سنبدأ هذا الأسبوع مع ضيف جديد
بدون أية مقدمات ولمفاجأة تامة
ضيفنا هذا الأسبوع هو عمو المستر سام Mr.Sam
مسترنا سام تفضل وعرفنا عن نفسك (وبطاقتك الشخصية حسب ما بتحب) قبل ما نبدأ ونسألك
تحياتي

طبعا متل ما بيعرف..
الواحد بعد فترة مما بقرب على الشخص .. بصير بيتعود عليه..
وهلأ .. ما عاد يزعجني.. بالعكس..

سام لطيف كتير.. بالقرب منه، (طبعا إذا بدك تحاول إنك تتواضع ع كتافنا.. وتقول إنو عم نطريك.. فيا ويلك.. !
لإنو بكون فيها من العكس أكثر مما من الصواب..
فقول.. صدتم يا أبنائي.. انا فعلا لطيف.. ومتواضع.. وبما أني كذلك لن أتواضع أكثر..
مع إنو بخوفني أحيانا بصمته.. وبدبلوماسيته..
يعني بحس في شي ورا الحكي يللي بقوله..

شو علاقته مع الحب.؟
داق الحب..؟
شو رأيه بالفتاة الحلبية..؟
يا ترى شلون الوضع بالشام؟؟
بتحس حالك متصالح مع المجتمع؟؟ وللا في جدال.. أو تناقض.؟
عندك فكرة يوتوبية للمجتمع؟؟ كيف..!
لسا في أسئلة تانية..
بتجي

من زمان وأنا عم أنتظر مشاركتك... وكالعادة بتفاجئني بشي جديد مالي حاسبلو حساب....

مشان رقم موبايلي سجل عندك... صفر تسعة أربعة، اتنين صفر، اتنين حمر، اتنين خضر!

بعدين، إذا بتذكر منيح أنت ما عرضت عليي صداقتك وقتها... أنت عرضت علي شي تاني (ما رح قولو)...... ولمعلوماتك أنا بعتبرك صديق من قبل قعدتنا بالمقصف....

بعدين الله يسامحك... ملخص اللغة كان من أحسن الملخصات وأوفرها بشهادة الأغلبية (أقول الأغلبية لأنني أستثنيك)... والملخص ما طالع كلفتو... (في عالم قبرت الفقر من ورا الملخصات......)

أما عن كلامي آخر كل محاضرة فكان عبارة عن كم ملاحظة وردت أثناء المحاضرة... بالإضافة لبعض الملاحظات حول الامتحان... وكنت بالنهاية حط كلمات شي غنية عجبتني (لعبي الفراغ طبعاً)... يعني لا كلام لا نبي ولا إله... يمكن أنت خلطت بين الثقة و الشخصية التقفيلية اللي بتقمصها بآخر المحاضرة... باين لازمك دورة بالإنكليزي!


برجع وبعيد أني إنسان عادي جداً متل كل هالبشر...... (ترجمتلك ياها لعبارة I make the average man)...

أما علاقتي بالحب.... بحب قلك أنو الحب أمر محوري بحياتي....

دايق الحب.... بالتأكيد وبأبشع صوره! (لا تسأل عن التفاصيل لأني لن أجيب)....

شو رأيي بالفتاة الحلبية.... متلها متل بقية فتيات العالم... ما يميزها أنها غالباً من مواليد مدينة حلب!

بحس حالي متصالح مع المجتمع.... بتحسن تقول متعايش أكتر من متصالح.....

وبالتأكيد أنسان يتمتع بمثاليتي حيكون عندو صورة يوتوبية للمجتمع.... بزمناتي كتبت موضوع بالاسباني عن هالفكرة... وهي ترجمتو الانكليزية (الإنكليزية ركيكة لركاكة الأصل الأسباني):

I've always dreamed about that town. A lot of people have. It's a very peaceful place, the people there are kind, nice and lovely. You have no problems there. It's not an ancient town, but it's full of love, passion and kindness. Although I haven't reached it yet, I won't stop looking for that town. It doesn't have a certain name, some people call it 'Utopia', but I call it 'The land of my dreams'.

بانتظار بقية فتيشاتك.... عفواً أسئلتك.....

