وأخيرا وبعد صدور نتائج الزملاء المقبولين في أقسام الدراسات العليا لهذا العام وبشكل رسمي والتي لم تستثني الا ندرة قليلة من الكثير من القلق والتوجس وبعد مضي أكثر من ثلاثة أشهر على انتهاء مشوار شائك في كلية الطب هاهي الأيام تسرع و رحلتنا الجديدة قد أوشكت على البدء وكما اعتدنا في كل شؤون حياتنا ومع بداية كل أمر جديد نسمع الكثير من الأقاويل والتوقعات البعض يبارك الاختصاص الذي اخترته والبعض يلوم شخص ينبه من الأيام والأشخاص الذين سنصادفهم (طلاب السنوات الاعلى ) و شخص بيهون الموضوع وبيقول الوضع موسئ بس بدكن تتعلموا التطنيش كتير
المهم بلشت الامور عنا تأخد غير منحى وبلش كل واحد يحكي حكي على كل فرع ( على حسبته كان ماعم يحكيه قبل مشان ما يضايق الشخص اللي مختاره بالمفاضلة ) يعني هلق ما راح يتضايق قال يعني :mad
المهم ما راح طول عليكم حابة أسمع رأيكم بوضع الدراسات وحتما هي شغلة بيسأل عنها معظم طلاب الطب و خاصة بالسنين الأخيرة
وعادي مافي مشكلة اذا نحن مقبلين كسنة أولى على سنة من العمل كممرضين خبرونا مشان ما ننصدم وعلى قول المتل اللي جايلك لا تلاقيلوا بس مع ذلك لازم ما ننسى شكر رب العالمين على الشي اللي وصلنا اله وخلي يكون عنا تفائل وأمل دائما ولا شو رأيكم
مع احترامي لجميع أعضاء المنتدى

الحكي مو متل الشوف ...

السنة الأولى بالإختصاص هي من أسوأ السنين اللي بتمر على الإنسان ... صحيح بتتعلم أمور كتير كان لازم تتعلمها من زمان بس في تعب كبير , تعب حسدي ونفسي...
طلاب السنوات الأعلى : في طلاب كتير أكابر وناس ما بيسووا فرنك مصّدي و المشكلة بدك تقلهم أمرك ... وتنفذ أمرهم ..... بس سنة وبتمر
أنامثلاً تقاتلت مع كذا واحد وأخدت كم عقوبة ... خاصة لما كنت أروح على الكلية وهنن بدن ياني ما أطلع من المشفى .. بس كنت أروح رغم كل المحاولات والشكاوي لمنعي ... لايمكن أن أتأقلم مع كوني مقيد



من ناحية العلم : مستوى العلم ماشي حاله وأفضل بكثير كثير من الصحة .. بس بدك تدرس لحالك كمان لحتى تطلع فهمان ...

حالياً نحن بإنتظار السنة الأولى بفارغ الصبر لأن وضعنا كتير صعب, ويمكن هدا أصعب شهر بمر علينا لأن السنة الأخيرة قرروا ينفرزوا 3 مع بعض مع ثلاث أخصائيين ونحن وبسبب قلة العدد فكل واحد فينا شايل ثلاث أخصائيين ... يعني أربع أيام عمليات ويومين عيادات والمشكلة أنك بس تلحق تجهز المرضى للعمليات ,يعني ما بتشتغل شي, ضغط شغل كبير وما حدا مستفيد غير السنة الأخيرة...

رح تتغير كتير شخصيتك ورح تتبنى مفاهيم جديدة ... أول ما بلشت كنتأخجل أصيح على مريض بصوت عالي .. كنت أدور عليه بكل غرفة ... بس هدا كان زمان ...

من ناحية تانية في شغلات كتير حلوة وخاصة أنك بتحس حالك صرت دكتور .. يعني بتفهم بالطب .. وما بتتلبك بضرب إبرة...
والراتب صحيح ما بعبي العين بس بتحس حالك لأول مرة مستقل وخاصة إذا كان عندك مدخول إضافي ...

نحنا كمان عنا نفس الشي... بيحكو كتير إنو رح ناكل هوا .. ورح ننحط بجو ضغوط نفسية ... بس أنا رأيي إذا واحد أقبل وبتفاؤل على أي موضوع .. ويتذكر دائماً إنو هو صرلو عم يدرس طول عمرو لحتى يوصل لهالخطوة إللي تعتبر تقريباً آخر خطوة ممكن يصل إلها الإنسان.. فلا بد من الصبر والجد........ وأكيد المستفيد الوحيد هو نحنا والله يختار الخير للجميع يا رب........ وعقبال كل الطلاب يطلعلن دراسات عليا لأني عن جد وحقيقة بتستاهل كل التعب إللي تعبناه ........ والله الموفق

