مقدمة: لقد استوحيت الفكرة أو بالأحرى الفكرة موجودة من قبل وإنما استوحيت طرحها بعد قراءة (البنت السورية دلوعة تريد زوجا عالموضة، بواسطة syria star)، والقصة ومافيها كالتالي:

أريد أن يتحول عنوان الموضوع إلى مشكلة اجتماعية حقيقية نعيشها وخصوصا في حلب...

أريد ان يشارك الجميع بهذا الموضوع ولاسيما الإناث.........
لماذا؟، هل؟ أريد أجوبة وتفسيرات وآراء موضوعية..........

لماذا هذه المتطلبات وهذا التضخم والغلاء في أسعار البنات الجاهزات للزواج (وآسف للتعبير "أسعار" ولكن أصبح الزواج كالصفقة والفتاة كالسلعة، في كثير من العائلات وحالات الزواج)

هل ماسبق هو نتيجة للغيرة (فتاة من فتاة أخرى) أي أن ذلك المعتر الأول كتب مقدم ومأخر مابعرف شقد ومليك مدري بشقد وعندو بيت بفلان منطقة وسيارة 2004، بالتالي عندما تقدم المعتر التاني صار بدا البرنسيسة التانية مو بس يكون عندو متل الفتاة الأولى وبس، لأ بدا يكتبلا الها بالأول بيت وسيارة ما عدا مقدم ومأخر أكتر من سابقتها و و و و و...)

أو ماسبق لايتعلق بالفتاة نفسها فهي مولودة في هذا الظرف وليس عندها القدرة على التحكم به وكل الأمر أن أمها أو أبوها (أهلها بشكل عام) لهم رؤية خاصة في هذا الموضوع، متل ما منسمع أنو شلون بدك تضملي مستقبل البنت وشلون بدك تعيشا، أو أيضا هو غيرة، أي غيرة الأهل من العيلة الفلانية (وربما يكون بينهم صلة قربا)، (ليش خيو بنتن هيك أجاها عريس مدري اش عمل واش ساوا، بنتنا نحن اش ناقصا بدنا متلو أو أحسن)

بعرف قصة قريب منها اذا بدكن أنا كنت في قلب الحدث (مع أنو ماحلو واحد يحكي عن قرايبينه بالعاطل بس الموضوع بيستاهل)، القصة انو الي بنت خالة أكبر مني بكذا سنة (للتوضيح إنو ما كانت عيني فيها) البنت بنت عيلة وحلوة وماكملت دراستها، ومن بين كتالوك العرسان يلي أجاها تم اختيار العريس الذهبي (من الخارج فقط) يعني مال ما بتاكلو النيران والكذب الله ماحبو أهل العريس تقلوها بالدهب، بس حسافة وبدون إطالة بنت خالتي وخلال سنتين تم طلاقها وعندا ولد................... لك اش بدكن يا جماعة أكبر من هيك جريمة وأكتر من هيك كفر.

وأمس بتفاجئ بنقاش دار بين الشباب بالجامعة عن الموضوع، بتقوم بتنطلي وحدة بتعطينا رأي يفتقر لكلشي الو علاقة بالعقل وانو هدا الشي (الغلا يلي ذكرتو والمتطلبات الزائدة أو الغير قادر عليها العريس) انو هدا الشي طبيعي وواجب وانو الوحدة مابتأمن على مستقبلها إلا هيك، أنا بوقتها وبالجامعة ، ولك لأ والقهرة انو يلي نطت محسوبة على جماعة المتدينات (يعني مفروض تكون من جماعة اذا اتاكم من ترضون دينه وخلقه فزوجوه)


لسا عندي حكي كتير مارح أقدر أكملو هلأ، بدي استنا مشاركاتكن وآراءكن بس عندي خبر عاجل بدي أقوله:
إلى جميع الأهالي، لا تزوجو بناتكن هلأ استنوا وامسكو ايدكن، في اشاعة انو السوق بدو يلب بحلول عام 2090، وخصوصا بعد وصول أحدث الموديلات من العرسان من الصين (الله يخليا)، الى مرفأ اللادقية، ماعليك آنستي إلا أن تدخلي الى الموقع الألكتروني www.3reesTAFSEEL.com وتملأي الاستمارة وتدفعي جمرك الموديل يلي بدك ياه لأنو معلومك يا آنستي انو صار في ضريبة رفاهية على العرسان المطابقين للمواصفات الحمواتية.
والخلود لتقاليدنا الآجتماعية البالية.