قصة ملخبطة

مابتعرف منين تبداها ...

وأحيانا بتشك انها ابتدت



قصتنا بتحكي عن أشيا غريبة ..

بقصد جعل الملتقى الطبي السوري أكثر تلاؤماً مع الأعضاء نفكر بإنشاء قسم جديد لاحتواء المواضيع الحادة والخلافية.
http://www.syrianmeds.net/forum/topic3924.html

وبتسمع منها اقتراحات عجيبة

نعلم مدى جهلنا وضيق ثقافتنا الجنسية ... أفكّر بافتتاح قسم للثقافة الجنسية ... لكن ليست للحديث عن الأمور الجنسية كما يتحدّث العوام ... بل بطريقة علمية بحتة ... كمناقشة أو شرح الظواهر الفيزيولوجية وحتى الروحية للجنس على سبيل المثال لا الحصر ...

ويمكن اذا قربت كتييير ....

تسمعلك تحذير ....

من كتر التحشيش

تحذير هام: هذه النشرة تنتمي إلى مجموعة تحشيش، ولذلك قد تحتوي على آراء غير مقبولة اجتماعياً أودينياً أو أخلاقياً. ولذلك أنصح بعدم متابعة القراءة.
http://www.milado.net/im-exist-then-...tim-pid33.html

بقصتنا منسمعك حكم

المشاركة الأصلية بواسطة Shankool

الحياة هكذا .. يأتي بعض ويذهب بعض ... وتمضي الحياة وتستمر ... وتحمل في فُلكها رُكّاباً من كل لونٍ ونوع ... إلى أن يقضي الله بما يريد ...

وأحيانا غنية

المشاركة الأصلية بواسطة Shankool

أغنية "ليلة لو باقي ليلة" من أمسية "مدرسة الحب"، الّتي قُمنا بها في العشرين من نسيان أبريل عام 2004، وهي من كلمات وألحان عبد الرب إدريس، وتعزفها فرقة شباب، وأُغنيها أنا.

بس بدك ما تواخزنا
قصتنا معها انحراف طرب

المشاركة الأصلية بواسطة Shankool

ما يثبت جدارة الأتراك هو اختراعهم البشارف والسماعيات واللونغات وتميزهم في تأليفها: خذ مثلاً
سماعي حجاز كار كرد تاتيوس أفندي
أو سماعي فرحفزا جميل بيك الطنبوري

وإذا ما كنت بتعرف بالموسيقا والطرب ....

المشاركة الأصلية بواسطة Shankool

أقوم بإعداد ونشر هذه الدروس في منتدى نغم
يمكنكم متابعة الدروس من خلال الرابط التالي
دروس للمبتدئين في الموسيقى

بس اذا بدك نعلّمك ... فلازم تكون طالب مجد وشاطر ...
لأنو نحن منعصب ...وممكن نطلع عن طورنا
بس حتى لو حبينا نطلع عن طورنا ... فنحن مؤدبين ومنستأذن

المشاركة الأصلية بواسطة Shankool

يعني اسمحولي أطلع شوي عن طوري ... خطاب في غاية الشوفينية والنازية والتطرف ... ويؤخر إلى الوراء دون أن يقدّم ... يعني بده يضل في صراع دائم مع المجتمع مشان يسوده ... إي رح يسوده بس بعد ما يسفك دماء كل المختلفين عنه ...

وحتى لو عصبنا وطلعنا عن طورنا ...
بيضل قلبنا حنون ... ويمكن نسونجي

المشاركة الأصلية بواسطة Shankool

شخصياً لا يُمكنني الصبر والصّمود أمام أُنثى تتألّم خاصّةً إن كانت حبيبة ...

والقلب الكبير الحنون .... بيسأل عن راحة اللي حواليه

المشاركة الأصلية بواسطة Shankool

هل أنت مرتاح في بشري حلب؟
ماذا تنتظر من بشري حلب؟
ماذا تريد؟
ماذا يزعجك؟
ماذا يريحك؟
أعلمني من فضلك

بس هالقلب الكبير ... دبلوماسي كمان
فإنت إذا سمت شبيك لبيك

المشاركة الأصلية بواسطة Shankool

بس السؤال للزملاء الأعضاء .. انتوا شو عم تستنوا؟ شو بدكم؟ وشو منتظرين؟ شو في أشياء لازم تتصلح؟ أو حتى تتغيّر!

فهادا مابيعني انو في شي رح يكون بين ايديك

المشاركة الأصلية بواسطة Shankool

ما فينا نوعدكم بإنه كل شي رح يتنفذ .. بس لازم نعرف ..

لأنو نحن مامنجبر حدا على شي ...
ولا منحب حدا يجبرنا على شي
ومنرفع شعار ...
"إني أتنفس حرية"
وبدنا الكل يتنفس حرية ...
الكلللللللللل
لازم يتنفس حرية
ولك غصب العنكم بدكون تتنفسو حرية





قصتنا فيها دموع ودم

المشاركة الأصلية بواسطة Shankool

قتيلٌ وتزحفُ حولي دمائي ... عليلٌ مريضٌ وهُم لي دوائي

حزينٌ وما جفَّ نهرُ دُموعي ... أأبكي؟ وماذا يُفيدُ بكائي؟

21 آب 1998

وحب كبير
وذكريات ما بتنتسى ....
لدرجة بتحس انو الرومنسية بقصتنا هية اللي خلقت الأبدية في الحب



بس لا تتفاجئ إذا شفت الرومانسيكي عميحكي عن انو الحب هو مجرد تفريغ لكبت ... وبينقلك لمرحلة من الحسابات والجمع والطرح في الحب ... لدرجة بتصير اذا بدك تحب لازم تعمل بورصة

http://www.milado.net/love-in-our-su...cts-pid36.html

قصتنا هيك
فيها تناقضات


فيها كر

أسْقَـمْتِني يا فَتاةَ الطّبِّ في ولهٍ ... وما سَئِمْتِ مِنَ التّحْديقِ في الكُـتْبِ

وما فَهِمْتِ هُـيامي مَرّةً فَـخُذي ... تَخْطيطَ قَلْبي عَسى أَنْ تُدْرِكي حُبّي

http://www.syrianmeds.net/forum/topic1366.html

وفر

المشاركة الأصلية بواسطة Shankool

طبعاً البيتين كانوا دعابة مو أكتر والدليل إني عم استمتع بقراءة الصبايا والشباب وشو عم يكتبوا ...