مستر سام
أعود إليك
بأسئلتي الصعبة و فضولي الشديد
- هل ترى أن مجتمعنا بمثقفيه ممكن أن يتقبل علم النفس و بالأحرى الطب النفسي بتطبيقاته الوقائية؟
- الأهم هل ترى أنه وصل إلى الآن إلى علاجات ناجعة ؟
- هل تتحدد لديك "و لا أريد تفصيلاً" معظم مقومات شخصيتك هل تعلم من أنت "عدا تلك الكلمة البسيطة أنا مستر سام"؟
- و أخيراً و ليس بآخراً :أحببت أن أقول أنك ذاك الانسان الذي أحببت على قلة لقاءاتي به و الذي لفتت شخصيته نظري مذ كان في السنة الثانية عندما ألفت لي على موبايلي العتيق Ericsson تلك النغمة اللطيفة البسيطة
تمنياتي لك بتحقيق أحلامك
و أرجو أن تعذرني على إثقالي عليك بالأسئلة و خاصة في علم النفس و لكنني أراك متمكناً منه لحد ما و أنا أحبه و لا أمتلك الوقت للقراءة عنه"يعني إذا ما تعبتك و تغالست عليك على مين لكان"

تحياتي
حازم

هممممممممممم
سام

من خلال قراءاتك بالطب النفسي .. هل يا ترى حسنت تحدد شخصية البنت اللي انت بدك ياها؟؟

تاني شي ومن خلال الmusic اللي بتعقد واللي انت بتألفها اشو هو الtrigger لحتى تركب مقطوعة من مقطوعاتك الساحرة؟

وبس..
وبرجعلك

المشاركة الأصلية بواسطة RWTH

- هل ترى أن مجتمعنا بمثقفيه ممكن أن يتقبل علم النفس و بالأحرى الطب النفسي بتطبيقاته الوقائية؟
- الأهم هل ترى أنه وصل إلى الآن إلى علاجات ناجعة ؟
- هل تتحدد لديك "و لا أريد تفصيلاً" معظم مقومات شخصيتك هل تعلم من أنت "عدا تلك الكلمة البسيطة أنا مستر سام"؟

مجتمعنا، وللأسف، لا يزال ينظر للطبيب النفسي كما يصورونه في الأفلام المصرية (رجال قصير نحيف أصلع وشعرو شايب وبالإضافة إلى أنو أجدب)... والذي يزيد من حسرتي أن أغلب أبناء الطبقة المتعلمة (لن أقول المثقفة... الثقافة أمر آخر) ينظرون إلى الطبيب النفسي من هذا المنظور أيضاً... ولكن لا يمكن أن تلومهم كثيراً... فالأطباء النفسيين (كبقية الأطباء من مختلف الاختصاصات) المثير منهم من هو (مالو علاقة باللياقة) أو أنو (واحد نصاب راكد ورا العملة)...

أما هل وصل إلى علاجات ناجعة... الشفاء حتى من الاضطرابات النفسية من عند الله... الطبيب لا يمثل إلا سبباً من أسباب الشفاء... بالتأكيد الطب النفسي بالوقت الحالي قطع أشواطاً بعيدة من ناحية العلاج ونوعيته وآثاره الجانبية... ولكن الأساس هو رغبة المريض في العلاج... إدراكه لاضرابه ورغبته في الوصول إلى حال أفضل...

أما عن مقومات شخصيتي... ليس تماماً... أعرف الخطوط العريضة الأساسية... (العطاء، المثالية... وأشياء أخرى لن أذكرها!)... أما المكنونات الصغيرة فلا أزال حتى الآن أستمتع باكتشافها...

وشكراً لك في النهاية على كلماتك الرقيقة والعذبة.......

المشاركة الأصلية بواسطة Optimisto

من خلال قراءاتك بالطب النفسي .. هل يا ترى حسنت تحدد شخصية البنت اللي انت بدك ياها؟؟
تاني شي ومن خلال الmusic اللي بتعقد واللي انت بتألفها اشو هو الtrigger لحتى تركب مقطوعة من مقطوعاتك الساحرة؟

أنت بتعرف، متل ما كل اللي درسو طب نفسي بيعرفو، أنو بالطب النفسي بندرس الشخصيات المرضية... الوسواسي الاعتمادي الهستريائي النرجسي.... فبحب قلك أني توصلت لشخصية البنت اللي بدي ياها وهي..... ولا واحدة من اللي مرقو معي بكل الكتب!
عكل في مقولة كتير بحبها بتقول (I want a lover just like dear old me (well, almost....

