مرحبا
كل سنة وانتو سالمين
انا بس بدي اسال عن التشريح بالسنة الاولى ... العملي ... كيف لازم يندرس يعني ؟؟
عم يعطونا تشريح وصفي ...
اول شي الدكتور يا لطيف شو بيحكي بسرعة .. لك ما بلحق عليه بالمرة أد مو سريع
وعلى حكيو بيؤؤول لا تسجلو غير رؤووس اقلام اي طيب بس وات الواحد بدو يرجع عالبيت ما لح يفهم شي!!يعني حسيتو بيفوت بالحيط .. جبت اطلس سوبوتا اي ألبت كم صفحة ... وفتحت كتاب التشريح الوصفي ... اي مستحيل يندرسو هدووووولل!!!
بس انو حدا يفيدني ويساعدني ... شلون؟

welcome to the crowed!!....

أول شي بحب أقلك أنو هادا شي طبيعي جداً....كلياتنا مرينا بهالمرحلة اللي فتنا فيها بالحيط.....ومهما نصحناكي ..راح تضلي فايتة بالحيط ...فبدك تصبري عليها حتى تلين معك المادة.......بس ممكن أعطيك بعض الملاحظات:

أولاً: ماراح تقدري تفهمي التشريح ..لحتى توصلي لأخر صفحة منو( يعني تاخدي فكرة شاملة)..لأنو متعلق ببعضو...فاذا أستعصت عليكي نقطة معينة..حاولي معها..واذا ما مشي الحال..أنتقلي للي بعدها...ولما بتراجعي المادة راح يمشي الحال..( مرة تانية الصبر مفتاح الفرج مع هالمادة)...

ثانياً: بالنسبة للكتاب اللي ممكن تدرسي منو....ماتسجلي ورا الدكتور....بنصحك بكتاب snell anatomy ..فيه صور توضيحية حلوة...نحنا درسنا منو التشريح...( أغلب طلاب الطب)....

ثالثاً: أقري المصطلحات اللاتينية دوماً تبع التشريح....

رابعاً: هاي ملاحظة اذا بدك ما تلتزمي فيها... بس راح قلك ياها....أقري مادة الجنين مع التشريح...غير هيك مستحيل تفهمي التشريح مزبوط....( هاي ملاحظة حقها مصاري...أبعتيلي على رقم الكريديت كارد ..... الحساب..215814584255445142...مبلغ 10 دولار......)

( صحيح أنك طب اسنان...بس التشريح تشريح عنا وعندكن.....)

وأهلين ..

روووووق كين
اول الشي الزميلة اللي عمتسأل طالبة اسنان ... فما تقيس الموضوع علتشريح تبع البشري ... لانو بظن بيدرسو مادة تشريح رأس وعنق بس
تاني شي هية عمتسأل علعملي

اكيد شباب الاسنان الكبار اللي معنا علموقع فيون يفيدوكي بشكل مفصل ... بس افادة مني فيكي تعتبريها عامة مشان التشريح :
بجلسة التشريح العملي الدكتور عميذكر مسميات غريبة عليكي ومابتعرفيها ومالك شايفتيها قبل هالمرة ... والعملي غايتو انو تشوفي هالتراكيب ... فبالتالي الكتابة ورا الدكتور رح تروح عليكي فرصة تمتيع ناظريكي بالمحضرات تبعة العملي ... فالدكتور ملاحظتو بمحلها ..ز ماتكتبي وراه غير الشغلات الرئيسية ... يعني المفروض :
ـ قبل جلسة عملي التشريح تكون دارسة النظري تبعها (مشان ما تكون المسميات اللي رح تنحكى بالجلسة جديدة عليكي)
ـ تشوفي الشي اللي عمتقريه بالنظري على شي اطلس تشريح ... لانو الوصفي بيضيع ... واللي بيختصرلك منو هو الصور اللي بالاطلس
ـ بجلسة العملي بعد ما تكوني محضرة ... ففعلا انتي مارح تكوني بحاجة غير انك تكتبي ورا الدكتور بس اسما الاشيا اللي عمتشوفيها ... وبالتالي تعرفي شو الشي اللي فعلا بتنسألي عليه بالفحص العملي ... لانو ماكلشي بينشرح بالنظري بتقدري تشوفيه بالعملي ...
موفقة ... وبانتظار افادات شباب الاسنان