فيها فرح وخفة دم وروح رياضبة ...

المشاركة الأصلية بواسطة Shankool

هي قريتها في مدونة نو بدي كرت جوكر

بس هالروح الرياضية مابتعني انو نقبل يدخل غوول بإنفنا .... عفوا ... قصدي بمرمانا

المشاركة الأصلية بواسطة Shankool

وشو ؟ مشان كرت جوكر؟ شو عاملك أنا .. حتى تحطني في بالك مدري كم شهر .. لتنتقم ... على كل حال .. اللعبة ما خلصت .. وبتعرف إنه في جوووووول بده يدخل في إنفك ...

شنكول ....
نحن بانتظارك
تتنفس حرية بصوت عالي
تكر وتفر
وتتقبلنا بروح رياضية



بانتظار البطاقة الشخصية

نوبدي ... دونكيشوت .. انت مع مين متقاتل؟ .. وجاي عم تتفشفش فيني!
يعني ليه عم تنفّس على الموقع .. روح اشعلك شي سيجارة أحسنلك ..

مشاركتك التافهة .. رح أخّر الرّد عليها شوي .. لسطحيتها .. وإغراضها ..
ورح امسح فيك المنتدى ..
راجع ..

المشاركة الأصلية بواسطة Elloni

مساء الخير
أكيد بعد زمان
شو أخباركم
اشتقنا للمنتدى

أهلاً إلوني .. فعلاً بعد زمان ونوّر المنتدى ..

المشاركة الأصلية بواسطة Elloni

استغربت أنو ادخل عل منتدى و تكون مقابلة شنكول

يعني و أخيراً حسنتوا تحطوه على كرسي الاعتراف

لهيك خطر على بالي كم سؤال

ليش شنكول ما رضي يقعد على كرسي الاعتراف لحد الآن يلي مر عليه كتيرين ؟؟
خوف و لا رغبة برسم هالة و غموض
و شو يلي خلاك تطلع هلأ ؟؟و مين؟؟ و ليش؟؟

ما رضيت .. لأنّه كان عندي هاجس كتير كبير في حياتي .. بيتعلق بدراستي وتخرّجي بالكليّة .. ومستقبلي .. حالياً حققت أول جزء ..
وغير هيك .. أنا تقدّمت منيح كشخص وكصاحب فكر .. وإذا بدخل بمقارنة بيني وبين أي شخص average في مجتمعنا .. رح اطلع متقدّم منيح .. ولكن أنا ما بدخل هالمقارنة لأنها بغير صالحي ..
المقارنة اللي بحب أدخل فيها .. هي مقارنة مع أشخاص أنا مبهور فيهم .. بشخصيتهم وبفكرهم .. وباللي حقّقوه .. وطبعاً أنا الخسران هون ...
رغم إيماني إنّي شخص مميّز كتير بالمقارنة مع أقراني .. بس لسه بدي شغل عحالي .. وهذا السّبب اللي خلاني أأجل المقابلة .. لأنه كل ما تأخَّرت كل ما مشيت وتقدّمت أكتر ..
لما بدت المقابلة كنت عم قول لحالي .. إنه رح يجي يوم وأقراها واضحك على حالي .. ويمكن أتضايق .. لأني لسه ما صرت ميلاد اللي بدي ياه (فكريّاً وثقافيّاً وطبيّاً) .. ميلاد اللي بده شغل ..
ولأنهّ المقابلة عبارة عن capture لمرحلة من مراحل حياتي .. كنت بتمنى تلتقط صورة بوقت أبعد .. لأنها رح تكون أحلى .. هي صورة وحدة رح تلتقط هون .. كان بدي ياها تكون أحلى ...

ما لها علاقة بالخوف أو برسم هالة وغموض .. بعتبر نفسي مكشوف .. وحتى لو اللي حولي قالوا إني غامض ..
بكل بساطة في كتير أشياء بتكون ظاهرة على الشّخص .. بس ما في شي بثبتها عليه .. متل اعترافه فيها ..
يعني كل النّاس عندهم ريبة مثلاً .. من موقفي فيما يتعلّق بفن العمارة إبان الثورة الصناعية في أوربا .. ناس بقولوا إني بحبها .. وناس بقولوا إني ما بحبها ..
بصراحة مو مهم ..
في نقاط بدي ياها تضل غامضة عن العالم .. ورح تضل ..

عكل حال بعد ما أكلت بهدلة من الشّباب وتحديداً سنفور .. رح أتخلى شوي عن دبلوماسيتي وأحكي بصراحة أكتر ..
فكّرت إنّي كون دبلوماسي (مع إنّه التّعبير مو دقيق) خطأ في حق ميلاد اللي فيه يكون أكتر من هيك ..

اللي خلاني .. إنه المشرفين تآمروا علي (وبالمناسبة لو داخلة قبل كم يوم كنتِ شفتِ لونهم أحمر لأني منعتهم عقاباً) وفاجؤوني بالمقابلة .. وما حبيت خجّلهم ..
وأنا حالياً مارر بمرحلة انتقالية من التخرج إلى ما بعد التخرج ... وعندي وقت لأني ما بلشت بالمرحلة التالية كما ينبغي ..

المشاركة الأصلية بواسطة Elloni

إذا حدا تابع الأخبار الفرنسية و شاف قصص الرئيس الفرنسي و مرته الجديدة , الصحافة عم بتابعه كانه نجم ستار أكاديمي و هو عم يشجعها على هل شي
و كيف تغيرت الصورة و راحت الهالة يلي كانت للرئيس و كان ممنوع يفرجوا حياته الخاصة....................

برايك شو الأصح ؟؟؟ انو يحوط الرئيس حاله بهالة و لا يكون قريب من الشعب بتصرفاته و قصصه مفتوحة للكل

الرئيس الفرنسي في النهاية هو بشر .. وإله حياته الخاصة متل أي إنسان ... فطبيعي يكون عنده طلاق وخطبة وزواج .. إلخ ..
لكن الأفضل إنه تضل حياته الخاصة داخل جدران قصره .. وما تطلع للعالم ..

