لقد قرأت موضوع( طالبة جامعية شريكة حياتك ) بالمنتدى و قد أثارني حقاً لأنني أرغب في مناقشة أفكاركم عن الفتاة الجامعية و بالأخص طالبة الطب .. لذلك أردت أن أفتح نقاشاً جديداً عن هذا الموضوع و لكن بطريقة أخرى .
فالحقيقة أني عندما دخلت كلية الطب التي طالما كنت أحلم بها,فوجئت بأن طالبة الطب غير مرغوب فيها في مجتمعنا . و أول من جعلني أشعر بذلك طبيب ...نعم , فقد قال لي: " الله يصلحك ليش دخلت طب ... يعني إنت هيك " تقريباً" قطعت بنصيبك و هيك صار الشباب اللي رح يتقدمولك أقل" و التفت إلى أمي و قال لها :" إذا إجاها (يعني تقدم لها شاب) و لو قبل التخرج معلش يعني لا تتركيها لبعد التخرج و إلا ......... "
و تابع الدكتور كلامه " كتير بنات زميلات بالكلية اللي تركوا حالهن لبعد التخرج؛ ما طلع نصيبهم لحدِّ الآن".
الحقيقة أنني لم أستمع له و لم أتأثر بكلامه مطلقاً لكن لا أنكر بأنني قد فوجئت فالذي قال هذا الكلام طبيب , و هو أدرى و أعلم بذلك ....لم أتأثر بكلامه لأنني مؤمنة تمام الإيمان بالقضاء و القدر و أن الزواج قسمة و نصيب و عندي تمام اليقين بأن كل فتاة قد خُلقت من ضلع رجل و أن هذا الرجل هو الذي سوف يتزوجها إذا شاء الله عاجلاً أم آجلاً .أما إن سألتموني عن النساء غير المتزوجات ؛ أقول لكم أنه من المحتمل أن يكون ذلك الرجل الذي قد خلقت من ضلعه قد توفي و هو طفلا.
بكل الأحوال دعونا نبقى في صلب الموضوع بالنسبة لطالبة الطب بالخاصة
(آسفة بدي أحول على العامي لأنو هيك أريح )
رح أحكيلكم شغلة : مرة طالبة من هالطالبات الطب كانت مع أمها بالسرفيس , و بتعرفوا النسوان الحلبية إذا شافوا بنت حلوة فوراً بيسألوها إذا كانت مخطوبة ؟! أمها جاوبتها : " لأ. بس هيّ عم تدرس ..." قالت لها المرأة الحلبية : "معلش و إذا كان , بتكمل دراستها عنا , إش هالشغلة!!..." قالت لها أمها : "هيّ عم تدرس طب ....."
قلت لها :"لأ ,يي يا خيتو إذا عم تدرس طب خليها عم تدرس طب ...."
طبعاً نحنا- بنات الطب- مالنا متشردقين على هيك ناس (عم بحكي على الناس غير المثقفين) بس القصة لما بيجي دكتور بيقول لماما " الله يصلحك ليش خليتيها تدخل طب " و لحدّ الآن 3 دكاترة بيحكوا نفس الحكي لماما .
لا تزعلوا علي لأنو متل ما قلتلكن أنا مؤمنة أشد الإيمان بالقضاء و القدر, ومن ناحية تانية ,أنا - و الحمد لله - كتير مبسوطة بكليتي و كلما عم بكبر عم بحب الطب أكتر .
لما طلبت من الدكتور إنو يفسر كلامه أكتر قال لي "الطب مشواره طويل "
طيب سؤال : إذا الطب مشواره طويل ؛ طويل على البنت و الشب .احسبوها معي:
الشاب رح يمضي 6 سنين بالجامعة + 4 سنين على الأقل اختصاص + سنتين عسكرية = 12 سنة على الأقل.
أقصد إذا كان الشاب قد تخرج من الجامعة و عمره 24 سنة , قولوا لي هذا الشاب متى سيؤمن تكاليف الزواج و المهر والمنزل و العيادة و تجهيزاتها؟؟؟؟(آسفة إذا كنت كبرت الوهم عليكم) أما بالنسبة للفتاة فهذه الأشياء غير مسؤولة عنها , ما عليها غير تدرس و بس ,و العيادة لوحدها شغلتها بسيطة (بتدبّر) فليش بيقولوا مشوارها طويل على البنت ؟التفتوا حواليكم و طلعوا على بنات من كلية تانية , على أساس أربع سنوات و بتخلص و بعدين بتشحط معها ست سنين أو أكتر و ما بتشعر بسبب التهاون الذي يؤدي إلى حمل المواد ....!!
اختصاراً, أريد أن أطرح عليكم كم سؤال :
ليش الشب بعكس البنت إذا دخل طب ؛صار دكتور و شي شغلة عظيمة و ألف بنت بتتمناه ؟؟؟صحيح البنت الدكتورة بيحترموها الناس لكن تبقى غير مرغوب فيها كزوجة مثل الشاب الدكتور(و في ناس ما بيحترموها لأنها بنت و على قولتن بتضل البنت بنص عقل و الدكتور بيفهم أكتر من الدكتورة و الصراحة أنا ما اكتشفت هالشي إلا لما رحت على مشفى الرازي و شفت بعيني , و بستغرب أكتر لما نسوان بييحكو هالحكي و كأنني أنا بنت و هي شي تاني , لأ يا سيدي مو هيك القصة . القصة أنو هالبنت تربت على هالأساس و ترسخت هالفكرة بذهنها و رضت بأمرها الواقع)
ليش طالب الطب ممكن أنو يفكر بطالبة درست للبكالوريا فقط أو يمكن حتى ما تكون أخدت البكالوريا: بس العكس مو صحيح ،يعني بالنسبة لطالبة الطب كتير قليل منهم بيفكروا أو يقبلوا بشخص أخد البكالوريا بس , إلا إذا كانت حالته المادية كتير منيحة ؟؟؟؟
لا تفكروا أنو هي أفكاري , لكن هي هيّ أفكار مجتمعنا . طلعو شوي على أفكار الناس اللي حواليكم رح تعرفو أديش البنت مظلومة من قبل مجتمعنا .هناك الكثير من الأفكار التي تجول في خاطري لكني أكتفي بهذا الآن حتى أسمع ردكم و تعليقاتكم على هذا الموضوع .و أرجو ألا تبخلوا علي بملاحظاتكم.
و السلام عليكم ورحمة الله و بركاته .....