السلام عليكم
أختي الكريمة السنة الماضية اختي كانت سنة اولى اسنان وعانت الكثير من دراسة التشريح الوصفي
بس بعد جهد وصبر مشي الحال
هلق اكيد عم تاخدوا تشريح الصدر والبطن تبع نصر مراد اغا الذي نزل اليكم من السنة الماضية لاول مرة وهوكتاب معت وماعجبني ابدا
بس انتو مالكون مطالبين فيو بحذافيره لأنو في شي كتير بينحذف منو
هلق انت عند بتاخدي المحاضرة مارح تفهمي شي
بس روحي عالبيت وادرسي على مهلك يعني احفظي الفقرات والعضلات الرئيسية منشأ ومرتكز رئيسان وتعصيب فقط ولا تهتمي بالباقي لانو في كلام كتير فاضي وبالنسبة للشرايين والأعصاب احفظي المنشأ والفروع الرئيسة وحاج ومالك مطالبة بالمسير
وطبعا حطي السوبوتا قدامك صفحة بصفحة
ولو نسيتي لا تيأسي لانو شي طبيعي
احفظي التسميات الرئيسة وكلشي بعدون بهون
بالنسبة للعملي في عنا بالكلية ملخص صغير عن جلسات العملي يحكي النقاط الرئيسة كتير حلو وبنصحك فيه
المهم لك هو تشريح الرأس والعنق وهوكتاب حلو على ما أعتقد
اذا في اي سؤال احكي والشباب مابيقصروا
والله يوفقك ويصبرك

الشباب ما قصروا بالشرح كين حكى عن النظري ونوبدي عن العملي
بس بحب اركز على اهمية التحضير قبل الجلسة وكمان مراجعة الجلسة الماضية مشان تشوفي الشغلات اللي فاتتك بالجلسة الماضيه
الكتابة ورا الدكتور بشوفها مضيعة للوقت لانه كلامه نفس كلام النظري ما بيجيب شي جديد بس اذا بدك تكتبي اكتبي الاشياء اللي بيركز عليها...لانه مثلا ما كل العضلات بالنظري بنشوفها بالعملي...فاكتبي اسماء العضلات اللي شفتيها بالعملي مشان بس ترجعي عالبيت تدرسيها بالتفصيل من كتاب النظري
كمان ممكن تكتبي الاشياء المميزه مثلا كيف نفرق بين العصب الفلاني والعلاني على العينة او هيك ملاحظات ممكن تفيد وقت الامتحان

بالاخير بالنسبة النا كان ينزل ملخص للعملي بيعملوه بعض الطلاب الشاطرين وبيحطوا فيه الخلاصه وكانت الدراسه منه كافيه كتير للعملي...اذا عندكم هيك شي اعتمديه