قربه أو بعده عن الشّعب ما له أي علاقة بعرض الحياة الخاصة ..
قربه من شعبه بيتعلق بأداؤه لواجبه تجاه الشّعب .. وتحقيقه لوعوده الانتخابية .. يعني برنامج العمل اللي فاز على أساسه

المشاركة الأصلية بواسطة Elloni

بشكل عام بتعتبر حالك من مستخدمي الاقنعة لأسباب ديبلوماسية او تأقلمية ......... , و لا بتخلي وجهك مفتوح و بتعبر عن نفسك و يلي عجبه عجبه و يلي ما عجبه ما بيهمني المهم يلي متلنا يجوا لعندنا شو بدي بالباقي

ماني من مستخدمي الأقنعة .. لا للتأقلم ولا بشكل دبلوماسي .. بكل بساطة بستخدم قناع فقط لهدف اسمه self-preservation
غالباً بعبّر عن رأيي ونفسي .. واللي عجبه عجبه واللي ما عجبه يسطفل .. وبتحفظ على الأجزاء البعيدة اللي ممكن تضرني وتتعارض مع مصالحي .. ولولا هيك .. ما كنتِ شفتيني .. شخصية جدلية في المنتدى .. ولي رأيي المختلف ..
أنا ما بتحفظ على رأيي لأنه مختلف وغريب وما بخليني أتناسب في المحيط ..
إنما بتحفظ عليه لما بضرني ..
وعندي مصلحة الإنسان أهم بكتير من الأفكار .. اللي وظيفتها بشكل أساسي .. إنها تحسن حياة الإنسان ..

المشاركة الأصلية بواسطة Elloni

ماحسنت أقرا كل الصفحات بس قريب هل جواب لهيل ستون ( أنا عندي سياسة في التعامل مع العالم .. ما بكشف كل شي .. وصار كذا شخص قال إني غامض رغم إنه قريب .. وأنا متفاجئ .. كنت فكّر نفسي واضح ومكشوف ..
يعني حتى القريبين .. عم يعانوا .. من غموضي .. مع إني مو قاصد هالشي ..)

برأيك شو سبب هل شي ؟؟
ليش كان تقديرك غلط لظاهرك ؟ نقصت من التعمق بشخصيتك , و لا تعمقت زيادة فما عدت حسنان تشوف الظاهر يلي عم يشوفوه يلي حواليك
بتعتبر عندك ضعف بالتعبير عن نفسك ؟؟
ياترى عدم اهتمام انو تعبر للقريبين منك عن نفسك و أحساسيسك
و لا عندك حب انو تكون غامض , لانو بيخليك تطوي جزء من نفسك و تحميه من العوامل الخارجية
و لا الغالبية العظمي قاصرين على ان يفهموا شخصيتك لأنو الغالبية ما بيشوفوا أو بيفكروا غير بالسطحي

و إذا يوم من الأيام شريكة حياتك شكتلك من بعدك و غموضك شو رح تعمل ؟ رح تعتبر هي ما بتفهمك و أنت أعمق من أنو نتفهم و لازم تبذل جهدها أكتر و لا في شي لازم تغيره , و لا الوضع هيك أحسن مافي داعي تعرف كل شي براسي خليني عم أخطط و أفكر على رواق و إلا بتروح قيادتي للامور

هون بدي وضّح نقطة مهمة .. إنه السياسة policy اللي حكيت عنها .. ما بتنطبق على الأشخاص القراب .. متل شنكولة والدكتور حازم القطريب .. أو كليوباترا .. ونوبدي .. وحتى أشخاص أكتر من هيك ... بس موجودين في مجال أبعد شوي صغيرة ..
لذلك أنا مستغرب كيف أي شخص ضمن هالنطاق ممكن يقول إني غامض .. وأنا ماني مخبّي شي ..
يعني الأربعة اللي ذكرتهم .. بحكي معهم بدون أي تحفّظ .. وبعبّر عن كل شي ...

بصراحة .. ما بعرف شو السّبب .. ممكن يكون قصور بالتعبير منّي .. أو الطرف التاني ما عم يلقطها ..
كتير بهمني .. وخصوصاً شنكولة والأصدقاء القريبين .. إنهم يعرفوا كل شي عني ويفهموني كتير منيح .. وما عندي أدنى نية إني خبّي عنهم شي ..
طبعاً النية بإني ما أكشف أفكاري أمام الأباعد .. موجودة ..

ما بعرف السبب بالضبط .. ممكن يكون أي سبب من الأسباب اللي افترضتيهم .. وممكن تكون أسباب أُخرى ..

بالنسبة لسؤالك عن شكاية شريكة الحياة من البعد والغموض .. فبرأيي أفضل حل .. بيعتمد على الطّرفين .. بإنّن يكونوا قراب من بعض أكتر .. وصريحين أكتر ..
طرف بحاول يكون أوضح وأقرب .. وطرف بحاول يفهم ويقترب أكثر ..
لما بكون في مشكلة .. لازم الطّرفين يتعاونوا على حلها .. وإلا ليه اسمهم شركاء؟

المشاركة الأصلية بواسطة Elloni

كتير ناس بيحكوا شي عن نظرتهم للأمور و كيف مفكرين يتعاملوا و بصدق ما قصدهم يكذبوا بس على الواقع هل شي بيختلف ( طبعاً الحكي عن الامور يلي بالإيد ) , و السبب الرئيسي عدم فهمهم لحالهم و لشو بدهم حتى يعبروا صح عنه و قلة تجربة
انت وين بتعتبر حالك من هل حكي؟
قديش نسبة فهمك لحالك؟

أظن إني فهمان ذاتي بنسبة عالية .. وكنت حكيت عن نفسي بمشاركة سابقة .. إني ممكن أكذب على الناس .. بس ما بكذب على حالي .. وبدين ذاتي وما ببرّر لنفسي لما بغلط ..
ما فيني أعطيكي نسبة لأنّه ما عندي وسيلة قياس علمية لإلها .. ولكن بتصوّري النسبة عالية ..

المشاركة الأصلية بواسطة Elloni

ياترى بتعبر شخصيتك و أفكارك عم تتغير وو تتطور بشكل سريع و لا ثابتة و ماشية ببطء للامام ( طبعاً كل انسان إله أمام خاص فيه ) و لا ( ما بظن ) لساتك بمرحلة تحديد الذات ,

أفكاري عم تتطور وتتبدل ببطء .. يعني ميلاد قبل 3 سنوات ونصف .. انتقل إلى ميلاد الحالي بشكل تدريجي وبطيء (وهذا شي منيح كتير) .. في تغييرات كبيرة كتير صارت .. بدها وقت .. وبدها شغل .. وقراءة واقتناع ..

