده
يعني بالمفصل اذا جبت 10 A و2 B و 2 E بترسب
بينما 10 C و 3 D و 1 E بتنجح

الفحص بتم على الشكل التالي :
بتوقف امام المحطه الاولى معك دقيقه لحتى تقرأ السؤال – بيدق الجرس - بتبلش الخمس دقايق اللي لازم تنفذ فيون المهمه بيعد اربع دقايق ونص بيعطوك تنبيه اني بيقي نص دقيقه - بدق الجرس معلنا نهاية الخمس دقايق – لازم تتحرك من الغرفه نحو الغرفه المجاوره توقف على الباب تقرا السؤال وتنتظر ليرن الجرس كل هاد خلال دقيقه – برن الجرس – وهكذا

هلق شو ممكن تنسأل :
كل شي ..... ممكن يسألوك عن أي شي .... رح يكون في ممثلين حفظانين دورون ومتفاعلين مع الموقف يعني اذا قلتهون خبر سيء ممكن يبكوا واذا ماشرحت العمليه بشكل جيد ممكن يرفضوا اجرائها وهيك شغلات
ممكن يطلبوا منك تاخد دم واحيانا دك شرياني (بس هون بستخدموا دمى)
الاكيد انو في محطتين موجودات دائما واللي هنن قياس الضغط وال CPR
ممكن يقلولك دخل خبر المريض انو عندو سرطان رئه
ممكن يقلولك اني مريضه عندها حمل هاجر ومجحشه الا بدها تروح على البيت دخل واقنعها تضل
ممكن يسالوك تحط قطبتين (على لعبه طبعا)
ممكن يطلبوا اجراء مس شرجي او مهبلي او اجراء لطاخه مهبليه (على لعب طبعا!!!!!)
ممكن يطلبوا اجراء فحص للثدي (على ذكر طبعا !!!!!!!!!)
ممكن يطلبوا اجراء اي فحص من الفحوص جهاز الدوران او التنفس او العصبي او الحركي او الحسي او فحص العين او الاذن او الركبه او الورك او الظهر او الرقبه او الدرق .......
طبعا كل محطه بجي فحص جهاز واحد (وهون صواب الوقت لاني معظم هل الفحوص مابتخلص خلال الوقت المطلوب 5 دقايق)
ممكن يقولوا مريض بدوا يساوي عمليه الفلانيه لازم تشرحلوا على العمليه وتخليها يوقع على التعهد
ممكن يقلوا ..... قوس حالك وخلاص من هل العيشه ..... ممكن

طيب ممكن حدا يرسب بهل الفحص ..... ممكن جدا (راجعوا الاحصائيه باول الموضوع)

منين الواحد بدرس لهل الفحص ؟
يعني والله أعلم بدون دوره ما ممكن تعدي هل الفحص لاني الدوره بالعاده رح تحطك بالجو وتخليك تفهم شو القصه
هلق في كتير خيارات بالنسبه للدورات فالنصيحه انكون تسالوا أخر واحد قدم قبلكون وين احسن دورا
الدورات بختلفوا بالسعر والمده بس بشكل عام المده اقل من اسبوع او اسبوع والسعر بتفاوت حسب عدد الطلاب في الصف والسكن بس يعني بدك تحط ببالك على الاقل 200 لـ 250 جنيه استرليني على الاقل (الجنيه حاليا بي 100 ليره تقريبا)
طبعا في كتب والخيارات كتيره بس لازم تقرا شي كتاب منون حاليا احسن كتابين هنن (London Plab and plab made easy) بس برجع بقلكون اني سالوا اللي رح يقدك قبلكون منن تدرسوا لاني هل الشغلات عبتتغير بشكل مستمر....
الفحص نفسه بكلف 430 جنيه بغض التظر عن السكن وهل الامور وفي اشاعه اني رح يصير بـ 750 جنيه في نهاية هل السنه بس انا ماتأكدت من هل الاشاعه !!!!!

بعد ماتساوي الدورا (بنصح يكون في اكتر من 2 اسبوع واقل من شهر بين الدورا والفحص) لازم تحويلك حدا تدرس معوا وتتدرب عليه (الشغلات اللي ممكن الواحد يدربون على رفيقه يعني مثلا ما معقول والله تساويله مثلا يعني ها مثلا غازات دم شرياني !!!!!؟؟؟؟) لا شو هل الحكي بس يعني بادربوا على اخد القصه المرضيه والفحص السريري ......

وموضوع شريك الدراسه شي كتير كتير كتير مهم (والرسوب شبه مضمون للي بدرب لحالوا لمتل هيك فحص!!!!!) فبتحوي شريك من الدوره من المريخ ما مهم المهم تحوي حدا تتدرب معوا على الحكي بالانكليزي بالنسبه للقصه والفحص والامور الاخري اللي بدها حكي

وللحديث تتمه......
ان شاء الله