أولاً مبروك للزملاء الاختصاص في الدراسات العليا وان شاء الله تصدر قريباً نتائج الصحة وينال كل زميلٍ مراده
فعلاً اختيار الاختصاص من الأمور الصعبة بل هو أصعب من اختيار منحى الطب نفسه ولكن المزعج أكثر هو ما بدر وسمعته أنا أو غيري وما لا زلت أسمعه ممن حولي حول ما اخترته للاختصاص فهذا الذي لا يعجبه ما اقترفت يداي وهذا الذي يعطيني محاضرةً حول الطريق المسدود والمليئ بالعقبات والمطبات الذي أوقعت نفسي به
ولكن في النهاية تبقى الارادة والأمل والثقة بالله والايمان بأن عملنا كله في سبيل خدمة البشرية وابتغاء مرضاة الخالق هو السبيل الذي يصبرني وينسيني تلك التعليقات التافهة التي اسمعها أحياناً
بالطبع نظام المشفى لدينا فيما يخص الدراسات هو كالقطعة العسكرية وهو أمرٌ يعلمه الجميع وكما أسلف معلمنا
_مصطلح ستعتادين سماعه_الدكتورwiseman _الدنيا مقامات وهو في سنة أعلى منا_وهنا تكمن الحكمة والقدرة على التحمل ولكن ما ستلاقيه من المرضى أنفسهم يفوق وبمراحل ما ستجدينه من الأطباء المقيمين ممن يفوقنا في سنوات الدراسة وربما كان ذلك السبب في الجفاء والصلابة التي ستلاقيها من البعض فشعبنا كله احترام وتقدير ويريد دائماً أن يكون في الصدارة وأن يدخل الى ردهة الاسعاف لتستقلبيه بالزغاريد والرياحين ولا مانع لديه ان اجتاز من أمامه هذا غير الذي سيقفز من فوق .............وواسطته فلانننننننننن والحالة التي معه أهم من المشفى بما فيه في النهاية الأمر يحتاج الى التروي والحكمة والصبر وهي الدعامة الأساسية لمهنة الطب وأنصح هنا جميع الأخوة المستجدين في الاختصاص بألا تأخذهم زهوة النصر الذي حققوه فيترفعوا على العباد ويبدأ الترفيس
وتبدأ المشاكل والتي قد تنتهي أحياناً بدعاوى قضائية كما حصل مع زميلةٍ لنا في قسم الجراحة حيث توانت عن خدمة أحد المراجعين لبرهة وابتلاه الله بأنه كان من فرسان اللسان بلا لجام فحدثت بينهما مشادةٌ كلامية انتهت في قاعات المحاكم والمطالبة بتعويض من تلك الطبيبة المسكينة والتي كما أسلف معلمنا الدكتورwiseman تتقاضى من الأجر الزهيد على فكرة زملاؤنا في دمشق رواتبهم أعلى منا لذا فإنه لزامٌ علينا متى ما ابتدأنا الاختصاص أن نوقع عريضةً نرفعها الى أولي الأمر علّ قلوبهم ترق لحالنا_والله عمبستحي أطلب من الوالد_
ودمتم

ان شاء الله بنقدر نكون على حمل المسؤولية اللي وضعنا نفسنا فيها وبنعمل اللي علينا ونتوفق بزملاء متعاونين ومتفهمين من طلاب السنوات الاعلى وما يكونوا بحاجة ليطربوا آذانهم بكلمة (معلم ) ( لأني ما بتوقعها سهلة اللفظ على أي طالبة اختصاص ) حتى يفيدونا بنصيحة أو توجيه
مشان موضوع الراتب ان شاء الله بنتعاون سويا في كافة الاقسام وما تلهينا المناوبات والدوام وما يعود حدى فاضي لحدى أكيد الموضوع بحاجة لمتابعة و تعاون حتى يستفيد الكل لأنو اذا بقي الراتب متل ما كان وعلى هالغلاء بكل شي الله يعين أهلينا لأنو من نصف الشهر راح نرجع لعندهم وعلى سيرة الراتب قال الاختصاصات بتفرق بيناتها يعني اختصاص الاشعة أكتر من البقية ب3 الأف هالحكي مزبوط ولا شو القصة خبرونا مشان اذا أهلنا ما عادوا يرودا علينا نعرف من مين نطلب من هالزملاء
وفائق الاحترام

السلام عليكم ورحمة الله وبركاته,
أضحى مبارك
تحية خاصة لدفعتي الغالية
صار لنا مداومين تقريبا شهر وبجوز كم يوم
هل مازلتم بخير.....أسأل الله أن يوفقنا جميعا لكل خير
مارأيكم أن نبقى على تواصل, بمعنى كل واحد بيخبرنا شو انطباعه عن اختصاصه
إذا موافقين- بعرف أنو ماعندكم وقت كتييير-بنحكي عن إيجابيات وسلبيات كل اختصاص
من جهة منعرف شو عبيصير بالأقسام التانية ومن جهة بيستفيدوا زملاؤنا اللي لسه ماتخرجوا

مرة تانية تحية للسنة الأولى-اختصاص طبعا-