بالنسبة لتحديد الذّات .. ما فهمت شو قصدك فيها .. بس راجعي ردي على الزميل أحمد بساطة ..

المشاركة الأصلية بواسطة Elloni

ياترى لسا في شغلات ما بتفهمها من حالك ليش عملتها هيك و ليش رضيتها هيك !!!!!!
و شو هي هل شغلات؟

إي أكيد ..
بالتحديد .. أشياء .. بعرف إنه لازم بالطريقة A بس أنا تجاوزت نفسي وعملتها بالطريقة B (أو ما لازم أعملها) رغم إنه A أفضل وأكثر منطقيّةً وصحّةً ..

كمثال .. الرّشوة .. أنا مرة رشيت .. وكتبت هالشي مرة .. وما بعرف إذا قريتي الموضوع ... أما لأ .. عكل حال موجود الموضوع في مدونتي الشخصية milado.net كمان ..

المشاركة الأصلية بواسطة Elloni

قديش درجة مسايرتك و تأقلمك بالأمور المهمة بالنسبة لإلك بس فيها طرف تاني بيهمك أمره ؟

أنا بحب الشّراكة والتعايش (وخصوصاً مع الأهل (إلى حا ما هون) أو الزوجة والأبناء) .. لذلك عندي استعداد دائماً للتفاوض .. والوصول إلى حالة وُسطى .. وبيلعب المنطق دور كبير في تحديد الاتفاق (أنا كتير عنيد .. بس ممكن إقناعي إلى حد بعيد بالمنطق) ..

المشاركة الأصلية بواسطة Elloni

العلاقات العامة يلي حكيت عنها بردودك ياترى قديش قدرتك على الاستغناء عنها إذا كان وقتك ضيق وعندك صعوبات

و إذا كان بحياتك هدف كبير و بده تكريس قديش قدرتك على الاستغناء عن المنتدى

سبق ومرّيت بمرحلة مصيرية .. خلال الأشهر 11 من 2007 وحتى نهاية 2 من 2008 .. واللي هي مرحلة التخرّج ..
نعم ابتعدت كتير عن العلاقات العامة .. ولغيت كتير أشياء بحبها بحياتي .. خلال هالفترة .. فلمين بدي شوفهم (صحارى و 300) انعرضوا مرتين في السينما الطلابية وما شفتهم .. طلعات كتير مع الشباب ما رحت عليها .. برامج تلفزيونية كتيرة لغيتها (متل So you think you can dance - Dr.Phil) وكنت سجل حلقات Grey's Anatomy و Lost وشوفهم في أوقات الراحة ..
انخفضت ساعات دخولي على الانترنت إلى حد كبير كتير .. وأمنت بالمشرفين فيما يخص المنتدى .. وصرت أدخل للتسلية .. إذا دخلت عليه ..
حافظت على الأمور المهمة فقط ..
حالياً بلّشت بالتحضير للمشروع التالي ... واللي هو الاختصاص في بلد غربي .. وكل ما تصاعد الموضوع .. رح تشوفوني أبعد ..

المشاركة الأصلية بواسطة Elloni

شو بتعمل إذا مسار حياتك تغير فجأة و كنت انت السبب بتغيره , متل شيارة رح تفوت حادث و عندك بإيدك الكونترول وغيرتلها طريقها بعد جهد جهيد , شو بتعمل بعد هل تجربة ؟
بتصف على جنب و بتتحمد ربك و بتتأمل باقي السيارات المارة زعلان عليهم و بتقول بكرا في حوادث كتير و لا بتضل عم بتسوق مباشرة لتكمل طريقك حتى لو انكسر بلورك و ظروف السواقة صارت اصعب
و لا ما بتحس بشي....... عادي كل يوم حادث جاي و حادث رايح انت قدها و قدود.......
و لا بتترك السيارة و بتاخد تكسي عل بيت بطلت السواقة كلها لبينما الله يفرجها عليك بقرار جديد

أحياناً بكون في حياتنا ... قرارت واضحة ومن السّهل اتخاذها .. وفجأة بتتغير ... ومنضطر نتخذ قرارات بديلة .. كمان سبق ومريت بتجربة مماثلة ..
لما كنت في السنة الثالثة .. اتخذت قرار السفر والاختصاص في بريطانيا .. وفجأة في السنة الخامسة طلع القرار بالاستغناء عن كل ما هو غير أوربي ... تنفيذاً للقرارات والاتفاقات الاتحادية .. فانتسف المشروع كلّه .. ضليت بعدها فترة طويلة متخبّط وما عم أعرف شو بدي أعمل .. وكتيرين حولي .. اتخذوا القرار إنهم يحولوا على ألمانيا أو على أميريكا وأنا قاعد في أرضي .. في حالة ذهول .. لحتى صحيت .. واتخذت قرار بديل .. بس بعد ما تأخرت ..
وبالأصل أمور السّفر والاختصاص في الغرب .. مرعبة وغائمة .. ونسبة نجاحها حسب الشباب 60% .. ما بعرف من وين جابوا النسبة .. فبصير القرار صعب ..
رح أستفيد من التجربة .. وإذا تكرّر هيك شي رح غيّر السّيارة .. واتخذ بديل تاني وبسرعة ..
وبنصح الكل يستفيدوا من تجربتي ..
مبارح كنت عم احكي مع نو بدي .. ونصحني بخطوة back up وما بتكلفني غير المزيد من فلوس .. وبالجهد نفسه .. واقتنعت فيها .. ورح اشتغل عليها .. بالإضافة إلى مشروعي الشخصي ..