مرحبا يا جماعة هلأ رح أشارك مشاركة صغيرة والي عودة لانو الموضوع كتير بعنيلي ويمكن أنا أكتر وحدة عانيت من هالمشكلة
نحن الحمدلله من عيلة ما كتير متعصبة يعني مافي مشكلة اذا صار عندي رفقة شباب بس بالحدود المعقولة
بس وقت دخلت عالكلية تفاجأت بالبنات يعني ابسط شغلة كانو يقولولي مارح ندخل عالمقصف اذاحدا شافنا اش بدو يحكي علينا؟؟
وخدو من هالحكي كتيييير
بقى اذا نحن البنات هيك عم نحكي فالشباب شو لازم يعملو؟؟

مرحباً ‏
اليوم أول مرة بشوف هل موضوع و في نقاط عديدة أثارت اهتمامي‏
‏ حبيت أرد على الزميل عبد الكريم بعدة نقاط : ‏
أولاً : طالبة الطب لما بتقول أنو بدها دكتور , الموضوع مو قصة تكبر بس القصة ‏أنو الدكتور هو الوحيد يلي رح يفهم عليها و رح يقدر عملها و علمها , و رح يكون ‏في تجانس بتفكيره مع تفكيرها , داخل بنفس الكلية و نفس المخبر و مشرح متلها ‏الجثث و شايف مرضى و مصايب خلق ‏
إذا ماكان دكتور فلازم يكون متفهم بشدة , و ما يتضايق أبداً إذا كانت فهمانة علمياً ‏أكتر منه أو راتبها الشهري أكبر منه(مثال حسب تفكير المجتمع) , و هل شي قليل ‏الوجود بنسبة كبيرة من الشباب الشرقيين ,هاي هي طبيعة المجتمع عندنا , عدا عن ‏أنو كل البنات بدهم دكتور (شوفو حالكم يادكاترة) فليش طالبة الطب متكبرة إذا ‏بتفضل ترتبط بزميل لإلها ؟؟‏
أصلاً بالنهاية هل موضوع قسمة و نصيب بس نحنا عم نحكي عن قاعدة عامة تضم ‏الغالبية بدون ما نعلق عن موضوع الأخلاق و الوعي .......... بالنسبة لي إنسان ‏خلوق وواعي و متفاهمة معه أفضل من دكتور تفكيره جاهل , و إذا كان الدكتور ‏بهل مواصفات فهل شي رح يكون رائع
‏ ‏
ثانياً : أنو طالبة السنة الأولى شايفة حالها و بعدين بتجلس و بعدين بتصير مسطرة ‏‏....... ( بعرف مين الدكتور يلي بيحكي هل حكي ) ‏
فسببه أنو البنت لما بتدخل عل جامعة المختلطة بعدما كانت بمدرسة خاصة بالإناث ‏‏(مدارس بلدنا هيك ) بتكون متحفظة و خبرتها قليلة و بتستنى أنو الخطوة الأولى بالتعامل تبدا من الشب , في ‏أي تعامل كان , بس بكليتنا الشباب مو هنن يلي بيقوموا بالخطوة الأولى ‏
عدا أنو الشباب نضجهم أبطأ من البنات ( لاتتضايقوا يادكاترة هل شي سببه معروف ‏لكل يلي بيدرس طب و مو القصد منه التجريح ) فبكونوا السنة الأولى كتير ‏مصبينين و تفكيرهم و حكيهم بده شوية وقت ليركز , فالوحدة مابتحس حالها إذا ‏حكت معهم أنهم محترمينها كزميلة و أنهم مارح يحكوا عليها أو يتمسخروا عليها ‏من وراء ظهرها بعدما تحكي معهم ( لساتهم مراهقين) ( هل حكي مو موجه للجميع ‏في كتير من الزملاء قمة الركازة و الذوق من السنة الأولى )‏