تحياتي

أختي clumsy angel:
بداية أهلاً وسهلاً بكِ معنا في المنتدى..
وأرجو لكِ التوفيق في مسيرتك الدراسية..
بالنسبة لمادة التشريح، فبحب أوضح إنه طلاب السنة الأولى هلأ عميدرسوا التشريح العام، والفصل الثاني بيدرسوا تشريح الرأس والعنق، وفي عندهم بعدين مادة جنين، فما في داعي يضيعوا وقتهم فيها هلأ..
هلأ أنا اللي بعرفه إنكم بتاخدوا بهالمادة ( التشريح العام ) تشريح أجهزة الجسم بشكل عام، مثل الجهاز الهضمي والتنفسي ووو.. ويمكن في تشريح الأطراف كمان..
أما العملي فما بعرف بالضبط الشي اللي عمتاخدوه، بس بتوقع رح يكون العظام وصور للجهاز الهضمي مثلاً، ويكمن تاخدوا العضلات كمان..
طيب؛ بالنسبة لدراسة مادة التشريح؛ كل واحد إله طريقة بيشوفها مناسبة لدراستها، بس المهم في الموضوع إنه هالمادة بتعتمد على حفظ المعلومات بعد فهمها، يعني بدون فهم رح يكون الحفظ صعباً جداً وسريع النسيان، ولو فهمتي كل المحاضرة من الدكتور وما حفظتي معلوماتها فرح تنسيها كلها..
مشان هيك أنا بنصحك بالطريقة التالية في الدراسة؛ وشوي شوي بتحسني تتأقلمي عالوضع وتعتمدي الطريقة اللي بتناسبك:
متل ما قال نوبدي.. ابدئيإنك قبل المحاضرة اقرئي موضوع المحاضرة وحاولي تفهميه ولو تخيلتي تخيل التشريح اللي عمتدرسيه وما تحاولي تحفظي شي بس اقرئي وافهمي، وإذا شي ما فهمتيه اقرئيه بس..
بعدها في الجلسة العملية إذا كان في صور وسلايدات أو شرح على عظام فما تضيعي وقتك بالكتابة، واكتبي إذا بدك بس رؤوس أقلام وركزي مع الدكتور، وبعد الجلسة ارجعي واقرئي المحاضرة وحاولي تتأكدي إنك فهمتيها، والشي اللي ما فهمتيه بالعظام والعضلات بتفيدك الأطالس كتير أو حتى إذا متوفر في المخبر هالعظام أو مجسم إلها حاولي تسجلي النقاط اللي ما فهمتيها مشان تسألي عنها الجلسة القادمة، وكملي هيك دراسة المحاضرة بمساعدة الأطلس..
وهيك بتوقع إنه المعلومة رح تركز تماماً لأنك فهمتيها وحفظتيها، وحتى لو نسيتيها بعدين بمراجعة بسيطة بتتذكريها..
المهم إنك ما تنصدمي وتبطلي الدراسة، أو تستصعبي الموضوع وتأجلي الدراسة للأخير، لأنه التشريح إذا تراكم عليكِ وما فهمتيه بيصير مشكلة، والتشريح سهل جداً إذا فهمتيه، ومهم جداً لآخر سنة إلك في الكلية، فعطيه جهدك وادرسيه برغبة إنك حابة تفهمي مشان تستفيدي وتتعلمي صح..
شدي الهمة، وبتمنالك التوفيق..

مرحبا ..

keane ..
شكرا على ملاحظاتك .. لح اسال على هاد الكتابsnell anatomy .. اي وتكرم خلص بظرف كم يوم بتلاقي 10دولار!!بس لبين ما نعبي هليي عنا حاكم مصفر!!!


nobody..
هلا اول شي نحن النظري تبع هي المادة بعد العملي .. واصلا صار في كسر يعني صرنا اخدين تلاتة عملي انا اول وحدة ما حضرتا .. وحدة نظري.. ؟؟؟
وبعدين في شغلات عم يحكي عنها مو موجودة بكتاب النظري ..يعني عن يفصل اكتر لانو اجيت بدي تبع معو على كتاب النظري في منن موجودين انو انا بس بأشر وهيك منشان انتبه اكتر ..بس اي مو كل شي موجود!!

zoro, turbo..
اي حاليا عم ناخد تشريح الصدر والبطن . بس ما بعرف لمين الحئيئة!!
انا شفت نوطة تشريح بس للسنة الماضية؟؟قالولي انو لا خدي تبع هي السنة .. بس انا لح رد اسال على كل احوال

ghareeb..
لح بلش باذن الله هيك .. لانو انا اصلا استصعبتو فما أربت عليه بالمرة!!!فعليي كسر 3محاضرات .. لح حاول مرئون ..

وعنجد شكرا كتييير على المساعدة ....
it was kind of u!!
n bout this crowed , well iam kinda tryin 2 get along with , ihave 2 infact!!

هلا دكتورة ,

لتفهمي التشريح منيح و هون بحط خطين تلاتة تحت كلمة منيح لازم تتعبي على حالك شوي , عندي 3 DVD صادرين عن جمعية الجراحين الأمريكيين حول تشريح الرأس و العنق مقاطعهن كتير كتير واضحين و حلوين إذا بدك ياهن بإمكاني أبعتلك ياهن بالقدموس لأي محافظة بسوريا , طبعا هدا ضمن مشروع عاملينو أنا مع مجموعة من طلاب طب الأسنان بحلب .

موفقة .