المشاركة الأصلية بواسطة Elloni

الشخصيات يلي ما بتعجبك و ما بتعجبك ردودها و مضطر ترد عليها , كيف بتتصرف ؟
بتقرا الرد و بتمخمخ فيه و بتجي بتكتبله رد المسوية خوفاً من التغليط بالحكي و رعبة بانو يكون ردك متقن لأنو هدول ناس واقفينلك على دقرة و غلطة الشاطر ( يلي هو انت ) عندهم بالف
و لا بترد عليه لأنو بتحس عندك قدرة الرد السريع و قبلما تهرب الافكار و ما تعود مشتهي تكتب رد المسا
و لا بلا الرد كله على بعضه بيجوز شي يوم من الأيام ارد ما رح يموت قهر اصلاً ما ما بتهمي هل شخصية و لا شو رايها بردي , مافي نتيجة تناقشنا كتير عل فاضي

لو ماني مضطر ما برد .. وإذا مضطر برد ..
إذا كنت مخيّر .. وكلام الشّخص ما عاجبني .. فما برد .. مثلاً إذا كان مصيّف وكلامه خبيصة .. ومو عرفان الله وين حاطه .. (انظري المشاركة السابقة لمشاركتك بتعرفي شو قصدي)
الخيارات اللي كتبتيها .. كلها متاحة .. ممكن أختار أي منها .. حسب الشخص وحسب الظّرف وحسب الكلام ومستواه ..

وفي النهاية .. أنا مبسوط من نفسي .. وبسعى إني كون أحسن دائماً وفقاً للشي اللي أنا بشوفه منيح .. وليس وفقاً للأشياء اللي بشوفوها العالم منيحة .. وإلا كنتِ شفتيني نسخة عن غيري .. متل ما معظم العالم نسخ عن بعضهم البعض .. بينما أنا شخصية متفرّدة .. أكيد ماني مثالي .. بس متفرِّد .. ومجموعي النهائي متميِّز ..

المشاركة الأصلية بواسطة Elloni

خلينا نحكي عن المنتدى باعتبار صلي زمان ماني داخلة فما في أحسن أخد الاخبار من شنكول نفسه

شو تقيمك للمنتدى بالوقت الحالي و شو تغير فيه لهل وقت بالنسبة للسنة الماضية؟
بهل سنة قديش مشي المنتدى لقدام ؟ سنة و لا أكتر و لا رسب سنة
شو تقييمك للعلاقات بالمنتدى , خصوصاً العلاقات التعسية , تحسنت و صار في صيغة متفاهم عليها للتعامل و لا المشاكل زادت و تعمقت

المنتدى صاير أضعف من السّابق ... والسّبب هو كسل الفريق بشكل عام (وأنا عضو في الفريق) .. دون رمي المسؤولية على أيٍّ منهم ..
طبعاً ما بحمّل المسؤولية للأعضاء .. لأنه مو من وظيفتهم إنهم يشتغلوا بدال الفريق .. وإنما مع ..

بهالسنة مشي المنتدى .. بس أبطأ بكتير من اللازم .. الفريق مقصر فترة .. بتصل لنصف سنة ..

ما فهمت شو هي العلاقات التّعسية!
عكلٍ مستوى العلاقات في المنتدى منيح .. وهالموضوع ما بيتعلق بالمنتدى ... لأنه نحن أبداً ما منتدخل في العلاقات بين الأعضاء (إذا ما حدا استدعانا) .. والعلاقات بتتحدّد مع كل شخص تبعاً لهواه الاجتماعي ..
يعني الاجتماعي بكوّن رفقة .. متل كليوباترا .. مو تاركة حدا من "شرها" .. طبعاً ما ني شايف هالشي سلبي .. البنت اجتماعية .. وهذا شي منيح كتير ..
وغير الاجتماعي .. بضل متقوقع على ذاته ..

المشاركة الأصلية بواسطة Elloni

إذا انهديت أنو تختار رنة بغنية لموبايلك فشو الغنية يلي رح تختارها و شو رح يكون مبدأك باختيار الأغنية ؟؟
رح تختار غنية تعبر عن حالتك النفسية بهل فترة
ولا تختار غنية يحبوها رفقاتك حتى ينبسطوا لما يخبروك
و لا عشوائي إجتني هدية خليني احط شي غنية عل تيسير المهم غنية بحبها , و بتسأل شخص مقرب ينقيلك غنية على ذوقه

من فترة .. كنت حاطط غنية .. وكانت "أحب شوفك كل يوم" لمحمد عبد الوهاب .. سبب الاختيار لأني بدي شي طربي ..
وإذا حدا بده يهديني .. وسألني قبل .. فأكيد رح أختار شيء طربي ...

المشاركة الأصلية بواسطة Elloni

حاج هيك

كانت شوية أسئلة خطرت على بالي انشالله ما يكون فيها شي مزعج
بس مو كل يوم مقابلة المشرف العام

أهلاً إلوني .. بتمنى تكوني لاقيتِ إجابات شافية ومفيدة على أسئلتك

المشاركة الأصلية بواسطة Kliopatra

2. ميلاد ...... لا قصدي يعني .......... يعني ............ يعني

You mean Shankoolah
She had been invited, already, and an account for her had been created few days ago.

I asked her to participate and to ask me something she's concerned about. she doesn't seem to have enough time. I hope she'll post something.
It's up to her, of course.

المشاركة الأصلية بواسطة Kliopatra

3. لو انت ولدت من 1400 سني ... لما كان في 3 جماعات :

-المؤمنين وأصحاب الرسول (صلى الله عليه وسلم)
- شلة كفار قريش .. واللي منون استوحيت هالسؤال !
- عصابة ابن سلول


بتتخيل نفسك مع مين كنت صرت ؟
ولو هالشي انعاد بهالزمن ....... مع مين بتشوف نفسك ؟

طبعاً الخيار سياسي بالدرجة الأولى وليس دينياً هنا ...

ميلاد الحالي بيختار يكون مع شلة كفار قريش ..
وميلاد قبل كذا سنة بيختار يكون مع محمد ..

السبب في هالاختيار .. إني كنت سابقاً ثوري .. فبختار كون ضمن الثورة المحمدية .. أما الآن أنا لبرالي .. فبختار كون مع كفار قريش .. أبي لهب وأبي سفيان ..

أما شلة عصابة ابن سلول .. فما بعرف عنهم شي .. وبحياتي ما سمعت بهالمجرمين .. وما فيني حدّد إذا بدي كون معهم أما لأ .. عموماً إذا كان في دولارات وجواري من العصابة .. فممكن كون معهم

المشاركة الأصلية بواسطة سنفور

أنا بضم صوتي لصوت نو دبي.. وبصب غضبي الشديد ع ميلاد.
هي ماي مقابلة،.. هي لف ودوران!!!
....
مشاركات الناس والأفكار يلي عم يطرحوها بالأسئلة أكتر من الأجوبة، وبتخلي الواحد يتساءل ويستمتع أكتر من الأجوبة، يلي غالبا عم تحط حد للسؤال بكلمة أو كلمتين جواب!!..
ما بدي قول ما هدا ميلاد، لإني ما عدت أعرف مين ميلاد..