بعدين على مر السنين بيصير في تعود بين الزملاء و الزميلات , و بيركز الزملاء و ‏بينضجوا , كمان الزميلات بيزيد وعيهم و بتتحسن قراراتهم , لهل سبب البنت ‏بتاخد راحتها أكتربالتعامل معهم ‏
و في عامل كبير كمان هو أنو نسبة المتدينين و المحافظين و اللي بينادوا بعدم ‏المخالطة بكليتنا نسبتهم كبيرة كتير( شباب و بنات) , و متلما بنقول الأكثرية تغلب ‏الأقلية , و حتى لو وحدة متحررة و برأيها أنو التعامل مع الزملاء بحدود معقولة ‏شي طبيعي ( فنحن بكلية وحدة و طلاب علم واحد و ماننا ولاد صغار) , فرح ‏تضطر تصير متل زميلاتها حتى ما تنحط بدوامة الحكي عليها إلخ من هل سخافات ‏المستشرية بكليتنا . ‏
عدا أنو ماتنسوا يازملاء أنو البنت طبعها خجول و لما بتكون ناضجة بتعرف تخبي ‏خجلها و مشاعرها لأنو ما مسموح تظهرهم , ربما بتفسروها أنتو على أنها تكبرو ‏شوفة حال إلخ ......... ‏
رد على ‏shakazoolo‏ : ‏
‏1) متلما في هي البنت المعقدة المقنعة يلي بينحكا معها و ما بترد ‏
في شباب هيك معقدين بيحتقروا البنت يلي بتحكي مع شب و بيظهر هل شي جلي ‏بتطليعاتهم , و حادثة مشابهة للي ذكرتها صارت مع وحدة من زميلاتي ‏
فلا تتضايق كتير هل شي طبيعي بمجتمع بيحوي عدد كبير من الناس المختلفين ‏بمذاهبهن ( ليش سموها جامعة), و بالصدق بحترم مذاهب كل الناس لأني بريد منهم ‏أنو يقدروا و يحترموا مذهبي وآرائي ‏
‏2) كتير من البنات بيناقشوا و و بيسألوا , بس المشكلة أنو دوامة الشباب حول ‏الدكتور بعد المحاضرة يلي عم يدحموا ليسألوا بتخلي البنت تبعد عن هل طريقة ,( ‏بالصدق لما كانت زميلتي تنزل محاضرات كانت تجاهد مجاهدة حتى توصل ‏للدكتور و مع هيك ما فقدت الأمل ) ‏
على كل بالعملي و الستاجات هل مشكلة مو موجودة و عم ناخد راحتنا بسؤال ‏الدكتور , ففكرتك خاطئة بهل شي ‏
ياشباب لاتنسوا أنو المجتمع الشرقي بالوقت الحالي منقسم كتير و هل مواضيع كل ‏مين بيفتي فتواه فيها على كيفه ‏
لم أعبر عن كل آرائي بس حبيت أفرغ شوي منها بكل صراحة ضمن المجال يلي ‏بقدر أحكي فيه ‏
‏ ‏
بس بدي أأكد شغلة ‏
بكل صدق كتير بقدر طلاب الطب و بعتز فيهم و بشوفهم أحسن بكتير من طلاب ‏باقي الكليات ( مع احترامي للجميع) علماً و أخلاقا ًو ركازةً و عملاً , و بتمنالهم كل ‏التوفيق ‏
‏ بس برجوهم يخفوا شوي عن البنت , لأنو البنت ببلدنا محاصرة من كل الجهات فلا ‏تزودوها عليها