وال Trigger تبع الموسيقا هو العواطف... بتوصل العواطف لدرجة من الغليان بتصير بحاجة إلى تفريغ... ومتل ما كانو يقولو عن الأدب الرومانسي (بالمعنى الأدبي طبعاً) "الإبداع وليد الألم...."

شكراً إلك على إعجابك بأعمالي.....

قولتكم اجا دوري ..... ؟
يمكن أنا أكثر واحد بالمنتدى بيعرف مستر سام.....مشان هيك مارح أسأله ولا سؤال لأني بعرف كل الإجابات.... بس بدي أحكي رأيي فيه.....وبكل صدق
سامحني مستر سام بس لازم الواحد مايكذب ..... يعني بتمنى تقدر موقفي:

بصراحة وبدون مبالغة أبو السوم من أكثر الأشخاص العزيزين على قلبي .... بتقدروا تقولوا يمكن أصنفه بالمركز الأول بين أصدقائي...
تعززت علاقتي معه منذ السنة الثالثة ومازالت علاقتنا تتنامى... تقريباً هو أكثر شخص أستطيع التفاهم معه..... وأكثر شخص بتتلاقى معه إهتماماتي وهواياتي ....
منذ السنة الثالثة وهو يدعمني في صراعي مع مشكلة عانيت منها في كليتنا العزيزة ..... وبقلكم.... الفضل كان لله أولاً ولمستر سام ثانياً بالتخلص (تقريباً) من هذه المشكلة..
مشان هيك مارح أنسى وقفته معي .... والشي اللي عطاني ياه ...
أنا كتير مبسوط أنه لم يستطع أن ينقل إلى الشام (بس لا تقولوه )... والحمد لله أنو كسبناه سنة تانية....
أما رأيي فيه:
مستر سام انسان مثقف بكل معنى الكلمة ... محترم وراقي ... وأهم مافيه أنه متواضع....
يعني ما بحاول يتفهمن متل البعض مع أنه مثل ما قلت مثقف جداً ... بتحسه هادئ ... وبيدخل القلب.... وبحب الخير للكل...
كلمة أخيرة: ... حبيبي مستر سام ... ما بعرف ليش عندي احساس أنو الله رح يبعتلك Mrs.Sam تكون فعلاً بتستاهلك.... (هي من الباراسيكولوجي )

شكراً يا وايزمان على كلماتك الحلوة والشاعرية..... بتعرف ومابدو مين يقلك عن غلاوتك عندي.....

بالنسبة لقعدتي بحلب سنة تانية..... بل سادسة إن صح التعبير.... إنشالله ستكون أحلى سنة... خاصة بذهاب الشوام إلى الشام وبقائي وحيداً.... ...

بس بحب وضحلك عدة أمور....:

ثقافتي..... ضحلة!

محترم وراقي..... صار لازم آخد وش عليك!

متواضع..... كتييييييييييير!

ما بتفهمن.... ما الفهمنة شغلتي!

هادئ...... أنت ما شايفني وأنا بالنادي!

بدخل القلب..... وأخرج منه سريعاً!

بحب الخير للكل..... إشو ساندي بيل! (صحي... وينها ساندي بيل؟)

وبالنهاية بحب قلك أني أنا كمان حاسس بأنو wisewoman_a عمتدور عليك.... بس لعما يعمي قلبها... كل يوم بتشوفك وما بتنتبه!

مستر سام
اسأل نفسك سؤال مشتهي حدا يسألك ياه ولسه ما حدا طرحه
وجاوب عليه

مستر سام
أنا بدي أسألك انو أحد أهم مفاتيح السعادة هو معرفة الانسان إش بدو من الحياة و اش هدفه فيها؟ هل استطعت تحديد هدفك ؟ هل تعتبر نفسك سعيداً الآن ؟ هل ترى أن بتطوير شخصيتك ستكون سعيداً مستقبلاً؟
الشي التاني هو شو العنصر اللي طاغي على شخصيتك لا بد انو يكون هناك عنصر أقوى من غيره عندك شو هو" العقلانية، العاطفة، الرومانسية،......"
و شكراً على كل المساعدات اللي قدمتلي ياها
سلام
أخوك حازم