متل ما قلت لإلوني .. أنا فكرت إنه مو حلوة بحقي .. كون هيك - سميتوها دبلوماسية - وأنا فيني كون أكتر من هيك ..
أوكي توكل ع الله .. رح جاوب أفضل .. بس تكون الأسئلة بتمس جوانب .. فيني احكي فيها وقاربها .. يعني كم سؤال أجاني في العمق بكل المقابلة؟ (ومو كل شي عميق فيني قاربه بسهولة على كل حال) مو بدك كمان أسئلة تمتحن العمق عندك؟

المشاركة الأصلية بواسطة سنفور

فيك تتجرد شوي عن موقعك السياسي كمدير منتدى، ولتنزل بصفتك الشخصية كميلاد صاحب فكر فردي مستقل؟؟
فيك تبطل شوي ع الأقل لمدة أسبوع (دبلماسية) ع حد تعبير نو بدي، وتحكي عن حالك إنت..؟
في أزمة حقيقية لما بتتماهى شخصية الفرد مع الموقع يلي عم يحتلله، .. لحتى يصير الموقع لابسه تماما.. بقللك الوزير الفلاني (أي وزير) أنا ما بوافق شخصيا ع أي شي من هالخطة.. بس لما بيحكي كوزير بقول الخطة احلى منها ما في وهي مفتاح المستقبل..!
هلأ، دائما الوضع المثالي إنو يكون الموقع منسجم مع الشخص، يعني هذا الوزير لكونه بفكر بطريقة معينة صار وزير والخطة يلي بيحكي فيها هي بنت أفكاره.. هدا الوضع أحسن شي..
الوضع الأسوأ شي.. إنو بعد ما يكون عنده أفكاره، بصير وزير، وبصير بيحكي حكي مختلف، وبتصير أفكاره بتتقولب مع الموقع يلي هو فيه وبصير بمعنى تاني .. "بيكدب الكدبة وبصدقها.."..
..
سؤالي، إلى اي مدى إنت هيك..؟ ..
وإذا اتهمتك إنك هيك إلى حد كبير، وباعترافك... فالسؤال.. شو بربح إذا كسبت اجتماع الناس من حولي وخسرت حالي؟؟؟

عن جد الموضوع ماله علاقة بكوني مدير المنتدى .. الموضوع إله علاقة بنفسي وذاتي ... والحفاظ على سلامتي ..
قلتلك من قبل .. إني ما بدي صرّح أكتر من إني علماني فيما يخص الدين .. حتى ما عندي نية احكي عن علمانيتي ... يا ترى هي جزئية ولا شاملة؟
بعرف إنه حتى لو قلت علماني بده يطلع واحد ويقول .. ملحد وكافر .. وفي كذا موضوع في تكفير العلمانية في المنتدى فيك تدور عليهم وتقراهم ..

الكلية فيها نسبة من المتطرفين للأسف (المتدينين الاعتيادين الواحد بيحترمهم وبتعايش معهم ببساطة) .. وحتى إذا قلت كلمة علماني .. بعرف إنه في مين بوقف بساحة الكلية وبيحكي عن علمانيتي "الكافرة" .. وبيتشدق بالجنة اللي هداه الله مفاتيحها .. ما ني مستغني عن أفكاري أو متراجع عنها .. بس ليش أعرّض نفسي لخطر واحد مجنون .. خلافي الأساسي معه خلاف سياسي .. بيتعلق باستخدامه السياسي للدين .. فهو بيستخدم الله ضدي .. ومستعد لولا القانون إنه يقطع راسي؟ ويدخل الجنة على كتافي! (لأنه هو مفكّر إنه الله كتير رح يفرح إذا أنا العلماني متت - طبعاً كل واحد لا شعورياً بفكّر إنه الله متله) بينما الحقيقة .. الله لبرالي وعلماني أكتر مني ومنك .. وعايفني وعايفك .. رغم إنهم بيتدخلوا بعلاقتنا مع الله .. وبيفترضوا إننا مو مناح .. وإنّه الله مو رضيان عنّنا .. لأننا مو متل ما بدهم (طبعاً افتراضياً هنن بدهم متل ما الله بده .. بس المشكلة إنه على اختلاف اللي بدهم ياه .. كلهم بقولوا نحن بدنا متل ما بده الله) ...

طريقة حديثي في اللقاء بتتعلق .. بتقديري الشّخصي كميلاد لمصلحتي ... وشو لازم احكيه وشو ما لازم احكيه .. وهذا بغض النّظر عن موقعي كمدير ..
في بداية المقابلة قلت .. بتمنى إنكم ما تتعاملوا معي على أساس إني مدير الموقع .. وكل كلمة أو فعل ضمن هذا النطاق على صفحات المقابلة كان مزح (متل تلوين المشرفين باللون الأحمر) ...

أنا ماني محبوس بشخصيتي كمدير للموقع ... والرقابة الذاتية اللي بمارسها على ذاتي هون رح أمارسها في أي مكان تاني ... شوف موقعي الشخصي مثلاً ..
ميلاد كشخص .. معتد بذاته جداً .. وواثق من نفسه .. ميلاد شخص مصاب بالنرجسية (مصاب لأني ما كنت نرجسي من قبل - بدي أكتب مدونة عنوانها أصابتني نرجسية)

حكيت في رد سابق .. عن استفادتي من موقعي كمدير للموقع وشو تعلمت من هالموقع .. في البداية ما كنت مناسب للموقع .. بس حالياً .. أنا مناسب إلى حد جيد .. صار عندي خبرة .. ورؤيا واضحة ... مشكلتها بدها تفرّغ ..