بصراحة يا جماعة بضلوا بنات الطب أحسن بنات (طبعا أنا منهن) وبضلوا شباب الطب أحسن شباب بس ما تنسوا انو نحن بجامعة وكل دفعة فيها 400 طالب من جميع البيئات رح نلاقي المتحررين كتير ورح نلاقي الملتزمين كتير وطبعا بضل الحل الوسط احسن شي لانو بقدر ينسجم مع الكل
أنا بعتبر حالي من الوسط ومع هيك كتير تعذبت بالسنة الاولى لقدرت أنسجم بس هلأ مشي الحال مو لانو أنا غيرت حالي لانو البنات بلشوا ينسجموا مع الوضع يعني ما بقى يشوفوا الشغلة كفرية اذا البنت سلمت على شب زميلها (يعني بادرة خير)
الشغلة الوحيدة اللي ماحبيتها بالكلية تلفيق القصص ورش البهارات يعني اذا أي بنت وشب وقفو مع بعضن أكتر من مرة فورا بصير في شي بينن
يا جماعة والله حرام الحكي اذا مو أكيد يعني كلنا واعيين منعرف الصح من الغلط بقى اذا سمعتوا حدا عم يحكي سكتووووووو
بالنسبة لموضوع الدكتورة لازم تاخد دكتور شي طبيعي لانو مجتمعنا شرقي والرجل مابحب تكون مرتو أحسن منو بالشغل او بالشهادة

المشاركة الأصلية بواسطة white heart

بصراحة يا جماعة بضلوا بنات الطب أحسن بنات (طبعا أنا منهن) وبضلوا شباب الطب أحسن شباب بس ما تنسوا انو نحن بجامعة وكل دفعة فيها 400 طالب من جميع البيئات رح نلاقي المتحررين كتير ورح نلاقي الملتزمين كتير وطبعا بضل الحل الوسط احسن شي لانو بقدر ينسجم مع الكل
أنا بعتبر حالي من الوسط ومع هيك كتير تعذبت بالسنة الاولى لقدرت أنسجم بس هلأ مشي الحال مو لانو أنا غيرت حالي لانو البنات بلشوا ينسجموا مع الوضع يعني ما بقى يشوفوا الشغلة كفرية اذا البنت سلمت على شب زميلها (يعني بادرة خير)
الشغلة الوحيدة اللي ماحبيتها بالكلية تلفيق القصص ورش البهارات يعني اذا أي بنت وشب وقفو مع بعضن أكتر من مرة فورا بصير في شي بينن
يا جماعة والله حرام الحكي اذا مو أكيد يعني كلنا واعيين منعرف الصح من الغلط بقى اذا سمعتوا حدا عم يحكي سكتووووووو
بالنسبة لموضوع الدكتورة لازم تاخد دكتور شي طبيعي لانو مجتمعنا شرقي والرجل مابحب تكون مرتو أحسن منو بالشغل
او بالشهادة

