أرجو المساعدة في علم الوراثة - السنة الأولى

بالمختصر المفيد با جماعة .. انو مقرر الوراثة الجديد للسنة الأولى "فظيع" وأكتر من فظيع كمان ..
المقصود بفظيع يعني بكل ما تحويه الكلمة من معنى
يعني إذا حدا من بقية السنوات اطلع على المقرر بيكون حل نص المشكلة .. بس مشان الباقي يحسنو يساعدونا
رح أعطي فكرة سريعة عن ما يسمى "مقرر الوراثة" :
1. المقرر مترجم ترجمة حرفية تماما من مرجع أجنبي .. يعني الصياغة عدم 100 % ,, والأفكار مستحيل تنفهم ..
لك والله العظيم الواحد بيحس حالو بيقرا كل كلمة من كتاب شكل .. هاد إذا عرف يقرا عربي أصلاً .. طيب شو الحل !
2. المصطلحات المستخدمة في المقرر .. أكثر من فظيعة .. مثل الرخد .. الجنف .. القيلة .. الإزفاء
طيب نحن والله كلنا على بعضنا طلاب سنة أولى .. يعني شو عرفنا بمعاني هالكلمات !! نقضي وقتنا في المعاجم الطبية ندور شو يعني
مشان يطلع معنى الرخد = الكساح
الجنف = التواء العمود الفقري
الإزفاء = الانتقال
لك شو كان بيخسر اللي حط هالمقرر لو حكى المصطلحات باللغة اللي متل عادة الخلق !!
لك بعدين أنا سنة أولى لسا تشريح 1 ما خلصتو .. شو فهمني بالدرز السهمي ولا الدرز الاكليلي ولا مدري شو ؟؟
بعدين شو هاد جناحا العظم الإسفيني ؟؟؟
شو هاي الصفيحة الغربالية ؟؟ شو هاد بروز عرف الديك
لك والله وكيلكن يا جماعة كل المقرر هيك .. وفوق الصياغة التعبانة شو بدك تساوي ..!
على كل حال المقرر بيحكي عن الشوهات والتشوهات والانقطاعات و المتلازمات
بقا يا شباب اللي بيعرفلنا شي مصدر أو موقع فيو هيك معلومات يفيدنا أحسن ما نحمل هاي المادة كمان _ عأساس خلصنا من التشريح 1 -
بعدين في كمان قسم الهندسة الوراثية ..
هاد الله يجعلو قسم .. كمان ما بتفهم شي منو ..
ومما جاء فيه : " ينتج شطر dna بالـ dna ecori حاوي لذيل 5 َ من السلسلة AATT ولحامة 3َ من ذيل السلسلة TTAA "
يا جماعة والله العظيم شي بيشيب الراس .. يا ما أحلى التشريح ادام هالوراثة
الله يرجحم أيام دكتور علي سريو .. ما فيني قول غير هيك !
المهم يا سادة يا كرام .. بعد ما اطلعتو على الوضع المرير .. يا ريت اللي ممكن يفيدنا يفدنا بأي نصيحة صغيرة
لأنو متل ما بتعرفو ماضل شي للفحص .. ومحسوبكن ما بيعرف شي عن المادة !!!!

ومشكورين سلفا ..

مالك غير تبصم .. عن جد ... ومستحيل تفهم إلا إذا حملت المادة .. وقعدت عليها من بداية الفصل الثاني ...

ابصم

أنشالله مايصعبولكن الأسئلة.......

لا تشكيلي لابكيلك .........
طبعا لازم علينا نتشكر الدكتور على تعبه في ترجمة المحاضرة وتنزيلها في مركز التصوير
بس كنت بدي اتشكره اكتر لو كان نزل النسخة الاصلية الانكليزية في مركز التصوير بدلا من العربي
لعل وعسى اقدر افهم كلمتين من الانكليزي لانو الترجمة ما شاء الله خود ايدك والحقني
ويا شباب عندي مداخلة بسيطة :
شو رايكم نفتح صفحة عامة بيضع فيها طالب السنة الأولى اسئلته وبجاوب عليها طلاب سنوات اعلى .
على كل حال اذا في طلاب سنوات اعلى مستعدين للجواب بتمنى منهم بس يعربوا عن استعداده من خلال مشاركة لهيدا الموضوع عشان اتجرا وافتح صفحة نقاش حول مادة الوراثة

اي والله لك ابو شريك جبتا
بس انشالله يتعاونو الشباب الطيبة معنا
أحسن ما نحمل المادة