في النهاية ... أنا ربحان ذاتي كتير (سواءً بعرض اللي بعرضه .. أو بإخفاء اللي بخفيه) .. المهم إنه اللي أنا فيه اخترته بنفسي .. والأدلجة اللي تعرضت إلها في صغري وشبابي .. لغيت معظم تأثيراتها ... أنا كتير فخور بنفسي .. إني تغيّرت واخترت ميلاد الحالي .. سياسياً ودينياً واجتماعياً ..
ما فيني استغني عن العالم .. لذلك بسايرهم لحد معيّن .. بعده ما فيني اسكت أكتر .. فبقول إني علماني .. واللي ما عجبه هو حر ...

بالأساس .. تسقط كل فكرة أمام بقائي وسلامتي .. أظن هي هيّه المصلحة العُليا بالنسبة لي .. شو فائدة الأفكار أصلاً .. إذا بدها تضرني؟ هذا موضوع تاني فينا نحكي فيه .. أظن عندك سؤال تالي رح اتطرق فيه لهالنقطة بالذات ..

المشاركة الأصلية بواسطة سنفور

السؤال التاني..
(كل شوق يسكن باللقاء لا يعول عليه)..
إنت شو بتقول؟...

بحثت عن القائل ووجدته انه محي الدين ابن عربي ..

كل فن لا يفيد علماً لا يُعوّل عليه

التجلي المتكرر في الصورة الواحدة لا يعول عليه
جميع ما يرد عليك وأنت تجهل أصله لا تعول عليه
كل حال يدوم زمانين لا يعول عليه
كل حضور لا يتعين لك في كل شيء لا يعول عليه
كل تمكين لا يكون في تلوين لا يعول عليه
كل كلام لا يؤثر في قلب السامع مراد المسمع فهو قول لا كلام .
كل سكر لا يكون عن شرب لا يعول عليه
كل بقاء يكون بعده فناء لا يعول عليه
كل فناء لا يعطي بقاء لا يعول عليه
كل نفس لا تنشأ منه صورة تشاهدها لا يعول عليه
كل عبودية لا يتعين سيدها لا يعول عليها
كل بلاء لا يكون ابتلاء لا يعول عليه
كل معرفة لا تتنوع لا يعول عليها
كل صدق يُسأل عنه لا يعول عليه
كل شوق يسكن باللقاء لا يعول عليه
كل محادثة لا يكون العبد فيها لا يعول عليها
المعرفة إذا لم تتنوع مع الأنفاس لا يعول عليها
كل مشهد لا يريك الكثرة في العين الواحدة لا تعول عليه
كل امتزاج لا يعطيك أمراً لم يكن عدنك من قبل وجوده لا يعول عليه
الحكمة إذا لم تكن حاكمة لا يعول عليها
الأدب إذا لم يجمع بين العلم والعمل لا يعول عليه
السماع إذا لم يوجد في الإيقاع غير الإيقاع لا يعول عليه
المكان إذا لم يكن مكانة لا يعول عليه.

المصدر

معظم هي الأفكار والتعويلات بتتعلّق .. بنجاعة وديمومة الفكرة .. لكنها مبالغة في المثالية ..
الأشياء غير المفيدة ... واللي منعملها في حياتنا ... كتيرة ..
مو ضروري كل شي نعمله في حياتنا نعوّل عليه .. خلي نعمل شي هيك .. من أجل الـ "هيك" ... مراق!

العبارة اللي انت اخترتها تحديداً ..

بصراحة ما كتير عجبتني .. وما ريحتني ..
يعني خليني أعمل مقاربة .. مدري إذا كانت ناجحة ..
كل ألم لا يزول بالدّواء لا يُعوَّل عليه .. مو منطقية ..

المشاركة الأصلية بواسطة سنفور

(قبل 1400 سنة، كان محمد داعيا للمستقبل، وكان أهل قريش عبدة للماضي.. اليوم مجتمع الإسلام هم كفار قريش، والذين يكسر الاصنام هم محمديون..)
شو رأيك بهدا التعريف الجديد للدين والكفر؟؟
بمعنى.. في ناس اليوم بتشوف إنو التدين التقليدي هو الكفر بعينه، بينما اللاإنتماء هو طريق الهدى!!!..
إنت وين؟؟؟

هذا التّعريف يتّسق مع روح من أرواح الإسلام (فهم .. من الفهوم المتعدّدة) .. اتفرج معي ..

"وَإِذَا قِيلَ لَهُمُ اتَّبِعُوا مَا أَنْزَلَ اللَّهُ قَالُوا بَلْ نَتَّبِعُ مَا أَلْفَيْنَا عَلَيْهِ آبَاءَنَا أَوَلَوْ كَانَ آبَاؤُهُمْ لَا يَعْقِلُونَ شَيْئًا وَلَا يَهْتَدُونَ" البقرة 170

"وَإِذَا قِيلَ لَهُمْ تَعَالَوْا إِلَى مَا أَنْزَلَ اللَّهُ وَإِلَى الرَّسُولِ قَالُوا حَسْبُنَا مَا وَجَدْنَا عَلَيْهِ آبَاءَنَا أَوَلَوْ كَانَ آبَاؤُهُمْ لَا يَعْلَمُونَ شَيْئًا وَلَا يَهْتَدُونَ" المائدة104

"وَإِذَا فَعَلُوا فَاحِشَةً قَالُوا وَجَدْنَا عَلَيْهَا آبَاءَنَا وَاللَّهُ أَمَرَنَا بِهَا قُلْ إِنَّ اللَّهَ لَا يَأْمُرُ بِالْفَحْشَاءِ أَتَقُولُونَ عَلَى اللَّهِ مَا لَا تَعْلَمُون"َ الأعراف28

"قَالُوا أَجِئْتَنَا لِتَلْفِتَنَا عَمَّا وَجَدْنَا عَلَيْهِ آبَاءَنَا وَتَكُونَ لَكُمَا الْكِبْرِيَاءُ فِي الْأَرْضِ وَمَا نَحْنُ لَكُمَا بِمُؤْمِنِينَ" يونس78

"قَالُوا وَجَدْنَا آبَاءَنَا لَهَا عَابِدِينَ" الأنبياء53

" قَالَ هَلْ يَسْمَعُونَكُمْ إِذْ تَدْعُونَ أَوْ يَنْفَعُونَكُمْ أَوْ يَضُرُّونَ قَالُوا بَلْ وَجَدْنَا آبَاءَنَا كَذَلِكَ يَفْعَلُونَ " الشعراء 73 ، 74