ما بعرف ليش اللت و العجن مستشرين كالوباء بكليتنا بشكل رهيب
يمكن بعزو هل شي لصغر حجم كل دفعة بالنسبة لباقي الكليات , فالوجوه كلها مؤلوفة ,
و بما أن المجتمع الشرقي متميز بالنميمة و التدخل بشؤون الآخرين للأسف :
لازم نرفع شعار لا للنميمة

elloni, white heart الله يعطيكون العافية... يعني حكيتو كل شي
بقلبي ...وكلامكن صح 100%
بدي علق على كم شغلة بس:

ونعاني من أنهن يحتللن المراكز الأولى في دفعتنا فلا نستطيع لهم صداً ولا رداً ، لأن مجال اهتمامهم الوحيد هو الدراسة وفقط

وين المعاناة بالموضوع؟؟
هذا دليل على ان الشاب لا بتحمل ان تسبقه الفتاة بشئ حتى ولو بالدراسة!!! بئا كيف اذا كانت هي دكتورة وشغلها منيح ودخلها عالي وهو مهندس مثلا ودخله اقل من دخلها؟ شو رح يكون موقفه منها؟ يعني السبب انو طالبة الطب تفضل الارتباط بطبيب مو شوفة حال بس تجنبا لكتير مشاكل ممكن تصير بحياتها متل عدم تفهم الزوج لعملها او..او....الخ

بس وقت دخلت عالكلية تفاجأت بالبنات يعني ابسط شغلة كانو يقولولي مارح ندخل عالمقصف اذاحدا شافنا اش بدو يحكي علينا؟؟

فعلا white heart يعني فكرة انو البنت اش ما عملت بدو ينحكا عليها ولازم حتى تضل محترمة ومؤدبة تحضر المحاضرة وبعدا فورا ترجع عل بيت ما بصير تطلع مع رفقاتها , ما بصير تقعد باماكن عامة لانو هيك كانها عم تعرض حالها امام الرايح والجاي , ما بصير تدخل عل مقصف لانو كلو شباب....هي فكرة موجودة ومترسخة باذهان كتير ناس وحتى البنات ذاتهن ...

الثقة الزايدة بالنفس ماكويسة وإذا يعني دخلتوا الطب!! كلية متل غيرها

هالحكي للشباب والبنات على حد سواء لانو مشالله كمان شباب الطب ما بتنقصون شوفة الحال بئا ليش عم تخص البنات بس بهالحكي؟

انا لاحظت من مجمل ردود الشباب انو :البنت الخجولة اللي ما بتحكي مع شباب ولا بتسلم عليهن هي بنظرهم معقدة وفاشلة اجتماعيا .. والبنت السبور اللي بتسلم على شباب بكل احترام هي بنظر البعض الاخر مصيّفة...يعني اش ما عملت البنت مو عاجبكن بئا خفو عن بنات الطب وحاج نازلين فيهن نقد وتجريح...
سلاااام....

دكتورة ناس
بدك ما تاخدي على حكي المعلم شاكازولو

إيلوني
أنا بأيدك باللي حكيتيه
وفعلاً كلام منطقي

وشكراً لسن شاين

بتمنى ما نخرج عن إطار الموضوع الأساسي
اللي هو ما رأيك بالفتاة الجامعية
رح أفتح موضوع خاص باللت والعجن
مشانكن
تكرم عيونكن

المشاركة الأصلية بواسطة Shankool

دكتورة ناس
بدك ما تاخدي على حكي المعلم شاكازولو
إيلوني
أنا بأيدك باللي حكيتيه
وفعلاً كلام منطقي
وشكراً لسن شاين
بتمنى ما نخرج عن إطار الموضوع الأساسي
اللي هو ما رأيك بالفتاة الجامعية
رح أفتح موضوع خاص باللت والعجن
مشانكن
تكرم عيونكن

بنعتذر إذا طلعنا عن الموضوع شوي
و شكراً لإلك على الموضوع الخاص الجديد