"وَإِذَا قِيلَ لَهُمُ اتَّبِعُوا مَا أَنْزَلَ اللَّهُ قَالُوا بَلْ نَتَّبِعُ مَا وَجَدْنَا عَلَيْهِ آبَاءَنَا أَوَلَوْ كَانَ الشَّيْطَانُ يَدْعُوهُمْ إِلَى عَذَابِ السَّعِير"ِ لقمان 21

"بَلْ قَالُوا إِنَّا وَجَدْنَا آبَاءَنَا عَلَى أُمَّةٍ وَإِنَّا عَلَى آثَارِهِمْ مُهْتَدُونَ(22) وَكَذَلِكَ مَا أَرْسَلْنَا مِنْ قَبْلِكَ فِي قَرْيَةٍ مِنْ نَذِيرٍ إِلَّا قَالَ مُتْرَفُوهَإ اِنَّا وَجَدْنَا آبَاءَنَا عَلَى أُمَّةٍ وَإِنَّا عَلَى آثَارِهِمْ مُقْتَدُونَ(23) قَالَ أَوَلَوْ جِئْتُكُمْ بِأَهْدَى مِمَّا وَجَدْتُمْ عَلَيْهِ آبَاءَكُمْ قَالُوا إِنَّا بِمَا أُرْسِلْتُمْ بِهِ كَافِرُونَ(24)" الزخرف

يرى القرآنيون أنّ المعنى لا يتعلّق بما "ألفينا \وجدنا عليه آباءنا" من حيث الكفر .. بل الآية تستنكر أن يرث الإنسان أفكاره عن أبيه وأمه ويكتفي بالاتباع الأعمى .. بل يرون أن الله يحب أن يُعمل الإنسان عقله .. وأن يجدّد ويجتهد ..

برأيي القرآنيون هم أكثر المتديّنين رقياً في هذا العصر ..

طبعاً أنا ما بحب إنّنا نحط معيار .. ونقول هذا كافر وهذا مؤمن ..

بالنسبة لي بحب الاجتهاد .. بحب كل واحد يقرا القرآن ويفهمه وفقاً لقدراته الفكرية ... ويطبّق الإسلام متل ما بيفهمه (بدون ما يفرض فهمه على الآخرين وبدون ما يكون فهمه إرهابي) ... أحسن ما يسمع لشيوخ كل همهم الكهنوت اللي هنّن فيه ... وتجييش الشعوب المتديّنة ضمن قطعان ..
يعني والله ما بشوفها حلوة .. إنه إنسان متعلّم (مو ضروري يكون فهمان) يثور بعد كلام شيخ بيطلع على قناة متل الجزيرة .. ويمشي مع القطيع متله متل أي أمي ..

شخصياً ما بتبع شيخ .. وما في فتوة بتلزمني .. لأنه ماني قليل .. وفيني اقرا وقرِّر .. لوحدي بدون الاستعانة بشيخ ...
وفكرة إنه "ما بفهم اللغة العربية ولذلك ما لازم اتدخل في تفسير القرآن" .. هي ما بقتنع فيها .. بنفس الوقت ما بفرضها على غيري .. لذلك فهمي للدين خاص إلي وحدي .. وما حدا إله علاقة فيه .. ولا بفرضه على حدا غيري ..

من حيث الانتماء .. البديل عند القرآنيين هو القرآن وفق تفسير حديث يناسب العصر .. وليس اللاانتماء ..

انتمائي لنفسي .. ولكل ما يتعلق بي ..

سنفور رح وقف هون .. وراجعلك ..

المشاركة الأصلية بواسطة Shankool

نوبدي ... دونكيشوت .. انت مع مين متقاتل؟ .. وجاي عم تتفشفش فيني!
يعني ليه عم تنفّس على الموقع .. روح اشعلك شي سيجارة أحسنلك ..

مشاركتك التافهة .. رح أخّر الرّد عليها شوي .. لسطحيتها .. وإغراضها ..
ورح امسح فيك المنتدى ..
راجع ..

المشاركة الأصلية بواسطة Shankool

لو ماني مضطر ما برد .. وإذا مضطر برد ..
إذا كنت مخيّر .. وكلام الشّخص ما عاجبني .. فما برد .. مثلاً إذا كان مصيّف وكلامه خبيصة .. ومو عرفان الله وين حاطه .. (انظري المشاركة السابقة لمشاركتك بتعرفي شو قصدي)

روق ابو الشناكل ... انا ماكنت عبتفشفش وكان مزاجي عالي (دخول الشات بنفس التوقيت وشوف) واكيد وقتك اثمن انك تضيعه بالتفاهة والسطحية والتصيف والتخبيص ... ... وملاحظة صغيرة ... انا هي المشاركة كاتبها قبل ماشوفك امس بالصدفة ونحكي عن المقابلة

المشاركة الأصلية بواسطة No Body

روق ابو الشناكل ... انا ماكنت عبتفشفش وكان مزاجي عالي (دخول الشات بنفس التوقيت وشوف) واكيد وقتك اثمن انك تضيعه بالتفاهة والسطحية والتصيف والتخبيص ... ... وملاحظة صغيرة ... انا هي المشاركة كاتبها قبل ماشوفك امس بالصدفة ونحكي عن المقابلة

لا لا .. انت بتستاهل إني ضيّع وقتي مشانك ..

ومين قلك إني مو رايق؟

رايق كتير

بما أنه هي مقابلة، فأنا عم اسمع و حاول أعرف أفكارك أكثر، وماني حابب أناقشك بشي. ممكن النقاش يكون في موضوع من نوع أخر مو في مقابلة، فخوذ راحتك.

سؤالي بسيط، بس `الصراحة` هي أهم عنصر في الجواب.
إذا قلتلك أنتهت فترة ولايتك في إدارة هذا المنتدى، ولازم يستلم الإدراة ناس جديدة بروح جديدة، شو رح يكون شعورك؟ هل رح تقول لحالك بس أنا اللي عملت هالمنتدى و تعبت عليه، والناس كلها مبسوطة مني، و وضع المنتدى عال، و اللي عم يحكي أنه بدو يغيرني هو من المغرضين و المعادين للمنتدى، لذلك ومن شان أوقف المخططات الأستعمارية و التآمرية، رح أضل مشرف عام و اللي عجبو عجبو واللي ما عجبو ما يدخل على المنتدى واللي بدو يفتح فمه بدي أخذفه (لأ ق